კითხვა დო პასუხი

ხვალე გალატელეფიშ 5:22, 23-ს გიმოკოროცხილ თვისებეფ მიშურსო „შურიშ ნაყოფშა“?

თე მუხლეფს გიმოკოროცხილ რე ჩხორო თვისება: „შურიშ ნაყოფ რე: ჸოროფა, ხიოლ, მშვიდობა, მოთვინება, ჯგირობუა, სიჯგირა, რწმენა, ლიბ ხასიათ დო დუდშეკება. მუთუნნერ კანონ ვა არსებენს თენეფიშ წინააღმდეგ“. მარა ხვალე თენეფ ვა რე თი თვისებეფ, ნამდგაშ გავითარება ღორონთიშ წმინდა შურიშ მოხვარათ შემლებნა.

მუშენ იფჩიებუთ თეს? ქიდეკვირით, მუ ჭარჷ პავლექ წოხოლენ მუხლეფს: „ხორციშ საქმეეფ . . . რე: უზნეობა, უწუნდურობა, დუდეშქუმალირობა, კერპთაყვანიშცემა, სპირიტიზმი, ნტერალა, ნირზი, ეჭვიანობა, გარისხება, ჩხუპი, ეკორთუალა, სექტანტობა, მენჯარიშობა, გინოჸუნელ შუმა, დუდეშქუმალირ დროშ ტარება დო თეცალ საქმეეფ“ (გალ. 5:19—21). პავლეს შეულებუდ შხვა მუდგარენეფ ხოლო მიშინუკო „ხორციშ საქმეეფ“ შქას, მაგალთო, თინა, მუთ კოლოსელეფიშ 3:5-ის მიშინუ. თეშნერო მიქცუ პავლექ თიმწკუმა ხოლო, მუჟამსით შურიშ ნაყოფიშ ჩხორო თვისება გიმოკოროცხჷ. თიქ თქუ: „მუთუნნერ კანონ ვა არსებენს თენეფიშ წინააღმდეგ“. ბერძნულ ტექსტშე თე მუხლიქ შილებე თაშ ხოლო ითარგმნას: „მუთუნნერ კანონ ვა არსებენს თეცალ თვისებეფიშ წინააღმდეგ“. თაშ ნამდა, პავლეს ვაგმუკოროცხჷ არძა ჯგირ თვისება, ნამდგაშ გავითარება ღორონთიშ წმინდა შურიშ მოხვარათ შემლებნა.

თეს უჯგუშო გებგენთ, მუჟამსით „შურიშ ნაყოფიშ“ თვისებეფს შევუდარენთ „სინთეშ ნაყოფიშ“ თვისებეფს. პავლექ ეფესოშ კრებას მეჭარ: „სინთეშ ნაყოფ რე სიჯგირა, სიმართლე დო ჭეშმარიტება“ (ეფეს. 5:8, 9). „სიჯგირა“, სიმართლე დო ჭეშმარიტებაწკუმა ართო, „სინთეშ ნაყოფიშ“ თვისება რე, მარა თინა „შურიშ ნაყოფიშ“ თვისება ხოლო რე.

თეს გეძინელ, თე საკითხის ხოლო უჯგუშო გებგენთ, მუჟამსით „შურიშ ნაყოფიშ“ თვისებეფს შევუდარენთ თი ამშვ ჯგირ თვისებას, ნამდგაშ გავითარება პავლექ ტიმოთეს ელუჩ; თენეფ რე: სიმართლე, ღორონთიშ ართგურობა, რწმენა, ჸოროფა, მოთვინება დო ლიბ ხასიათ (1 ტიმ. 6:11). თენეფ შქას ხვალე სუმ თვისება (რწმენა, ჸოროფა დო ლიბ ხასიათ) მიშურს „შურიშ ნაყოფშა“. მარა მუშო ოკო რაგად, ტიმოთექ წმინდა შურიშ მოხვარათ, შხვა ჯგირ თვისებეფ ხოლო ოკო გევითარკო, მუნერით რე: სიმართლე, ღორონთიშ ართგურობა დო მოთვინება (ქეშუდარით კოლოსელეფიშ 3:12; 2 პეტრეშ 1:5—7).

თაშ ნამდა, გალატელეფიშ 5:22, 23-ს ვა რე გიმოკოროცხილ არძა ჯგირ თვისება, ნამუთ ქრისტიანეფქ ოკო გევითარან. ღორონთიშ წმინდა შურ მოხვარნა, გუვავითარათ „შურიშ ნაყოფიშ“ ჩხორო თვისება. მარა შხვა თვისებეფიშ გავითარება ხოლო მოსაჭირნა, ნამდა მოწიფულ ქრისტიანეფო გინიფრთათ დო ქიმკიფქუნათ „ახალ პიროვნება, ნამუთ ღორონთიშ ნებაშ შესაბამისო გოჭყაფილ რე ჭეშმარიტ სიმართლეთ დო ართგურობათ“ (ეფეს. 4:24).