Ana Akwete Maumboni?
“Yindu yakwinani soni yapachilambo chapasi yagambile kupagwa mwajika.”—Yaŵalembile Stephen Hawking ni Leonard Mlodinow mu 2010. Jemanjaji ali ŵasayansi.
“Mlungu ŵapanganyisye kwinani ni chilambo chapasi.”—Baibulo, Genesesi 1:1.
Ana yindu yakwinani soni yapachilambo chapasi yagambile kupagwa mwajika, kapena apali juŵayipanganyisye? Maloŵe gaŵaŵechete ŵasayansi ŵaŵiliŵa soni yajisasile Baibulo yikulosya kuti pana kwanga kuŵili kwa chiwusyochi soni kuli kwakulekangana mnope. Ŵandu ŵane akusakulupilila kwanga kwineko soni ŵane akusakulupilila yineyo. Pele ŵane akusasoŵa yakulupilila. Sonitu ŵandu akusasisyana ya nganiji kupitila m’mabuku soni pa TV.
Mwine paŵaliji ku sukulu atichala ŵawo ŵasalilaga kuti yindu yakwinani ni yapachilambopa soni yaumi yagambile kupagwa jika pangali juŵayipanganyisye. Nambo ana ŵapele maumboni ga yindu yaŵaŵechetagayi? Kombolekasoni ŵapikene achimlongola ŵa dini ali mkuŵecheta kuti apali juŵapanganyisye yindu yosopeyi. Nambo ana ŵapele maumboni ga yindu yaŵaŵechetagayi? Kapena ŵagambaga kusaka kuti wawojo akulupilile ligongo lyakuti jemanjajo asasile yeleyo?
Komboleka pakwete paganichisye yeleyi. Nambo akusayiwona kuti yili yakusawusya kusimichisya nditu kuti apali juŵayipanganyisye yindu yosopeyi. Mwine mpaka aganisyeje kuti ana kumanyilila kuwatyochele umi kuli kwakusosekwa?
Chandanda magasiniji chijisale yayikusiyatendekasya ŵandu ŵajinji kulupilila kuti apali juŵapanganyisye yindu yosopeyi. Kaneko chijisalesoni ligongo lyakwe kumanyilila kuwatyochele umi kuli kwakusosekwa mnope.