მუთუნ ვეცილუათ იეჰოვაშ მსახურებას

1, 2. მუჭო შილებე მინშა მნიშვნელოვან საქმექ ხოლო მოცილეთ გინმართან?

ᲬᲔᲠᲛᲘᲓᲒᲘᲜᲘᲗ, ნამდა რულს გეხეთ დო თე დროს ტელეფონ გირეკუნა. შილებე იფიქრათ, მიდგაინს ვა უჭირდას დო ჩქიმ ყურადღება ვასაჭირუდასია, მარა თე დროს თინა ხოლო გარჩქილენა, ნამდა შარას ოკო უჯინათ, რულქ ვაკოიცუანინ. ხშირას ვორეთ თიცალ სიტუაციეფს, მუჟამსით მიხვადუნა თიშ გინოჭყვიდუა, მუ რე უმოს მნიშვნელოვან კონკრეტულ სიტუაციას.

² ჩქინ ცხოვრებას ბრელ მნიშვნელოვან მუდგარენ რე, მუდგას ჩქინ ყურადღება ოსაჭირ, მარა მარჩქილენა, ნამდა ირფელიშ უმოს მნიშვნელოვან სულიერ საქმეეფa რე (მათ. 6:33). ჯგირ შოფერცალო, ნამუთ ფრთხილ რე, ჩქი ხოლო ვოცადუთ, მუთუნს ვემეფჩათ საშვალება, ყურადღება ქრისტიანულ ცხოვრებაშ შარაშე შხვა მუდგარენშა გეგნმოღალაფუან (იგავ. 4:25; მათ. 6:22).

3. მუს გუვარჩიენთ თე სტატიას დო მუს მიმეხვარებუნა თენა?

³ მუშო ოკო რაგად, გურს ნამთინს ვა მოკონა, სულიერ საქმეეფს გემკვოჩირთათ, მარა მინშა სიტუაციეფ თეშ გეკინწყუაფ, ნამდა ადვილო შილებე ყურადღება შხვა მუდგარენშა გეგნიბღათ (ლუკ. 21:34–36). იეჰოვაშ მსახურებაშ პირველ ადგილშა გერნაფაქ ქეშმალებუანინ, გუვარჩუათ 1) მუქ შილებე ყურადღება შხვა მუდგარენშა გეგნმოღალაფუან? 2) მუჭო ახერდენდჷ იესო, მუთუნ ვეცილუკო თი საქმეშ კეთებას, მუთ ირფელიშ უმოს მნიშვნელოვან რდჷ? დო 3) ჩქი მუჭო შემლებუნა პირველ ადგილს ქიგვორინუათ ღორონთიშ სამეფო?

ᲛᲣᲥ ᲨᲘᲚᲔᲑᲔ ᲧᲣᲠᲐᲓᲦᲔᲑᲐ ᲨᲮᲕᲐ ᲛᲣᲓᲒᲐᲠᲔᲜᲨᲐ ᲒᲔᲒᲜᲛᲝᲦᲐᲚᲐᲤᲣᲐᲜ?

4–6. მუ დო მუ სიტუაციეფქ შილებე მეცილან, ღორონთიშ მსახურება პირველ ადგილშა გემირდან?

⁴ არძას ქიანაშ ამბე მისოფუანა, მუთ ჩქინ ყურადღებას ითხინს. მაგალთო, შილებე ჯანმრთელობა ვა მორგუდან ვარდა პირად დო ოჯახურ პრობლემეფშენ მაფუდან ოფიქრებელ. მარა, თე ირფელშენ ფიქრის გეგნვაჸუნით დო დრო დო ენერგია ვამოტუანინ თიშ საშვალება ქიმეფჩით-და, თექ შილებე მეცილან, იეჰოვაშ მსახურება გემირდან პირველ ადგილშა.

⁵ ნამთინეშ შემთხვევას პირად პრობლემეფს პოლიტიკურ არეულობა, ეკონომიკურ პრობლემეფ, ეპიდემიეფ დო ჩხუპეფ გიაძინუ (2 ტიმ. 3:1). მუჟამსით თეცალ მუდგარენ ჩქინწკუმა ხვადუ, შილებე თეშ მეტ მუთუნშე ვა მაფიქრებედან.

⁶ შილებე იჩინენდათ ადამიანეფს, მიდგას თეცალ პრობლემეფიშ გურშენ დუდგიმე გემნართჷ ცხოვრებაქ. ვა რე გასაკვირ, ნამდა თინეფ ემოციურო მანგარ გლახათ გინაფლენდან დუდის, მუშენდა კოჩ ვა რე გოჭყაფილ თეცალ პრობლემეფიშ გარზებელო. ნამთინე თეცალ პრობლემეფიშ უკულ ფიქრენს, ნამდა ნორმალურ ცხოვრებას დართასინ თიშო გართობა დო მოსვანჯა ოსაჭირ დო ბრელ გვალო გინოჸუნს თეს. შილებე ბრელ ვორდათ თიცალ სიტუაციეფს, ნამუთ ჟიშე გიმოპკოროცხით. ათეშენ მორთ გუვარჩუათ, მუჭო ახერხენდჷ იესო, ყურადღება ღორონთიშ მსახურებაშე შხვა მუდგარენშა ვეგნიღუკო დო ქიგებგათ, ჩქი მუშ გურაფა შემლებუნა თიშე.

ᲛᲣ ᲝᲮᲕᲐᲠᲣᲓ ᲘᲔᲡᲝᲡ, ᲧᲣᲠᲐᲓᲦᲔᲑᲐ ᲦᲝᲠᲝᲜᲗᲘᲨ ᲛᲡᲐᲮᲣᲠᲔᲑᲐᲨᲔ ᲨᲮᲕᲐ ᲛᲣᲓᲒᲐᲠᲔᲜᲨᲐ ᲕᲔᲒᲜᲘᲦᲣᲙᲝ?

7. მუშა შილებედ იესოქ ყურადღება გეგნიღუკო?

⁷ იესოს ღორონთიშ მსახურებაშე შხვა მუდგარენშა ყურადღება შილებე ბრელ მუდგარენქ გინაღალაფუკო, მაგალთო, სოციალურ დო პოლიტიკურ პრობლემეფქ. თიმ დროს უღონობა დო ლახალა ბრელს უნწარენდჷ ცხოვრებას (მათ. 14:14; მარ. 14:7). ხალხ რომაელეფიშ დო შხვა იუდეველეფიშ ხეშე ხოლო ხვადუდ უსამართლობას. ათეშენ მუჟამსით ქოძირეს, ნამდა იესოს სასწაულეფიშ კეთებაშ ძალა უღუდ, თიშ გამეფება მინდომეს (იოან. 6:14, 15). თეწკუმა ართო, იესოს სატანა ხოლო გეუხედ. თინა ოცადუდ იესოშ დოჸუნაფას დო თის ურაგადუდ, ნამდა შეულებუდ უწვალებუო გინირთუკო მსოფლიოშ მმართველო (მათ. 4:8, 9). მუჟამსით იესო მოწაფეეფს ეუნწყუნდჷ, ნამდა ოკო იტანჯუკო, მუშ ართ-ართ უხოლაშ მეგობარქ, პეტრექ, ხოლო ელუჩ, მარტივ შარა გეგშეგორუკო დო უწუ: „ქეშიცოდილე დუდ, უფალ“ (მათ. 16:21, 22).

8. მუ ოხვარუდ იესოს, პირველ ადგილს ღორონთიშ მსახურება გეურდუკო?

⁸ მუ ოხვარუდ იესოს, პირველ ადგილშა ღორონთიშ ნებაშ შესრულება გეურდუკო? სუმ მუდგარენ: 1) თის გინოღალირ აფუდ იეჰოვაშ აზროვნება (იოან. 8:28; 14:9); 2) დაკავებულ რდჷ სულიერ საქმეეფით (მათ. 9:35) დო 3) ჯგირო არჩქილედ, სინამდვილეს მუ რდჷ არძაშ უმოს მნიშვნელოვან (იოან. 4:34). ათეშენ თიქ შურო ვა დაფიქრებენ თეშ უწუ ვარია სატანას დო ვართ პეტრეს დაჸუნ, მიდგას, მართალ რე, ჯგირ ოკოდ იესოშო, მარა ელუჩუნ თინა ვემურდჷ იეჰოვაშ ნებას (მათ. 4:10; 16:23). იესო ვარზენდჷ ხალხიშ აზრის, ნარაგადის ვარდა საქციელს თიშ უფლებას, ეცილუკო ღორონთიშ ნებაშ შესრულებას. მართალ რე, ჩქინ შემთხვევას შილებე გვალო შხვა მუდგარენეფქ მეცილან, პირველ ადგილს გივორინუათ ღორონთიშ მსახურება, მარა თიშ გაგება, იესო მუჭო ახერხენდჷ, მუთუნ ვეცილუკო ღორონთიშ მსახურებას, ჩქი ხოლო ქიმმეხვარებუნა.

ᲛᲣ ᲛᲘᲛᲔᲮᲕᲐᲠᲔᲑᲣᲜᲐ, ᲘᲔᲰᲝᲕᲐᲨ ᲛᲡᲐᲮᲣᲠᲔᲑᲐ ᲞᲘᲠᲕᲔᲚ ᲐᲓᲒᲘᲚᲡ ᲒᲔᲛᲘᲠᲓᲐᲜ?

9. მუს ნიშნენს, ქინვანჭათ, მუ რე იეჰოვაშ ნება? (ეფეს. 5:17).

⁹ ქიდიგურეთ იეჰოვაცალ აზროვნება. თეშ კეთება ქიმგეხვარებუნა, ქინანჭათ, მუ რე იეჰოვაშ ნება (წეკითხით ეფესოელეფიშ 5:17). ღორონთის მუ მოწონს დო მუ ვარინ თეშ გაგებას ქიმმეხვარებუნა თიშ სიტყვაშ კითხირ დო თიშე ჯგირო დაფიქრება. თიმწკუმა ხოლო, მუჟამსით ბიბლია კონკრეტულო მუთუნს ვეჩიებ ჩქინ სიტუაციაშ გურშენ, იშენით შემლებუნა თევრეშე ქიგებგათ, მუშ კეთება იჸუაფ ღორონთშო მოსაწონ. თეშო საჭირო რე, ქიგებგათ, მუჭო უჯინე იეჰოვა შხვადოშხვა საკითხის დო მზათ ვორდათ, ქიმვაჸუნათ ნაგურეფუს.

10. მუჭო შემლებუნა ქინვანჭათ, მუჭო უჯინე იეჰოვა შხვადოშხვა საკითხის?

¹⁰ იეჰოვა შხვადოშხვა საკითხეფს მუჭო უჯინენ თეშ უჯგუშო ინონჭაფას ქიმმეხვარებუნა ბიბლიურ შემთხვევეფშე დაფიქრება, სოვრეშეთ იძირე, მუჭო ოქცუდ თინა ადამიანეფს (იერ. 45:5). თინეფიშ კითხირიშ დროს შემლებუნა თეცალ კითხვეფშე დეფიფქრათ: „მუს ბგურაფლენქ თავრეშე იეჰოვაშ გურშენ? მუ მაფჷ ოთირალ, ნამდა ჩქიმ აზროვნება იეჰოვაშ აზროვნებას ქიმურდას?“. მუშო ოკო რაგად, მარჩქილენა, ნამდა იეჰოვაშ სიბრძნეშა თეშით ხოლო ველმაჸუნინენა (ეს. 55:9). ათეშენ ფთხინთჷ თის ლოცვას, ქიმმეხვარან მუშ ნებაშ შესრულებას (ფსალმ. 143:10). თეწკუმა ართო, ლოცვას ღორონთის თის ხოლო ფთხინთჷ, ნამდა ქიმმეხვარან მუშ აზროვნებაშ ინონჭაფას დო თიშ გინოღალას (1 იოან. 5:14).

11. მუ ოკო იეჰოვას?

¹¹ იეჰოვას ოკო, მზათ ქუდოფხვადათ თე ქიანაშ ბოლოს (მათ. 24:44). ათეშენ თის მუთუნით ვაკო, ნამდა ყურადღება თიშ მსახურებაშე შხვა მუდგარენშა გეგნიბღათ, მაგალთო, გეგნვაჸუნათ მუდგარენეფშე წუხებას (მათ. 6:31, 32). ზუსტას ათეშენ იეჰოვა მზათ რე ჩქინ მახვარებელო, მუჟამსით ჯანმრთელობაშ, სამუშაშ ვარდა პირად დო ოჯახურ პრობლემეფიშ გურშენ მნერვიანენთ დო შხვა მუთუნშენ ვა მაფიქრებენა. თინა მირაგადუნა, ნამდა ჩქინ სირთულეეფიშ გარზებელო ძალას დო სიბრძნეს ქოფთხინთ-და, აუცილებერო ქომუჩანა (ფსალმ. 55:22; იგავ. 3:5–7).

12. მუ რე ართ-ართ, მუთ მიმეხვარებუნა ბედნერეფ ვორდათ, თიშ უმკუჯინუო, ნამდა მსოფლიოს ბრელ გლახა მუდგარენ ხვადუ? (მათ. 5:3).

¹² აქტიურო მიღით მონაწილება სულიერ საქმეეფს. მუშო ოკო რაგად, არძას მაწუხენა თი გლახა მუდგარენეფ, მუთ ამდღა მსოფლიოს ხვადუ. მარა თე ირფელიშ გაჩერებელო ჩქი მუთუნიშ კეთება ვეშემლებუნა. ათეშენ, მუთ ვა მათირენან თიშე ნერვიანობას გინვაჸუნათინ თიშ მანგიორო, მთელ ყურადღება ღორონთიშ მსახურებაშა მაფუნა გინოღალირ. ჩქინდა ნამდვილ ხიოლ დო ბედნერობა ღორონთწკუმა ხოლოს ვორდათინ თის მოუღ, მუშენდა თის თაშ ვაფუთ გოჭყაფილ (წეკითხით მათეშ 5:3). ჩქინდა ენოდვალირ თე მოთხოვნილებას იპკმაყოფილენთ, მუჟამსით ღორონთიშ სიტყვაშ, ბიბლიაშ, საშვალებათ იფჩინებაფუანთ თის დო ირნერო ვოცადუთ, არძა საშვალება გეგმიბრინუათ თიშ მსახურებას. თეშნერო გურს უხარენთ იეჰოვას, მუშენდა ჭკვერულო იბრინუანთ დროს (იგავ. 23:15).

13. მუჭო შემლებუნა ჭკვერულო გიმიბრინუათ დრო?

¹³ ქრისტიანეფს მოკონა, ჭკვერულო გიმიბრინუათ დრო (ეფეს. 5:15, 16). მუშო ოკო რაგად, ბიბლიას თეთ უბრალოთ თიშ რაგად ვაკო, ნამდა ჭკვერულო მაფუდან დონწყილ დღაშ დინახალე ოკეთებელ საქმეეფ. თინა ელამჩანა, ჯგირო ქუგუჩათ გურ, მუჭო იბრინუანთ დროს, ნამუთ თე უბადო ქიანაშ მოსპუალაშახ მეძჷ. მუჭო შემლებუნა ვოძირუათ, ნამდა ჭკვერულო იბრინუანთ დროს? ნამთინ საინფორმაციოს ვენკიფშქვანთ დო ირ გლახა ამბეს ქუჯინეთ დო ქოპკითხულენთ-და, თენა მეცილებუნა, არძაშ უმოს მნიშვნელოვან საქმეშენ ქიფიფქრათ, თეს გეძინელ, გურს გომტახუნა დო მონდომას მემდინუანა ღორონთიშ მსახურებას. ათეშენ ჯგირ იჸუაფ, გუვაკონტროლათ, მუზმა დროს გიმურთუნთ ახალ ამბეეფიშ გაგებას. თეშნერო ნაკლებ გურიშგასოფალ ამბეს გებგენთ დო, თეწკუმა ართო, უმოსო ქუდმოსქიდუნა დრო სულიერ საქმეეფშო, მუთ ჯგირო ქიმოქმედენს ჩქინდა. შემლებუნა მსახურებას უმოსიშ კეთებაშენ ხოლო დეფიფქრათ. მაგალთო, ქიმვაკითხუათ თინეფს, მიდგაქ პირველ ჩიებაშ დროს ჯგირო მომრჩქილუეს. ჩქი ჯგირო მარჩქილენა, მუსხით მნიშვნელოვან რე, ხეშე ვა გუტუათ ნამთინ საშვალება, ნამდა არძა ადამიანქ „გინოსქიდას დო სიმართლეშ ზუსტ რჩქინა მიღას“ (1 ტიმ. 2:4).

14. მუჭო მოხვარუნა სულიერ საქმეეფიშ კეთება? (ქოძირით სურათ).

¹⁴ სულიერ საქმეეფს მონაწილებას მუთ შემლებუნან აქტიურო ქობღებულენთ-და, ვაგმოჭყორდუნა, მუ დროს ფცხოვრენთ. მუჟამსით ვორწყეთ, ნამდა პოლიტიკურ არეულობეფ ხვადუ, ეკონომიკურ მდგომარეობა იუფრაშებ ვარდა შხვადოშხვა ლახალა მიკორჩქინდუ, ჩქი შიშ ვეპჭოფუნა დო თე მოვლენეფს თეშ უჯინეთ, მუჭოთ მტკიცებულებას, ნამდა ბიბლიურ წინასწარმეტყველებეფ კილ-კილშა ისრულებ. თაშ ნამდა, შიშიქ ენომლუანინ თიშ მანგიორო, ბჯერა, იეჰოვა ბოლოშა ქიმიჸუნანს მუშ განზრახვას. მარა თე დროშ მოულაშახ, დარწმუნებულ ვორეთ, ნამდა იეჰოვა ქიმმეხვარებუნა გარზებას დო თენა ხოლო მარზენა სიმშვიდეს (ფსალმ. 16:8; 112:1, 6–8).

15. მუს მიმეხვარებუნა გურგოჩამილობა? (1 პეტ. 4:7).

¹⁵ ვაგგოჭყორდან, მუ რე უმოს მნიშვნელოვან. ბრელ ამდღა დროშ ტარებაშა რე გინულირ დო შურო ვა ფიქრენს, ნამდა თე ქიანაშ მოსპუალა მანგარ ხოლოს რე. მართალ რე, მოსვანჯას მუშ ადგილ უღჷ, მარა საჭირო რე, გურგოჩამილეფ ვორდათ, ნამდა თე ქიანაშ აზროვნებაქ ვეგნმადვან თე საკითხის (წეკითხით 1 პეტრეშ 4:7). შხვა მუდგარენეფწკუმა ართო, თენა ნიშნენს, ნამდა გვალო გინოჸუნელ ვა ვორდათ გართობას დო მოსვანჯას. თეშ გინაწონს, ჭკვერულ გადაწყვეტილებეფ მიბღათ თე საკითხის. თეთ ვოძირანთ, ნამდა იეჰოვაშ აზროვნება მაფუნა გინოღალირ დო მარჩქილენა, მუ რე მართალო მნიშვნელოვან (2 ტიმ. 1:7).

16. მუშე ფიქრენდჷ იესო ღურაშ წოხოლე?

¹⁶ იესოს დღას ვაჭყორდუდ, მუ რდჷ ირფელიშ უმოს მნიშვნელოვან. დედამიწას ცხოვრებაშ ბოლო საათეფს ხოლო თინა ხვალე თიშე ფიქრენდჷ, ნამდა მუდგათიჸინ ღორონთიშ ართგურქ ქუდოსქიდუკო დო თიშ ნება შეასრულუკო, ათეშენ თინა კურცხას რდჷ დო ირიათო ლოცულენდჷ. თექ ვაკეთებუეს თიშ მოწაფეეფს, თინეფს ქუდარულეს. მუჭოთ ბიბლიაშე ბგებულენთ, მოწაფეეფს ძალაქ თიშენ ეშელუეს, ნამდა გურშეჭირებულეფ რდესჷ (ლუკ. 22:39–46; იოან. 19:30).

17. მუშო ირინუანს ბრელ სოციალურ მედიას დო მუჭო შილებე თიქ მოცილექ იჸუას? (ქოძირით სურათ).

¹⁷ იესოშ მოწაფეეფცალო მინშა შილებე ჩქი ხოლო ემოციურო გინოშულადირ ვორდათ. თი ირფელ, მუთ ამდღა სატანაშ ქიანას ხვადუ, გლახათ მოქმედენს ჩქინდა. თე ქიანაშ ბოლო დღალეფს თიცალ გლახა მუდგარენეფ ხვადუ მსოფლიოს, ნამდა თე ირფელ სტრესის მიძინანა. ამდღა ხალხ აქტიურო ირინუანს სოციალურ მედიას, ნამდა დუდ მიდუღას თე ირფელს. ბრელ ქიანაშ დროს უთმენს სოციალურ მედიას. მართალ რე, ნამთინე თის ოჯახიშ წევრეფ დო მეგობრეფწკუმა დაკავშირებელო ხოლო ირინუანს, ნამდა ქეჩუას ახალ ამბეეფ, ქოუჯღონას სურათეფ დო შხვა, მარა სოციალურ მედიას ირდღას თისხი ახალ მუდგარენ მიკორჩქინდუ ოკითხეთ დო ოჯინეთ, ნამდა თე ადამიანეფ ქიანაშ დროს დო ენერგიას მიკახარჯენა თის. ჩქი ხოლო თაშ ვა მაღოლანინ, ჯგირ იჸუაფ, დეფიფქრათ: „თი ირფელ, მუდგას სოციალურ მედიაშე ბგებულენქ, ჯგირო მოგინაფუანს დუდის დოვარ მოცილ, ყურადღება თიშა მაფუდას გინოღალირ, მუთ მართალო მნიშვნელოვან რე?“.

18. მუშენ ოკო ვორდათ გურგოჩამილეფ, მუჟამსით გართობას გიშებგორუნთ?

¹⁸ გურიშგოჩამა მოსაჭირუნა თიმწკუმა ხოლო, მუჟამსით კინოეფს, სატელევიზიო პროგრამეფს ვარდა ჭიჭე ვიდეოეფს უჯინეთ ინტერნეტით ვარდა ბლაჸაფენთ ვიდეოლაჸაფეფს. შილებე თე ირფელ სასიამოვნო რდასჷ დო მინშა ჭიჭე მოსვანჯას მოხვარუდან, მარა გურ ოკო ქუგუჩათ, მუს იბრინუანთ გართობაშო დო მუზმა დროს უთმენთ. მაგალთო, ვიდეოეფს ქოუჯინეთ-და, შილებე ართიშ ჯინას ვათენთინ იზმა ხანშა მაჟია, ახალ, გიდვალუდას. შილებე დუდიქ ვენდმაღინან დო ქიმშვაჸუნათ თინეფიშ ჯინას. ნამთინე ვიდეოს ხოლო ძალადობა ვარდა უზნეობა რე. თეცალ მუდგარენქ აღოლ ართ აზიელ ჯიმას. თიქ დუდშე ინტერნეტის ჭიჭე ვიდეოეფიშ ჯინა ქიდიჭყჷ. ჭიე-ჭიეთ თის თიცალ ვიდეოეფიშ ეშაჸათამაქ ხოლო ქუდუჭყჷ, სოდეთ უზნეო სცენეფ რდჷ. თე ჯიმა თე ირფელქ პორნოგრაფიაშ ჯინაშა ქიმიჸუნ. საბედნეროთ, თიქ უხუცესეფიშ დო მეგობრეფიშ მოხვარათ საჭირო ნაბიჯეფ გეგნოდგჷ. დოლას თი აპლიკაციეფ, სოდეთ თე ვიდეოეფს უჯინედ დო წინასწარ აფუდ დოდგინელ დრო, მუზმა ხანს გიმირინუანდ ტელეფონს. თიშ შემთხვევა ჯგირო ოძირანს, მუსხით მნიშვნელოვან რე, გურგოჩამილეფ ვორდათ, მუჟამსით გართობას გიშებგორუნთ.

19. მუქ შილებე მოხვადას, გართობას გეგნვაჸუნუთ-და?

¹⁹ გურგოჩამილობა თიმწკუმა ხოლო მოსაჭირუნა, მუჟამსით საქმე გართობას დო მოსვანჯას ოხუ. მუშო ოკო რაგად, მოსვანჯა აუცილებერ რე, ნამდა სამუშას ვეგნვაჸუნათ დო ჯანმრთელობა ხოლო ვეგლებლუათ, მარა მოსვანჯას ბრელ დროს გეგმურთუნთ-და, თიქ შილებე მეცილან, ყურადღება თიშა გეგნიბღათ, მუთ არძაშ უმოს მნიშვნელოვან რე (ფილ. 1:10). არძაქ ჩქინით ოკო გინოპჭყვიდათ, გართობაშ დო მოსვანჯაშ ნამ სახეობას გიშებგორუნთ დო მუზმა დროს გიმურთუნთ თის. თე გადაწყვეტილებაშ მოიღებელო ქოკითხ სქან დუდის: „ქიძირენო თი დროშე, მუდგას გართობას დო მოსვანჯას გიმურთუნქ, ნამდა ვორექ გურგოჩამილ? ქუვორექო დარწმუნებულ, ნამდა პირველ ადგილშა გემრე თინა, მუთ მართალო მნიშვნელოვან რე? ქუვოძირანქო, ნამდა მზათ ვორექ თე ქიანაშ აღსასრულშო?“.

20. მუ ჯგირობუას მომღანა, ღორონთიშ მსახურებას მუთუნს ვეფცილუანთ-და?

²⁰ მუჟამსით მუთუნს ვემეფჩანთ საშვალებას, ყურადღება ღორონთიშ მსახურებაშე შხვა მუდგარენშა გეგნმოღალაფუან, თენა ჯგირობუას ქუმომღანა (ეს. 48:17). იეჰოვაშ მოხვარათ უჯგუშო შემალებენა გივორჯგინათ თი სირთულეეფს, ნამდგას ცხოვრებას ფხვადუთ. თეს გეძინელ, გურს ვენკომიჸოთანა თი სირთულეეფ, ნამუთ ამდღა ხვადუ. ვართ გართობას მეფჩანთ თიშ საშვალებას, ნამდა საჭიროშე უმოს დრო მიდამღან. ათეშენ მორთ ირფელ გუვაკეთათ თიშო, ნამდა გეგნიბღათ იეჰოვაშ აზროვნება. სულიერ საქმეეფს მუთ შემლებუნან აქტიურო მიბღათ მონაწილება დო ვაგმოჭყორდან, მუ რე არძაშ უმოს მნიშვნელოვან. თაშ ქიმიფქციებუთ-და, თენა მიმეხვარებუნა, მუთუნ ვეფცილუათ ღორონთიშ მსახურებას დო გემამნგარათ „ნამდვილ სიცოცხლეშ იმენდ“ (1 ტიმ. 6:19).