Cindu Cakusimonjesya Mnope
Buku jine jatite, “Kaboni ali jwakusosekwa mnope paumi.” (Nature’s Building Blocks) Kapanganyikwe ka kaboniju kakusamtendekasya kuti jukamulaneje ni kaboni jujakwe kapena ni yindu yine. Ligongo lya yeleyi ŵandu aŵele ali mkuyikopocela yindu yejinji yasambano yakupanganyidwa kutyocela mu kaboni.
Mwambone, kaboni pajuwanganyicilene ni jujakwe jukusapanganya yindu yakulekanganalekangana mpela yacituyiwone munganiji. Kusala yisyene kaboni juli cindu cakusimonjesya mnope.
LIGANGA LYA DAYAMONDI
Kaboni pajuwanganyicilene ni jujakwe jukusapanganya tuyindu twakuwoneka mpela tumasugulu twakolanjikwa kuti dayamondi. Ligongo lya kuwanganyicilana ceneneku, dayamondi akusaŵa jwakulimba mnope. Naga kaboni awanganyicilene cenene akusapanganya dayamondi jwambone, jwakuwoneka mpela kaganga kamo
GILAFAYITI
Makaboni genyambatilane mnope gakusaŵa mpela tumapepala twakutelesya twesajikanesajikane twakusatukolanga kuti gilafayiti. Ligongo lya kutelesyaku, gilafayiti akusamsyaga kapena kumsungunukula ni kumtaga muyilumbikene yisyano nambosoni kupanganyicisya mapensulo gamakala.a
GILAFINI
Ali kaboni jwenyambatilane mwatumabokosimabokosi twakola makona 6. Atamose kuti gilafini ali jwakutependala, nambo ali jwakulimba mnope kupunda cisyano. Gilafini jwamnono mnope akusasimanikwa mu pensulo jamakala.
FULELINI
Kaboni pajunyambatilene ndaŵi sine akusapanganya tuyindu twatukusawoneka mpela tumipila kapena tumacubu twamwanamwana lina lyakwe fulelini. Tumacubu ni tumipilatu tukusawoneka pakamulicisya masengo macini gakumulicila.
YINDU YAUMI
M’maselo ga yakumela, yinyama, soni ŵandu mukusaŵa kaboni. Kaboni jweleju akusatyocela mu yakulya.
Ndamo sya Mlungu syangawoneka ni meso . . . sikuwonecela m’yindu yaŵapanganyisye.’—Aloma 1:20.
a Kuti amanyilile yejinji, aŵalanje ngani jakuti “Kodi Ndani Ali ndi Pensulo?” mu magasini ja Ajimuce! ja July 2007.