ჩქი შემლებნა მარადიულო იფცხოვრათ

1. მუჭო მოქმედენს ჩქინდა იეჰოვაშ დუნაპირებ მარადიულ სიცოცხლეშენ ფიქრ?

ᲘᲔᲰᲝᲕᲐ მუშ მორჩილეფს ოპირ, ნამდა აღვენუნა „მარადიულ სიცოცხლე“ (რომ. 6:23). მუჟამსით თეშე ფიფქრენთ, იეჰოვაშ მიმართ ჩქინ ჸოროფა უმოსო იმანგარებ. უბრალოთ დეფიქრით, ჩქინ ზეციერ მუმას თიშ მამანგარას უჸორთ, ნამდა მარზენა ძღვინს, მუდგაშ შედეგო მუთუნს ვენკვაჸოთინეთ თიშე.

2. მუჭო მოხვარნა მარადიულ ცხოვრებაშ იმენდ?

² მარადიულ სიცოცხლეშ გურშენ ღორონთიშ დუნაპირებ მოხვარნა, ქუგურზათ ამდღარ პრობლემეფს. ნტერეფქ ღურათ დუმორცქინანინ ხოლო, იშენით ვემვოტალენთ იეჰოვაშ მსახურებას, მუშენდა მიჩქნა, იეჰოვაშ ართგურო დობღურით-და, თინა გუმათელენა დო ქომჩანა იმენდის, ნამდა დღას ვა ბღურუთ (იოან. 5:28, 29; 1 კორ. 15:55—58; ებრ. 2:15). მუშენ შემლებნა ბჯერდან, ნამდა მარადიულ სიცოცხლე შეიოლებერ რე? გუვარჩუათ მუსხირენ მიზეზ.

ᲘᲔᲰᲝᲕᲐ ᲛᲐᲠᲐᲓᲘᲣᲚ ᲠᲔ

3. მუშენ შემლებნა ვორდათ დარწმუნებულ, ნამდა იეჰოვას შეულებ მარადიულო მაცხოვრან? (ფსალმ. 102:12, 24, 27)

³ ჩქი მიჩქნა, ნამდა იეჰოვას შეულებ მარადიულო მაცხოვრან, მუშენდა თიშე მოურს სიცოცხლე დო თინა მარადიულ რე (ფსალმ. 36:9). ყურადღება ქიმვაქცუათ ხვალე მუსხირენ ბიბლიურ მუხლის, სოვრეშეთ იძირე, ნამდა იეჰოვა ირიათო რდჷ დო ირიათო იჸუაფ. ფსალმუნიშ 90:2 იეჰოვაშ გურშენ იჩიებ: „მარადიულო სი რექ ღორონთ“. 102-ა ფსალმუნ ხოლო თე აზრის იჩიებ (წეკითხით ფსალმუნიშ 102:12, 24, 27). წინასწარმეტყველ აბაკუმქ ჩქინ ზეციერ მუმაშ გურშენ ჭარჷ: „მარადიულო ვა რექო, იეჰოვა?! ჩქიმ ღორონთ, ჩქიმ წმინდა, სი დღას ვა ღურუქ!“ (აბაკ. 1:12).

4. ოკო მაწუხენდანიო, მუჟამსით ვენვანჭუთ თი ფაქტის, ნამდა ღორონთ მარადიულ რე? გენწყით.

⁴ შილებე ძნელ გაფდან თი აზრიშ ინონჭაფა, ნამდა იეჰოვა „მარადიულ ღორონთ“ რე (ეს. 40:28). თენა ბრელ ადამიანშო რე თაშ. ელიჰუქ ღორონთიშ გურშენ თქუ: „მითინს ვენანჭინე თიშ წანეფიშ რიცხვშა“ (იობ. 36:26). მარა მუდგარენს ვენვანჭუთუნ თინა ვა ნიშნენს, ნამდა სინამდვილეს ვა არსებენს. მაგალთო, შილებე ბრელ მუთუნ ვამჩქუდან, სოვრეშე მოურს დო მუჭო მოქმედენს დღაშ სინთე. მარა თენა ნიშნენსო, ნამდა თინა ვა არსებენს? თეშნერო, ადამიანეფქ შილებე ბოლოშა დღას ვენვანჭათ, მუს ნიშნენს, იეჰოვა ირიათო არსებენდჷ დო ირიათო იარსებენს. მარა თენა ვა ნიშნენს, ნამდა ღორონთ მარადიულ ვა რე. გუმაჭყაფალიშ გურშენ ჭეშმარიტება თიშა ვა რე დამოკიდებულ, მუსხით შემლებნა თიშ ინონჭაფა (რომ. 11:33—36). თინა თიშახ არსებენდჷ, ონდო სამყაროს მუთუნ გორჩქინდუდ, თინეფ შქას ჩხანა, სოვრეშეთ ბღებულენთ სინთეს. ჩქი დარწმუნებულ ვორეთ, იეჰოვა რე თინა, მიდგაქ „მუშ ძალათ გაჭყჷ დედამიწა“ დო, მით თიშახ არსებენდჷ, ონდო ცა იჸუაფუდ (იერ. 51:15; საქ. 17:24). ხოლო მუ მიზეზ მიღნა, მუთ მარწმუნენა, ნამდა შემლებნა იფცხოვრათ მარადიულო?

ᲘᲔᲰᲝᲕᲐᲥ ᲛᲐᲠᲐᲓᲘᲣᲚ ᲡᲘᲪᲝᲪᲮᲚᲔᲨᲝ ᲒᲣᲛᲝᲭᲧᲔᲡ

5. მუ იმენდ უღუდ პირველ წყვილს?

⁵ იეჰოვას დედამიწას ადამიანეფიშ მეტ მარადიულ ცხოვრებაშო შხვა მუთუნ ვა გუჭყაფ. თიქ ხვალე ადამიანეფს მეჩჷ განსაკუთრებულ უნარ, დღას ვა ღურესკო. თეწკუმა ართო, იეჰოვაქ გაფრთხილ ადამ: „ჯგირ დო ფურიშ ჩინებაშ ჯაშე ვაჭკუმა, მუშენდა მუ დღასით ოჭკუმუნქ, თიმ დღას დოღურუქ“ (დაბ. 2:17). ადამ დო ევა იეჰოვაშ მითითებას ვეგნურთანდეს-და, ვა ღურუდეს. გონივრულ რე, ბჯერდან, ნამდა იეჰოვა ართ დროს თინეფს ქიმეჩანდჷ უფლებას, უჭკუმდესკო „სიცოცხლეშ ჯაშე“. თენა ნიშნენდჷ, ნამდა თინეფს აღვენუდეს მარადიულb სიცოცხლეშ საშვალება (დაბ. 3:22).

6, 7. ა) ხოლო მუ ოძირანს, ნამდა ადამიან მარადიულ სიცოცხლეშო რე გოჭყაფილ? ბ) მუშ კეთება გილამნა ახალ ქვეყნიერებას? (ქოძირით სურათეფ).

⁶ ბრელ მეცნიერქ მერთჷ თი დასკვნაშა, ნამდა ჩქინ ტვინს ბრელით უმოს მეტ ინფორმაციაშ გენტირნაფა შეულებ, ვინემ ჩქი ვოჭიშუანთ მთელ ცხოვრებაშ დინახალე. 2010 წანას ართ სამეცნიერო ჟურნალს (Scientific American Mind) ადამიანიშ ტვინიშ ართ-ართ კვლევაშ შედეგ რდჷ მოჩამილ. თე ნაშრომიშ თანახმას ადამიანიშ ტვინს შეულებ 2, 5 მილიონ გიგაბაიტიშ ინფორმაცია ქიგინტირინუას. თენა თი რაოდენობაშ ინფორმაცია რე, ნამდა ადამიანქ თინა ტელევიზორშე მიღასინ, 3 მილიონ საათის (300 წანაშე უმოს ხანს) ოკო უჯინას თის. თე ციფრეფ შილებე გვალო ზუსტ ხოლო ვა რდას, მარა თავრეშე ართ მუდგარენ იძირე: იეჰოვაქ ჩქინ ტვინ თეშ გაჭყჷ, ნამდა თის ბრელით უმოს ინფორმაციაშ გენტირნაფა შეულებ, ვინემ 70 ვარდა 80 წანას მაჭიშენა (ფსალმ. 90:10).

⁷ იეჰოვაქ, თეს გეძინელ, მარადიულ ცხოვრებაშ ძალიერ სურვილით გუმოჭყეს. ბიბლია იჩიებ, ნამდა ღორონთიქ „მარადიულობა ხოლო ქინოდვჷ ადამიანეფიშ გურეფს“ (ეკლ. 3:11). თენა რე ართ-ართ მიზეზ, მუდგაშ გურშენ ღურას უჯინეთ, მუჭოთ ჩქინ ნტერს (1 კორ. 15:26). სერიოზულო დებლახით-და, მუთუნს ვა ფქიმინუნთ დო ღურას დუჭყანთო ჯინას? ვარ. მუშო ოკო რაგად, ექიმშა მიდურთ დო წამალეფს ხოლო გეფშუნთ, ნამდა ლახალას მივერუათ; ვა ბღურათინ თიშო ირფელს გუვაკეთენთ. ვარდა მუჟამსით ჩქინ საჸოროფო პიროვნება ღურუ, ვა უღჷ მნიშვნელობა, ახალგაზრდა რენ დოვარ ხანშა მიშულირ, გურს ვა ბჭუნანო თენა? (იოან. 11:32, 33). მარადიულ ცხოვრება შეიოლებერ ვა ჸოფედკონ, მუშო ოკო რაგად, ჩქინ გუმაჭყაფალ დღას ვამჩანდეს თეშ სურვილს დო შესაძლებლობას. მარა ხოლო ბრელ მიზეზ მიღნა, მუდგაშ გურშენ შემლებნა ბჯერდან, ნამდა მარადიულ ცხოვრება შეიოლებერ რე. მორთ გუვარჩუათ იეჰოვაშ ნამთინე საქმე, ნამუთ ულირს უკეთებ დო ასე ხოლო ორთჷ, მუთ ამტკიცენს, ნამდა იეჰოვაშ დუდშეიან განზრახვა ვა თირე.

ᲘᲔᲰᲝᲕᲐ ᲛᲣᲨ ᲒᲐᲜᲖᲠᲐᲮᲕᲐᲡ ᲕᲐ ᲗᲘᲠᲐᲜᲡ

8. მუს მოგურუანა ესაიაშ 55:11 ჩქინწკუმა დაკავშირებულ იეჰოვაშ განზრახვაშ გურშენ?

⁸ თიშ უმკუჯინუო, ნამდა ადამ დო ევაქ შეცოდეს დო მუნეფიშ სქუალეფს ღურა მოუღეს, იეჰოვას მუშ დუდშეიან განზრახვა ვა უთირუ (წეკითხით ესაიაშ 55:11). ათეშენ, თის კინ ოკო, მუშ ართგურეფქ მარადიულო იცხოვრან. თე დასკვნაშა მეურთ, მუჟამსით ფიფქრენთ, მუ თქუ დო მუ აკეთ იეჰოვაქ მუშ განზრახვაშ შეიოსრულებერო.

9. მუს მოპირნა ღორონთ? (დან. 12:2, 13)

⁹ იეჰოვა მოპირნა, ნამდა გათელენს ღურელეფს დო ქიმეჩანს მარადიულ ცხოვრებაშ საშვალებას (საქ. 24:15; ტიტ. 1:1, 2). ართგურ კოჩ იობ დარწმუნებულ რდჷ, ნამდა იეჰოვას შურ ოლჷ, გათელას ღურელეფ (იობ. 14:14, 15). წინასწარმეტყველ დანიელს ხოლო უჩქუდ, ნამდა ადამიანეფ გეთელებდეს დო აღვენუდეს მარადიულ ცხოვრებაშ საშვალება (ფსალმ. 37:29; წეკითხით დანიელიშ 12:2, 13). ვართ იესოშ დროს მახორუ იუდეველეფშო რდჷ ახალ, ნამდა იეჰოვა მუშ ართგურ მსახურეფს ქიმეჩანდჷ „მარადიულ სიცოცხლეს“ (ლუკ. 10:25; 18:18). იესოქ ბრელშა მიშინუ თე დუნაპირებ. მუ ხოლო ხომ მუამუშიქ გათელ (მათ. 19:29; 22:31, 32; ლუკ. 18:30; იოან. 11:25).

10. მუს ამტკიცენს ულირს მოხვალამირ გათელებაშ შემთხვევეფ? (ქოძირით სურათ).

¹⁰ სიცოცხლეს იეჰოვა ირზენს, ათეშენ უღჷ ძალა, კინ დურთინუას ადამიანს თინა. თიქ ძალა ქიმეჩ წინასწარმეტყველ ელიას, გათელკო სარეფთელ ოსურკოჩიშ სქუა (1 მეფ. 17:21—23). უმოს გვიანო, წინასწარმეტყველ ელისექ, ღორონთიშ მოხვარათ გათელ შუნამელ ოსურკოჩიშ სქუა (2 მეფ. 4:18—20, 34—37). თე დო შხვა შემთხვევეფ ოძირანს, ნამდა იეჰოვას უღჷ ძალა, კინ დურთინუას ადამიანს სიცოცხლე. დედამიწას რდუნ თიმწკუმა იესოქ დამტკიც, ნამდა მუშ მუმას მუშა აფუდ თე ძალა მეჩამილ (იოან. 11:23—25, 43, 44). ასე იესო ზეცას რე დო თის უღჷ „მთელ ძალაუფლება ზეცას დო დედამიწას“. თის უკინებ მდგომარეობა, სოვრეშეთ შეულებ შეასრულას დუნაპირებ, ნამდა არძა, „მით ღორონთიშ მეხსიერებას რე“, გათელას დო ქიმეჩას მარადიულ ცხოვრებაშ შესაძლებლობა (მათ. 28:18; იოან. 5:25—29).

11. მუჭო გინაშქვანს გიშაჸიდირალ შეიოლებერო მარადიულ სიცოცხლეს?

¹¹ მუშენ დუშვჷ იეჰოვაქ, ნამდა მუშ სქუაქ ტანჯებათ დოღურკო? იესოქ გამცხადეს თეშ მიზეზ. თინა იჩიებ: „ღორონთიქ თეშ ქიჸოროფუ ქვეყნიერება, ნამდა ქიმეჩ მუშ ხვალეგუნაჭყეფ სქუა, მუშენდა მიდგა თიშ რწმენას გიმირჩქინანს, ვა ღურას დო მარადიულ სიცოცხლე უღდას“ (იოან. 3:16). მუშ სქუაშ მსხვერპლო შეწირუათ ღორონთიქ გეგშამჸიდეს ცოდვეფშე დო შეიოლებერ გინაშქვჷ, იფცხოვრითკო მარადიულო (მათ. 20:28). მოციქულ პავლექ ენწყჷ ღორონთიშ განზრახვაშ თე მნიშვნელოვან ნაწილ, მუჟამსით ჭარჷ: „მუჭოთ ართ კოჩიქ მიღჷ ღურა, თეშნერო, ართ კოჩიშ საშვალებათ იჸუაფ ღურელეფიშ გათელება. მუჭოთ ადამიშ გურშენ ღურუ არძა, თეშ გეთელებ არძა ქრისტეშ ჭყოლოფათ“ (1 კორ. 15:21, 22).

12. მუჭო შეასრულენს სამეფო ღორონთიშ განზრახვას?

¹² იესოქ მუშ მიმაჸუნალეფს დაგურუ, ილოცესკო ღორონთიშ სამეფოშ მოულაშ დო დედამიწას ღორონთიშ ნებაშ შესრულებაშენ (მათ. 6:9, 10). დედამიწას ადამიანეფიშ მარადიულ ცხოვრება იეჰოვაშ განზრახვაშ ნაწილ რე. თეშ შეიოსრულებერო თიქ მესიანურ სამეფოშ მეფეთ მუშ სქუა გიორინუ. თეს გეძინელ, ღორონთ დედამიწაშე შაყარანს 144 000 ადამიანს, ნამდა, იესოწკუმა ართო, შეასრულან მუშ ნება (გამოცხ. 5:9, 10).

13. მუს ორთჷ იეჰოვა ამდღა დო ჩქი მუჭო ბღებულენთ თეს მონაწილებას?

¹³ იეჰოვა ასე შაყარანს „ანაყუ ხალხის“ დო ამზადენს თინეფს, ნამდა იცხოვრან ღორონთიშ სამეფოშ მართველობაშ თუდო (გამოცხ. 7:9, 10; იაკ. 2:8). ამდღა მსოფლიოს ხალხიშ უმენტაშის ჯოგჷ ართიან დო ომეფ ხვადუ, მუდგაშ გურშენ თინეფ გორთილ რენა, მარა „ანაყუ ხალხ“ ირფელს ორთჷ, ნამდა გიორჯგინას გოჯოგაფას. თინეფ, თაშ ქოფთქუათინ, „მუნეფიშ ყამეფშე ოხონალ იარაღეფს“ გიშაჭკადნა (მიქ. 4:3). თიშ მანგიორო, ნამდა მონაწილება მიღან ომეფს, ნამდგას ბრელ ადამიანიშ ღურა მოჸუნს, თინეფ ხალხის ჭეშმარიტ ღორონთიშ დო თიშ განზრახვეფიშ გურშენ გურაფათ ოხვარნა, ქიმიოგორუან „ჭეშმარიტ სიცოცხლეს“ (1 ტიმ. 6:19). ღორონთიშ სამეფოშა ხუჯიშდაკინებაშ გურშენ თინეფს შილებე ოჯახიშ წევრეფ ოწინააღმდეგდან დო ფინანსურ პრობლემეფ უღდან, მარა აუცილებერ ვემიოკორდუნან თეშა იეჰოვა არწმუნენს (მათ. 6:25, 30—33; ლუკ. 18:29, 30). თე ფაქტეფ მარწმუნენა, ნამდა ღორონთიშ სამეფო ნამდვილო არსებენს დო თინა გაგრძელენს იეჰოვაშ განზრახვაშ შესრულებას.

ᲬᲝᲮᲝᲚᲔ ᲓᲘᲓᲔᲑᲣᲚ ᲛᲝᲛᲐᲕᲐᲚ ᲛᲔᲚᲜᲐ

14, 15. მუჭო შისრულებ იეჰოვაშ დუნაპირებ, ნამდა საბოლათ მისპუ ღურა?

¹⁴ იესო ასე ზეცას მეფე რე დო თინა ღორონთიშ არძა დუნაპირებუს შეასრულენს (2 კორ. 1:20). 1914 წანაშე მოჸუნაფილ იესო იმორჩილენს მუშ ნტერეფს (ფსალმ. 110:1, 2). თინა დო თიშ თანამართველეფ მალას საბოლათ გიორჯგინანა მუნეფიშ ნტერეფს დო უბადო კათას განადგურენა (გამოცხ. 6:2).

¹⁵ იესოშ ანთასწანიან მართველობაშ დროს ღურელეფ გეთელებნა დო მორჩილ ადამიანეფ სრულყოფილებას ქიმიოჭირინუანა. საბოლა გამოცდაშ უკულ თინეფ, მიდგას იეჰოვა მართალეფო მირჩქინანს, „დემკვიდრენა დედამიწას დო მარადიულო იცხოვრენა თექ“ (ფსალმ. 37:10, 11, 29). საბედნეროთ, „უკანასკნელ ნტერ, ნამუთ მისპუ, ღურა რე“ (1 კორ. 15:26).

16. მუ ოკო რდას თი მთავარ მიზეზ, მუდგაშ გურშენ ვომსახურუთ იეჰოვას?

¹⁶ მუჭოთ ბძირით, მარადიულ ცხოვრებაშ გურშენ ჩქინ იმენდ მთლიანო გერსხილ რე ღორონთიშ სიტყვაშა. თე იმენდ მოხვარნა, ვა ვოდინუათ ართგურობა თე ძნელო გინაღალარ ბოლო დღალეფს. მარა იეჰოვას გურ გუხარათინ, დასაბაღ ვა რე, ხვალე თი სურვილით მოფქმედენდათ, ნამდა ცოცხალეფქ ქუდოფსქიდათ. მთავარ მიზეზ, მუდგაშ გურშენ იეჰოვაშ დო იესოშ ართგურეფ ფსქიდუთ, თინეფიშ მიმართ მთელ გურით ჸოროფა რე (2 კორ. 5:14, 15). თე ჸოროფა გინმოჭყვიდირაფუანა, მივაჸუნათ თინეფიშ მაგალითის დო გუცხადათ შხვეფს თი იმენდიშ გურშენ, ნამუთ მიღნა (რომ. 10:13—15). მუჟამსით ქიდიბგურუანთ, ნამდა ვორდათ გურხვეეფ დო ვართ ხოლო ეგოისტეფ, თენა გინმოშქვანა თიცალ პიროვნებეფო, მიდგაწკუმა იეჰოვას ოკო, ირიათო იმეგობრას (ებრ. 13:16).

17. მუშ კეთება მოვალნა თითოულს? (მათ. 7:13, 14)

¹⁷ ქიპჸუაფუთო თინეფ შქას, მით მარადიულ სიცოცხლეს მიღენა? იეჰოვა მარზენა თეშ შესაძლებლობას, თიქ თეშო ფართას გომინჯეს კარ. ასე საჭირო რე, ქუდოფსქიდათ შარას, ნამუთ სიცოცხლეშა მეურს (წეკითხით მათეშ 7:13, 14). მუნერ იჸუაფ ცხოვრება, მუჟამსით მარადიულ სიცოცხლე მაღვენუნა? თე კითხვაშ პასუხის უკულიან სტატიას გუვარჩიენთ.