კითხვა დო პასუხი

მუშენ ეჭარუნს შხვადოშხვანერო მათეშ დო ლუკაშ სახარებეფ იესოშ ცხოვრებას დედამიწას?

მათეშ სახარება, სოდეთ იესოშ დაბადება დო ადრეიან ცხოვრება რე მოშინაფილინ, გენესხვავებ ლუკაშ სახარებაშე, მუშენდა თინეფქ თე ამბე შხვადოშხვანერო ეჭარეს.

მათეშ სახარებას მეტ ყურადღება იოსებშა რე გინოღალირ. თექ ეჭარილ რე, მუნერო შეხვად იოსებიქ მარიამიშ ორსულობას, მუჭო ეუნწყ ანგელოზიქ სიზმარს თე ამბე დო მუჭო მიაჸუნ თიშ მითითებეფს (მათ. 1:19—25). მათე მიშინუანს იოსებიშ თი სიზმარს ხოლო, სოდეთ ანგელოზიქ უწუ, მუშ ოჯახწკუმა ართო ეგვიპტეშა უნტებუდკო. ხოლო ართ სიზმარს ანგელოზ ურაგად თის, ნამდა დირთას ისრაელშა. უმოს გვიანო აფრთხილენს, ოჯახწკუმა ართო ნაზარეთის ქიდიხორას (მათ. 2:13, 14, 19—23). მათეშ სახარებაშ პირველ ჟირ დუც იოსებიშ სახელ ბრუოშა რე მოშინაფილ, მარა მარიამიშ სახელ ხვალე ოთხშა.

ლუკაშ სახარებას უმოსო მარიამიშ გურშენ მეურს რაგად. თექ მოშინაფილ რე, მუჭო მერთ გაბრიელ ანგელოზიქ მარიამშა, მუჭო იდუ მარიამქ სტუმარო მუშ მოჯგირე ელიზაბეთშა დო მუჭო განადიდენს თინა იეჰოვას (ლუკ. 1:26—56). ლუკა მიშინუანს სიმონს, ნამუქით მარიამს უწუ, ნამდა იესო დეტანჯებუდ მომავალს. ლუკა თი შემთხვევას ხოლო ეჭარუნს, მუჟამსით 12 წანერ იესო მუშ ოჯახწკუმა ართო მეურს ტაძარშა. თე დროს თის მარიამიშ სიტყვეფ მოჸუნს დო ვართ ხოლო იოსებიშ. ლუკა თის ხოლო გეუძინანს, ნამდა მარიამწკუმა მანგარო იმოქმედ თე ირფელქ (ლუკ. 2:19, 34, 35, 48, 51). თე სახარებაშ პირველ ჟირ დუც მარიამიშ სახელ ვითოჟირშა რე მოშინაფილ, იოსებიშ — ხვალე სუმშა. თაშ ნამდა, მათე უმოსო ეჭარუნს იოსებიშ საქმეეფს დო თის, მუდგას თინა გინაფლენდ; ლუკა ხოლო კილ-კილაშა ეჭარუნს მარიამიშ როლს დო თიშ მოქმედალას.

მათეშ დო ლუკაშ სახარებას მოშინაფილ საგვარეულო სია ხოლო გენესხვავებ ართიანშე. მათე მიშინუანს იოსებიშ საგვარეულო ხაზის დო ოძირანს, ნამდა იოსებიშ ნარდ სქუა იესო, მეფე დავითიშ კანონიერ მეკვირდე რდუ. მუშენ? თიშენ ნამდა, იოსები მეფე დავითიშ გამნარყ რდუ თიშ ქომოლსქუაშ, სოლომონიშ საგვარეულო ხაზშე (მათ. 1:6, 16). თეშ გინაწონს, ლუკა მიშინუანს მარიამიშ საგვარეულო ხაზის დო ოძირანს, ნამდა იესო მეფე დავითიშ პირდაპირ მეკვირდე რდუ, მუჭოთ თიშ „ხორციელ გამნარყი“ (რომ. 1:3). მუშენ? თიშენ ნამდა, მარიამი მეფე დავითიშ გამნარყ რდუ თიშ ქომოლსქუაშ, ნათანიშ საგვარეულო ხაზშე (ლუკ. 3:31). მარა მუშენ ვემიშინუ ლუკაქ მარიამი საგვარეულო სიას, მუჭოთ ელიშ ოსურსქუან თეშ? თიშენ ნამდა, ოფიციალურ საგვარეულო სიას ხვალე ქომოლკათას მიშინუანდეს. თაშ ნამდა, მუჟამსით ლუკაქ იოსები ელიშ სქუათ მიშინუნ, ირ კოჩშო გასაგებ რდუ, ნამდა სინამდვილეს თინა ელიშ სინჯა რდუ (ლუკ. 3:23).

მათეშ დო ლუკაშ ეჭარილ საგვარეულო სია ჯგირო ოძირანს, ნამდა იესო რდუ ნაწინასწარმეტყველებ მესია. ნამდვილო, იესოშ საგვარეულო სია არძას თიცალ ჯგირო უჩქუდ, ნამდა ფარისეველეფს დო სადუკეველეფს ხოლო ეჭვიშ თუდო დღას ვეგურინუაფნა თინა. ლუკაშ დო მათეშ სახარებეფს ეჭარილ საგვარეულო სია რწმენას მიმანგარენა დო მაჯერენა, ნამდა ღორონთი მუშ არძა დუნაპირებუს შეასრულენს.