Chiwunukuko Chakwawula kwa Yohane
8 Paŵamatukwile chakumatila cha 7, kwinani kwatesile jii kwa maminisi chiŵandika 30. 2 Kaneko nagaweni malayika 7 gali gajimi pameso pa Mlungu, soni ŵagapele malipenga gakwana 7.
3 Kaneko lilayika line lyalyanyakwile chakutinichisya* yakununjila chagolide lyakopochele ni kwima pamalo gakupelechela mbopesi. Lilayikalyo ŵalipele yakununjila yejinji kuti liyipeleche pamalo gakupelechela mbopesi gagolide pampepe ni mapopelo ga ŵaswela wosope. Malo gakupelechela mbopesigo galiji pasogolo pa mpando waumwenye. 4 Lyosi lya yakununjila yayaliji mmyala mwa lilayikalyo lyakwelaga pameso pa Mlungu yimpepe ni mapopelo ga ŵaswelawo. 5 Nambo mwachitemachitema lilayikalyo lyajigele chakutinichisya yakununjila chila, ni kusapulilamo moto kutyochela pamalo gakupelechela mbopesi gala, kaneko ŵachiponyisye pachilambo chapasi. Ndaŵi jijojo kwapikaniche kulindima soni kuŵecheta kwa maloŵe. Kwamesisyesoni njasi soni kwatesile chisichinya.* 6 Kaneko malayika 7 gagajigele malipenga 7 gala gakosechele kugomba malipenga gawo.
7 Lilayika lyandanda palyagombile lipenga lyakwe, kwawoneche matalila ni moto wewanganyichilane ni myasi, ni ŵayiponyisye pachilambo chapasi. Pelepo mbali jimo mwa mbali sitatu sya chilambo chapasi japile, soni mbali jimo mwa mbali sitatu sya yitela japilesoni. Nombenago manyasi gosope gamaŵisi gapile.
8 Lilayika lyaŵili palyagombile lipenga lyakwe, chindu chakuwoneka mpela litumbi lyekulungwa lyakolela moto ŵachiponyisye m’nyasa. Pelepo mbali jimo mwa mbali sitatu sya nyasajo syatesile myasi. 9 Nambosoni mbali jimo mwa mbali sitatu sya yindu yaumi ya m’nyasajo yawile, soni mbali jimo mwa mbali sitatu sya winji wa yombo jajonasiche.
10 Lilayika lyatatu palyagombile lipenga lyakwe, kwinani kwagwile ndondwa jekulungwa jakolela moto mpela nyali. Ndondwajo jagwilile pa mbali jimo mwa mbali sitatu sya sulo soni pa nduluko sya mesi. 11 Lina lya ndondwa jeleji lili Chakumela Chakuŵaŵa, soni mbali jimo mwa mbali sitatu sya mesigo jaŵele jakuŵaŵa, mwamti ŵandu ŵajinji ŵawile ni mesigo ligongo lyakuti gaŵele gakuŵaŵa.
12 Lilayika lyamcheche palyagombile lipenga lyakwe, mbali jimo mwa mbali sitatu sya lyuŵa, soni mbali jimo mwa mbali sitatu sya mwesi, nambosoni mbali jimo mwa mbali sitatu sya ndondwa syatesile chipi. Ligongo lya yeleyi, mbali jimo mwa mbali sitatu sya musi ni chilo nganisikola kuŵala.
13 Kaneko najiweni ngwasi jili mkuguluka mwinani, soni najipikene jili mkugumila mwakwesya maloŵe kuti, “Likungu,* likungu, likungu kwa ŵandu ŵakutama pachilambo chapasi ligongo lya malipenga gagasigelego gele malayika gatatu gasigele panandi kugomba.”