იჩით სიმართლე გემუანო

1. მუ მაფუნა ოკეთებელ, ნამდა ღორონთიშ ხალხ შქას ქუვორდათ?

ᲛᲣᲟᲐᲛᲡᲘᲗ ქრისტიანეფ ართიანს იფჩინებაფუანთ, ხშირას ართმაჟიას ვოკითხუთ: „მუჭო გეგჷ ჭეშმარიტება?“. ნამთინე პასუხენს, ჭეშმარიტებას იბრდია, მინ ხოლო თქუანს, ნამდა ამარდე გეგჷ ჭეშმარიტება. მუშენ რე თე საკითხ ჩქინო თეცალ მნიშვნელოვან? მუშენდა სიმართლე, ნამდგას ღორონთიშ სიტყვაშე ბგებულენთ, დუდშე ბოლოშა თირანს ჩქინ ცხოვრებას დო მარჩქილენა, ნამდა ღორონთიშ ხალხ შქას ქუვორდათინ ქუმოკონან-და, ოკო მიჸორდან თე სიმართლე დო ფცხოვრენდათ თიშ თანახმას. თეშა მიშურს თინა ხოლო, ნამდა, მაგალთო, პატიოსანეფ ვორდათ ქოთ ჩქინ ჩიებათ დო ქოთ საქმეთ (ფსალმ. 15:1–3).

2. ა) მუნერ სახელ გეძუდ იესოს? ბ) მუ შედეგ მაჸუნუდ იესოშ მხარეშე ხალხშა სიმართლეშ ქადაგებას?

² იესო ირიათო თის იჩიებუდ, მუთ მართალ რდჷ. თიშ ნტერეფ ხოლო მუნეფიშ პიჯით იჩიებუდეს, ნამდა იესო ირო მართალს თქუანდჷ თიმწკუმა ხოლო, მუჟამსით უჩქუდ, ნამდა მუშ ნარაგად ბრელს ვემეწონებუდ (მათ. 22:16). ართშა იესოქ თეშნერო ეჭარ, მუ შედეგ მაჸუნუდ მუშ ქადაგებას: „თიშა მობრთჷ, ნამდა გობრთე ოჯახეფ; ქომოლსქუა მუმას წუკინდინუე, ოსურსქუა – დიდას დო ნოსა – დიანთილს“ (მათ. 10:35). იესოშ შუროთ ვაკოდ, ნამდა თაშ მოხვადუკო დო გლახა რეაქციაქ მაჸუნუკო თის, მუდგას მუ დო მუშ მიმაჸუნალეფ ქადაგენდეს; უბრალოთ, უჩქუდ, ნამდა თენა თაშ იჸიდ (მათ. 23:37). თის ჯგირო არჩქილედ, ნამდა ამბე, მუდგას ქადაგენდჷ, ჟირო გორთუნდ მსოფლიოს: ართ მხარეს იჸუაფუდეს თინეფ, მით ქიჸოროფუანდ ბიბლიას ინოჭარილ სიმართლეს დო მაჟია მხარეს იჸუაფუდეს თიცალეფ, მით ვა ქიმინუნდ თეს (2 თეს. 2:9–11).

3. მუს გუვარჩიენთ თე სტატიას?

³ იესოცალო ჩქი ხოლო ვოცადუთ, ირნერ სიტუაციას მართალ ფთქუათ, თიმწკუმა ხოლო, მუჟამსით შილებე ბრელს შურო ვეხუჯას თექ. თეწკუმა ართო, ბიბლიას ინოჭარილ ჭეშმარიტებას უქადაგუთ დო ვოგურუანთ ხალხის, თიშ უმკუჯინუო, ნამდა ბრელს აღიზიანენს, მუდგას ჩქი იფჩიებუთ. მუჭოთ ვორწყეთ, ჩქინო მანგარ მნიშვნელოვან რე, სიმართლე ფთქუათ. მარა თენა ვა ნიშნენს, ნამდა შურო გურ ოკო ვა გუჩათ, მუჟამ დო მუჭო ფთქუანთ თე ჩქინ სიმართლეს, თინეფ შქას მსახურებაშ დროს. თე სტატიას დიო ქუპასუხენთ მთავარ კითხვას: სოვრეშე ბგებულენთ სიმართლეს ღორონთიშ გურშენ? უკულ გუვარჩიენთ, მუშენ, მუჭო დო მუჟამ ოკო ფთქუათ სიმართლე. თე კითხვეფშე პასუხიშ მეჩამა ქიმმეხვარებუნა, უჯგუშო შემალებუან სიმართლეშ სწორას რაგადიქ, მუთ ნიშნენს, ნამდა გემუანო დო მუშ დროს ფთქუათ თინა.

ᲡᲝᲕᲠᲔᲨᲔ ᲨᲔᲛᲚᲔᲑᲣᲜᲐ ᲒᲔᲑᲒᲐᲗ ᲡᲘᲛᲐᲠᲗᲚᲔ ᲦᲝᲠᲝᲜᲗᲘᲨ ᲒᲣᲠᲨᲔᲜ

4. მუშენ შემლებუნა ფთქუათ, ნამდა სიმართლე ღორონთშე მოურს?

⁴ სიმართლე იეჰოვაშე მოურს. ირფელ, მუდგას თინა იჩიებ სიმართლე რე. მაგალთო, მართალ დო სწორ რე თიშ კანონეფ, ნამდგათ მირაგადუნა, მუ რე ჯგირ დო მუ – გლახა (ფსალმ. 19:9; 119:142, 151). თეწკუმა ართო, ირფელ, მუდგას თინა მომავალიშ გურშენ წინასწარმეტყველენს, ირო ისრულებ (ეს. 55:10, 11). იეჰოვა ირო ასრულენს მუშ დოდვალირ სიტყვას (რიცხ. 23:19). გამორიცხულ რე, თიქ ტყურა ქოთქუას! (ებრ. 6:18). თაშ ნამდა, ბიბლია მართალო სწორას უძახ იეჰოვას „სიმართლეშ ღორონთის“ (ფსალმ. 31:5).

5. გენწყით, მუშენ ვა რე ძნელ ღორონთიშ გურშენ სიმართლეშ გაგება (საქ. 17:27).

⁵ ამდღა ბრელ ფიქრენს, ნამდა ღორონთ ვარდა შურო ვა არსებენს დო გოკონ-და არსებენდასინ ხოლო, ძნელ იჸი თიშ გაჩინებაფა. მარა თენა ვა რე მართალ. სინამდვილეს, სოდგა ვემკიბჯინათინ, ირდიხას ბძირუნთ თიშ მტკიცებულებეფს, ნამდა ღორონთ არსებენს (რომ. 1:20). თეწკუმა ართო, ათენს, რჩქინელ კათაწკუმა ჩიებაშ დროს, პავლექ თქუ, ნამდა ღორონთის ოკო, ბგორათ თინა დო ნამდა „თინა შორს ვა რე ჩქინდე ნამთინშე“ (წეკითხით საქმეეფიშ 17:27). ხვალე თენა ვარინ, ღორონთის მუშ ხოლოშა მეჸუნს თი თანდაბალ ადამიანეფ, მიდგას ოკონა სიმართლეშ გაგება თიშ გურშენ (იოან. 6:44).

6. ა) ნამ რე თი ნამთინე საკითხ, ნამდგაშ გურშენ ბიბლიას სიმართლეს ბგებულენთ? ბ) მუშენ რეთჷ მარდულ, ნამდა თე საკითხეფიშ გურშენ სიმართლე გიჩქუნა?

⁶ ართ-ართ საშვალება, მუდგათ ღორონთიშ გაჩინებაფა შემლებუნა, თიშ სიტყვაშ, ბიბლიაშ, გიმორკვიება რე. ღორონთიქ მუშ ართგურ ქომოლკათას წმინდა შურით ოჭარაფუ ირფელ, მუთ თე წიგნის ინოჭარ (2 პეტ. 1:20, 21). თაშ ნამდა, ირფელ, მუთ ბიბლიას ჭარჷ, მართალ დო სანდო რე. მაგალთო, სანდო რე თი სიტყვეფ, მუდგას ბიბლია სამყაროშ დო დედამიწას სიცოცხლეშ გოჭყაფაშ გურშენ იჩიებ (დაბ. 1:1, 26). შემლებუნა ბჯერდან თიშ ხოლო, მუდგას ბიბლია იჩიებ თიშ გურშენ, მუშენ ვორეთ არძა ცოდამეფ დო მუშენ იპტანჯებუთ დო ბღურუთ (რომ. 5:12; 6:23). სანდო რე თინა ხოლო, ნამდა, მუჭოთ ბიბლია იჩიებ, იეჰოვა მუშ სქუაშ საშვალებათ მოსპუნს თი ირფელ გლახას, მუთ სატანაქ, „ტყურაშ მუმაქ“, მომღეს (იოან. 8:44; რომ. 16:20). დო შემლებუნა ბჯერდან ბიბლიას მოჩამილ თი დუნაპირებუშ ხოლო, ნამდა მალას იესო მოსპუნს უბადოეფს, გათელენს ღურელეფს, დედამიწას სამოთხეთ გინაშქვანს დო ჩქი გასრულყოფილებას ქიმმეხვარებუნა (იოან. 11:25, 26; 1 იოან. 3:8). დეფიფქრათინ, მართალო მუშმადიდა პატის მარზენა იეჰოვა! თიქ გუმოგებაფუეს სიმართლე მუშ გურშენ დო მარზენა საშვალებას, თენა შხვეფს ხოლო ქუდვოგურუათ (მათ. 28:19, 20).

ᲛᲣᲨᲔᲜ ᲘᲤᲩᲘᲔᲑᲣᲗ ᲡᲘᲛᲐᲠᲗᲚᲔᲡ

7, 8. ქიმიჸუნით მაგალით, სოვრეშეთ იძირე, მუსხით მნიშვნელოვან რე, მუნერ გურით იფჩიებუთ სიმართლეს (მარ. 3:11, 12; ქოძირით სურათეფ).

⁷ მუჭოთ უკვე ფთქვით, იეჰოვაშ ოჯახის ქუვორდათინ ქუმოკონან-და, ირო სიმართლე ოკო იფჩუათ. მარა ღორონთის გურ გაუხარათინ თიშო, ხვალე სიმართლე იფჩუათინ თენა ვა რე დასაბაღ. იეჰოვაშო მნიშვნელოვან რე, მუშენ იფჩიებუთ სიმართლეს. გუვარჩუათ ართ შემთხვევა, ნამდგაქ იესოშ დედამიწას მსახურებაშ დროს მოხვად (წეკითხით მარკოზიშ 3:11, 12). მუჟამსით იესო გალილეაშ ზღვაშ გოხოლუას მსახურენდჷ, თიწკუმა ანაყუ ხალხ რდჷ აკოშაყარელ. თინეფ შქას რდესჷ თიცალეფ ხოლო, მიდგას დემონეფ მიშუხედეს. თინეფ იესოშ წოხოლე დიხას აშანთხუდეს დო ღვარანდეს: „სი ღორონთიშ სქუა რექჷ!“. მუშენ იჩიებუდეს დემონეფ სიმართლეს იესოშ გურშენ? თინეფს შილებე ოკოდესკო, ნამდა ხალხის დემონეფ მიშუხედუნ თი ადამიანეფიშ ნდობაქ ქაშუესკო დო უკულ ეიოჩილითუესკო ღორონთიშ შარას. მართალ რე, დემონეფქ სიმართლე თქუეს, მარა თეს მუნეფიშ სამოგებოთ ორთუდეს. იესოქ ქიმუხვად თინეფს დო შუროთ ვა ხიოლებ თენა თქვისინ; პირიქით, უზოჯ, მითინწკუმა ვეჩუესკო თიშ გურშენ.

⁸ მუს ბგურაფლენთ თე შემთხვევაშე? იეჰოვაშო მნიშვნელოვან რე, მუნერ გურით იფჩიებუთ სიმართლეს. ათეშენ, მუჟამსით შხვეფს იეჰოვაშ გურშენ ვოგურუანთ, თეს თიშ ჸოროფა ოკო მოკეთებაფუანდან დო მუჟამსით შხვეფ მოცქვანა თი ცნობაშ გურშენ, ნამდგას ფქადაგენთ, ოკო ვედიფსქვამუათ თინა დო დიდება იეჰოვას უძღვინათ (მათ. 5:16; ქეშუდარით საქმეეფიშ 14:12–15).

9. მუშ კეთებას ოკო ვევეცადათ დო მუშენ?

⁹ დეფიფქრათ ხოლო ართ სიტუაციაშე, მუდროსით შილებე მიღუდან თიშ ცდუნება, ნამდა ვეცადათ შხვეფშე დიდება მიბღათ. წერმიდგინით, ნამდა პასუხიშმგებელ ჯიმაქ მუდგარენ თიცალ ინფორმაცია ქიგენდეს, ნამუთ შხვეფს ოკო ვა უწუათ. მარა თქვა გედირთით დო შხვეფს ხოლო ქეჩით თიშ გურშენ. უკულ, მუჟამსით მიდგას თე ამბე ეჩითინ თინეფ ქოძირუნა, ნამდა ირფელქ უწითინ თეშ ქუმოხვად, შილებე იფიქრან, ნამდა თქვა მანგარ მნიშვნელოვან პიროვნება რეთჷ დო ბრელ კონფიდენციალურ ინფორმაციას გონდუნა. შილებე თექ ადამიანეფიშ თოლს პატი ქიგერდვან, მარა ღორონთიშ თოლს ვა მოიძინანა ფასის (იგავ. 11:13). მუშენ იფჩიებუთ თეს? ართ თიშენ, ნამდა ორაგადე ვა გაფუდესინ ფერ მუდგარენ გაჸინა რაგადებულ დო მაჟია, მართალ რე, სიმართლეს ქოთქუანდით, მარა არასწორ მოტივით.

ᲛᲣᲭᲝ ᲝᲙᲝ ᲘᲤᲩᲣᲐᲗ ᲡᲘᲛᲐᲠᲗᲚᲔ

10. მუს ნიშნენს გემუან ჩიება? (კოლ. 4:6).

¹⁰ წეკითხით კოლოსელეფიშ 4:6. პავლე მოციქულქ კოლოსეს მახორუ ქრისტიანეფს ქუგაშინ, ნამდა თინეფქ ირიათო გემუანო ოკო იჩუესკო. მუს ნიშნენს თენა? ორიგინალ ტექსტის თე ადგილს გიმორნაფილ ფრაზას თიცალ აზრ ინოძ, ნამდა ჯგირ ოკო ფთქუათინ თეწკუმა ართო, ჩქინ ჩიება მარჩქილეშო სასიამოვნო მარჩქილაფარ ოკო რდასჷ დო გურ ოკო ვა უწყუნუას.

11, 12. მუშენ მოსაჭირუნა გურგოჩამილობა შხვეფშა ბიბლიას მოჩამილ სიმართლეშ გურაფაშ დროს? ქიმიჸუნით მაგალით (ქოძირით სურათეფ).

¹¹ პავლეშ რჩევა ჩქი ხოლო ოკო გეგმიბრინუათ დო გემუანო ვეჩუათ შხვეფს, მუჟამსით ბიბლიას მოჩამილ სიმართლეს ვოგურუანთ. ბიბლია სიმართლეს, ნამუთ თე წიგნის ენოჭარ, ადარენს ლასირელ ყამას, ნამდგას შეულებ ხორციშ დო შურიშ გორთუალა. შხვანერო ქოფთქუათინ, თინა აარგამენს, სინამდვილეს მუ გრძნობეფ დო მოტივეფ უღჷ კოჩის (ებრ. 4:12). მარა თე წიგნის ჭკვერულო ვეგმიბრინუანთ-და, შილებე გვალო ძალით გუვაღიზიანათ მიდგაინ ვარდა უთანხმოებაქ ქუმაშუან. მუჭო შილებე თექ ქუმოხვადას?

¹² წერმიდგინით თეცალ სიტუაცია: მსახურებაშ დროს შეხვადუთ ართ ჯგირ გურიშ კოჩის, მით ირო ხატეფწკუმა ლოცულენს დო მუშ ოჯახწკუმა ართო თანაფა დო ქირსეს აღნიშნენს. ჩქი ხომ შემლებუნა ბიბლიაშე ქუვოძირუათ, მუნერ სიბორუე რე მუთუნიშ მოღე ვა რენ ფერ ხატეფიშ წოხოლე ლოცვა დო თინა ხოლო, ნამდა თიცალ დღახუეფ, მუნერით რე ქირსე დო თანაფა, ტყურა რელიგიაშე მოურს (ეს. 44:14–20; 2 კორ. 6:14–17). მარა თეს პირველ ჩიებას ქუწინთ-და, მართალ რე, ტყურას მუთუნს ვა ფთქუანთ, მარა თენა ღორონთიშ სიტყვაშ ჭკვერულო გიმორნაფა ვეჸუაფუდ.

13. მუჭო შემლებუნა „ჯიმ ქუკათუათ“ ჩქინ ჩიებას?

¹³ პავლექ თინა ხოლო თქუ, ნამდა ჩქინ ჩიება „ჯიმკათაფილ“ ოკო რდასჷ. თის თიშ რაგად ვაკოდ, ნამდა შხვეფშა ბიბლიას მოჩამილ სიმართლეშ გურაფაშ დროს მუდგაინ გეგნვაკეთათ ვარდა დოფუბლათ. თეშ გინაწონს, ჩქინ ჩიება „ჯიმ კათაფილ“ რდასინ თენა ნიშნენს, თეშ ვეჩუათ შხვეფს ჭეშმარიტებაშ გურშენ, ნამდა გურქ ქაჸუან თიშ მორჩქილაფაშა (იობ. 12:11). თეშ კეთება გვალო ეფ ამბე ვა რე. მაგალთო, ოჭკუმალიშ კეთებაშ დროს შილებე იფიფქრათ, ნამდა თინა ჩქინო გემუან ქორენ-და, შხვეფშო ხოლო გემუან იჸუაფ დო ქიმეწონებუნა. შილებე თეშნერო იფიფქრათ ჩქინ ჩიებაშე ხოლო. მარა თენა ირო თაშ ვა რე. მაგალთო, ნამთინე კულტურას პირდაპირ უჩქუნა ორაგადეშ რაგად, თიმწკუმა ხოლო, მუჟამსით ხანშამიშულირ ადამიანს ეჩიებუნა. მარა შხვა კულტურაშ ხალხის შილებე ვა მოწონდას თეცალ ჩიება დო გვალო გურ ხოლო მალედან. მუჭოთ პავლექ თქუ, ოკო მიჩქუდან, მის მუნერ პასუხ მეფჩათ. მუს ნიშნენს თენა? მუს მუჭო ფთქუათინ თენა ჩქინ გემოვნებაშ დო კულტურაშ მიხედვით ოკო ვეგნოპჭყვიდათინ, მარჩქილეშ „გემოვნებას“ ოკო დუხუჯუათ.

ᲛᲣᲟᲐᲛ ᲝᲙᲝ ᲘᲤᲩᲣᲐᲗ ᲡᲘᲛᲐᲠᲗᲚᲔ

14. მუშენ ვაგურუანდჷ იესო მუშ მიმაჸუნალეფს ირფელს, მუთ მუს უჩქუდ?

¹⁴ იესო მუშ მიმაჸუნალეფს ირო გემუანო ეჩიებუდ დო ჸოროფათ ოგურუანდჷ ბრელ მუდგარენს (მარ. 6:34). მარა თინეფს დიო ხოლო ბრელ აფუდეს დაგურაფალ. იესო ვაცადუდ, თინეფს ირფელ ქუდაგურუკო, მუთ მუს უჩქუდ, მუშენდა არჩქილედ, მუსხი გიანტირედეს მუშ მოწაფეეფს დო ჯგირო უჩქუდ, ნამდა თიმ დროს თინეფშა მუდგარენეფიშ რაგადიშ დრო დიო ვა რდჷ (იოან. 16:12). მუშ გურაფა შემლებუნა თავრეშე?

15. მუშენ ოკო ვევეცადათ, ბიბლიაშ მაგურაფალს ირფელ ართათ დუვოგურუათ? (იგავ. 25:11; ქოძირით სურათ).

¹⁵ იესოშ მაგალითშე ჯგირო იძირე, ნამდა ბიბლიაშე სიმართლე მიჩქუნან თენა ვა ნიშნენს, ირფელ ართუცფას ქუდვოგურუათ შხვეფს. გურ ოკო ქუგუჩათ, მუ მდგომარეობა უღჷ თი ადამიანს, მიდგას ვეჩიებუთ. მაგალთო, დუვართათ თი კოჩის, ნამუთ მუშ ოჯახწკუმა ართო, ხიოლით აღნიშნენს ქირსეს დო თანაფას. ჩქი ხომ ჯგირო მიჩქუნა, ნამდა თე ჟირხოლო დღახუ ტყურა რელიგიეფშე მოურს დო ღორონთის ვა მოწონს. მარა წერმიდგინით, ნამდა თე კოჩის ქირსეშახ გვალო ართ ვარდა ჟირ მარა მეძუნ თეშ უჭყანთ ბიბლიაშ გურაფას. მუს თქუანთ, მუსხით ჭკვერულ იჸუაფუდ თე კოჩის თეცალ დროს გეუნწყითკო, მუს ოგურუანს ბიბლია ტყურა რელიგიაშე მოურსუნ ფერ დღახუეფიშ აღნიშნებაშენ დო უწითკო, ნამდა ასეშე ოკო მიოტუას თინეფიშ აღნიშნება? მუშო ოკო რაგად, რენა თიცალ ბიბლიაშ მაგურაფალეფ ხოლო, მით ხეთეშე იჭყანა თიშ გიმორნაფას, მუდგას ბიბლიაშე გებულენა. მარა ნამთინეს ჭიჭე უმოს დრო ოსაჭირ აზროვნებაშ დო ცხოვრებაშ ოთირალო. ბიბლიაშ მაგურაფალქ სულიერო წიმი მიდართასინ ქუმოკონან-და, მუშ დროს ოკო უწუათ ორაგადე. თენა ნიშნენს, ნამდა თიმწკუმა უწუათ, მუჟამსით თიშ მეღება უჯგუშო შეიალებე (წეკითხით იგავეფიშ 25:11).

16. მუჭო მივეხვარათ ბიბლიაშ მაგურაფალეფს, „სწორ შარას გიაჸუნან“?

¹⁶ ჩქინდა სასწაულ ხიოლ მოუღ შხვეფშა იეჰოვაშ გურშენ სიმართლეშ დოგურაფას. ჩქინ ბიბლიაშ მაგურაფალეფქ „სწორ შარას გიაჸუნანინ“ ქუმოკონან-და, ჩქი ოკო მეფჩათ ჯგირ მაგალით თინეფს (3 იოან. 3, 4). ირო ქუგუჩით გურ, მუსხით ქაძირანს თქვან ცხოვრება, ნამდა რწანა ღორონთიშ სიტყვას ენოჭარილ დუნაპირებუეფიშ. სიმართლე ირო სწორ მოტივით იჩით. მუჟამსით შხვეფს ღორონთიშ სიტყვას ინოჭარილ სიმართლეს ურაგადუთ, ეჩით გემუანო, კოჩის გურს მუჰამუანსინ თეშ, დო სწორ დრო გეგშაგორით შხვეფშა სიმართლეშ დაგურაფალო. დო ბოლოს, მთელ დიდება ირო იეჰოვას უძღვინით. თაშ გაკეთენთ-და, დამტკიცენთ, ნამდა იეჰოვაშ, სიმართლეშ ღორონთიშ, მსახურეფ რეთჷ.