იეჰოვა გუგამანგარენა!

1. მუჭო რდეს ჯვეშ დროს გამანგარებულეფ იეჰოვაშ ართგურ მსახურეფ?

ᲑᲘᲑᲚᲘᲐ ხშირას ღორონთიშ ართგურ ქომოლკათას ძალიერ პიროვნებეფო მიშინუანს. მარა თინეფ შქას არძაშ უმოს ძალიერეფს ხოლო მინშა ძალა ელიებუდეს დო თიცალ გრძნობა უღდეს, ითამ მუთუნიშ კეთება ვეშულებდეს. მაგალთო, მუჭოთ ბიბლიაშე ბგებულენთ, მეფე დავით ნამთინეშა „გვალაცალო მანგარას“ გერდჷ დო ნამთინეშა შქურნაფილ რდჷ (ფსალმ. 30:7). სამსონს ხოლო, მიდგას განსაკუთრებულ ფიზიკურ ძალა უღუდ, ჯგირო არჩქილედ, ნამდა თენა ღორონთიშ დო თიშ წმინდა შურიშ ჭყოლოფა რდჷ დო თიშ უმშო დესუსტებუდ დო შხვეფცალ იჸუაფუდ (მსაჯ. 14:5, 6; 16:17). თე ართგურ ქომოლკოჩეფ იეჰოვაქ გამანგარ დო ხვალე თიშ ჭყოლოფათ რდეს ძალიერეფ.

2. მუშ ჭყოლოფათ გინირთჷ პავლექ ძალიერო თიმწკუმა, მუჟამსით სუსტ რდჷ? (2 კორ. 12:9, 10).

² მოციქულ პავლეს ჯგირო არჩქილედ, ნამდა სირთულეეფიშ გარზებელო თის ხოლო ოსაჭირუდ ძალა იეჰოვაშე (წეკითხით 2 კორინთელეფიშ 12:9, 10). მუჭოთ ჩქინდე ბრელს, პავლეს ხოლო ჯამრთელობაშ პრობლემეფ უღუდ (გალ. 4:13, 14). მინშა არასრულყოფილებაშ გურშენ სწორიშ კეთება ხოლო უჭირდჷ (რომ. 7:18, 19) დო მინშა მანგარ შქურნაფილ რდჷ (2 კორ. 1:8, 9). მარა მუჟამსით თეზმა სირთულეს ობრძოლუდ დო სუსტ რდჷ, ზუსტას თიმწკუმა გინირთჷ ძალიერო. მუშ ჭყოლოფათ მოხვად თექ? თინა იეჰოვაქ გამანგარ დო მეჩჷ ძალა, ნამუთ გარზებელო ოსაჭირუდ.

3. მუს გუვარჩიენთ თე სტატიას?

³ იეჰოვა ჩქი ხოლო მოპირნა, ნამდა ქომჩანა ძალას სირთულეეფიშ გარზებელო (1 პეტ. 5:10). მარა ოკო ვეფიფქრათ, ნამდა თენა მუშით მოხვადუ. ღორონთშე ძალა მიბღათინ ჩქინ მხარეშე მონდომა რე საჭირო. დეფიქრით თეცალ მაგალითშე: მანქანას მატორიშ ჭყოლოფათ შეულებ მოძრაობაშ დოჭყაფა, მარა შოფერქ გაზის კუჩხ ვემკუნჭირ-და, მანქანა ირო ართ ადგილს გერდას იჸი. თეშნერო, იეჰოვა ღორონთ ირიათო მზათ რე, ქომჩან ძალა სირთულეეფიშ გარზებელო, მარა ჩქინ მხარეშე თიშ მიოღებელო კონკრეტულ ნაბიჯეფიშ გინოდგუმა რე საჭირო. თე სტატიას გუვარჩიენთ, მუჭო გამანგარ იეჰოვაქ წინასწარმეტყველ იონა, იესოშ დიდა მარიამ დო მოციქულ პავლე, მუთ მიმეხვარებნა თიშ გაგებას, მუ აკეთ იეჰოვაქ ჩქინ გამანგარებელო დო მუ ოკო ვაკეთათ თიშო ძალაშ მიოღებელო. თეს გეძინელ, თის ხოლო ქობძირუნთ ამდღა მუჭო მამანგარენა იეჰოვა, მუჭოთ თეს ულირს, მუშ მსახურეფიშ შემთხვევას ორთუდ.

ᲛᲘᲦᲘᲗ ᲫᲐᲚᲐ ᲚᲝᲪᲕᲐᲗ ᲓᲝ ᲒᲘᲛᲝᲠᲙᲕᲘᲔᲑᲐᲗ

4. მუჭო შემლებნა იეჰოვაშე ძალაშ მეღება?

⁴ იეჰოვაშე ძალაშ მიოღებელო ართ-ართ საშვალება ლოცვა რე. შემლებნა დარწმუნებულ ვორდათ, ნამდა ღორონთ ქუპასუხენს ჩქინ ოთხუალს დო ქომჩანა ძალას, ნამუთ „ჩვეულებრივშე უმოს რე“ (2 კორ. 4:7). ღორონთშე ძალაშ მეღება, თიშ სიტყვაშ კითხირით დო ნაკითხირშე დაფიქრებათ ხოლო შემლებნა (ფსალმ. 86:11). მუჭოთ ბიბლიაშე ბგებულენთ ღორონთიშ სიტყვას დიდ ძალა უღჷ დო „მოქმედ“ რე (ებრ. 4:12). ათეშენ, მუჟამსით ლოცულენთ დო კითხულენთ ბიბლიას, ღებულენთ ძალას, ნამუთ თიშო გოსაჭირნა, ნამდა გაურზათ სირთულეეფს, ვადინუათ ხიოლ დო შეასრულათ რთულ დავალებეფ ხოლო. მორთ ქიგებგათ, მუჭო გამანგარ იეჰოვაქ წინასწარმეტყველ იონა.

5. მუჟამ დესაჭირ წინასწარმეტყველ იონას გაბედულებაქ?

⁵ ართშა წინასწარმეტყველ იონაქ ღორონთშე თიცალ დავალება მიღჷ, ნამდგაშ შესრულება გაბედულებას ითხინდჷ. თის აშქურინ თი ადგილშა ულაქ, სოდეთ იეჰოვა თე დავალებაშ შეიოსრულებერო უტენდჷ. ათეშენ, გეგნოჭყვიდ, ნამდა დუდ აურიდუკო თე დავალებაშ შესრულებას დო გეშართჷ თი გემშა, ნამუთ გვალო შხვა ადგილშა მიშჷ. იონაშ თეცალ საქციელიშ გურშენ შტორმიშ დროს თიქ დო თიწკუმა ართო გემს რდესინ თინეფქ დახე დოღურეს. თინა მეზღვაურეფქ შქა ზღვას რდესინ თეშ, გემშე გეგნაჸათეს. თეშ უკულ იონაქ დიდ ჩხომიშ ქვარას ქუმოხვად, სოდეთ მანგარ უკმელა რდჷ დო შურო მუთუნ ვერწყებედ. მუჭო ფიქრენთ, მუ აზრეფ მალედ იონას გონებაშა? პირველ რიგის, ალბათ თის იფიქრენდჷ, ნამდა ღურა ვეიოჩირთუდ ვარდა შილებე თის ხოლო ფიქრენდკო, ნამდა იეჰოვაქ მიოტუ თინა. მუჭოდგა ვარდუკონ, იონა შქურნაფილ იჸუაფუდ დო ნერვიანენდკონ იჸიდ.

6. მუჭოთ იონაშ 2:1, 2, 7-შე ბგებულენთ, მუქ გამანგარ იონა ჩხომიშ ქვარას?

⁶ მუ აკეთ იონაქ იეჰოვაშე ძალაშ მიოღებელო, მუჟამსით ჩხომიშ ქვარას რდჷ დო დუდის მეტებულო გინაფლენდჷ? პირველ, მუთ აკეთუნ თინა რდჷ, ნამდა ილოც (წეკითხით იონაშ 2:1, 2, 7). მართალ რე, იონაქ ვედემორჩილ იეჰოვაშ მითითებას, მარა დარწმუნებულ რდჷ, ნამდა თეშ უმკუჯინუო, ღორონთ ქიმირჩქილუანდჷ თიშ თანდაბლურო რაგადებულ ლოცვას დო ქოძირუნდჷ, მუჭო ნარღენდჷ დაშებულს. ხოლო მუ აკეთ იონაქ? თიქ დეფიქრ თი ირფელშე, მუთ წმინდა წერილეფს აფუდ კითხირებულ. სოვრეშე მიჩქნა თენა? თიშ ლოცვას, ნამუთ ინოჭარილ რე იონაშ მა-2 დუდის, თინა ირინუანს ბრელ თიცალ სიტყვას დო ფრაზას, ნამდგას ბიბლიაშ წიგნ ფსალმუნეფს შეფხვადუთ (მაგალთო, ქეშუდარით იონაშ 2:2, 5 ფსალმუნიშ 69:1; 86:7-ის). არგამა რე, იონას ჯგირო უჩქუდ წმინდა წერილეფიშ თე ადგილ დო განსაცდელიშ დროს თინეფშე დაფიქრებაქ დარწმუნ თინა, ნამდა იეჰოვა აუცილებერო ქიმეხვარებუდ. თექ ქოთ ქუმოხვად, ჩხომქ იონა წყარპიჯის გეკაჸათ. იეჰოვაქ ირსხჷ თინა, მუდგაშ უკულ იონას გაბედულებაქ ქიმიაჩ დო მზათ რდჷ, შეასრულკო ღორონთშე მეღებულ დავალება (იონ. 2:10—3:4).

7, 8. მუშ ჭყოლოფათ მიღჷ ღორონთშე ძალა სირთულეეფიშ დროს ართ ტაივანელ ჯიმაქ?

⁷ იონაშ შემთხვევა მიმეხვარებნა განსაცდელეფიშ დროს. გუვარჩუათ ტაივანს მახორუ ართ ჯიმაშ, ზიმინგიშ,b მაგალით. თის ჯამრთელობაშ სერიოზულ პრობლემეფ უღჷ დო თეწკუმა ართო, რწმენაშ გურშენ ოჯახიშ წევრეფშე სასტიკ წინააღმდეგობას ხვადუ. თეცალ სირთულეეფიშ უმკუჯინუო, იეჰოვაშე ძალას ლოცვათ დო ბიბლიაშ გიმორკვიებათ ღებულენს. თინა იჩიებ: „მინშა პრობლემეფიშ გურშენ თიცალ განერვიანებულ ვორექ, ნამდა განწყობა მიდინუ დო პირად გურაფაშ დუდ ხოლო ვა მიღჷ“. მარა ზიმინგ დუდის ვემუდვანს თეცალ მდგომარეობას. თინა გეუძინანს: „მუჟამსით დუდის თაშ ბგინაფლენქ, პირველ რიგის ბლოცულენქ დო იეჰოვას მოხვარას ფთხულენქ. უკულ ეიბდვანქ ჩქიმ ყურსასმენეფს დო ვურჩქილექ ღორონთიშ ოდიდებელ ობირეშეფს. მინშა ობირეშეფს ხონარდაბალო ევაჸუნუქ დო თეიშახ იბიბრქ, ონდო შინაგან სიმშვიდეს ვებგინანქ დო განწყობა ვადმართუ. თეშ უკულ, იბჭყანქ პირად გურაფას“.

⁸ პირად გურაფაშ ჭყოლოფათ ზიმინგიქ იეჰოვაშე მიღჷ ძალა, ნამდგათ შეიალებუ გიორჯგინკო სირთულეეფს. მაგალთო, ართშა სერიოზულ ოპერაცია იკეთუნ უკულ, ექიმქ უწუ, ნამდა თიშ ორგანიზმის ერითროციტეფიშ დონე მანგარ დოლაფირ რდჷ დო ფიქრენდჷ, ზისხირიშ გინობუნა დესაჭირებუდ. თე დროს ზიმინგის ქუგაშინ, ნამდა ოპერაციაშ წოხოლენ სერს პირად გურაფაშ დროს წეკითხ ართ დაშ ისტორია, მიდგას ზუსტას თეცალ ოპერაცია უკეთეს დო ერითროციტეფიშ თიშე უმოს დაბალ დონე უღუდ, ვინემ ზიმინგის. მარა თე დაქ ვარია თქუ ზისხირიშ გინობუნაშე დო საბოლათ, ირფელქ ჯგირო გეთუ. თე დაშ შემთხვევაქ ზიმინგ გამანგარ დო მეხვარ, ვადინუკო ღორონთიშ ართგურობა.

9. მუშ კეთება შეილებნა სირთულეეფ ძალას მიდმაიღანან-და? (ქოძირით სურათეფ).

⁹ დღას ქოჸოფეთო თიცალ სიტუაციას, მუჟამსით სირთულეეფიშ გურშენ, გურ თეშ გაფდეს დამონკებულ, ნამდა ლოცვაშ ძალა ხოლო ვაიღდეს? ვარდა ქოჸოფეთო თიცალ გინოშულადირ, ნამდა პირად გურაფაშ დუდ ხოლო ვაიღდეს? შილებე თე სიტუაციეფ ნაჩინებ რე თქვანო. მარა რშუდან, იეჰოვა ორწყე თქვან მდგომარეობას დო ირფელ ჯგირო არჩქილე. ათეშენ, გვალო ჟირ სიტყვათ რაგადებულ ლოცვაშ უკულ ხოლო შეილებნა დარწმუნებულ რდათ, ნამდა ღორონთ აუცილებერო ქიმერჩანა თის, მუთ თი მომენტის გოსაჭირუნა (ეფეს. 3:20). ფიზიკურო დო ემოციურო გლახათ ქორეთ დო კითხირიშ დო გიმორკვიებაშ დუდ დო ძალა ვაიღნან-და, შეილებნა ქუმურჩქილუათ ბიბლიაშ დო თიშა გერსხილ პუბლიკაციეფიშ აუდიო ჩანაწერეფს. თეს გეძინელ, თეცალ დროს შილებე მიგეხვარან, ჩქინ ნამთინე ობირეშიშ რჩქილაქ ვარდა ჩქინ ვებგვერდის გედვალირ ნამდგაინ ვიდეოშ ჯინაქ. მუჟამსით ლოცულენთ დო ლოცვაშ პასუხეფს გორუნთ თი საშვალებეფს, მუთ იეჰოვაქ თქვანო ხეშამალაფარო გინაშქვჷ, თეშნერო, თის არზენთ საშვალებას, გუგამანგარან რთულ სიტუაციეფიშ დროს.

ᲛᲘᲦᲘᲗ ᲫᲐᲚᲐ ᲗᲐᲜᲐᲥᲠᲘᲡᲢᲘᲐᲜᲔᲤᲘᲨ ᲡᲐᲨᲕᲐᲚᲔᲑᲐᲗ

10. მუჭო შეულებნა და დო ჯიმალეფს ჩქინ გამანგარება?

¹⁰ იეჰოვა ღორონთ თანაქრისტიანეფიშ საშვალებათ მოხვარნა დო მამანგარენა. მუჟამსით სირთულეეფს ფხვადუთ ვარდა თიშე ბნერვიანენთ, შემალებენან დო ვარ შევასრულათ ჩქინდა მოჩამილ რთულ დავალება, და დო ჯიმალეფქ შილებე თე დროს, თაშ ქოფთქუათინ, ჩქინ ძალათ გინირთან დო გურშა ემქექუან (კოლ. 4:10, 11). მეგობრეფიშ ელარნა, განსაკუთრებულო „გაჭირებაშ“ დროს მოსაჭირნა (იგავ. 17:17). ათეშენ, მუჟამსით ბგინაფლენთ, ნამდა ძალეფ მელიებუნა, ჩქინ თანაქრისტიანეფს შეულებნა მიმეხვარან დო ქელამდირთან ფიზიკურო, ემოციურო დო სულიერო. მორთ გუვარჩუათ, მუჭო მიღჷ გურიშ ექექაფა შხვეფშე იესოშ დიდა მარიამქ.

11. მუშენ ოსაჭირუდ მარიამს ძალა?

¹¹ მარიამქ იეჰოვაშე მნიშვნელოვან დავალება მიღჷ, მუდგაშ შეიოსრულებერო მართალო დიდ ძალა ოსაჭირუდ. წერმიდგინით, მუნერო გენერვიანებუდ თინა, მუჟამსით ღორონთიშ ანგელოზიქ, გაბრიელქ, უწუ, ნამდა დეორსულებუდ დო გეიორჩქინანდჷ ბაღანას. ვარინ მარიამ თე დროს დაქორწინებულ ვა რდჷ. ხვალე თენა ვარინ, ბაღანეფიშ რდუალაშ გამოცდილება ხოლო ვა უღუდ, მუშენდა სქუალეფ დღას ვა ნოჸვე დო ასე გებულენს, ნამდა ოკო გეიორჩქინას დო მორდას ბაღანაბოშ, მით მომავალს მესია იჸუაფ. წერმიდგინით, მუ რთულ სიტუაციას მოხვად მარიამქ. თის სქესობრივ კავშირ მითინწკუმა ვა ნოღვე დო ასე, მუშ საქომონჯოშა ორაგადე აფუდ, ნამდა ორსულო რდჷ (ლუკ. 1:26—33).

12. მუჭოთ ლუკაშ 1:39—45-ის ბგებულენთ, სოვრეშე მიღჷ მარიამქ ძალა?

¹² მარიამქ შხვეფშე ითხუ მოხვარა, მუდგაშ ჭყოლოფათ მიღჷ ძალა თე უცნაურ დო რთულ დავალებაშ შეიოსრულებერო. მაგალთო, თიქ მუშა მეშქუმალირ ანგელოზის, გაბრიელს, ქოთხუ უმოს დეტალეფშა ქეჩუკო მუშ დავალებაშ გურშენ (ლუკ. 1:34). თეშ უკულ, მუსხირენ დღაშა მარიამქ იუდეაშ „გვალამ მხარეშა“ მიდართჷ დო მუშ ნათესე ელისაბედის ქიმიაკითხუ. თექ მართალო ჯგირქ იჸუ მარიამშო. ელისაბედიქ ქაცქუ თის დო ღორონთიშ წმინდა შურქ წინასწარმეტყველურ სიტყვეფ ქარაგადაფუ მარიამიშ დიო დაბადებულ ვა რდუნ ფერ სქუაშ გურშენ (წეკითხით ლუკაშ 1:39—45). მარიამს მანგარო ელუკინ გურშა თე სიტყვეფიშ მორჩქილაფაქ დო იეჰოვაშ გურშენ თქუ, ნამდა „დიდებულ საქმეეფს ორთუდ მუშ ძალიერ კილეთ“ (ლუკ. 1:46—51). არგამა რე, გაბრიელიშ დო ელისაბედიშ საშვალებათ იეჰოვაქ გამანგარ მარიამ.

13. მუ ჯგირობუა მოუღ ართ ბოლივიელ დას თანაქრისტიანეფშე მოხვარაშ მეღებაქ?

¹³ მარიამცალო თქვა ხოლო შეილებნა თანაქრისტიანეფიშ საშვალებათ მიღათ ძალა იეჰოვაშე. გუვარჩუათ ართ ბოლივიელ დაშ, დასურიშ, შემთხვევა, მიდგაქ რთულ სიტუაციას ქუმოხვად დო გარზებელო ძალა ოსაჭირუდ. ართ დღას ექიმეფქ თიშ მუმას თიცალ ლახალაშ დიაგნოზ გეუშქვეს, ნამდგაშა მუთუნ ვემიხვარებე დო საავადმყოფოს ქუდანჯირუეს. ათეშენ დასურიქ, თიშ მიკოლუაფაშ მთელ პასუხიშმგებლობა მუშ დუდშა გეჭოფ დო ოკოდ მუშ მხარეშე ირფელ გუკეთებუდკო, მუთ შეულებუდ (1 ტიმ. 5:4). მარა, მუშო ოკო რაგად, თეშ კეთება ირიათო ვაფუდ ადვილ. თინა იჩიებ: „ბრელშა ნობღვე თიცალ სიტუაცია, მუჟამსით მიფიქრებ, ნამდა მეტიშ გარზება ვეშემლებუდ“. დუდშე თის მითინშა ვა უთხუ მოხვარა დო ენწყუნს, მუშენ მიქცუ თაშ: „ვა მოკოდ და დო ჯიმალეფ ჩქიმ პრობლემეფით შევაწუხკო. ფიფქრენდჷ, ნამდა ხვალე იეჰოვას შეულებუდ ჩქიმ მოხვარა, მარა უკულ ქიმეფხვად, ნამდა შხვეფშა დუდიშ არიდებათ ხვალე თის ვოცადუდ, ნამდა პრობლემეფ ჩქიმით მუვაგვარკო“ (იგავ. 18:1). დასურიქ გეგნოჭყვიდ, მუსხირენ მეგობარს ქიმეჭარკო, მუ მდგომარეობას რდჷ, მუდგაშ კეთებაქ ჯგირობუა მოუღ. თინა იჩიებ: „ნინათ ვემაჭარე, მუჭო გუმამანგარეს ჩქიმ ძვირფას და დო ჯიმალეფქ. თინეფქ საავადმყოფოშა ქუმმაკითხეს, ოჭკუმალ ქუმომღეს დო წამკითხეს გურიშემაქექაფალ ბიბლიურ მუხლეფ. მუშმაჯგირა რე თიშ შეგრძნება, ნამდა რთულ სიტუაციაშ დროს ხვალე ვა ვორეთ. თეშა მუთუნს ვემიართე. ჩქი, იეჰოვაშ დიდ ოჯახიშ ნაწილ ვორეთ დო პჸუნა და დო ჯიმალეფ, მით მზათ რენა, ირიათო ელამდირთან, ინგარან ჩქინწკუმა ართო დო მიმეხვარან, თინეფწკუმა ართო გუვაგრძელათ იეჰოვაშ მსახურება“.

14. მუშენ ოკო მიბღათ მოხვარა უხუცესეფშე?

¹⁴ ხოლო ართ საშვალება, მუდგაშ ჭყოლოფათ იეჰოვა ძალას მარზენა, რე ჩქინ ძვირფას უხუცესეფშე მეღებულ მოხვარა. თინეფ, მართალო ძღვინ რენა იეჰოვაშე, მუშენდა ზუსტას თე ჯიმალეფიშ საშვალებათ მამანგარენა დო გიშმაცოცხალენა იეჰოვა (ეს. 32:1, 2). ათეშენ, მუჟამსით ოწუხებელიშ გურშენ გურ შეგეჭირებნა, ალალას ქუდურაგადეთ უხუცესეფს დო ქეჩით, მუს გინაფლენთ. თინეფს მთელ გურით ოკონა, ელაიდირთან. ათეშენ, ვა თქუათ ვარია მოხვარაშე დო გეგმირჩქინით მარდულობა. რშუდან, თე ართგურ ქომოლკათაშ საშვალებათ იეჰოვა გამანგარენა დო ძალეფით ეგოფშანა.

ᲛᲝᲛᲐᲕᲐᲚᲘᲨ ᲘᲛᲔᲜᲓ ᲒᲣᲒᲐᲛᲐᲜᲒᲐᲠᲔᲜᲐ

15. მუ იმენდ მიღნა?

¹⁵ ბიბლიაშა გერსხილ მომავალიშ იმენდ ძალეფით ემოფშანა დო მოხვარნა, გუვაგრძელათ იეჰოვაშ მსახურება (რომ. 4:3, 18—20). ნამთინე ქრისტიან მარადიულო იჸუაფ ზეცას დო იმართველენს ქრისტეწკუმა ართო დო შხვეფ მარადიულო იცხოვრენა, სამოთხეთ გინორთელ დედამიწას. თე დიდებულ იმენდ მარზენა ძალას, ნამდა გავურზათ სირთულეეფს, იფქადაგათ სახიოლო ამბე დო შევასრულათ ჩქინდა მოჩამილ არძანერ დავალება (1 თეს. 1:3). მორთ ასე გუვარჩუათ, მუჭო გამანგარ მომავალიშ იმენდიქ პავლე მოციქულ.

16. მუშენ ოსაჭირუდ პავლე მოციქულს ძალა?

¹⁶ პავლე მოციქულს ხოლო არჩქილედ, ნამდა ღორონთშე ძალა ოსაჭირუდ. კორინთელეფშა მეჭარილ მაჟია წერილს თიქ მუშ დუდ „თიხაშ ჭურჭელს“ შეუდარ დო თინა ხოლო მიშინუ, ნამდა მოწინააღმდეგეეფ ავიწროენდეს, თხოზუდეს, მანგარ გლახათ ოქცუდეს დო მინშა თიშ სიცოცხლე საფრთხეშ თუდო რდჷ (2 კორ. 4:8—10). პავლექ კორინთელეფს თე წერილ მასმა მისიონერულ მოგზაურობაშ დროს მეჭარ, მარა ვა უჩქუდ, ნამდა წიმი ხოლო უფრაშ ელუდ. თე მისიონერულ მოგზაურობაშ დროს პავლე მოციქულქ ხოლო მუსხირენშა მოხვად რთულ სიტუაციას. მაგალთო, მუსხირენშა ოჭოფეს, მოწინააღმდეგეეფიშ ახნარებულ კათაქ ქიგიანთხჷ დუდის, გინუსქიდ ზღვას შქვიდაფას დო ციხეს ხოლო ქუმოხვად.

17. 2 კორინთელეფიშ 4:16—18-შ თანახმას, მუქ მეჩჷ პავლეს სირთულეეფიშ გარზებელ ძალა?

¹⁷ პავლეს მთელ ყურადღება მომავალიშ იმენდშა აფუდ გინოღალირ, მუდგაქ სირთულეეფიშ გარზებელ ძალა მეჩჷ (წეკითხით 2 კორინთელეფიშ 4:16—18). თიქ კორინთელ ქრისტიანეფს მეჭარ, ნამდა მართალ რე თიშ ფიზიკურ სხეულ „ხუმუდ“, მარა თეშ გურშენ გურ ვა უტირხუდ დო ვა წუხენდჷ. მუ რდჷ პავლეშ თეცალ განწყობაშ მიზეზ? მუჭოთ მიფშინეთ, თინა ირიათო მომავალშე ფიქრენდჷ. პავლეს დიდებულ იმენდ უღუდ. თის ზეცას მარადიულ სიცოცხლე ელუდ, მუდგაშ მაფასა თიშო მუთუნ ვა რდჷ დო თე ჯილდოშ მიოღებელო მზათ რდჷ, გეგნიღკო ირნერ სირთულე. თინა ირიათო ფიქრენდჷ თიშე, მუთ წიმი ელუდ დო შედეგო „ირდღას იახალებუდ“.

18. მუჭო გამანგარ გათელებაშ იმენდიქ ტიხომირ დო მუშ ოჯახ?

¹⁸ მორთ გუვარჩუათ, მუჭო გამანგარ ბულგარეთის მახორუ ართ ჯიმა, ტიხომირ, მომავალიშ იმენდიქ. თიშ უკლაშ ჯიმაქ, ზდრავკოქ, მუსხირენ წანაშ წოხოლე ავარიას ქუმოხვად დო დოღურ. თე ამბეშ უკულ ტიხომირ მანგარ გლახათ გინაფლენდჷ დუდის, ხშირას რდჷ მოწყინაფილ დო ონატრუდ მუშ ჯიმა. მუ ოხვარ ტიხომირს თე გურჭუაშ გარზებას? თინა დო მუშ ჩილ დო სქუა, წერმიდგინენა თი დროს, მუჟამსით ზდრავკო გეთელებ. ტიხომირ იჩიებ: «ჩქი ხშირას იფჩიებუთ თიშე, მუს გუვაკეთენთ, მუჟამსით ზდრავკო გეთელებ. მაგალთო, ფიფქრენთ, სო შეფხვადუთ თის, მუ ოჭკუმალს გუკეთენთ, მის დუვაპატიჟენთ თიშ გათელებაშ უკულ მონწყილ პირველ მეგობრულშა დო მუს ვუწინთ „ბოლო დღალეფიშ“ გურშენ». ტიხომირ იჩიებ, ნამდა თე დიდებულ იმენდშე ფიქრ დო თე ირფელიშ წარმოდგენა მუს დო მუშ ოჯახის ოხვარ, ქუგურზან გურჭუას დო მოთვინებათ უჯინან თი დროს, მუჟამსით იეჰოვა გათელენს ზდრავკოს.

19. მუ მიგეხვარებნა მომავალიშ იმენდიშ გამანგარებას? (ქოძირით სურათ).

¹⁹ მუჭო შეილებნა გემანგარათ მომავალიშ იმენდ, ნამდა თინა უმოს რეალურ რდას თქვანო? დედამიწას მარადიულო ცხოვრებაშ იმენდ ქოიღნან-და, წეკითხით თი ბიბლიურ მუხლეფ, სოდეთ ეჭარილ რე, მუნერ იჸუაფ სამოთხე დო დეფიქრით თე ირფელშე (ეს. 25:8; 32:16—18). ხშირას იფიქრით თიშე, მუნერ იჸუაფ ცხოვრება ახალ ქვეყნიერებას. თოლშა ქეწირინეთ თე ირფელ დო წერმიდგინით: მის ორწყეთ? მუშ ხონარ გარჩქილენა? მუს გინაფლენთ? თე ირფელ უჯგუშო წერმიდგინათინ, შეილებნა ქუგაჯინათ ჩქინ პუბლიკაციეფს მოჩამილ ნახანტეფს დო ილუსტრაციეფს, სოდეთ ეჭარილ რე სამოთხე. თეს გეძინელ, შეილებნა ქუჯინათ სამოთხეშ გურშენ ჩქინ ვებგვერდის გედვალირ მუსიკალურ ვიდეოკლიპეფს. მაგალთო, მუნერით რე, „ხოლოს რე სამოთხე“, „დრო ნანატრ დო ბედნერ“ დო „წერმიდგინ დრო“. მომავალიშ იმენდშენ დაფიქრებას დო ახალ ქვეყნიერებაშ წარმოდგენას დროს გეგმურთუნთ-და, უმოს ქექაშო გეგნიბღანთ თი სირთულეეფს დო პრობლემეფს, ნამუთ ამდღა მიღნა (2 კორ. 4:17). რშუდან, იეჰოვაშე მეღებულ თე დიდებულ იმენდ გუგამანგარენა დო ქიმერჩანა ძალეფს სირთულეეფიშ გარზებელო.

20. მუ გუმამანგარენა თიმწკუმა ხოლო, მუჟამსით ბგინაფლენთ, ნამდა ძალეფქ ქეშმელის?

²⁰ თიმწკუმა ხოლო, მუჟამსით ბგინაფლენთ, ნამდა ძალეფქ ქეშმელუეს დო მუთუნიშ დუდ ვა მიღნა, შემლებნა დარწმუნებულ ვორდათ, ნამდა „ღორონთ ქომჩანა ძალას“ (ფსალმ. 108:13). იეჰოვაქ ბრელ საშვალება მუჩეს თიშე ძალაშ მიოღებელო. უბრალოთ, ჩქინ მხარეშე, თინეფიშ გიმორნაფა რე საჭირო. ათეშენ, მუჟამსით გინაფლენთ, ნამდა დავალებაშ შეიოსრულებერო, სირთულეეფიშ გარზებელო ვარდა ხიოლ ვადინუათინ თიშო, მოხვარა გოსაჭირნა, ლოცვას გურ გეგნუფაჩით იეჰოვას დო პირად გურაფაშ საშვალებათ, გორით თიშ ხემძღვანელობა. მიღით გურიშელაკინა დო მოხვარა თანაქრისტიანეფშე, ირიათო რშუდან მომავალიშ დიდებულ იმენდ დო თოლშა ქეწირინეთ თინა. თე ირფელიშ უკულ, ღორონთ მუშ დიდებულ ძალათ გუგამანგარენა დო შეგალებენა, „მოთვინებათ დო ხიოლით გაურზათ ირფელს“ (კოლ. 1:11).