მუს იჩიებ ბიბლია აბორტიშ გურშენ?

მუ პასუხის მარზენა ბიბლია:

ბიბლია სიტყვა „აბორტის“ ნაყოფიშ ჩათხინაფაშ მნიშვნელობათ ვერინუანს. მარა, თეშ უმკუჯინუო, ბრელ ბიბლიურ მუხლის მოჩამილ რე ღორონთიშ თვალსაზრის ადამიანიშ, თინეფ შქას დიო ვა დაბადებენ ფერ ბაღანაშ, სიცოცხლეწკუმა დაკავშირებით.

სიცოცხლე ღორონთიშ საჩუქარ რე (დაბადება 9:6; ფსალმუნი 36:9) თიშო არძაშ სიცოცხლე ძვირფას რე, თინეფ შქას დიო ვა დაბადებენ ფერ ბაღანაშ ხოლო. თაშ ნამდა, მუჟამსით მიდგარენ შეგნებულო ჸვილუნს დიო ვა დაბადებენ ფერ ბაღანას, თენა ჸვილუათ ათვალუ.

ისრაელეფშა მეჩამილ ღორონთიშ კანონს რაგადებულ რდჷ: „ქომოლკათა ჩხუპიშ დროს ორსულს ზიანს ქიმიორინუანა დო თინა დროშე ადრე ქიმშობიარენს, მარა უბედრობა ვა მოხვადუ-და, ზიანიშ მიმარნაფალქ ოკო გეგნიგას თისხი ჯარიმა, მუსხის ოსურკოჩიშ ქომონჯ მითხინს დო მსაჯულეფ დუწესენა. მარა უბედრობა ქუმოხვადუ-და, სიცოცხლეშ მანგიორო სიცოცხლე ოკო გინიგას“ (გამოსვლა 21:22, 23).a

• მუჟამ იჭყაფ ადამიანიშ სიცოცხლე?

• ქაპატიენსო ღორონთ თის, მიდგას აბორტ აფჷ ნაკეთებ?

• ქორენო სწორ აბორტიშ კეთება, მუჟამსით დიდაშ, ვარდა ბაღანაშ სიცოცხლე საფრთხეშ თუდო რე?

მუჟამ იჭყაფ ადამიანიშ სიცოცხლე?

ღორონთიშ თოლს სიცოცხლე ჩასახვაშე იჭყაფ. მუშ სიტყვა ბიბლიას, ღორონთ დიო ვა დაბადებენ ფერ ბაღანას ეჭარუნს მუჭოთ ცალკე პიროვნებას. გუვარჩუათ მუსხირენ მაგალით, სოვრეშეთ იძირე, ნამდა ღორონთ ართნერო უჯინე დაბადებულ დო დიო ვა დაბადებენ ფერ ბაღანას.

• ღორონთიშ შთაგონებათ მეფე დავითიქ თქუ: „სქან თოლეფქ თიმწკუმა ბძირ, მუჟამსით დიო ხოლო ჩანასახ ვორდჷ“ (ფსალმუნი 139:16). ღორონთ დავითის დაბადებაშახ ხოლო ცალკე პიროვნებათ მირჩქინანდჷ.

• თეს გეძინელ, იერემიაშ დაბადებაშახ, ღორონთის უჩქუდ, ნამდა თის, მუჭოთ წინასწარმეტყველს, განსაკუთრებულ მიზან აღვენუდ. ღორონთიქ უწუ იერემიას: „სქან დაბადებაშახ მაფუდ გიშაგორილ დო ერჩქინაშახ — განწმენდილ. ხალხეფიშ წინასწარმეტყველო დუგორინე“ (იერემია 1:5).

• ბიბლიაშ ართ-ართ მაჭარალ ლუკაქ, ნამუთ ექიმ რდჷ, ართ დო იგივე ბერძნულ სიტყვა გიმირინუ ახალ დაბადებულ დო დიო ვა დაბადებენ ფერ ბაღანაშ ეიოჭარალო (ლუკა 1:41; 2:12, 16).

ქაპატიენსო ღორონთ თის, მიდგას აბორტ აფჷ ნაკეთებ?

თინეფს მიდგას აბორტ აფნა ნაკეთებ, შეულებნა ღორონთშე პატიება მიღან. სიცოცხლეწკუმა დაკავშირებით ღორონთცალ აზროვნება ქუღნან-და, ულირს კეთებულ ცოდვაშ გურშენ გურ ოკო ვეგიტახან. „იეჰოვა მოჭყოლოფე რე დო გურშა მეუღ შხვეფიშ გაჭირება. . . მუჭოთ ბჟაეიოლ რე შორს ბჟადინოლშენ, თეშ დამთხინუეს თიქ ჩქინ ცოდვეფ“b (ფსალმუნი 103:8—12). იეჰოვა აპატიენს არძას, მით მთელ გურით ინანიენს ულირს დაშებულ ცოდვას, თინეფ შქას აბორტის (ფსალმუნი 86:5).

ქორენო სწორ აბორტიშ კეთება, მუჟამსით დიდაშ ვარდა ბაღანაშ სიცოცხლე საფრთხეშ თუდო რე?

დიო დაბადებულ ვა რენ ფერ ბაღანაშ სიცოცხლეწკუმა დაკავშირებით ბიბლიაშ აზრის გეფთვალისწინენთ-და, მითინს ვა გამართლებე აბორტიშ კეთება თი მიზეზით, ნამდა ბაღანაშ დაბადებათ შილებე დიდაშ ვარდა სქუაშ სიცოცხლექ საფრთხეშ თუდო იჸუას.

მარა მუშ რაგად შილებე, მუჟამსით მშობიარობაშ დროს, სიტუაცია ითხინს არჩევანიშ კეთებას დიდაშ ვარდა ბაღანაშ სიცოცხლე შქას? თე დროს მონაწილეეფქ მუნეფიშით ოკო გინოჭყვიდან, მიშ სიცოცხლე გინასქილიდუან.