„ჩქიმწკუმა ართო იჸუაფუქ სამოთხეს“

1. მუ უწუ იესოქ ღურაშახ ჭიჭე ხანით ადრე დამნაშავეს, ნამუთ მუშ გვერდით მიკოჭკადუდ? (ლუკ. 23:39—43)

ᲘᲔᲡᲝ დო ჟირ დამნაშავე, ნამუთ თიშ გვერდით მიკოჭკადუდეს, საშინელ ჭუას გინაფლენდეს დო ტანჯებათ ღურუდეს (ლუკ. 23:32, 33). თინეფ, ჟირხოლო, ლანძღუნდეს იესოს, სოვრეშეთ იძირე, ნამდა თიშ მოწაფეეფ ვა რდეს (მათ. 27:44; მარ. 15:32). მარა ართიქ დამოკიდებულება დითირუ. თიქ თქუ: „იესო, ქუგომშინ, მუჟამსით სქან სამეფოს იჸიქ“. იესოქ უპასუხ: „ჭეშმარიტებას გირაგადუქ ამდღა: ჩქიმწკუმა ართო იჸუაფუქ სამოთხეს“ (წეკითხით ლუკაშ 23:39—43). თიშ უმკუჯინუო, ნამდა თე დამნაშავეს მორჩქილაფირ აჸიდ ცნობა ზეციერ სამეფოშ გურშენ, ნამდგას იესო ქადაგენდჷ, თინა ვეგნორთე ქრისტეშ მოწაფეთ დო ვართ იესოს უთქუალ დღას, ნამდა თე კოჩ ზეცას იჸუაფუდ სამეფოს (მათ. 4:17). იესო იჩიებუდ მომავალ მიწიერ სამოთხეშენ. მუშენ შემლებნა თეშ რაგად?

2. სოვრეშე მიჩქნა, ნამდა თე მომნანიე დამნაშავე ებრაელ რდჷ?

² დამნაშავე, ნამდგაქ მინანუ, მუჭოთ იძირენ, ებრაელ რდჷ. თიქ მაჟიას უწუ: „ღორონთიშ ვა გოშქურნო? სი ხოლო თი განაჩენ ვეგშაიღესო?“ (ლუკ. 23:40). ებრაელეფ ხვალე ართ ღორონთის ცენდეს თაყვანს, მარა შხვა ერიშ ხალხის ბრელ ღორონთიშ წანდჷ (გამ. 20:2, 3; 1 კორ. 8:5, 6). თე დამნაშავეეფ ებრაელეფ ვა ჸოფედესკონ, მომნანიე დამნაშავე თეცალ მუდგარენს იკითხენდჷ: „ღორონთეფიშ ვა გოშქურნო?“. თეს გეძინელ, იესო არძა ერიშ ხალხშა ვარინ, „ხვალე ისრაელიშ დინაფილ შხურეფშა რდჷ გოტებულ“ (მათ. 15:24). თეწკუმა ართო, ღორონთიქ ისრაელეფს გუცხად, ნამდა ღურელეფიშ გათელება იჸუაფუდ. მომნანიე დამნაშავეს არჩქვენუდ თენა. თიშ სიტყვეფშე იძირე, ნამდა ჯერდჷ, იეჰოვა დურთინუანდჷ იესოს სიცოცხლეს ღორონთიშ სამეფოს მეფობაშო. მუჭოთ იძირე, თე კოჩის იმენდ უღუდ, ღორონთ თის ხოლო გათელენდუნ.

3. მუ შილებე იფიქრუკო მომნანიე დამნაშავექ, მუჟამსით იესოქ სამოთხე მიშინუ? გენწყით (დაბ. 2:15).

³ მუჭოთ ებრაელს, თე მომნანიე დამნაშავეს, არჩქვენუდ ადამ დო ევაშ დო თი სამოთხეშ გურშენ, ნამუთ იეჰოვაქ თინეფშო გაჭყჷ. ათეშენ თე დამნაშავეს შილებე უჩქუდკო, ნამდა სამოთხე, ნამუთ იესოქ მიშინუ, იჸუაფუდ სქვამ ბაღ დედამიწას (წეკითხით დაბადებაშ 2:15).

4. მუშა ოკო დუმაფიქრან ართ-ართ დამნაშავეშა რაგადებულ იესოშ სიტყვეფქ?

⁴ დამნაშავეშა რაგადებულ იესოშ სიტყვეფქ ოკო დუმაფიქრან, მუნერ იჸუაფ სამოთხეს ცხოვრება. მეფე სოლომონიშ მშვიდობიან მართველობაშე დაფიქრება ხოლო მოხვარნა, წერმიბდგინათ, დაახლოებით მუნერ იჸუაფ სამოთხე. დარწმუნებულ ვორეთ, ნამდა იესო, მით სოლომონშე უმოს რე, მუშ თანამართველეფწკუმა ართო დედამიწას სქვამ სამოთხეთ გინაშქვანს (მათ. 12:42). ვა რე გასაკვირ, „შხვა შხურს ოინტერესდას“, მუშ კეთება რე საჭირო, ნამდა მარადიულო იცხოვრან სამოთხეს (იოან. 10:16).

ᲛᲣᲜᲔᲠ ᲘᲸᲣᲐᲤ ᲪᲮᲝᲕᲠᲔᲑᲐ ᲡᲐᲛᲝᲗᲮᲔᲡ?

5. მუჭო გაფნა წარმოდგენილ სამოთხეს ცხოვრება?

⁵ მუ მუგალენა გონებაშა, მუჟამსით სამოთხეს ცხოვრებაშენ ფიქრენთ? ალბათ წერმიდგინენთ ედემიშ ბაღჯგურა სქვამ პარკის (დაბ. 2:7—9). შილებე ქუგგაშინან მიქაშ წინასწარმეტყველებაქ, ნამდა ღორონთიშ ხალხშე „თითოულ მუშ ბინეხიშ დო ლუღიშ თუდო გითოხედას იჸი“ (მიქ. 4:3, 4). თეწკუმა ართო, გუგაშინენა ბიბლიაშ შხვა მუხლეფ ხოლო, სოდეთ ჭარჷ, ნამდა ოჭკუმალ ხვეიანო იჸუაფ (ფსალმ. 72:16; ეს. 65:21, 22). თაშ ნამდა, ალბათ თქვან დუდის წერმიდგინენთ სქვამ ბაღის, სოდეთ მიკოხეთ სტოლს, ნამუთ გემუან ოჭკუმალით რე ეფშა, სუნთქენთ სუფთა ჰაერს დო თქვან გოხოლუას ყვავილეფიშ ჰამო შურ იტრიალ; ელგარჩქილენა ძიცაშ ხონარ. თენეფ რენა თქვან ოჯახიშ წევრეფ დო მეგობრეფ, თინეფ შქას გათელებურეფ, მით ართო ატარენა დროს. თენა უბრალოთ ოცნება ვა რე. შემლებნა დარწმუნებულ ვორდათ, ნამდა თე ირფელ მართალო იჸუაფ დედამიწას. თეს გეძინელ, სამოთხეს მაღვენუნა სასიამოვნო საქმე.

6. მუ მაჸინა ოკეთებელ სამოთხეს? (ქოძირით სურათ).

⁶ იეჰოვას თეშ ვაფუთ გოჭყაფილ, ნამდა მუშობაქ ხიოლ მომღან (ეკლ. 2:24). ჩქი განსაკუთრებულო ბრელ საქმე ქრისტეშ ანთასწანიან მართველობაშ დინახალე მაღვენუნა. დიდ გასაჭირ გინოღალირეფს დო მილიონობით გათელებურ ადამიანს დესაჭირებ მიკაქუნალ, ოჭკუმალ დო ოცხოვრებელ ადგილ. თე ირფელქ ქიჸუასინ თიშო, ბრელ სასიამოვნო საქმე მაჸინა ოკეთებელ. მუჭოთ ადამ დო ევას ოკო გინურთინუაფდესკო თე ბაღ მუნეფიშ ჸუდეთ, თეშ ჩქი ხოლო მაღვენუნა პატი, მთელ დედამიწა სამოთხეთ გინვორთინუათ. წერმიდგინით, მუშმადიდა ხიოლს მომღანა თი გათელებურეფშა გურაფა, მიდგას გვალო ჭიჭე აფნა გაგებულ იეჰოვაშ ვარდა თიშ განზრახვაშ გურშენ, დო მუ სასიამოვნო იჸუაფ, მუჟამსით იესოშახ ბრელ ხანით ადრე მახორუ ართგურეფს ქიმვეხვარებუთ უმოს მეტიშ გაგებას.

7. მუშა შემლებნა ვორდათ დარწმუნებულ დო მუშენ?

⁷ შემლებნა ბჯერდან, ნამდა მომავალს სამოთხეს მაღვენუნა მშვიდობიან ცხოვრება. მუთუნ ვამმოკორდნა დო ირფელ ორგანიზებულო იჸუაფ, მუშენდა სოლომონიშ მართველობაშ მაგალითშე იეჰოვაქ უკვე ქუმოძირეს, მუნერ ცხოვრება იჸუაფ მუშ სქუაშ მართველობაშ დროს.

ᲛᲔᲤᲔ ᲡᲝᲚᲝᲛᲝᲜᲘᲨ ᲛᲐᲠᲗᲕᲔᲚᲝᲑᲐ — „ᲭᲘᲭᲔ ᲡᲐᲛᲝᲗᲮᲔ“

8. მუჭო შისრულ დავითიშ სიტყვეფქ, ნამუთ მოჩამილ რე ფსალმუნიშ 37:10, 11, 29-ს? (ქოძირით თე ჟურნალს მოჩამილ „კითხვა დო პასუხ“).

⁸ მეფე დავითიქ ღორონთშე შთაგონებათ ჭარჷ, მუნერ იჸუაფუდ ცხოვრება, მუჟამსით ბრძენ დო ართგურ მეფე ქიდეკინენდჷ ტახტის (წეკითხით ფსალმუნიშ 37:10, 11, 29). ჩქი ხშირას უკითხენთ შხვეფს ფსალმუნიშ 37:11-ის, მუჟამსით მომავალ სამოთხეშენ ვეჩიებუთ. თენა სწორ რე, მუშენდა იესოქ ხოლო თე სიტყვეფ მიჸონ გვალას ქადაგებაშ დროს დო თიშ მომავალს შესრულებაშენ იჩუ (მათ. 5:5). მარა დავითიშ სიტყვეფ თის ხოლო ოძირანდჷ, მუნერ იჸიდ ცხოვრება მეფე სოლომონიშ დროს. სოლომონიშ მეფობაშ დროს ღორონთიშ ხალხის უღუდ განსაკუთრებულ მშვიდობა დო ცხოვრენდჷ დიხას, სოდეთ, თაშ ქოფთქუათინ, „ბჟა დო თოფურ“ ვარკუდ. ღორონთიქ თინეფს უწუ: „ჩქიმ წესეფს დო მცნებეფს ვეგნურთანთ-და, . . . მშვიდობას ვემგარკენთ თი დიხას, მშვიდას ქიდირულუანთ დო მითინიშ შიშ ვა გაღვენუნა“ (ლევ. 20:24; 26:3, 6). თე დუნაპირებუეფქ სოლომონიშ მართველობაშ დროს შისრულ (1 მატ. 22:9; 29:26—28). ხოლო ართ პირობა, მუთ იეჰოვაქ დოდვჷ, თინა რდჷ, ნამდა უბადო ხალხ, მით ტყურა ღორონთეფს ცენდეს თაყვანს, „მეტო ვეჸუაფდეს“ (ფსალმ. 37:10). თაშ ნამდა, ფსალმუნიშ 37:10, 11, 29-ს მოჩამილ სიტყვეფქ ჯვეშ დროს შისრულ დო მომავალს ხოლო შისრულებ.

9. მუ თქუ საბაშ დედოფალქ სოლომონიშ მართველობაშ გურშენ?

⁹ სოლომონიშ მართველობაშ დროს ისრაელეფ მშვიდობიანო ცხოვრენდეს დო ეკონომიკურო ხოლო მანგარ ჯგირო რდეს. თე ინფორმაციაქ საბაშ დედოფალიშ ჸუჯშა ქიმიოჭირინუ. თიქ მანგარ შორ შარა გემკორთჷ, ნამდა გენორთკო იერუსალიმშა დო თე ირფელ მუშ თოლით ქოძირკო (1 მეფ. 10:1). სოლომონიშ სამეფოშ გოლებაშ უკულ თიქ თეცალ მუდგარენ თქუ: „გვერდ ხოლო ვა ჸოფე ჩქიმდა რაგადებულ. . . . ბედნერ რე სქან ხალხ დო ბედნერეფ რენა სქან მსახურეფ, მით სქან გვერდით რენა დო სქან სიბრძნეს ირჩქილენა!“ (1 მეფ. 10:6—8). მარა თი ირფელ, მუთ სოლომონიშ მართველობაშ დროს რდჷ, ჭიჭე მაგალით რე თიშ, მუდგას იეჰოვა მუშ სქუაშ, იესოშ, მართველობაშ დროს გაკეთენს ადამიანეფშო.

10. მუთ რე იესო სოლომონშე უმოს?

¹⁰ იესო ბრელით უმოს აღმატებულ რე სოლომონშე. სოლომონ არასრულყოფილ რდჷ დო თიქ ბრელ სერიოზულ შეცდომა დუშვჷ, მუდგაშ გურშენ პრობლემეფ მოუღ ღორონთიშ ხალხის. მარა, თიშ გინაწონს, იესო სრულყოფილ მართველ რე დო თინა შეცდომეფს ვა უშვენს (ლუკ. 1:32; ებრ. 4:14, 15). იესოქ არძაშ უმოს რთულ განსაცდელს ხოლო გიორჯგინ, მუჟამსით თინა სატანაქ გიმოცად. იესოქ ქაძირუ, ნამდა დღას ვეშეცოდენს დო ვართ თიცალ მუთუნს აკეთენს, მუდგათ ეცილებუდ მუშ ართგურეფს. არგამა რე, დიდ პატი რე, პჸუნდან თეცალ მეფე.

11. მი მეხვარებ იესოს?

¹¹ იესოს ჸუნს 144 000 თანამართველ, მით თიწკუმა ართო ზრუნენა ადამიანეფშე დო შეასრულენა იეჰოვაშ განზრახვას დედამიწაწკუმა დაკავშირებით (გამოცხ. 14:1—3). თინეფქ ბრელ განსაცდელ დო ტანჯება გიმოცადეს მუნეფიშ დუდშა, მუჟამსით დედამიწას რდეს, ათეშენ თე თანამართველეფს ჯგირო შეიალებენა მიშელან შხვეფიშ მდგომარეობაშა. კონკრეტულო მუს გაკეთენა თინეფ?

ᲛᲣᲡ ᲒᲐᲙᲔᲗᲔᲜᲐ ᲪᲮᲔᲑᲣᲚᲔᲤ?

12. მუ საქმე დავალ იეჰოვაქ 144 000-ის?

¹² საქმე, ნამუთ იესო დო თიშ თანამართველეფშა რე დავალებურ, ბრელით უმოს რე თი საქმეშე, ნამუთ სოლომონს უღუდ. ისრაელიშ მეფე სოლომონს ხვალე ისრაელს მახორუ მილიონობით ადამიანშა აფუდ მიკაჯინალ. მარა ღორონთიშ სამეფოშ მართველეფქ, ოკო მიკაჯინან მთელ დედამიწას მახორუ მილიარდობით ხალხის. მართალო, მუშმადიდა პატის არზენს იეჰოვა 144 000-ის.

13. მუ განსაკუთრებულ საქმეს შეასრულენა იესოშ თანამართველეფ?

¹³ იესოცალო, 144 000 იმსახურენა მეფეეფო დო მღვდელეფო (გამოცხ. 5:10). მუჟამსით ისრაელეფ მოსეშ კანონს მეჸუნდეს, ძირითადო მღვდელეფს ოვალდეს, ქიმეხვარესკო ხალხის, უღდესკო ფიზიკურ ჯამრთელობა დო იეჰოვაწკუმა ხოლოშიან ურთიერთობა. თე კანონ რდჷ „მომავალ კურთხევეფიშ ორო“. ათეშენ გონივრულ რე, იფიფქრათ, ნამდა იესოშ თანამართველეფს აღვენუნა განსაკუთრებულ როლ, იზრუნან ღორონთიშ ხალხიშ ფიზიკურ დო სულიერ საჭიროებეფშე (ებრ. 10:1). ჩქი დიო ხოლო ვამჩქუნა, მუჭო ითანამშრომლენა თე მეფეეფ დო მღვდელეფ სამეფოშ თი მოქალაქეეფწკუმა, მით დედამიწას იცხოვრენა. მუჭოთ იეჰოვაქ გინოჭყვიდ, ჩქი შემლებნა ბჯერდან, ნამდა სამოთხე მართალო იჸუაფ დო დედამიწას მახორუ ხალხ მიღენს საჭირო ხემძღვანელობას (გამოცხ. 21:3, 4).

ᲛᲣ ᲝᲙᲝ ᲐᲙᲔᲗᲐᲡ „ᲨᲮᲕᲐ ᲨᲮᲣᲠᲥ“ ᲡᲐᲛᲝᲗᲮᲔᲡ ᲝᲪᲮᲝᲕᲠᲔᲑᲔᲚᲝ?

14. მუნერ ურთიერთობა უღნა „შხვა შხურს“ დო ქრისტეშ ჯიმალეფს?

¹⁴ იესოქ თინეფ, მით თიწკუმა ართო იმეფენდეს, მიშინუ მუჭოთ „ჭიჭე ოჭყიშალ“ (ლუკ. 12:32). თინა მაჟია ჯგუფიშ გურშენ ხოლო იჩიებუდ დო თის გიოდვჷ „შხვა შხურ“. მარა თე ჟირ ჯგუფ ართ ოჭყიშალს რენა (იოან. 10:16). თე ჟირ ჯგუფ ართო ხანდენს დო თიმწკუმა ხოლო ელუდირთნა ართიანს, მუჟამსით დედამიწა სამოთხეთ გინირთუ. თეშ უკულ „ჭიჭე ოჭყიშალ“ ზეცას იჸუაფ დო „შხვა შხურს“ მიაჩამუ საშვალება, გეხარას დედამიწას მარადიულ ცხოვრებათ. მარა „შხვა შხურქ“ ამდღა მუდგარენ ოკო გაკეთას თიშო, ნამდა იცხოვრას სამოთხეს.

15. ა) მუჭო თანამშრომლენს „შხვა შხურ“ ქრისტეშ ჯიმალეფწკუმა? ბ) მუჭო შეილებნა მიაჸუნათ ჯიმაშ მაგალითის, ნამუთ აფთიაქის მილარე? (ქოძირით სურათ).

¹⁵ იესოწკუმა ართო მიკოჭკადილ მომნანიე დამნაშავეს ღურაქ საშვალება ვემეჩ, მარდულობა გეგმოხანტუკო ქრისტეშ მიმართ თიშ გურშენ, მუთ თიქ აკეთ. თიშ გინაწონს, ჩქი, „შხვა შხურს“, ბრელნერ საშვალება მიღნა, გეგმოფხანტათ ირფელ, მუდგას იესოშ მიმართ ბგინაფლენთ. მაგალთო, იესოშ ჸოროფას თით გიმოფხანტუნთ, მუნერ დამოკიდებულება მიღნა ცხებულ ჯიმალეფიშ მიმართ. თიქ თქუ, ნამდა „შხურეფს“ თეშ მიხედვით გასამართლენს (მათ. 25:31—40). ქრისტეშ ჯიმალეფს ხუჯის უკინენთ, მუჟამსით შურ დო გურით ვოხვარუთ თინეფს ქადაგება დო მოწაფეეფიშ მომზადებაშ საქმეს (მათ. 28:18—20). ათეშენ მოკონა, ჯგირო გეგმიბრინუათ ბიბლიაშ ოგურაფალ საშვალებეფ, მუნერით რე წიგნ „მარადიულო გეხარით ცხოვრებათ!“. ასე ბიბლიას მითინს ვაგურუანთ-და, მიზანო გიღდან, ქეშეთავაზათ თინა მუთ შილებენ მეტ ადამიანს.

16. მუ შემლებნა ვაკეთათ ამდღა, ნამდა ქიპჸუათ ღორონთიშ სამეფოშ მოქალაქეეფქ?

¹⁶ საჭირო ვა რე, თი დროს უჯინათ, მუჟამ დოდირთუ სამოთხე დედამიწას, ნამდა თიცალ პიროვნებათ გინიფრთათ, მუნერით იეჰოვას ოკო ვორდათ თექ. ასეშე შემლებნა იმუფშუათ, ნამდა ვორდათ ზომიერეფ დო პატიოსანეფ რაგადით დო საქმეეფით. თეწკუმა ართო, ვორდათ იეჰოვაშ, მეუღლეშ დო თანაქრისტიანეფიშ ართგურეფ. მუთ უმოსო ვომორჩილუთ ღორონთიშ ნორმეფს თე უბადო ქვეყნიერებას, თით უმოს ადვილ მაჸინა სამოთხეს ცხოვრება. შემლებნა ასეშე გუვავითარათ უნარეფ დო თვისებეფ, ნამუთ თექიანშო მუმამზადენა. ქოძირით თე ჟურნალს მოჩამილ სტატია: „ქორექო მზათ, დემკვიდრე დედამიწა?“.

17. გურ ოკო გომტახანიო ულირს კეთებულ ცოდვაქ? გენწყით.

¹⁷ ოკო ვეცადათ, ჩეფთხინუათ უღირსობაშ გრძნობა ულირს დაშებულიშ გურშენ. მუშო ოკო რაგად, გიშაჸიდირალ მსხვერპლ დღას ოკო ვემიფრჩქინათ „განზრახ“ ცოდვაშ გამართლებათ (ებრ. 10:26—31). მარა შემლებნა დარწმუნებულ ვორდათ, ნამდა სერიოზულ ცოდვას მართალო ქიბნანიენთ, თი მოხვარას ქობღებულენთ, ნამდგას იეჰოვა მარზენა დო ჩქინ საქმეეფს ქოფთირანთ-და, ღორონთ სრულას მაპატიენა (ეს. 55:7; საქ. 3:19). ქიგიშინით, მუ უწუ იესოქ ფარისეველეფს: „მა მართალეფიშ ვარინ, ცოდვილეფიშ დაძახინშა მოფრთჷ“ (მათ. 9:13). გიშაჸიდირალ მსხვერპლის უღჷ დასაბაღ ძალა, ნამდა გეგნოფორას ჩქინ არძა ცოდვა.

ᲗᲥᲕᲐ ᲨᲔᲘᲚᲔᲑᲜᲐ ᲘᲪᲮᲝᲕᲠᲐᲗ ᲛᲐᲠᲐᲓᲘᲣᲚᲝ ᲡᲐᲛᲝᲗᲮᲔᲡ

18. მუს უწინდით თი დამნაშავეს, ნამდგაქ იესოშ გვერდით ღურჷ?

¹⁸ შეილებნო სქან დუდ წერმიდგინე სამოთხეს, სოდეთ ურაგადუქ თი დამნაშავეს, ნამუთ იესოს ეჩიებუდ? მუშო ოკო რაგად, ჟირხოლო გეგმოხანტუნთ მარდულობას იესოშ მსხვერპლიშ მიმართ. ალბათ ქოკითხენქ, მუნერ რდჷ იესოშ დედამიწას ცხოვრებაშ ბოლო საათეფ დო მუს გინაფლენდჷ, მუჟამსით თიქ უპასუხ მუშ ოთხუალს. შილებე თიქ ხოლო რთხუას, ქეჩუე სატანაშ სისტემაშ ბოლო დღალეფს ცხოვრებაშ გურშენ. მუშმადიდა პატი იჸუაფ თეცალ ხალხშა ღორონთიშ სიტყვაშ გურაფა! (ეფეს. 4:22—24).

19. მუშენ ვეჸუაფ სამოთხეს ცხოვრება მოსაწყენ? (ქოძირით სურათ გალენ გვერდის).

¹⁹ სამოთხეს ცხოვრება დღას ვეჸი მოსაწყენ. ირო მაღვენუნა საშვალება, შეფხვადათ საინტერესო ხალხის დო ვაკეთათ სასიამოვნო საქმე. მუთ არძაშ უმოს მთავარ რე, ირდღას უჯგუშო გეფჩინებაფუანთ ჩქინ ზეციერ მუმას დო გეფხარენთ თით, მუთ ჩქინო აკეთ. ჩქი ირიათო დიბგურუანთ თიშ გურშენ დო ბრელ მუდგარენს გებგენთ თიშ გუნაჭყეფუეფშენ. მუთ უმოს ხანს იფცხოვრენთ, თით უმოსო მეჸოროფებნა იეჰოვა. მანგარ მარდულ ვორეთ იეჰოვაშ დო იესოშ, ნამდა მუჩეს სამოთხეს მარადიულო ცხოვრებაშ დუნაპირებ!