მუ ჯგირობუა მოუღ სამქადაგებლო მსახურებაშ ჯგუფეფს

1, 2. მუს იჩიებუნა და დო ჯიმალეფ სამქადაგებლო მსახურებაშ ჯგუფეფიშ გურშენ?

ᲥᲝᲠᲨᲣᲜᲐᲜᲝ თი დღა, მუჟამსით მაუწყებელო დენიშნით? თიმ დღას მანგარ ბედნერ იჸუაფუდით, მუშენდა გინირთით თი დიდ ჯგუფიშ წევრო, ნამუთ იეჰოვაშ სახელს განადიდენს (ფსალმ. 148:1, 2, 12, 13). მარა თიმ დღას ართ ჭიჭე ჯგუფიშ ნაწილო ხოლო გინირთუდით, თენა რე სამქადაგებლო მსახურებაშ ჯგუფ. სამქადაგებლო მსახურებაშ ჯგუფეფ მანგარო მოხვარუნა, შევასრულათ იესოშ მითითება დო იფქადაგათ სახიოლო ამბე „სამეფოშ გურშენ მთელ მსოფლიოს“ (მათ. 24:14).

² თქვა მუს ფიქრენთ სამქადაგებლო მსახურებაშ ჯგუფეფშენ? და ვენდიa იჩიებ: „სამქადაგებლო მსახურებაშ ჯგუფიქ ბრელნერო მიმეხვარ. მაგალთო, და დო ჯიმალეფშე ქიდიბგურე ქადაგებაშ დო გურაფაშ უჯგუშ მეთოდეფ, მიმეხვარ, მიღუდუკო დო ქიმვოჭირინეკო სულიერ მიზნეფს დო ქუმაშუკო ნამდვილ მეგობრეფქ“. ჯიმა რიჩ იჩიებ: „ჩქიმო დიდ პატი რე სამქადაგებლო ჯგუფიშ ზედამხედველო მსახურება. მართალ რე, ბიბლიაშ მასწავლებერ ოხვარ მაგურაფალს, მირდას სულიერო დო დინათას, მუთ თე და დო ჯიმალეფშო დიდ ხიოლიშ მიზეზ რე, მარა ჯგუფიშ ზედამხედველს უღჷ განსაკუთრებულ საშვალება, თე პიროვნებას ნათუაშ უკულ ხოლო წანეფიშ დინახალე ქიმეხვარას სულიერო წიმი ულას“. ხოლო ართ და, დინა, იჩიებ: „მუ ჯგირ რე, სამქადაგებლო მსახურებაშ ჯგუფეფ მიღუნან! ჩქიმ ჯგუფ ჩქიმო ოჯახცალ რე“.

3. მუს გუვარჩიენთ თე სტატიას?

³ თე სტატიას დიო თიშე ქიფჩიებუთ, მუ პასუხიშმგებლობეფ უღუნა ჯგუფიშ ზედამხედველს დო თიშ დამხმარეს დო მუჭო ასრულენა მუნეფიშ საქმეს. უკულ ქობძირუნთ, პირადო ჩქი მუშ კეთება შემლებუნა ჩქინ სამქადაგებლო ჯგუფშა ხუჯიშდაკინებელო დო ბოლოს გუვარჩიენთ, მუ ჯგირობუა მოუღ სამქადაგებლო ჯგუფეფს.

ᲯᲒᲣᲤᲘᲨ ᲖᲔᲓᲐᲛᲮᲔᲓᲕᲔᲚᲘᲨ ᲓᲝ ᲗᲘᲨ ᲓᲐᲛᲮᲛᲐᲠᲔᲨ ᲞᲐᲡᲣᲮᲘᲨᲛᲒᲔᲑᲚᲝᲑᲔᲤ

4. ა) მუ რე ჯგუფიშ ზედამხედველიშ მთავარ პასუხიშმგებლობა? ბ) მუჭო ზრუნენს ჯგუფიშ ზედამხედველ მუშ ჯგუფიშ მაუწყებელეფშე? (ქოძირით ჩარჩო „რჩევეფ ჯგუფიშ ზედამხედველშო“).

⁴ სამქადაგებლო მსახურებაშ ჯგუფიშ ზედამხედველო მსახურენს უხუცესეფიშ საბჭოშ დანიშნულ უხუცესb. თე ჯიმა მუშ ჯგუფის რენ თი მაუწყებელეფს ოხვარ სულიერო წიმი ულას. მუჭო ორთჷ თინა თეს? პირველ, თინა თითოეულ მაუწყებელს აქციენს ყურადღებას (იგავ. 27:23). მუჭოთ გურგოჩამილ დო მზრუნველ ჭყიშის, თის ირიათო უღჷ კონტაქტ მუშ ჯგუფიშ მაუწყებელეფწკუმა. თეშ ჭყოლოფათ თინა, საჭიროქ ქიჸუ-და, სულიერო, ემოციურო დო პრაქტიკულო ოხვარ და დო ჯიმალეფს (იგავ. 12:25; ეს. 32:2; იაკ. 2:15–17). მაჟია, თინა თითოეულ მაუწყებელს ოხვარ, აქტიურო მიღან მონაწილება ქადაგებაშ საქმეს. თინა ირნერო ოცად, ირმარას მუშ ჯგუფწკუმა ართო იქადაგას. თეს გეძინელ, ჯგუფიშ ზედამხედველ ირიათო თანამშრომლენს თითოეულ მაუწყებელწკუმა, ნამდა გურშა ელუკინას თინეფს დო ქიმეხვარას, გინირთან უჯგუშ მაქადაგებელეფო დო მასწავლებერეფო. იშვიათ შემთხვევეფს შილებე მუს ვა მართინას სამქადაგებლო შეხვალამაშა, მარა ზრუნენს თიშე, ნამდა ჯგუფის მუშ დამხმარექ ვარდა შხვა შესაფერის მაუწყებელქ ქიმკაჯინას. მასმა, თინა ნათილ ჯიმალეფს ოხვარ, აკმაყოფილენდან თი მოთხოვნეფს, ნამუთ კრებას პასუხიშმგებლობეფიშ მიოღებელო რე საჭირო (1 ტიმ. 3:1). ჯგუფიშ ზედამხედველ შურ დო გურით ოცქვანს, ბიბლიურ რჩევეფს არზენს დო ოგურუანს ჯიმალეფს, ნამდა მამზადას მომსახურეთ ვარდა უხუცესო მსახურებაშო. რახანს ჯგუფიშ ზედამხედველს თეცალ სერიოზულ პასუხიშმგებლობეფ უღჷ, უხუცესეფიშ საბჭო თე საქმეშო თიცალ უხუცესეფს გიშაგორუნს, მიდგას არძაშ უჯგუშო შეიასრულებენა თე დავალება.

5. მუ სირთულეეფს ხვადუ ნამთინე ჯგუფიშ ზედამხედველ?

⁵ ჯგუფიშ ზედამხედველს შილებე შხვადოშხვანერ სირთულე უღუდას. მაგალთო, ართ ჯგუფიშ ზედამხედველ, იერგ, ნამუთ გერმანიას ცხოვრენს დო ნამდგას, ბრელ უხუცესცალო, კრებას შხვა პასუხიშმგებლობეფ ხოლო უღჷ, იჩიებ: „მანგარო ქუმოკო, მიპკითხე ჩქიმ ჯგუფიშ თითოეულ მაუწყებელ, მარა თეშ კეთება მიჭირს, მუშენდა კრებას შხვა პასუხიშმგებლობეფ ხოლო მიღჷ დო ირფელიშ ეკოჭოფუა ძნელ რე“. უგანდას მახორუ 70 წანერ უხუცეს, აბელ, მირაგადუნა: „ჩქინ კრებას უხუცესეფ დო მომსახურეეფ ბრელ ვა ვორეთ, ათეშენ დიდ სამქადაგებლო ჯგუფეფ მიღუნა. შედეგო, პირადო მა მანგარო მიჭირს, მუჭოთ ჭყიშიქ, თითოეულ მაუწყებელს მოკონ თეშ მივაქცუე ყურადღება“. სურინამელ უხუცეს, ობედ, თეცალ მუდგარენს იჩიებ: „მოხიოლ შხვეფს ვოგურუანქინ, მარა თეს დრო დო ენერგია ოსაჭირ დო თეწკუმა ართო, შედეგ ხოლო ირო უცფას ვეძირე. ათეშენ უმოსო თე საქმეს გინობდვანქ დო შხვა საქმეეფს ვორთუქ“. მუ მეხვარებ უხუცესეფს თე დო შხვა თეცალ სირთულეეფიშ დროს?

6. მუშენ რე ჯგირ ჭიჭე სამქადაგებლო ჯგუფეფ?

⁶ შეიოლებერ ქორენ-და, სამქადაგებლო ჯგუფ დიდ ოკო ვა რდასჷ, ნამდა ზედამხედველს მუშ ჯგუფიშ არძა მაუწყებელიშ ჯგირო გაჩინებაფაქ დო სულიერო მოხვარაქ შეიალებუას. მარა მუ ოკო ქიმინას უხუცესეფიშ საბჭოქ, კრებას არძა ჯგუფშო დასაბაღ უხუცეს ვა რენ-და? თიშ მანგიორო, ნამდა ჭიჭე ჯგუფეფ გაერთიანას დო უკულ ზედამხედველს მუშ პასუხიშმგებლობაშ ნორმალურო შესრულებაქ ვეშიალებუას, უხუცესეფიშ საბჭოქ შილებე მომსახურეს დავალას, დროებით თიქ ქიმკაჯინას ჯგუფის. სამქადაგებლო ჯგუფეფ ჭიჭე ქიჸუაფუნ-და, ზედამხედველეფს უჯგუშო შეიალებენა, შეასრულან მუნეფიშ დავალებაშ მთავარ ნაწილ – იზრუნან მუნეფიშ ჯგუფიშ და დო ჯიმალეფშე.

7. მუშ კეთება შეულებ ჯგუფიშ ზედამხედველს, ნამდა ჯგირო ქიზრუნას მუშ ჯგუფიშ არძა მაუწყებელშე თიცალ კრებას, სოდეთ ბრელ უხუცეს ვა რე? (1 პეტ. 5:2; ქოძირით სურათ).

⁷ თიცალ კრებას, სოდეთ ბრელ უხუცეს ვა რე, ჯგირ იჸუაფ, ჯგუფიშ ზედამხედველქ უმოს ყურადღება ქიმიაქცუას მუშ დამხმარეშ მომზადებას, ნამდა თიქ ქიმეხვარას ღორონთიშ შხურიშ ჭყიშუას (წეკითხით 1 პეტრეშ 5:2). გუნაწილით საქმეეფ თქვან დამხმარეს. მაგალთო, ქოთხით, მინშა მუქ ჩატარას სამქადაგებლო შეხვალამა დო თიმ დღას მუქ ქუხელმძღვანელას ჯგუფის. ქილოცით თიწკუმა ართო დო გარჩით, მუჭო შეილებუნა თქვან ჯგუფის თითოეულს მეხვარათ, უჯგუშ მაქადაგებელეფო გინირთან დო უმოსო დეახლოვან იეჰოვას. ქელეჸუნეთ თქვან დამხმარე სამწყემსო მონახულებეფიშ დროს. ირ მონახულებაშახ ქელაკითხეთ, მუჭო შეილებუნა გურშა ელუკინათ თანაქრისტიანს დო მონახულებაშ უკულ ქაცქვეთ დო, საჭირო ქორენ-და, ქიმეჩით რჩევეფ. თეცალ მომზადებაშ შედეგო, დროშ მიკულაშ უკულ, შილებე უკვე თინა ხოლო აკმაყოფილენდას ჯგუფიშ ზედამხედველო მსახურებაშ მოთხოვნეფს (2 ტიმ. 2:2). შეილებუნა თქვან ჯგუფშე შხვა მოწიფულ ქრისტიანეფ ხოლო ქიმიხვარუათ. მაგალთო, ქოთხით პიონერეფს დო შხვა გამოცდილ მაუწყებელეფს, ითანამშრომლან ახალეფწკუმა დო ნაკლებო გამოცდილეფწკუმა. სულიერო მოწიფულ ქრისტიანეფს შეულებუნა მეხვარან თიცალეფს, მიდგას უჭირა მსახურებაშ დროს ჩიებაშ წუმოჭყაფა, კინ მეკითხირ დოვარ ბიბლიაშ გურაფაშ ჩატარება. მორთ ასე გუვარჩუათ სუმ მხარე, ნამდგათ შემლებუნა ხე შეუნწყუათ სამქადაგებლო მსახურებაშ ჯგუფის.

ᲮᲣᲯ ᲥᲣᲓᲣᲙᲘᲜᲘᲗ ᲗᲥᲕᲐᲜ ᲡᲐᲛᲥᲐᲓᲐᲒᲔᲑᲚᲝ ᲛᲡᲐᲮᲣᲠᲔᲑᲐᲨ ᲯᲒᲣᲤᲘᲡ

8. მუჭო შემლებუნა ხუჯ დუკინათ ჩქინ სამქადაგებლო ჯგუფის? (რომ. 1:12).

⁸ იქადაგით ჯგუფწკუმა ართო. თქვან ჯგუფიშ მაუწყებელეფწკუმა მსახურებაშა ულათ ხეს შეუნწყუნთ ართიანშა გურიშელაკინას (წეკითხით რომაელეფიშ 1:12). მსახურებაშა შხვაწკუმა ართო მიდურთ-და, ნაკლებო ინერვიანენთ დო უმოს თხილერო იგინანთ დუდის ნამთინე ტერიტორიას ქადაგებაშ დროს. თქვან ჯგუფწკუმა ართო მსახურებას ხშირას სამუშა ქუგოცილუნან-და, უნჩაშის ქუდურაგადეთ დო ქოთხით გრაფიკიშ თირუა. შილებე თიქ გვალო გონწყუნან თეშ დოითირუან სამუშა გრაფიკ (ნეემ. 2:4–6). სამქადაგებლო შეხვალამაშა ულა გლახა ჯანმრთელობაშ ვარდა ასაკიშ გურშენ ვეშეილებუნან-და, ქუდურაგადეთ თეშე ჯგუფიშ ზედამხედველს. შილებე თიქ თეშ მანწყუას, ნამდა შეგალებუან ჯგუფწკუმა ართო ვიდეოკონფერენციათ შეხვალამაშა დასწრებაქ დო წერილეფით ვარდა ტელეფონით ქადაგებას მონაწილებაშ მეღებაქ. შილებე ახალგაზრდა რეთჷ დო ჯანმრთელობა ხოლო ჯგირ გიღუნა, მარა გიჭირა მსახურებაშა რეგურალურო ულა. თაშ ქორენ-და, ჯგირ იჸუაფ ირ მარას თქვან ჯგუფშე მიდგაინწკუმა დაგეგმათ მსახურება. შილებე გინაჯინალ გაფუდან, მუს უკინებ თქვან ცხოვრებას პირველ ადგილ ვარდა უბრალოთ დრო გაფუდან შხვანერო განაწილებერ (რომ. 12:11; კოლ. 4:5). შედეგ ნამდვილო ღირჷ მონდომაშა. ქილოცით დო ქოთხით იეჰოვას მოხვარა. თინა თეშ ოკეთებელო ქოთ გურს ქოიჸოფირენა დო ქოთ ძალას ქიმერჩანა (ფილ. 2:13).

9. მუჭო შემლებუნა ჩქინ სამქადაგებლო ჯგუფის ხე შეუნწყუათ გემუან დო ჸოროფიან გარემოს? (რომ. 12:13).

⁹ რდათჷ სტუმარიშ მოჸოროფე. სტუმარიშ ჸოროფაშ გიმორჩქინათ ჩქინ სამქადაგებლო ჯგუფის გემუან დო ჸოროფიან გარემოს უნწყუნთ ხეს (წეკითხით რომაელეფიშ 12:13). მაგალთო დეფიფქრათ, შემლებუნანო სამქადაგებლო შეხვალამაშ ჩატარებელო ჩქინ ჸუდეშ კარ ხოლო გონჯამილ რდასჷ? ნამთინე კრებას ჯგუფეფ ოჩერედობით აგეგმენა, ნამდა შხვა კრებაშე მოულირ მომხსენებელეფ დაპატიჟან სადილშა. მომხსენებელს სადილშა ვა მართინასინ ხოლო, თი ჯგუფიშ და დო ჯიმალეფ იშენ იშაყარუნა, ართო ჭკუმუნა ოჭკუმალს დო გურშა ელუკინანა ართიანს. ართ სპეციალურ პიონერ, სარა, იჩიებ: „სტუმარეფს ვაპატიჟენქინ, მნერვიანენქ, ირფელიშ კეთება ქუმაჭიშენო. ათეშენ ბრელს მუთუნს ვა ვორთუქ დო შედეგო ნაკლებ ონერვიანებელ მიღჷ. ვოცადუქ, ყურადღება და დო ჯიმალეფიშ უჯგუშო გაჩინებაფაშა გინიბღე დო ვართ ხოლო დიდ სუფრაშ გიმონწყუალაშა“. მუჟამსით ირნერო ვოცადუთ, ჩქინ სამქადაგებლო ჯგუფის ოჯახცალ გემუან დო თავისფალ გარემო რდასჷ, ქოთ იეჰოვას ვეახლოებუთ დო ქოთ ართიანს (ნეემ. 8:10; საქ. 20:35).

10. მუშ კეთება შემლებუნა, ნამდა მსახურებაშ ნამთინე მხარეს გებუჯგუშათ? (იგავ. 1:5; 27:17; ქოძირით სურათ).

¹⁰ ქითხით მოხვარა. მუთ უმოს ჯგირ მაქადაგებელეფ დო მასწავლებერეფ ვორეთ, თით უმოსო მოხიოლუნა ჩქინ ჯგუფწკუმა ართო მსახურებაშა ულა. მსახურებაშ ნამთინე მხარეს გაუჯგუშება ქუგოსაჭირუნან-და, ჯგირ იჸუაფ, მოხვარა ქოთხუათ მაგალთო, თქვან ჯგუფშე ართ-ართ პიონერს ვარდა გამოცდილ მაუწყებელს (წეკითხით იგავეფიშ 1:5; 27:17). თქვან ჯგუფიშ ზედამხედველს ხოლო ქუწით, მუ კუნთხუთ გოსაჭირუნა გაუჯგუშება დო თინა ხოლო ქიმგეხვარებუნა. მოხვარა შეილებუნა შხვეფს ხოლო ქოთხუათ. თაშ მიქცუ ართ დაქ, ჰეზერქ. მართალ რე, თის მანგარო ორიდ შხვეფშა მოხვარაშ თხუალა, მარა თინა იჩიებ, მუ აკეთ: „ართ პიონერ დას ქოფთხი მოხვარა კინ მეკითხირეფიშ კეთებას. თიქ შურ დო გურით დო გემუანო მომდირთჷ დო რეგულარულო მსახურენდჷ ჩქიმწკუმა. თე დაქ თის ხოლო ქიმმეხვარ, ნამდა ართ დაინტერესებულწკუმა ბიბლიაშ გურაფა ქიდიპჭყიკო. ჯგირ რე, თის მოხვარა ფთხინ, მუშენდა ასე ხიოლით მეურქ მსახურებაშა“. არგამა რე, თითოეულს ბრელნერო შემლებუნა ხუჯ დუკინათ ჩქინ სამქადაგებლო ჯგუფის.

ᲛᲣ ᲯᲒᲘᲠᲝᲑᲣᲐ ᲛᲝᲣᲦ ᲗᲥᲕᲐᲜᲓᲐ ᲡᲐᲛᲥᲐᲓᲐᲒᲔᲑᲚᲝ ᲛᲡᲐᲮᲣᲠᲔᲑᲐᲨ ᲯᲒᲣᲤᲘᲡ

11, 12. მუ სულიერ მოხვარას ბღებულენთ სამქადაგებლო მსახურებაშ ჯგუფშე? ქიმიჸუნით შემთხვევა.

¹¹ სულიერ მოხვარა. სამქადაგებლო მსახურებაშ ჯგუფის თითოეულ მაუწყებელშა მოუღ ჯგირობუა. მაგალთო, ზედამხედველ სირთულეეფიშ დროს დროულო ელუკინანს გურშა ომბოლეფს, ხანშამიშულირეფს დო ქომონჯღურელ ოსურეფს, მიდგაშეთ იეჰოვა განსაკუთრებულო ზრუნენს (1 თეს. 2:8; იაკ. 1:27). თე ჯგუფეფიშ ჭყოლოფათ ბგურაფლენთ, მუჭო გინიბრთათ უჯგუშ მაქადაგებელეფო დო მასწავლებერეფო. სამაგალითო ნათილ ჯიმალეფ მიკმულა მომზადებას, ნამდა დაკმაყოფილან თი მოთხოვნეფ, ნამუთ კრებას შხვადოშხვა პასუხიშმგებლობაშ მიოღებელო რე საჭირო (1 ტიმ. 3:10).

¹² ქობძირათ, მუ ჯგირობუა მოუღ სამქადაგებლო მსახურებაშ ჯგუფიქ ჟიშე მოშინაფილ ვენდის. თინა იჩიებ: „მუაჩქიმ მოწინააღმდეგე რდჷ, ათეშენ დიაჩქიმს ვეგლართედ მსახურებაშა სამქადაგებლო ჯგუფწკუმა ართო, მარა მა მიტენდეს. ართ ხანიერ პიონერ დაქ სულიერო ქელამრდუ დო მიმეხვარ, მსახურებას გებუჯგუშიკო დო კრებას ხოლო უმოს გუვაკეთიკო. თეს გეძინელ, ჯგუფიშ ზედამხედველს ჸოროფათ ბრელშა მუჩამ ბიბლიაშა გერსხილ რჩევეფ, მუთ ამდღარ დღაშახ მოხვარ“.

13. მუჭო მოხვარუნა ემოციურო ჩქინ სამქადაგებლო მსახურებაშ ჯგუფ? (ქოძირით სურათ).

¹³ ემოციურ მოხვარა. მუჟამსით ჩქინ ჯგუფიშ და დო ჯიმალეფწკუმა ართო მსახურენთ, ჩქინ შქას ჯგირ მეგობრობა ივითარებ (ფილ. 1:27). თინეფს, მით მორდებუანეფ რენა ვარდა ბრელ ხალხ შქას უხერხულო გინაფლენა დუდის, ჭიჭე სამქადაგებლო ჯგუფეფს შილებე უმოს ეფიქ აჸუან ხოლოშიან მეგობრეფიშ შეძენაქ (2 კორ. 6:13). შემლებუნა თეცალ მეგობრეფიშ იმენდ მიღუდან სირთულეეფიშ დროს, მაგალთო, მუჟამსით იბლახებუთ, გურ მაფუნა შეჭირებულ ვარდა საჸოროფო ადამიან მიღურუნა (1 თეს. 5:14). მუშო ოკო რაგად, მომავალს ჯგირ მეგობრეფ უმოსო დემესაჭირებუნა (მათ. 24:21). შილებე ჩქინ პრობლემეფქ ვემიგვარას, მარა თინეფშა უმოს ადვილ გარზებელ მაჸინა, მუჟამსით მარჩქვენუნა, ნამდა პჸუნა მოჸოროფე და დო ჯიმალეფ, მიდგაშ იმენდ შემლებუნა ირიათო მიღუდან (იგავ. 17:17).

14. მუჭო ბღებულენთ პრაქტიკულ მოხვარას ჩქინ სამქადაგებლო ჯგუფშე სტიქიურ უბედრობაშ დოვარ შხვა თეცალ სიტუაციეფიშ დროს?

¹⁴ პრაქტიკულ მოხვარა. ჩქინ სამქადაგებლო ჯგუფშე დროულო ბღებულენთ მოხვარას, მუჟამსით ეპიდემია რე, სტიქიურ უბედრობეფ ხვადუ, სასწრაფო სამედიცინო მოხვარა მოსაჭირუნა ვარდა რწმენაშ გურშენ ფთხოზუნა. მაგალთო, სტიქიურ უბედრობაშ დროს ჯგუფიშ ზედამხედველ მუშ ჯგუფიშ თითოეულ ოჯახის დეკავშირებ, ნამდა ქიგეგას, ხომ ვასაჭირუნა სამედიცინო მოხვარა, ოჭკუმალ, წყარ, დუდიშგითაფორაფალ, ბარგ დოვარ შხვა მუდგარენ. თეშ გაგებაშ უკულ ჯგუფიშ ზედამხედველს შეიალებე პრაქტიკულო ქიმეხვარას თინეფს. თეწკუმა ართო, ჯგუფიშ ზედამხედველეფ კრებაშ სამსახურებრივ კომიტეტწკუმა ართო მსჯელენა, მუნეფიშ ჯგუფეფს მის შილებე თეცალ სიტუაციეფიშ დროს განსაკუთრებულ მოხვარაქ დესაჭირას დო აგეგმენა, მუჭო მეხვარან თინეფს. მართალო მუ ჯგირ რე, ნამდა სამქადაგებლო ჯგუფიშ საშვალებათ თეცალ პრაქტიკულ მოხვარას ბღებულენთ, მუდგაშეთ დიდ ჸოროფა იძირე!

15. მუ მაერთიანენა არძას იეჰოვაშ ორგანიზაციას?

¹⁵ მუჭოთ დუდშე მიფშინეთ იეჰოვაშ ორგანიზაცია ქიანაშმადიდა რე. ხვალე ზეცას ოშობით მილიონ, შილებე მილიარდობით, სულიერ ქმნილება რდასჷ. დედამიწას ხოლო 9 მილიონშე მეტ ადამიან ომსახურ იეჰოვას დო თინეფიშ რიცხვის ირდღას აძინუ (ზაქ. 8:23; გიმოცხ. 5:11). იეჰოვაშ ართგურ თაყვანიშმცემელეფ ზეცას დოვარ დედამიწას ართო მონაწილენა ღორონთიშ სამეფოშ გურშენ სახიოლო ამბეშ გაცხადებას (გიმოცხ. 14:6, 7). მორთ მიზანო მიღუდან, სრულას მიბღათ ჯგირობუა ჩქინ სამქადაგებლო მსახურებაშ ჯგუფშე, მუთ მოხვარუნა, მთელ გურით განვადიდათ იეჰოვა (ფსალმ. 111:1).