გოლოფეფ — მუს იჩიებ ბიბლია?

• „ჩინეთ აცხადენს, ნამდა დეფიქსირ რეკორდულ ტემპერატურაქ დო თენა რდჷ მასმა ზაფხულ, მუჟამსით არძაშ უმოს გოლოფა რდჷ“ – ჭარუდ ართ–ართ ჟურნალიშ 2022 წანაშ 7 სექტემბერიშ გიშაშქუმალას (The Guardian)

• „სომალიშ ნახევარკუნძულეფს ხუთ წანაშა მანგარ გოლოფა იჸუაფ“. – ჭარუდ ართ–ართ ჟურნალიშ 2022 წანაშ 26 არგუსოშ გიშაშქუმალას (UN News)

• „ევროპაშ ტერიტორიეფიშ სოდგარენ ჟირ ნასუმორ გოლოფაშ საშიშროებაშ თუდო რე დო თენა ბოლო 500 წანაშ არძაშ უმოს გლახა პროგნოზ რე“. – ჭარუდ ართ–ართ ჟურნალიშ 2022 წანაშ 23 არგუსოშ გიშაშქუმალას (BBC News)

ბრელ ექსპერტ ფიქრენს, ნამდა თეცალ გოლოფეფ მომავალს ხოლო გეგრძელებ დო ხოლო უმოს სინჩხეეფს მელნა. შილებენო მიღდან უჯგუშ მომავალიშ იმენდ? მუს იჩიებ ბიბლია?

გოლოფეფ დო ბიბლიურ წინასწარმეტყველება

ბიბლიაქ ჩქინ დღალეფშე იწინასწარმეტყველ:

• „იჸუაფ . . . ოჭკუმალიშ სინაკლებე მინ ართ დო მინ მაჟია ადგილს.“ (ლუკა 21:11)

გოლოფეფს ხშირას ოჭკუმალიშ სინაკლებე მაჸუნუ. მუჭოთ ოჭკუმალიშ სინაკლებე, თეშ ტანჯება დო ღურაშენ, მუთ თინეფს შედეგო მოჸუნს, ბიბლიას რდუ ნაწინასწარმეტყველეფ (გამოცხადება 6:6, 8).

მუშენ იძინანს გოლოფეფ:

ბიბლიას ჭარჷ მთავარ მიზეზ მუშენ იძინანს გოლოფეფ. თინა იჩიებ:

• „მიჩქჷ, იეჰოვა, ნამდა ადამიანიშ ნებაშა ვა რე თიშ შარა; კოჩის ვაჸონინე მუშ ცხოვრება.“ (იერემია 10:23)

თენა ნიშნენს, ნამდა ადამიანეფს დო თინეფ შქას, მთავრობეფს ხოლო „ვაჸონინენა მუნეფიშ ცხოვრება“. ხშირას თინეფიშ არასწორ გადაწყვეტილებეფს მაჸუნუ ტემპერატურაშ მანგარო მოძინა დო წყარიშ სინაკლებე.

• ბრელ მეცნიერ იჩიებ, ნამდა ადამიანეფიშ საქმიანობეფს მაჸუნ გლობალურ დათბობაქ, ნამდგაშ შედეგო მთელ მსოფლიოს იძინანს გოლოფეფ.

• თი ადამიანეფიშ მოქმედებეფს, მით გიმირჩქინანა ჰარამობას დო თეშ ადგინენა წესეფს, ნამდა ვაფიქრენა მომავალშე, მოჸუნს ტყალეფიშ განადგურება, გარემოშ დაბინძურება დო ბუნებრივ რესურსეფიშ უგუნურო გიმორნაფა. შედეგო, ვოდინუანთ წყარიშ მნიშვნელოვან რესურსეფს.

მარა ბიბლია მარზენა იმენდის.

შილებენო მიღდან მომავალიშ იმენდ?

ბიბლია მოპირნა, ნამდა ღორონთ მაგვარენს წყარიშ სინაკლებეშ პრობლემას. მუჭო?

1. 1. ღორონთ „მოსპუნს დედამიწაშ მუმასპალეფს.“ (გამოცხადება 11:18) თინა მოსპუნს წყარიშ სინაკლებეშ გამომწვევ ართ–ართ მიზეზის – ჰარამ კათას, ნამდგაშ მოქმედებეფ აზიანენს გარემოს. (2 ტიმოთე 3:1, 2)

2. 2. „სინჩხეშე გინოჭვილ ხრიოკეფ წყარიშ გუბეთ გინირთუ.“ (ესაია 35:1, 6, 7) ღორონთ მაგვარენს თი პრობლემეფს, მუთ გოლოფას მოჸუნს დო დედამიწას გინაშქვანს სამოთხეთ, სოდეთ წყარ დასაბაღ იჸი.

3. 3. „სი მიკმაჯინექ დედამიწას, ვარკენქ ხვე დო ბარაქას“ (ფსალმუნი 65:9) ღორონთ თეშ აკურთხენს დედამიწას, ნამდა არძას ქიანაშ ოჭკუმალ დო სუფთა წყარ აღვენუ.