Ana Cilamboci Cikwawula Kwapi?

M’MWESI wa January 2017, ŵasayansi ŵajenesye utenga wakogoya wakuti ŵandu asigele panandi konanga cilambo soni yindu yosope ya pacilambopa. Ŵasayansiŵa, aŵele ali mkukamulicisya masengo Woci ja Lisiku Lyaconasiko ca Cilambo pakulosya yeleyi. Wociji, akujijendesya mwakuwuta kampamba kamaminisi ni kukajawusya kusogolo ni masekandi 30. Pa yaka yosope yakupunda 60, yikuwoneka kuti apano ndaŵi jawoji akuti jisigele ni maminisi gaŵilipe ni hafu kuti jikwane 12 koloko jacilo, yayikugopolela kuti ndaŵi jakuti cilicose cijonasice pacilambopa akuti jisigele panandi.

M’caka ca 2018, ŵasayansiŵa cacilolasoni ndaŵi jajisigele kuti cilamboci soni yindu yosope ya pacilambopa yijonasice. Ana yisyene kuti cilambo soni yindu yosope yicijonasika mwakamulana ni mwajikwendela Woci ja Lisiku Lyaconasiko ca Cilamboji? Ana akuganisya wuli? Ana yisyene kuti cilamboci cikwawula mwamti pangali cilicose campaka ŵandu atende? Komboleka kuti nganaŵa akombwele kwanga cenene yiwusyo yeleyi. Atamose apano, ŵalijiganye ŵajinji agaŵikangene pangani jeleji. Ŵandu ŵane ngakusakulupilila kuti yeleyi yicitendekwa.

Mwakulekangana ni yeleyi, ŵandu ŵajinji akusakulupilila kuti kusogolo yindu yiciŵa cenene. Akusasalasoni kuti pana umboni wakulosya kuti cilamboci cicitama mpaka kalakala soni ŵandu ŵambone cacisangalala kwangamala. Ana yeleyi yisyene? Ana yindu yosope pacilambopa yisigele panandi konasika kapena iyayi?