Lijiganyo 13

Masenga ni Usaŵi Yili Yakusakala

Satana akusaka kuti mtendeje yamasenga. Ŵandu ŵajinji akusapeleka mbopesi kwa acinangolo ŵaŵawile kalakala kapena ku misimu, kutendela kuti ngasiyawonecela yakwawulasya. Akusatenda yeleyi ligongo lyakujijogopa misimu. M’makono kapena m’yala akusawala yibangili yayikusaŵa ya macili ga m’masenga. Akusamwaga kapena kupakala pacilu pawo “mtela” waukusaŵa wa macili ga m’masenga. Mnyumba syawo kapena kusyungulila malo gawo gakutama, ŵandu ŵane akusasisaga yindu yine yakusakulupilila kuti yikwete macili gakuti mpaka kwacinjilicisya. Ŵane akusakamulicisya masengo “mtela” wamasenga, acikulupililaga kuti mpakana wakamucisye kuti malonda gawo gajendeje cenene, kuti apunde mayeso, kapenasoni kuti yajendele cenene pakusaka kulombela.

Kuŵa mjakwe jwa Yehova niko kwampaka kumcinjilicisye cenene mnope ku Satana. Yehova Mlungu ni malayika gakwe, ali ŵamacili mnope kumpunda Satana ni yiŵanda yakwe. (Yakobo 2:19; Cibvumbulutso 12:9) Yehova ali jwakusacilila kulosya macili gakwe pakwacenjela ŵele ŵali acimjakwe—ŵakusampikanila mwakuwona mtima.—2 Mbiri 16:9.

Maloŵe ga Mlungu gakuti: “Mkasimtendaga yamasenga.” Yehova akusaŵengana ni yamasenga kapena yausaŵi ligongo lyakuti yeleyi mpaka yimtendekasye mundu kuŵa pasi pa ulamusi wa Satana Jwakulambusya.—Levitiko 19:26.