Mwampaka Tulipatile

ANA AKUSALIWONA KUTI AKUSASANGALALA YISYESYENE? Naga yili m’yoyo, ana cici cacikwatendekasya kuŵa ŵakusangalala? Ana lili liŵasa lyawo, masengo kapena yikulupi ya dini jawo? Kapena, ana akwembeceya yindu yine yampaka yatendekasye kuŵa ŵakusangalala mpela kumalisya majiganyo, kupata masengo gambone kapena kusuma galimoto jasambano?

Ŵandu ŵajinji akusaŵa ŵakusangalala naga akwanisye kutenda cindu cinecakwe, kapena apatile cindu cakumtima kwawo. Nambo ana yindu yeleyi, yikusamtendekasya mundu kuŵa jwakusangalala yisyesyene? Kusala yisyene, mundu akusagamba kusangalala kwandaŵi jamnono.

Kusangalala kusyesyene kukusagopolela kola mtendele wamunganisyo ndaŵi syosope. Mundu jwakusangalala akusaŵa jwakwikutila, soni mwacipago akusasacilila kuti atameje mwamtendele mpaka kalakala.

Konjecesya pelepa, ligongo lyakuti kusangalala yisyesyene kukusaŵa kwandaŵi jelewu, nikuti nganikuŵa mpela kwamba kwika pamalo panepakwe, kapena kwanilisya cakulinga cinecakwe, nambo kuli mpela ulendo. Nambosoni kusala kuti “cinjiŵa jwakusangalala msogolo . . . ” nikuti ngatukumanyilila kugopolela kwakuŵa ŵakusangalala.

Kusangalala mpaka tukuwanicisye ni kola cilu cambone. Ana tukusatenda yamtuli kuti tuŵe ni cilu cambone? Tukusasosekwa kusagula yakulya, mang’asi, soni yindu yakusangalasya mwalunda. Mwakulandana ni yeleyi, mpaka tuŵe ŵakusangalala naga tukusagula mwalunda yindu yampaka yitukamucisye paumi wetu, soni kutenda mwakamulana ni yeleyo.

Ana ni yindu yapi yampaka yitukamucisye kuŵa ŵakusangalala yisyesyene? Kwende tulole yindu yine mwa yeleyi:

• KWIKUTILA SONI KOLOŴA MAGASA

• KUSAMALILA CILU SONI KUPILILA YIPWETESI

• CINONYELO

• KWAKULULUCILA ŴANE

• KUMANYILILA CAKULINGA CA UMI

• KOLA CEMBECEYO

Buku jine jakusosekwa mnope jikusasala lunda lwakuti, “Ŵakusangalala ali ŵandu ŵakusatenda yindu mwangalemwesya.” (Salimo 119:1) Kwende sambano tutagulilane yindu yeleyi.