Chiwunukuko Chakwawula kwa Yohane

15 Kaneko nachiweni chimanyisyo chine kwinani, chakusimonjesya mnope. Chaliji malayika gakwana 7 gagakwete milili jakwana 7. Milili jeleji jili jakumalisya ligongo ukali wa Mlungu chiwumale pachalosye milili jeleji.

2 Kaneko nachiweni chinechakwe chakuwoneka mpela nyasa ja ligalasi jewanganyichilane ni moto. Kaneko naweni ŵele ŵaŵachigomeche chilombo chila, chiwanichisyo chakwe, soni nambala ja lina lyakwe ali ajimi chiŵandika nyasa ja ligalasijo. Jemanjanji ŵanyakwile yakwimbila yangonji yakutyochela kwa Mlungu. 3 Jemanjaji ŵaliji mkwimba nyimbo ja Mose kapolo jwa Mlungu soni nyimbo ja Mwanache Jwangondolo. Ŵaliji mkwimba kuti,

“Masengo gawo gali gekulungwa soni gakusimonjesya wawo Yehofa Mlungu Jwamachiligosope. Matala gawo gali gakulungama soni gakuwona, wawo Mwenye jwandaŵi syosope. 4 Ana ŵani ŵele ngasiŵajogopa wawo Yehofa? Ana ŵani ŵele ngasalichimbichisya lina lyawo? Pakuŵa wawo jika ali ŵakulupichika. Mitundu josope ja ŵandu jichiyika ni kwatindiŵalila ŵalakwe, ligongo malamusi gawo gakulungama gawonechele.”

5 Panyuma pa yeleyi, nagaweni malo geswela ga chitenti chaumboni gali gawugwiche kwinani. 6 Kaneko nagaweni malayika 7 gagakwete milili jakwana 7 gala gali gakopochele kutyochela ku malo geswelago. Malayikago gawete yakuwala yetakate soni yakunyesimila mnope nambosoni galiji gali gataŵile malamba gagolide pamtima pawo. 7 Kaneko chaumi chimo mwa yaumi mcheche yila chapeleche mbale 7 syagolide kwa malayika 7 gala. Mbalesyo syaliji syegumbale ni ukali wa Mlungu jwele chachitama ni umi mpaka kalakala. 8 Pelepo malo geswelago gagumbele ni lyosi ligongo lya uchimbichimbi wa Mlungu, soni ligongo lya machili gakwe. Pangali juŵakombwele kwinjila ku malo geswelago mpaka milili 7 ja malayika 7 gala jili jimasile.