‘Kola Mbili Jambone Kukusapunda Kola Yipanje Yejinji’

KOLA mbili jambone kuli kwakusosekwa mnope mwamti m’yilambo yejinji ŵatamilikasisye malamusi pakusaka kuti ŵandu akasakasyaga mbili ja ŵane. Malamusiga gakusalekasya kulemba, kugulusya soni kuŵeceta yakusakasya mbili ja ŵane. Yeleyi yikusatukumbusya maloŵe ga m’Baibulo gakuti, “Kuli cenene Kusagula lina lyambone kulekangana ni kola cipanje cejinji. Kupocela ucimbicimbi kuli kwambone kupunda silifa ni golidi.” (Miyambo 22:1) Ana mpaka tutende wuli kuti tukole mbili jambone soni kuti ŵane atucimbicisyeje? Baibulo mpaka jitukamucisye cenene panganiji.

Mwambone, kwende tulole yajikusasala Baibulo pa Salimo 15. Jwamasalimo jwawusisye ciwusyo cakuti, “Ana ŵani ŵampaka atame mu citenti cawo [Mlungu]? Pakwanga jwatite, “Ali mundu . . . jwakusatenda yambone soni kuŵeceta yisyesyene mumtima mwakwe. Jwangasogoda ŵane. . . . Jwangamtendela cakusakala soni kumcembulusya mjakwe. Jwangakamulana ni jwalijose jwakusakala . . . Naga atesile cilanga akusakwanilisya atamose yisawusye camtuli. . . . Jwangatenda yacinyengo.” (Salimo 15:1-5) Ana mundu jwa ndamo syambone mpela syelesi nganaŵa amcimbicisye?

Ndamo jine jakusosekwa mnope kuti ŵane atucimbicisyeje jili kulinandiya. Lilemba lya Miyambo 15:33 likusati, “Ucimbicimbi ukusayika ligongo lyakulinandiya.” Mundu jwakulinandiya akusalola mbali syakusosekwa kongolela soni akusatenda yakomboleka ni kongolela. Jwalakwe akusapepesya naga amlemwecesye mundu jwine. (Yakobo 3:2) Nambo mundu jwakulikwesya ngaŵa mkutenda yeleyi, mmalo mwakwe akusajanguya kutumbila. Lilemba lya Miyambo 16:18 likusati, “Kupoka kukusamjigalila mundu kukonasika, soni mtima wakulikwesya ukasamkuŵasya mundu.”

Nambi wuli mundu jwine patesile yindu yakusakasya mbili jawo? Ana akusosekwa kutenda yindu mwakuwutuka miyasi ligongo lya kupya mtima? Aliwusye kuti, ‘Ana pangulinga kujicenjela mbili jangu, cimbe ndili mkuwandisya mabosa?’ Atamose ndaŵi sine mpaka yiwonece kuŵa yakamucisya kujigalila nganijo kunganya ja magambo, nambope akaliŵalila yajikusatukalamusya Baibulo kuti, “Mkajanguya kwawula kunganya ja magambo.” Mmalo mwakwe, “mtagulilane kaje nganijo ni mjenujo.” (Miyambo 25:8, 9)a Kutagulilana nganijo cenene soni mwakuwusimana mtima mpaka kukamucisye kuti akajonanga mbiya pakulipila magambo.

Atamose kuti Baibulo jikusasala mnopemnope ya dini, nambope jili jakamucisyasoni paumi wetu. Jwalijose jwakusakamulicisya masengo songa sya m’Baibulo akusakola ndamo syambone syampaka sitendekasye kuti ŵane amcimbicisyeje soni akusakola mbili jambone.