„ხოლო მუჟამ იჸუაფ კონგრესი?“

მეხიკო. 1932 წანა, ნოემბერიშ ბოლო. ართ მარათ ადრე, თე ობუძოლაია ქალაქის, სოდეთ ართ მილიონშე მეტ ხალხ ცხოვრენსინ, პირველო ქიგიორინეს შუქნიშნეფი. მარა ხალხიშ ყურადღებაქ უცფას თე მარაშ შხვა მნიშვნელოვან ამბეშა გეგნორთ. ქალაქიშ რეპორტიორეფ მუნეფიშ კამერეფით მატარებელიშ სადგურს ელდეს განსაკუთრებულ სტუმარიშ, ჯოზეფ რუტერფორდიშ მოულას, ნამუთ თი დროს საზოგადოება „გინაჯინალ კოშკიშ“ პრეზიდენტ რდუ. თექიან მოწმეეფქ ხოლო შურ დო გურით დოხვადეს ჯიმა რუტერფორდის, ნამუთ სუმ დღიან კონგესიშ დასწრებშა რდუ მოულირ.

ჟურნალ „ოქროშ ხანას“ ჭარუდ: „თე კონგრეს იეჰოვაშ მოწმეეფიშ ისტორიაშა გემშურს, მუჭოთ ართ-ართ მნიშვნელოვან შეხვალამა, ნამუქით მექსიკას ჭეშმარიტებაშ გავრცელებას შეუნწყუ ხე“. მარა მუშენ რდუ თე კონგრეს თეცალ მნიშვნელოვან, მუჟამსით თის ხვალე 150 კოჩიქ დესწრ?

თე კონგრესშახ, მეხიკოს სახიოლო ამბეშ ქადაქებას იშენდოიშენ დიდ ინტერეს ვა მოჸუნაფ. 1919 წანაშე ჭიჭე კონგრესეფ იტარებუდ, მარა კრებეფიშ რიცხვის ოკორდუდ. მეხიკოს 1929 წანას ფილიალიშ გონწყუმას იმენდიშ თოლით უჯინედეს, მარა პრობლემეფ იშენით რდუ. ორგანიზაციაქ მითითება მეჩ წიგნეფიშ გილმაღალარეფს, (თაშ უძახდეს თი დროს პიონერეფს) ნამდა წიგნეფ ვეგმუჩამდესკო ქადაქებაშ დროს. ათეშენ თინეფშე ართ-ართიქ გურ მიჸუნ, მიოტუ ორგანიზაცია დო ცალკე გონწყ ბიბლიაშ გურაფაშ ჯგუფი. თეწკუმა ართო, ფილიალიშ ზედამხედველქ ვემიქცუ ბიბლიურ ნორმეფს ოსადაგუდუნ თეშ დო თიშ მანგიორო შხვა ქუდარნეს. თაშ ნამდა, მექსიკას ართგურ მოწმეეფს გურიშ ელაკინა ოსაჭირდეს.

კონგრესის ჯიმა რუტერფორდიქ გიშართ ჟირ მოხსენებათ, თეშ გეძინელ, რადიოთ ხოლო ხუთ მოხსენება აკეთ. თე ირფელქ ართგურ მოწმეეფს რწმენა გუმანგარ. თენა პირველ შემთხვევა რდუ მექსიკას, მუჟამსით ხალხიქ სახიოლო ამბე რადიოთ მირჩქილუ. კონგრესიშ უკულ ქადაქებაშ საქმეს ფილიალიშ ახალ ზედამხედველ ხემძღვანელენდ, შედეგო ართგურ მოწმეეფქ გაახალებულ ძალეფით დო იეჰოვაშ ჭყოლოფათ გაგრძელეს ქადაქებაშ საქმე.

მაჟია წანას მექსიკას ჟირ კონგრესიქ ჩეტარ, ართიქ საპორტო ქალაქ ვერაკრუსის დო მაჟიაქ — მეხიკოს. გურგედვალირ ხანდას ჯგირ შედეგეფქ ქუმაჸუნ. მაგალთო, 1931 წანას 82 მაქადაქებელ რდუ. ვით წანაშ უკულ მაქადაქებელეფიშ რიცხვიქ ვითმაგო ქუმაძინ. 1941 წანას, მეხიკოს ჩატარებულ კონგრესშა სოდგარენ 1000 კოჩიქ მერთ.

„ქუჩეფს ქიმშაკათეს“

1943 წანას მოწმეეფქ ქიდიჭყეს პლაკატეფით ხალხიშ დაპეჯება კონგრესშა, ნამუთ მექსიკაშ 12 ქალაქის ჩეტარებუდ.a თე პლაკატეფს „სენდვიჩეფს“ უძახდეს, მუშენდა თინა მელე-მოლე გიობუდეს ხუჯის. თე მეთოდის იეჰოვაშ მოწმეეფ 1936 წანაშე გიმირინუანდეს.

მეხიკოშ ქუჩეფშა პლაკატეფით გიშულას ჯგირ შედეგეფქ მაჸუნ, ნამუშ გურშენ ართ გაზეთის, ჭარუდ: „[კონგრესიშ] პირველ დღას [მოწმეეფქ] მუთ შილებედუნ მეტ ხალხ ოკო დაპეჯესკო. მაჟია დღას კონგრესის ონტირუ ვა რდუ“ (La Nación). მუშო ოკო რაგად, თექ კათოლიკურ ეკლესიას ვემეწონ დო მოწმეეფიშ ცილება ქიდიჭყეს. მარა და დო ჯიმალეფქ ვა დოშქურდეს დო გაგრძელეს პლაკატეფით ქუჩეფშა გიშულა დო ხალხიშ დაპეჯება. ჟიშე მოშინაფილ გაზეთის თინა ხოლო ჭარუდ, ნამდა მთელ ქალაქ ორწყედ, მუჭო გილეშეს პლაკატეფით ქუჩეფს იეჰოვაშ მოწმეეფი. თექ თე და დო ჯიმალეფიშ სურათ ხოლო რდუ მოჩამილ. სურათიშ თუდო ჭარუდ: „ქუჩეფს ქიმშაკათეს“.

„ცამეტიშ პროლშე უმოს ლიბ დო ტიბ“

თი წანეფს იეჰოვაშ მოწმეეფიშ უმენტაშის ბრელ მუდგარენ ოკო დუთმებუდკო, ნამდა კონგრესეფს ქიდესწრესკო მექსიკას. ბრელს თიცალ შორ სოფელეფშე აფუდ მაულარ, სოდეთ ვართ რკინაშარა მიკმურდ დო ვართ მანქანეფიშ ოულარ შარა. ართ კრება ჭარუნდ: „ჩქინწკუმა ხვალე ტელეგრაფიშ ხაზ მიკმურს“. თაშ ნამდა, თინეფ მუსხირენ დღას მიშეს ვირით ვარდა კუჩხით მატარებელშახ, ნამუსით ქალაქშა ოკო მიდაჸუნესკო, სოდეთ კონგრესი იტარებუდ.

მოწმეეფიშ უმენტაშ თიცალ ღარიბ რდუ, ნამდა ფარა ხვალე კონგრესშა მიოულარო უბაღდეს. კონგრესშა მეულირ სტუმარეფს თექიან და დო ჯიმალეფ მუნეფიშ ჸუდეშა ხიოლით ღებულენდეს. ნამთინე ხოლო სამეფო დარბაზის ოთანუანდ სერს. ართშა კონგრესიშ დამსწრეეფშე სოდგარენ 90 კოჩიქ ფილიალს ქუდოსკიდ, სოდეთ წიგნეფიშ ყუთეფს გელურდეს. მუჭოთ „წელიწდეულს“ ჭარუდუნ, თინეფ მარდულეფ რდეს, ნამდა დანჯირალქ ქაშუეს, ნამუთ „ცამეტიშ პროლშე უმოს ლიბ დო ტიბ“ რდუ.

თე ქრისტიანეფ თისხით გახარებულ რდეს მუნეფიშ და დო ჯიმალეფწკუმა ართო შაყარუათ, ნამდა თენა ირნერ მსხვერპლშა უღირდეს. მექსიკას ამდღა ხოლო თეცალ შურ დო გურით მსახურენს სოდგარენ ართ მილიონ იეჰოვაშ მოწმე.b 1949 წანაშ „წელიწდეულს“ მოჩამილ ანგარიშის ჭარუდ: «თე რთულ პერიოდის მექსიკელ ჯიმალეფს ვა უდინუაფნა იეჰოვაშ მსახურებაშ ხიოლ, მუშენდა თითოულ თეცალ კონგრეს დიდ ხანს რდუ თინეფიშ მთავარ ორაგადე თემა. ჯიმალეფ ხშირას კითხულენდეს: „ხოლო მუჟამ იჸუაფ კონგრესი?» (ჩქინ არქივშე ცენტრალურ ამერიკა).