რდათ მორჩილეფ

1. მუქ შილებე მეცილან მორჩილებაშ გიმორჩქინას?

ᲓᲦᲐᲡ ქოჸოფეთო თიცალ სიტუაციას, მუჟამსით გაიჭირდეს მორჩილებაშ გიმორჩქინაქ? თაშ მოხვად მეფე დავითიშ შემთხვევას ხოლო, ათეშენ, თიქ ლოცვას ღორონთის თხუ: „სქან მორჩილებაშ სურვილ გომრჩქინ გურს“ (ფსალმ. 51:12). დავითის მანგარო უჸორდჷ იეჰოვა, მარა მინშა იშენით უჭირდჷ, დემორჩილკო თის. თაშ რე ჩქინ შემთხვევას ხოლო. მუ რე თეშ მიზეზ? პირველ, ჩქი დაუმორჩილებლობა მემკვიდრეობათ მიბღით ჩქინ პირველ მშობლეფშე. მაჟია, სატანა ირფელს ორთჷ, ნამდა ვედვემორჩილათ იეჰოვას, მუჭოთ ართ დროს მუქ აკეთ (2 კორ. 11:3). მასმა, თიცალ ხალხ შქას ფცხოვრენთ, მით მუნეფიშ ნებაშა ცხოვრენა დო გიმირჩქინანა დაუმორჩილებლობას (ეფეს. 2:2). ათეშენ ბრელ ოკო იფხანდათ, ნამდა ქივეწინააღმდეგათ, მუჭოთ ჩქინ ცოდამ მიდრეკილებეფს, თეშ სატანა დო თიშ ქვეყნიერებას ხოლო, ნამდა შემალებუან დევემორჩილათ იეჰოვა ღორონთის დო თინეფს, მიდგას იეჰოვაქ გარკვეულ უფლებამოსილება მეჩჷ.

2. მუს ნიშნენს ვორდათ მორჩილ? (იაკ. 3:17).

² წეკითხით იაკობიშ 3:17. ღორონთიშ შთაგონებათ ნაჭარა წერილს იაკობიქ თქუ, ნამდა ბრძენ ადამიან მორჩილ რე. დეფიქრით, მუს ნიშნენს თენა. ჩქი მთელ გურით ოკო მოკოდან დო მზათ ოკო ვორდათ, დევემორჩილათ თინეფს, მიდგას იეჰოვაქ გარკვეულ უფლებამოსილება მეჩჷ. მარა მუშო ოკო რაგად, ღორონთ ჩქინდე ველჷ, ნამდა მორჩილებას გეგმიფრჩქინანთ, მუჟამსით მიდგაინ თიშ კანონეფიშ გინორთას მოფთხინა (საქ. 4:18—20).

3. მუშენ რე მნიშვნელოვან დევემორჩილათ თინეფს, მიდგას ღორონთიქ გარკვეულ უფლებამოსილება მეჩჷ?

³ მინშა ჩქინო უმოს ადვილ იეჰოვაშ მორჩილება რე, ვინემ ადამიანეფიშ, მუშენდა იეჰოვა ირიათო სრულყოფილო ფხემძღვანელენა დო თიშ მითითებეფშა მუთუნ კილ ვეგორე (ფსალმ. 19:7). მართალ რე, ადამიანეფშე თეშ რაგად ვეშემლებნა, მარა არასრულყოფილებაშ უმკუჯინუო, ღორონთიქ მშობლეფს, სახელმწიფო მოხელეეფს დო უხუცესეფს გარკვეულ უფლებამოსილება მეჩჷ (იგავ. 6:20; 1 თეს. 5:12; 1 პეტ. 2:13, 14). ათეშენ, თინეფიშ მორჩილებათ იეჰოვას ვომორჩილუთ. თე სტატიას გუვარჩიენთ, მუჭო დევემორჩილათ თე ადამიანეფს თიმწკუმა ხოლო, მუჟამსით ვა ვოთანხმუთ თინეფშე მეღებულ მითითებეფს ვარდა რთულ მაფნა მეჸუნა.

ᲓᲔᲛᲝᲠᲩᲘᲚᲘᲗ ᲛᲨᲝᲑᲚᲔᲤᲡ

4. მუშენ უჭირს ბრელს მშობლეფიშ მორჩილება?

⁴ ამდღა ბრელ ახალგაზრდა ვეგმირჩქინანს მშობლეფიშ მორჩილებას დო უდუჯერებელ რე (2 ტიმ. 3:1, 2). მუ რე თეშ მიზეზ? ნამთინე ახალგაზრდა ორწყე, ნამდა მშობლეფ ვართნა თის, მუდგას სქუალეფშე ითხინა, ათეშენ უსამართლობაშ გრძნობა ურჩქინდუნა დო უჭირა თინეფიშ მორჩილება. შხვეფ ფიქრენა, ნამდა ამდღა გვალო შხვანერ ცხოვრება რე, ათეშენ მშობლეფიშ რჩევეფ გიმარნაფალო პრაქტიკულ ვა რე დო ნაბეტან შემზღუდველ რე. ახალგაზრდეფ, თქვა ხოლო ხომ ვა ნორღვენა თეცალ ფიქრეფ? ამდღა ბრელს უჭირს, მიაჸუნას ბიბლიას მოჩამილ იეჰოვაშ მითითებას: „ქუდუჯერით თქვან მშობლეფს თეშ, მუჭოთ უფალიშ ნება რე, მუშენდა თაშ რე სწორ“ (ეფეს. 6:1). მორთ გუვარჩუათ, მუ მიგეხვარებნა, რდათ მშობლეფიშ მორჩილეფ.

5. მუჭოთ ლუკაშ 2:46—52-შე იძირე, მორჩილებაშ მუ ჯგირ მაგალით დომტუეს იესოქ?

⁵ მორჩილებაშ არძაშ უჯგუშ მაგალით იესოქ დომტუეს, ათეშენ, ბრელ მუდგარენიშ გურაფა შეილებნა თიშე (1 პეტ. 2:21—24). სრულყოფილ იესოს არასრულყოფილ მშობლეფ ჸუნდჷ, მარა იშენით ირიათო გიმირჩქინანდჷ თინეფიშ მიმართ პატიცემას თიმწკუმა ხოლო, მუჟამსით შეცდომეფ მალედეს ვარდა ვარჩქილედეს იესოშ (გამ. 20:12). ქიგიფშინათ მუქ მოხვად, მუჟამსით იესო 12 წანერ რდჷ (წეკითხით ლუკაშ 2:46—52). თინა მუშ მშობლეფქ იერუსალიმშა, პასექიშ დღახუშ აღნიშნებელო, მიდეჸუნეს. მარა უკახალე ირთუდესინ იესოქ იერუსალიმს ქუდოსქიდ, მუდგაშა იოსებ დო მარიამს გურ ვა გუჩამნა. ვარინ მუჭოთ მშობლეფიშ, თინეფიშ პასუხიშმგებლობაშა მიშეშ, დერწმუნესკო, ნამდა პასექიშ დღახუშ უკულ, ჸუდეშა დორთაშ დროს, სქუალეფშე ნამთინ ვარკუდეს. თინეფ სუმ დღას გორუნდეს იესოს დო მუჟამსით ქიმიოგორუეს, მარიამქ იესოს გუდღან მოხვალამირიშ გურშენ. იესოს შეულებუდ იფიქრუკო, ნამდა მარიამქ უსამართლოთ მიქცუ დო გურ მიჸონკო თეშ გურშენ, მარა თაშ ვა მოქციებე. თიქ მუშ მშობლეფს პატიცემათ დურაგადუ დო გემუანო უპასუხ. მართალ რე, იოსებ დო მარიამქ ვენანჭეს იესოშ პასუხის, მარა, მუჭოთ ბიბლიაშე ბგებულენთ იესო ირიათო იშენით „უჯერდჷ თინეფს“.

6, 7. მუქ შილებე მეხვარას ახალგაზრდეფს მშობლეფიშ მორჩილებას?

⁶ ახალგაზრდეფ, გიჭირანო მშობლეფიშ მორჩილება თიმწკუმა, მუჟამსით მუდგარენ შეცდომეფ მალენა ვარდა ბოლოშა ვარჩქილენა თქვან? თაშ ქორენ-და, მუ მიგეხვარებნა, თე ირფელიშ უმკუჯინუო, იშენით დუჯერათ თინეფს? პირველ რიგის დეფიქრით, მუ დამოკიდებულება უღჷ იეჰოვას თე საკითხიშ მიმართ. ბიბლიას ბკითხულენთ, ნამდა, მუჟამსით მშობლეფს ომორჩილუთ „თენა მოსაწონ რე უფალშო“ (კოლ. 3:20). იეჰოვას ჯგირო უჩქჷ, ნამდა მინშა თქვან მშობლეფს ბოლოშა ვარჩქილენა თქვან დო თიცალ წესეფს ირზენა, ნამდგაშ მორჩილება იშენდოიშენ ადვილ ვა რე. მუჟამსით თე ირფელიშ უმკუჯინუო იშენით ომორჩილუთ მშობლეფს, ღორონთის გურს უხარენთ.

⁷ მაჟია, დეფიქრით, მუს გინაფლენა თქვან მშობლეფ, მუჟამსით ომორჩილუთ თინეფს. მორჩილებათ თინეფს გურს უხარენთ დო თიშ მიზეზის ხოლო არზენთ, ნამდა უმოსო გონდუდან (იგავ. 23:22—25). ხვალე თენა ვარინ, მშობლეფიშ მორჩილება თქვა ხოლო მიგეხვარებნა, უმოსო დეახლოვათ თინეფს. ბელგიას მახორუ ართ ახალგაზრდა ჯიმა, ალექსანდრე, მირაგადნა, მუჭო მეხვარ მშობლეფიშ მორჩილებაქ თინეფწკუმა დაახლოებას. თინა იჩიებ: „თიშ უკულ, მუთ მშობლეფს უმოსო ვომორჩილუქ, ჩქინ ურთიერთობაქ უჯგუშობაშა დითირ. ასე ართიანწკუმა უმოს გემუან დო ხოლოშიან ურთიერთობა მიღნა“.b მასმა, დეფიქრით, მომავალს მუ ჯგირობუას მოიღანა მშობლეფიშ მორჩილება. ბრაზილიას მახორუ ართ 23 წანერ ახალგაზრდა, სახელო პაულო, თეცალ მუდგარენს იჩიებ: „მშობლეფიშ მორჩილებაქ მანგარო ეწმოდირთჷ. თეშ ჭყოლოფათ ამდღა თავისფალო ვომორჩილუქ იეჰოვას დო თინეფს, მიდგას გარკვეულ ძალაუფლება უღნა“. ახალგაზრდეფ, ღორონთიშ სიტყვას მოჩამილ რე მნიშვნელოვან მიზეზ, მუდგაშ გურშენ ოკო დემორჩილათ მშობლეფს. თექ ჭარჷ: „თი დროს იჸუაფუქ წარმატებულ დო ბრელ ხანს იცხოვრენქ დედამიწას“ (ეფეს. 6:2, 3).

8. მუშენ ომორჩილ ბრელ ახალგაზრდა მშობლეფს?

⁸ ბრელ ახალგაზრდაქ მუშ დუდშა გეგმოცად, ნამდა ირფელ უჯგუშობაშა მეურს, მუჟამსით მშობლეფს ომორჩილ. ბრაზილიას მახორუ ართ 16 წანერ ახალგაზრდას, სახელო ლუიზას, დუდშე ვარჩქილედ, მუშენ ვარზენდეს მშობლეფ უფლებას, უღუდკო ტელეფონ, მუჟამსით მუშ მახანეფიშ უმენტაშის უღუდ. მარა უკულ ქიმეხვად, ნამდა თეცალ მოქმედებათ სინამდვილეს მშობლეფ თის თხილანდეს. ასე ლუიზა იჩიებ: „დარწმუნებულ ვორექ, მშობლეფიშ მორჩილება კინ ჩქიმ საჯგირობუოთ რე, მუშენდა ირო თიცალ რჩევეფს მარზენა, მუთ მოსაჭირ“. ამერიკას მახორუ ართ 18 წანერ დას, ელისაბედის, კანკალეშა ამდღა ხოლო უჭირს მშობლეფიშ მორჩილება. თინა იჩიებ: „მუჟამსით ბოლოშა ვა მარჩქილე, მუშენ ფთხინა ჩქიმ მშობლეფ კონკრეტულ წესიშ მეჸუნას, იფშინანქ, მუჭო დოფთხილუ ულირს თინეფიშ დოდგინელ წესეფიშ მორჩილებაქ“. სომხეთის მახორუ 17 წანერ ახალგაზრდა, სახელო მონიკა, იჩიებ, ნამდა მშობლეფიშ მორჩილებას უმოს ჯგირ შედეგეფ მოუღ თიშო, ვინემ დაუმორჩილებლობას.

ᲓᲔᲛᲝᲠᲩᲘᲚᲘᲗ ᲡᲐᲮᲔᲚᲛᲬᲘᲤᲝ ᲛᲝᲮᲔᲚᲔᲔᲤᲡ

9. მუს ფიქრენს ბრელ ხელისუფლებაშ მორჩილებაწკუმა დაკავშირებით?

⁹ ბრელ ოთანხმ თი აზრის, ნამდა საჭირო რე, პჸუნდან ხელისუფლება დო დევემორჩილათ თინეფიშ ნამთინე კანონს (რომ. 13:1). მარა კინ თე ადამიანეფქ შილებე ვედემორჩილან ხელისუფლებაშ თიცალ კანონეფს, ნამუთ ვა მოწონა ვარდა მიორჩქუნა, ნამდა უსამართლო რე. მაგალთო, ევროპაშ ართ-ართ ქიანას გინაგაფალეფიშ გაფაწკუმა დაკავშირებით გამოკითხვაქ იჸუ ჩატარებულქ. მუჭოთ თე გამოკითხვაშე იძირ, ბრელ ადამიან ფიქრენს, ნამდა შუროთ ვა რენა ვალდებულ, გინიგან გინაგაფალეფ თინა უკანონოთ ქიმიორჩქუნან-და. ათეშენ, გასაკვირ ვა რე, ნამდა თე ქიანაშ მოქალაქეეფ გინაგაფალეფიშ ხვალე 67 პროცენტის გაფულენა.

10. მუშენ ოკო დევემორჩილათ ხელისუფლებას თიმწკუმა ხოლო, მუჟამსით შილებე თეშ კეთება ვა მოკოდან?

¹⁰ ბიბლიაშე ბგებულენთ, ნამდა ადამიანურ მთავრობეფ ხალხიშ ტანჯებაშ მიზეზ რენა, თის ხოლო ბგებულენთ, ნამდა თინეფს სატანა აკონტროლენს დო მალას გენადგურებნა (ფსალმ. 110:5, 6; ეკლ. 8:9; ლუკ. 4:5, 6). ღორონთიშ სიტყვა თის ხოლო მოგებაფუანა, ნამდა „მით ხელისუფლებას ოწინააღმდეგ, ღორონთიშ დოდგინელ წესრიგიშ წინააღმდეგ მეურს“. ამდღა ღორონთ მთავრობეფს არზენს თიშ უფლებას, ნამდა წესრიგიშ დაცვებელო დადგინან წესეფ დო ჩქინდე თინეფიშ მორჩილებას ელჷ. ათეშენ, „მიდგას მუ ოკუთვნუნ“, თინა ოკო მეფჩათ, მუდგაშა მიშურს გინაგაფალეფიშ გაფა დო პატიცემა დო მორჩილებაშ გიმორჩქინა ხელისუფლებაშ მიმართ (რომ. 13:1—7). შილებე ნამთინე კანონიშ მორჩილება მიჭირდან, მუშენდა მიმორჩქუდან, ნამდა უსამართლო რე ვარდა თე კანონით ბრელ ოგაფურს ფთხინა. მარა თე ირფელიშ უმკუჯინუო, დოპჸუნთ იეჰოვაშ მითითებას დო ვომორჩილუთ ხელისუფლებას, ონდო თინეფ ღორონთიშ კანონიშ წინააღმდეგ ულას ვა მოფთხინა (საქ. 5:29).

11, 12. მუჭოთ ლუკაშ 2:1—6-ის იძირე, მუ მსხვერპლშა იდეს იოსებ დო მარიამქ, ნამდა დემორჩილესკო კანონს დო მუ მიღეს შედეგო? (ქოძირით სურათეფ).

¹¹ ხელისუფლებაშ მორჩილებაწკუმა დაკავშირებით ბრელ მუდგარენიშ გურაფა შემლებნა მარიამ დო იოსებშე. თინეფ მზათ რდეს, დემორჩილესკო ხელისუფლებას თიმწკუმა ხოლო, მუჟამსით თეშ კეთება ვა რდჷ ადვილ (წეკითხით ლუკაშ 2:1—6). მაგალთო, ართშა ავგუსტუსიქ, მით რომიშ იმპერატორ რდჷ, ზოჯჷ, ნამდა ეიოჭარალო არძაქ მუშ-მუშ ქალაქშა გენორთკო. მარიამ დო იოსებშო თე მითითებაშ მეჸუნა ვა რდჷ ადვილ, მუშენდა მარიამ თუთას ინორდჷ დო თინეფქ იოსებიშ მშობლიურ ქალაქშა, ბეთლემშა, გენორთესკონ, 150 კილომეტრ ოკო მიკორთესკო. მუშო ოკო რაგად, თე მგზავრობა განსაკუთრებულო რთულ იჸუაფუდ მარიამშო. თინა ნერვიანენდკონ იჸიდ, მუჭოთ მუშ, თეშ ბაღანაშ ჯამრთელობაშე. მუშო ოკო რაგად, იოსების ხოლო თე ოწუხებელ აღვენუდ. თეს გეძინელ, ჟირხოლო შილებე ფიქრენდეს, მუ ოკო ქიმნესკო, მარიამს მშობიარობა შარას ქუდაჭყაფუდ-და. თის ხომ ქვარაშა მომავალ მესია ელუხედ. თე ირფელიშ გურშენ ხომ ვესხუნუანდეს, ვედემორჩილესკო მთავრობაშ გიშაშქუმალირ კანონს?

¹² მართალ რე, მარიამ დო იოსების ნერვიანობაშ მიზეზეფ უღდეს, მარა იშენით გეგმირჩქინეს მორჩილება დო ქიგიოდირთეს ბეთლემიშ შარას. იეჰოვაქ აკურთხჷ თინეფ გიმორჩქინელ მორჩილებაშ გურშენ. მარიამქ უსაფრთხოთ გენორთჷ ბეთლემშა, გეიორჩქინ ჯამრთელ ბაღანა დო ხვალე თენა ვარინ, ხე შეუნწყუ ბიბლიურ წინასწარმეტყველებაშ შესრულებას (მიქ. 5:2).

13. მუ ჯგირობუაქ შილებე მაჸუნას ჩქინ გიმორჩქინელ მორჩილებას?

¹³ მუჟამსით ვომორჩილუთ მთავრობას თენა ჯგირობუაშ მუმაღალარ რე, მუჭოთ ჩქინო, თეშ შხვეფშო ხოლო. მუშენ იფჩიებუთ თეს? მაგალთო, მუჟამსით გიმიფრჩქინანთ მორჩილებას თეთ ეიფჩილითუანთ თი გლახა შედეგეფს, მუთ კანონიშ დაუმორჩილებლობას მოჸუნს (რომ. 13:4). მუჟამსით მთავრობას ვომორჩილუთ თეთ ხეს ვუნწყუნთ, ნამდა მთავრობაშ წარმომადგენელეფს ჯგირ წარმოდგენაქ დასქიდან იეჰოვაშ მოწმეეფიშ გურშენ. მაგალთო, ნიგერიას, წანეფიშ წოხოლე, ჯარიშკოჩეფქ შქა შეხვალამაშ დროს დარბაზშა გენიჭკირეს დო გორუნდეს აბუნტებულეფს, მით ვარიას იჩიებუდეს გინაგაფალეფიშ გაფაშე. მარა ჯარიშკოჩეფიშ უნჩაშიქ უზოჯ თინეფს, ქიდიტუესკო თექიანობა დო უწუ: „იეჰოვაშ მოწმეეფ ირიათო გაფულენა ოგაფურეფს“. თაშ ნამდა, ირო, მუჟამსით ვომორჩილუთ მთავრობაშ დოდგინელ კანონეფს, თეშნერო ხეს ვუნწყუნთ, ნამდა ღორონთიშ ხალხის ჯგირ რეპუტაცია უღდას შხვეფიშ თოლს. მის უჩქჷ, ართ დღასით ჯგირ რეპუტაციაქ შილებე დეცვას ჩქინ და დო ჯიმალეფ (მათ. 5:16).

14. მუქ მეხვარ ართ დას, დემორჩილკო ხელისუფლებას?

¹⁴ მინშა, იშენით შილებე ირიათო ადვილ ვა მაფდან, დევემორჩილათ ხელისუფლებაშ მითითებეფს. ართ და, ჯოანა, მით შეერთებულ შტატეფშე რე, თეცალ მუდგარენს იჩიებ: „ჩქიმო მანგარ რთულ რდჷ მორჩილებაშ გიმორჩქინა მთავრობაშ წარმომადგენელეფიშ მიმართ, მუშენდა ჩქიმ ოჯახიშ წევრეფშე ნამთინე, ხელისუფლებაშე მანგარ უსამართლობას ხვადუდ“. მარა ჯოანაქ გეგნოჭყვიდ, დითირუკო დამოკიდებულება მთავრობაშ მიმართ. თეშო თიქ მუსხირენ ნაბიჯ გეგნოდგჷ. პირველ, თიქ მიოტუ სოციალურ მედიას თიცალ ინფორმაციაშ კითხირ, მუთ ხელისუფლებაშ წარმომადგენელეფშე გლახას ოფიქრებაფუანდჷ (იგავ. 20:3). მაჟია, თიქ ილოც დო იეჰოვას ხელისუფლებაშ თირუა ვარინ, თხუ, ნამდა ქიმეხვარკო, ხოლო უმოსო მიენდკო თის (ფსალმ. 9:​9, 10) დო მასმა, თიქ ნეიტრალიტეტიშ გურშენ ჩქინ პუბლიკაციეფს სტატიეფ წეკითხჷ (იოან. 17:16). ასე ჯოანა უმოს კმაყოფილებას დო სიმშვიდეს გინაფლენს, მუშენდა შეიალებუ გავითარკო მორჩილება დო პატიცემა ხელისუფლებაშ მიმართ.

ᲓᲔᲛᲝრᲩᲘᲚᲘᲗ ᲘᲔᲰᲝᲕᲐᲨ ᲝᲠᲒᲐᲜᲘᲖᲐᲪᲘᲐᲨᲔ ᲛᲔᲦᲔᲑᲣᲚ ᲮᲔᲛᲫᲦᲕᲐᲜᲚᲝᲑᲐᲡ

15. მუშენ შილებე მინშა გამჭირდან, დევემორჩილათ იეჰოვაშ ორგანიზაციაშე მეღებულ მითითებეფს?

¹⁵ იეჰოვა ჩქინდე ითხინს, ქუგუგონათ თინეფს, „მიდგას [კრებას] ხემძღვანელობა ოვალ“ (ებრ. 13:17). მართალ რე, იესო, კრებაშ დუდ, სრულყოფილ რე, მარა თეშ რაგად ვეშემლებნა თი ჯიმალეფშე, მიდგას თიქ ხემძღვანელობა დავალ. ათეშენ, შილებე მინშა გამჭირდან თინეფიშ მორჩილებაქ, განსაკუთრებულო თიმწკუმა, მუჟამსით თიცალ მუდგარენს ფთხინა, მუდგაშ კეთება იშენდოიშენ ვა მოკონა. ართშა მოციქულ პეტრეს ხოლო გუჭირდჷ მორჩილებაშ გიმორჩქინაქ, მუჟამსით ანგელოზიქ უწუ, უჭკუმუდკო ცხოველიშ ხორც, ნამუთ მოსეშ კანონით უწმინდურ რდჷ. პეტრექ ართშა ვარინ, სუმშა თქუ ვარია თეშ კეთებაშე (საქ. 10:9—16). მუშენ იჩიებუდ პეტრე ვარიას თე მითითებაშ მეჸუნაშე? თის გუჭირდჷ თიშ ინონჭაფაქ, მუშენდა გენესხვავებუდ თი ირფელშე, მუდგას პეტრე მთელ ცხოვრებას ორთუდ. დეფიქრით, მოციქულ პეტრეს სრულყოფილ ანგელოზიშ მორჩილებაქ გუჭირდჷ-და, მუ გასაკვირ რე, ნამდა მინშა ჩქი ხოლო გამჭირდან, დევემორჩილათ არასრულყოფილ ჯიმალეფშე მეღებულ მითითებეფს?!

16. მუ აკეთ პავლექ თიშ უმკუჯინუო, ნამდა ფიქრენდჷ, მეღებულ მითითება გონივრულ ვა რდჷ? (საქ. 21:23, 24, 26).

¹⁶ მორჩილებაშ ჯგირ მაგალით მოციქულ პავლექ ხოლო დომტუეს. თინა მზათ რდჷ, გიმირჩქინკო მორჩილება თიმწკუმა ხოლო, მუჟამსით ფიქრენდჷ, ნამდა მეღებულ მითითება გონივრულ ვა რდჷ. ქიგიფშინათ ართ შემთხვევა. იუდეველ ქრისტიანეფ პავლეშ გურშენ ირჩქილუაფუდეს, ნამდა უპატიცემლობას გიმირჩქინანდჷ მოსეშ კანონიშ მიმართ დო შხვეფს ხოლო ელუჩანდჷ, გინურთესკო თის (საქ. 21:21). ათეშენ უხუცესეფქ უწუეს, ნამდა ოთხ კოჩწკუმა ართო მიდართკო ტაძარშა დო შეასრულკო განწმენდაშ წეს, მუდგათ დემტკიცებუდ, ნამდა თი ირფელ, მუდგას პავლეშ გურშენ იჩიებდეს ტყურა რდჷ დო კანონს ხოლო იცვენდჷ. მართალ რე, პავლეს ჯგირო უჩქუდ, ნამდა ქრისტიანეფს მეტო ვემეთხიებდეს მოსეშ კანონიშ დაცვება დო თინა ხოლო არჩქილედ, ნამდა მუთუნს ვაშენდჷ, მარა იშენით ხეთეშე გეგმირჩქინ მორჩილება დო გაკეთ თინა, მუთ იუდეველ უხუცესეფქ უწუეს. მუჭოთ ბიბლიაშე ბგებულენთ, „მაჟია დღას მიდეჸუნ პავლექ თი კოჩეფ დო თინეფქ განწმენდაშ წეს შეასრულეს“ (წეკითხით საქმეეფიშ 21:23, 24, 26). პავლეშ მორჩილებაქ ხე შეუნწყუ და დო ჯიმალეფ შქას ართობას (რომ. 14:19, 21).

17. მუ დიგურეთ სტეფანიშ შემთხვევაშე?

¹⁷ ართ დას, სახელო სტეფანის, მანგარო გუჭირდჷ, მიაჸუნკო პასუხიშმგებელ ჯიმალეფიშ მეღებულ გადაწყვეტილებას. თინა დო მუშ ქომონჯ მუნეფიშ ქიანას უცხოენოვან ჯგუფის მსახურენდეს, მუდგას ბედნერობა მოუღუდ თინეფშა. მარა ართ დღასით ფილიალქ თე ჯგუფიშ გაუქმება გინოჭყვიდ დო სტეფან დო თიშ მეუღლე კინ თი კრებაშა დართინუეს, ნამუთ მუნეფიშ მშობლიურ ნინაშა რდჷ. სტეფან იჩიებ: „ალალას ქოიწუათინ, შუროთ ვაფხიოლებ თე გადაწყვეტილება. ვა ფიფქრენდჷ, ნამდა ჩქიმ მშობლიურ ნინაშ ტერიტორიას მაუწყებელეფიშ მანგარ საჭიროება რდჷ“. მარა თე ირფელიშ უმკუჯინუო, სტეფანიქ გეგმირჩქინ მორჩილება დო მიაჸუნ მითითებას. თინა აგრძელენს: „დროშ მიკულაწკუმა ართო ქიმეფხვად, ნამდა ჯიმალეფიშ მეღებულ გადაწყვეტილება მართალო გონივრულ რდჷ. ჩქინ ახალ კრებას ბრელ თიცალ და დო ჯიმა რე, მიდგაშ ოჯახიშ წევრეფ ვამსახურნა იეჰოვას. ათეშენ, მა დო ჩქიმ მეუღლექ თინეფშო ოჯახცალო გინიფრთით დო მუთ შემლებნან ირნერო ელურეთ. თეს გეძინელ, ბიბლიას ვოგურუანქ ართ დას, მით არააქტიურ რდჷ დო ამარდე დირთჷ კრებაშა. ხვალე თენა ვარინ, უმოს დრო მიღჷ პირად გურაფაშო ხოლო. ბედნერ ვორექ, ნამდა სუფთა სინდისით ვომსახურუქ იეჰოვას, მუშენდა შემალებუ მორჩილებაშ გიმორჩქინაქ თიშ უმკუჯინუო, ნამდა თენა ვა რდჷ ადვილ“.

18. მუ ჯგირობუა მომღეს მორჩილებაქ?

¹⁸ ჩქი შემლებნა დიბგურუათ მორჩილებაშ გიმორჩქინა. დეფიქრით ართ მუდგარენშე, იესოქ მორჩილება იდეალურ პირობეფით ვარინ, თი ოტანჯებელიშ ჭყოლოფათ დიგურუ, მუთ გინიღ (ებრ. 5:8). იესოცალო, ჩქი ხოლო ხშირ შემთხვევას, მორჩილებაშ გიმორჩქინას სირთულეეფიშ დროს ბგურაფლენთ. მაგალთო, მუჟამსით ᲙᲝᲕᲘᲓ-19 პანდემიაქ დიჭყჷ, მიბღით მითითება, ნამდა მეტო ვეკიბშაყარითკო დარბაზეფს დო მივოტეთკო კარდოკარ მსახურება. ქიგიშინით, გაიჭირდესო თე მითითებეფიშ მორჩილებაქ? შილებე თაშ რდჷ, მარა არგამა რე, მორჩილებაქ არძა დოფთხილუეს, ჩქინ ართობას შეუნწყუ ხე დო მუთ არძაშ უმოს მთავარ რე, გურ გუხარით ჩქინ ძვირფას ღორონთ იეჰოვას. ასე ჩქინდე თითოულ უჯგუშო ვორეთ მომზადებულ, ნამდა მივაჸუნათ ნებისმიერ მითითებას, ნამდგას „დიდ გაჭირებაშ“ დროს მიბღენთ. ჩქინ სიცოცხლე ზუსტას თე მითითებეფიშ მორჩილებაშა იჸუაფ დამოკიდებულ! (იობ. 36:11).

19. მუშენ გოკონა მორჩილებაშ გიმორჩქინა?

¹⁹ თე სტატიაშე ქობძირით, ნამდა მორჩილებაშ გიმორჩქინას ანაყუ კურთხევეფ მოჸუნს. ჩქი ვომორჩილუთ იეჰოვას, მუშენდა მიჸორა თინა დო მოკონა, გურ გუხარათ (1 იოან. 5:3). ჩქი დღას ვეგნმაგინენა იეჰოვაშა თი ირფელშო, მუთ ჩქინო აკეთ (ფსალმ. 116:12). მარა მუდგაშ კეთება შემლებნა თინა რე, ნამდა დევემორჩილათ, მუჭოთ ღორონთის, თეშ თინეფს, მიდგას გარკვეულ უფლებამოსილება უღნა. მორჩილებაშ გიმორჩქინათ ვოძირანთ, ნამდა ჭკვერულო იფქციებუთ, მუთ გურს უხარენს იეჰოვას (იგავ. 27:11).