მუშენ ჯოხო იესოს ღორონთიშ სქუა?

მუ პასუხის მარზენა ბიბლია:

ბიბლიას იესო ხშირას მოშინაფილ რე, მუჭოთ „ღორონთიშ სქუა“ (იოანე 1:49). სიტყვეფ „ღორონთიშ სქუა“ მეუთითენს, ნამდა ღორონთიქ იესოს თეშ მეჩჷ სიცოცხლე, მუჭოთ შხვა გუნაჭყეფუეფს, მუშენდა თინა რე ირფელიშ გუმაჭყაფალ (ფსალმუნი 36:9; გამოცხადება 4:11). ბიბლია ვა მოგურუანა, ნამდა ღორონთის პირდაპირ გაგებათ ქეშეძინ სქუაქ, მუჭოთ თენა ადამიანეფიშ შემთხვევას ხვადუ.

ბიბლია ანგელოზეფს ხოლო მიშინუანს, მუჭოთ „ღორონთიშ სქუალეფს“ (იობი 1:6). თეს გეძინელ, ბიბლიას პირველ კოჩ ადამ ხოლო მოშინაფილ რე, მუჭოთ „ღორონთიშ სქუა“ (ლუკა 3:38). მარა იესო ღორონთიშ პირველ გუნაჭყეფ რენ დო უშუალოთ ღორონთიქ გაჭყუნ თიშენ, ბიბლია თის არძაშე უმოს ხშირას მიშინუანს, მუჭოთ „ღორონთიშ სქუა“.

• დედამიწაშა მოულაშახ ზეცას ცხოვრენდუო იესო?

• მუს ორთუდ იესო დედამიწაშა მოულაშახ?

დედამიწაშა მოულაშახ ზეცას ცხოვრენდუო იესო?

ქო. იესო ზეცას სულიერ ქმნილება რდჷ, სოიშახ დედამიწას დებადებუდ, მუჭოთ ადამიან. იესოქ თქუ: „ზეცაშე ჩქიმ ნებაშ შეიოსრულებშა ... ვა მომრთუმ“ (იოანე 6:38; 8:23).

ღორონთიქ იესო არძაშე დო ირფელშე ადრე გაჭყჷ. იესოშ გურშენ ბიბლიას რაგადებულ რე:

• „თინა [რე] ... არძა ქმნილებაშე ადრე გოჭყაფილ“ (კოლოსელები 1:15).

• თინა რე „ღორონთიშ გუნაჭყეფუეფშე პირველ“ (გამოცხადება 3:14).

იესოშა შესრულ მესიაშ გურშენ რაგადებულ წინასწარმეტყველებაქ: „თიშ დაჭყაფ ჯვეშ, მითაჟამიშ დროშე რე“ (მიქა 5:2; მათე 2:4—6).

მუს ორთუდ იესო დედამიწაშა მოულაშახ?

თის არძაშე აღმატებულ ზეციერ მდგომარეობა უღუდ. ართშა იესოქ თე საკითხ მუშ ლოცვას მიშინუ: „მუმა, კინ ქომუჩ თი დიდება, ნამუთ ქიანაშ გოჭყაფაშა მიღუდ, მუჟამსით სქანწკუმა ვორდჷ“ (იოანე 17:5).

თინა მუამუშის ოხვარუდ ირფელიშ გოჭყაფას. იესო ხანდენდჷ მუამუშწკუმა ართო, „მუჭოთ ოსტატ“ (იგავები 8:30). იესოშ გურშენ ბიბლიას ჭარჷ: „თიშ მონაწილებათ გორჩქინდჷ შხვა ირფელქ ზეცას დო დედამიწას“ (კოლოსელები 1:16).

ღორონთიქ იესოშ საშვალებათ გაჭყჷ ირფელ — ზეციერ ქმნილებეფ დო ფიზიკურ სამყარო (გამოცხადება 5:11). შილებე ირაგადუას, ნამდა ღორონთიშ დო იესოშ თანამშრომლობა არქიტექტორიშ დო მაშენებელიშ თანამშრომლობას მოგენდჷ. არქიტექტორ ხაზუნს პროექტის დო მაშენებელ თიშ ნახაზაშ მიხედვით აშენენს შენობას.

იესო რდჷ „სიტყვა“. მუჭოთ ბიბლია იჩიებ, დედამიწაშა მოულაშახ იესო რდჷ „სიტყვა“ (იოანე 1:1). მუჭოთ იძირე, ღორონთ იესოშ საშვალებათ გინოჩანდჷ მუშ აზრეფს სულიერ ქმნილებეფს.

თეს გეძინელ, იესო ღორონთიშ წარმომადგენელ რდჷ დედამიწას ხოლო დო ადამიანეფს თიშ აზრეფ გინოჩ. შილებე ღორონთ „სიტყვაშ“ საშვალებათ არზენდკო მითითებეფს ადამ დო ევას ხოლო ედემიშ ბაღის (დაბადება 2:16, 17). საეგებიოთ, იესო რდჷ თი ანგელოზ, ნამუთ უდაბნოს ისრაელეფს აწოჸუნდჷ დო ნამდგაშათ თინეფს ყურადღებათ ოკო ურჩქილდესკო (გამოსვლა 23:20—23).a