Chiwunukuko Chakwawula kwa Yohane
10 Kaneko naliweni lilayika line lyamachili lili mkutuluka kutyochela kwinani. Lilayikalyo lyaliji lili liwete liwunde. Kumtwe kwakwe kwaliji ukunje wa wula, soni ngope jakwe jaliji mpela lyuŵa, soni ngongolo syakwe syaliji mpela misati jakuwoneka mpela moto. 2 Mmyala mwa lilayikalyo mwaliji mpukutu wamwana wetambasukule. Lilayikalyo lyapondile panyasa ni lukongolo lwakwe lwakumlyo, soni lyapondile pamkuli* ni lukongolo lwakwe lwakumchiji. 3 Lilayikalyo lyagumisile ni maloŵe gamachili mnope mpela mwalikusati lisimba pakutongola. Palyagumisile myoyo, kwapikaniche yilindimo yakwana 7 yili mkuŵecheta.
4 Yilindimo 7 yila payaŵechete, nasakaga kuti ndande kulemba, nambo napikene maloŵe kutyochela kwinani, gali mkuti, “Mgasunje maloŵe ga yilindimo 7 gampikenego soni mkagalemba.” 5 Kaneko naliweni lilayika lyalyapondile panyasa soni pamkuli lila lili likwesisye mkono wakwe mwinani. 6 Lilayikalyo lyalumbile pa lina lya jwele jwakusatama mpaka kalakala, jwele juŵapanganyisye kwinani ni yosope yayili kweleko, chilambo ni yosope yayili mwelemo, soni nyasa ni yosope yayili mwelemo. Lyatite, “Ndaŵi jakwembecheya jimasile. 7 Nambo m’masiku gele lilayika lya 7 lichiŵa lili lisigele panandi kugomba lipenga lyakwe, yakusisika ya Mlungu yele akusayimanyikasya mpela ngani syambone kwa achikapolo ŵakwe ŵasyesyene ŵalisoni ŵakulochesya, yichiŵa yili yikwanilichikwe.”
8 Kaneko napikene maloŵe kutyochela kwinani gali mkuŵechetasoni ni une kuti, “Mjawule, mkajigale mpukutu wetambasukule wawuli mmyala mwa lilayika lyalijimi panyasa soni pamkuli lila.” 9 Napite kwa lilayikalyo ni kulisalila kuti limbe mpukutu wamwanawo. Lilayikalyo lyasalile kuti, “Mjigale mpukutuwu ni mlye. Pachimlyepo chiwumpweteche m’matumbo, nambo mkamwa mwenu chiwuŵe wakulyolyopela mnope mpela uchi.” 10 Najigele mpukutu wamwanawo mmyala mwa lilayikalyo ni kulya. Panalile, mkamwa mwangu walyolyopelaga mnope mpela uchi, nambo wambweteche m’matumbo. 11 Kaneko napikene maloŵe gakusalila kuti, “Mkusosekwa mkalochesyesoni yakwamba ŵandu, yilambo, yiŵecheto soni mamwenye gejinji.”