ხანშამიშულირეფ, თქვა კრებაშო მანგარ ძვირფასეფ რეთჷ!

შილებე ასაკიშ გურშენ ჯვეშო ორთუდითინ თიზმა ვეშეილებუდან. თიშ უმკუჯინუო, ნამდა წანეფ რე, მუთ ართგურო ომსახურუთ იეჰოვას, თქვან ასეიან მდგომარეობაშ გურშენ შილებე გურ გიტირხუდან. მაგალთო, შილებე ამდღა მუდგას ორთუთ თის უდარენდათ თის, მუდგას ულირს ორთუდით. თაშ ქორენ-და, მუ მიგეხვარებუნა თეცალ ფიქრეფიშ ჩათხინაფას?

ᲓᲔᲤᲘᲥᲠᲘᲗ, ᲛᲣᲡ ᲔᲚᲷ ᲘᲔᲰᲝᲕᲐ ᲗᲥᲕᲐᲜᲓᲔ

დეფიქრით: მუს ელჷ იეჰოვა ჩქიმდე? შილებე მანგარო ელაიკინან გურშა 2 კორინთელეფიშ 8:12-ს ინოჭარილ სიტყვეფქ: „მუშენდა ღორონთის არძაშ უმოსო მთელ გურით კეთებულ ძღვინ მოწონს. თის ოკო, კოჩიქ თინა შეწირას, მუთ უღჷ დო ვართ ხოლო თინა, მუთ ვა უღჷ“.

მუჭოთ თე მუხლშე იძირე, იეჰოვა თქვანდე თიშ შეწირუას ელჷ, „მუთ გიღუნა“, შხვანერო ქოფთქუათინ, თიშ კეთებას, მუთ შეილებუნა. თეშ რჩქინა მიგეხვარებუნა, ვართ შხვას შეუდარათ დუდ დო ვართ ასე შეილებუნან თინა შეუდარათ თის, მუთ ულირს შეილებუდეს.

დეფიქრით: ალბათ ღორონთიშ უმენტაშ მსახურცალო, თქვა ხოლო გარაგადენა, ნამდა ახალგაზრდობას, ნამ შეილებუდესინ, ირფელს ორთუდით იეჰოვაშო. თენა თიმ დროს თქვან მხარეშე მაქსიმუმ რდჷ. მარა ამდღა მუჭო რე საქმე, მუჟამსით თქვან მდგომარეობაქ დითირ? ალბათ, კინ ნამ შეილებუნან, ირფელს ორთუთ იეჰოვაშო, თის, მუთ ამდღარ მდგომარეობას რე თქვან მაქსიმუმ. თე საკითხის თეშნერო ქუჯინეთ-და, ქიმეხვადუთ, ნამდა იეჰოვაშო კინ თის ორთუთ, მუდგას თეიშახ ორთუდით. თიმწკუმა ნამ შეილებუდესინ, ირფელს ორთუდით თიშო დო ამდღა ხოლო ნამ შეილებუნან, ირფელს ორთუთ.

ᲨᲔᲘᲚᲔᲑᲣᲜᲐ ᲨᲮᲕᲔᲤᲘᲨ ᲛᲝᲮᲕᲐᲠᲐ

ხოლო ართ მხარე, ნამდგაშეთ ღირჷ დაფიქრება: თიშ მანგიორო, ნამდა ხვალე თიშე იფიქრათ, მუ გლახა მოიღეს სირჩინუექ, თი ჯგირ შედეგეფშე დეფიქრით, მუდგაქ ასაკშა მიშულას მაჸუნ. მაგალთო, მუჭოთ გამოცდილ ხანშამიშულირ ქრისტიანს, ასე თიშ კეთება შეილებუნა, მუთ ახალობას ვა გაკეთებედეს:

გეგნოჩით თქვან გამოცდილება შხვეფს. დეფიქრით თუდო მოჸუნაფილ მუხლეფშე:

მეფე დავით: „ახალგაზრდათ ქუვორდჷ დო ქოთ დიბრჩინ, მარა დღას ვამძირ მართალ კოჩ უმინჯურო წუმოტებულ, ვართ თიშ სქუალეფ - ქობალს თხულენდესკონ თეშ“ (ფსალმ. 37:25).

იესო ნავეშ სქუა: „მა უკვე ბღურუქ; ჯგირო გიჩქუნა, ნამდა ვა გამტყუნებე ნამთინ დუნაპირებ, ნამუთ იეჰოვაქ, თქვან ღორონთიქ, თქვან საჯგირობუოთ მერჩეს, არძა შეისრულეს, ნამთინ ვა გამტყუნებე“ (იეს. 23:14).

დავით დო იესო ნავეშ სქუას ბრელ წანას აფუდეს ღორონთშა ნამსახურებ დო ბრელ მუდგარენ აფუდეს ნაძირეფ ცხოვრებას. ათეშენ, თინეფ მუნეფიშ გამოცდილებაშე იჩიებუდეს თე სიტყვეფს, მუთ უმოს წონას არზენდჷ თინეფიშ ნარაგადის. შილებე აიშახ თქვა ხოლო გითქუალუნა თინეფცალ სიტყვეფ. მარა ასე, მუჟამსით თქვან ნარაგად თქვან გამოცდილებაშა რე გერსხილ, თის უმოს წონა უღჷ.

მაგალთო, შეილებუნა ქიგიშინათ, მუ კურთხევეფ მოიღეს იეჰოვაშ მსახურებაქ. ხომ ვაიღუნა მუდგაინ საინტერესო ვარდა გურიშ ემაკინალ ისტორია, ნამუთ ქაძირანს შხვეფს, ნამდა ღორონთიშ მსახურებას ხვამათ ეფშა ცხოვრება მოჸუნს? ქეჩით თინეფ შხვეფს. ალბათ, ნაძირეფ გაჸინა, მუშმაჯგირათ მოქმედენს თეცალ ისტორიეფიშ მორჩქილაფა შხვეფშა. ათეშენ, მორდებაქ ვა გაშუან, ნამდა ქეჩუათ შხვეფს თქვან ისტორიეფ. თენა და დო ჯიმალეფს რწმენას გუმანგარენს დო მეხვარებ, უმოს მონდომათ გაგრძელან ღორონთიშ მსახურება (რომ. 1:11, 12).

კრებაშ შეხვალამეფშა ფიზიკურო დასწრება შურო ქეშეილებუნან-და, და დო ჯიმალეფს თენა ხოლო მანგარო ქელუკინანს გურშა. თენა ქოთ თქვანო იჸი ჯგირ დო ქოთ შხვეფშო. ჟიშე მოშინაფილ კონი იჩიებ: „შეხვალამეფშა გილულა მოხვარ, გურქ ვა გომტირხას. მუ პჸოფირენს გურშეჭირებულს, მუჟამსით დარბაზის და დო ჯიმალეფწკუმა ვორექ?! ვოცადუქ, ჭიჭე-ჭიჭე საჩუქარეფით ჩქიმ მარდულობა ქუვოგინაფუე და დო ჯიმალეფს. მოკო, ვა მოფჩირთე კრებაშ შეხვალამეფს, ნამდა ქოთ აშო მიბღე გურიშელაკინა დო ქოთ იშო ელუკინე შხვეფს გურშა“.

ᲘᲔᲰᲝᲕᲐ ᲛᲐᲜᲒᲐᲠᲝ ᲐᲤᲐᲡᲔᲜᲡ ᲗᲥᲕᲐᲜ ᲐᲠᲗᲒᲣᲠᲝᲑᲐᲡ

ბიბლია ეფშა რე თიცალ ადამიანეფიშ მაგალითეფით, მიდგას ოკოდესინ თიზმა ვაკეთებედეს ღორონთშო, მარა იეჰოვას იშენით უჸორდჷ თინეფ. მაგალთო, დეფიქრით მოხუცებულ სიმონშე, ნამდგაქ იესოშ დაბადებას მაჭიშუ. ტაძარშა მეულაშ დროს, თინა ორწყედუკონ იჸიდ მუშე უმოს ახალგაზრდეფს, მით შხვადოშხვა მნიშვნელოვან საქმეს ორთუდეს. სიმონ შილებე ფიქრენდუკო, ნამდა იეჰოვაშო ბრელ მუთუნ ვაკეთებედ. მარა იეჰოვა გვალო შხვანერო უჯინედ თე ადამიანს. თიშ თოლს სიმონ „მართალ დო ღორონთიშმოშიშ კოჩ“ რდჷ დო თოთო იესოშ ძირაფაშ პატი მეჩჷ. თიქ სიმონს წინასწარმეტყველება ხოლო ორაგადაფუ, ნამდა თე ბაღანა მესია იჸუაფუდ (ლუკ. 2:25–35). მუჭოთ ვორწყეთ, იეჰოვა თე კოჩიშ მოხუცებულობას ვა უჯინედუნ, თიშო მთავარ სიმონიშ ძალიერ რწმენა რდჷ დო ათეშენ არზენდჷ მუშ წმინდა შურს.

თქვა ხოლო შეილებუნა რჯერდან, ნამდა გოკონან თისხი ვა გაკეთებედანინ ხოლო, იეჰოვა მანგარო აფასენს თქვან ართგურობას. ხომ ქორშუნა, ღორონთის „არძაშ უმოსო მთელ გურით კეთებულ ძღვინ მოწონს. თის ოკო, კოჩიქ თინა შეწირას, მუთ უღჷ დო ვართ ხოლო თინა, მუთ ვა უღჷ“ (2 კორ. 8:12).

თაშ ნამდა, მთელ ყურადღება თიშა გეგნიღით, მუდგაშ კეთება შეილებუნა. მაგალთო, დეფიქრით მსახურებაშ თი შხვადოშხვა ფორმეფშე, ნამდგაშათ დიო ხოლო შეილებუნა მონაწილებაშ მეღება, ჭიჭე ხანით რდასინ ხოლო. ვარდა ეგება შეილებუდან მიდგაინს გურშა ქელუკინათ რეკუათ ვარდა წერილით. აკაბცხა მუდგარენქ ხოლო შილებე მანგარქ იჸუას თანაქრისტიანშო, განსაკუთრებულო, მუჟამსით თეს ჯვეშ ქრისტიან ორთჷ.

ხანშამიშულირეფ, ძალა ვაიბაღუდანინ ხოლო, იშენით ბრელიშ კეთება შეილებუნა იეჰოვაშო. ქოძირით ჩარჩოს „ართ მუხლიქ სიცოცხლე ირსხჷ“ მოჩამილ შემთხვევა, ნამდგაქ აფრიკას მოხვად.

ვაგგოჭყორდან, ნამდა თეზმაწანიან თქვან რწმენა დო ართგურობა მანგარო ელუკინანს შხვეფს გურშა. თქვა მოთვინებაშ ცოცხალ მაგალით რეთჷ დო შეილებუნა რჯერდან, ნამდა „ღორონთ უსამართლო ვა რე დო ვეგიჭყოლიდუანს თქვან ხანდას დო ჸოროფას, ნამუთ თიშ სახელიშ გურშენ გიმირჩქინით თით, ნამდა ომსახურუდით დო ასე ხოლო ომსახურუთ წმინდეფს“ (ებრ. 6:10).

ᲜᲐᲛ ᲨᲔᲒᲐᲚᲔᲑᲔᲜᲐᲜ, ᲘᲠᲤᲔᲚ ᲒᲐᲙᲔᲗᲘᲗ ᲨᲮᲕᲔᲤᲘᲨ ᲛᲐᲮᲕᲐᲠᲔᲑᲔᲚᲝ

სტატისტიკა ოძირანს, ნამდა თი ხანშამიშულირეფს, მით შხვეფს ოხვარუნა, უჯგუშ ჯანმრთელობა დო აზროვნებაშ უნარ უღუნა დო უმოს ხანს ცხოვრენა.

მუშო ოკო რაგად, შხვეფშა ჯგირიშ კეთებას ვა გაჩერებე ირფელ, მუთ ასაკშა მიშულას მოჸუნს. ხვალე ღორონთიშ სამეფოს შეულებ საბოლათ მოსპას სირჩინუეშ დო ღურაშ დუდ – ჩქინ ცოდამ მდგომარეობა (რომ. 5:12).

მარა იეჰოვაშ მსახურება, მუდგაშათ შხვეფშა თიშ გაჩინებაფა ხოლო მიშურს, ამდღა ხოლო ამანგარენს თქვან იმენდის დო ჯგირო მოქმედენს თქვან ჯანმრთელობაშა ხოლო. ძვირფას ხანშამიშულირეფ, რთხინთჷ, ირიათო რშუდან, ნამდა იეჰოვა მანგარო აფასენს ირფელს, მუდგას თიშო ორთუთ დო თქვან რწმენაშ მაგალით კრებაშო ხოლო ძვირფას რე.