მუს ბგურაფლენთ მოწაფეშე, „ნამუთ იესოს განსაკუთრებულო უჸორდჷ“?

1. მუჭო გოგინაფუანა დუდის ღორონთიშ ჸოროფა?

მოციქულ იოანექ ჭარჷ: „ღორონთ ჸოროფა რე“ (1 იოან. 4:8). თე მარტივ წინადადება გუმოშინანა ძირითად ჭეშმარიტებას: ღორონთიქ გარჩქინ სიცოცხლე, თეწკუმა ართო, თინა ჸოროფაშ გუმაჭყაფალ ხოლო რე. იეჰოვას ვუჸორთ! თენა მოხვარნა, დუდის თხილერო, ბედნერო დო კმაყოფილო ბგინაფლენდათ.

2. მუჭოთ მათეშ 22:37—40-ის ჭარჷ, ნამ რე ჟირ არძაშ უდიდაშ მცნება დო მუშენ შილებე გამჭირდან მაჟია მცნებაშ მორჩილებაქ?

² ჸოროფაშ გიმორჩქინა ქრისტიანეფიშ ვალდებულება რე დო ვართ ხოლო არჩევან (წეკითხით მათეშ 22:37—40). მუჟამსით იეჰოვას უჯგუშო გეფჩინებაფუანთ, ვა გამჭირდუნა პირველ მცნებაშ დაცვება, მუშენდა იეჰოვა სრულყოფილ რე; თინა ზრუნენს ჩქინდე დო ჯგირო მოქცუნა. მარა შილებე მაჟია მცნებაშ დაცვებაქ გამჭირდან. მუშენ იფჩიებუთ თეს? მუშენდა ჩქინ და დო ჯიმალეფ, მით არძაშ უმოს ხოლოშიან მოყვასშა მიშურს, არასრულყოფილეფ რენა. მინშა თინეფქ შილებე თიცალ მუდგარენ ქომწუან ვარდა გამკეთან, მუდგათ გლახათ მოგინებაფუანა დუდის. იეჰოვას უჩქუდ, ნამდა ჩქი ქეშეფხვადუდით თე სირთულეს, ათეშენ თიქ მუშ მუსხირენ მსახურს ბიბლიას ქენაჭარაფუ კონკრეტულ რჩევეფ, მუშენ დო მუჭო ოკო გიმიფრჩქინათ ჸოროფა ართიანიშ მიმართ. თე მაჭარალეფშე ართ-ართ იოანე რდუ (1 იოან. 3:11, 12).

3. მუშ გურშენ გამახვილ იოანექ ყურადღება?

³ მუშ ნაჭარა წიგნეფს იოანე ხაზის უსვენს, ნამდა ქრისტიანეფქ ოკო გიმირჩქინან ჸოროფა. იესოშ ცხოვრებაშ გურშენ ჭარილ წიგნის იოანე სიტყვა „ჸოროფას“ თიშე უმოსშა ირინუანს, ვინემ დანარჩენ სუმ სახარებაშ მაჭარალ ართო. იოანე სოდგარენ ოშ წანერ რდუ, მუჟამსით სახარება დო მუშ სუმ წერილ ჭარჷ. თე შთაგონებულ ნაჭარეფ მოგურუანა, ნამდა არძა საქმე ჸოროფაქ ოკო მოკეთებაფუან (1 იოან. 4:10, 11). მარა იოანეს ხოლო დროქ დესაჭირ თეშ დაგურაფალო.

4. ირო გიმირჩქინანდუო იოანე შხვეფიშ მიმართ ჸოროფას?

⁴ ახალგაზრდობას იოანე ირო ვეგმირჩქინანდჷ ჸოროფას. მაგალთო, ართშა იესო დო მუშ მოწაფეეფ სამარიაშ შარათ იერუსალიმშა მიშეს. სამარიაშ ართ სოფელს სტუმარიშ ჸოროფა ვეგმირჩქინეს დო თინეფ ვემიღეს. მუნერ რეაქცია უღუდ იოანეს თეშენ? თიქ იესოს უწუ, ნამდა ცაშე დაჩხირ გეგმიჸონკო დო თე სოფელს არძა გოჭყვიდკო! (ლუკ. 9:52—56). ხოლო ართ სიტუაციაშ დროს იოანექ ჸოროფა ვეგმირჩქინ შხვა მოციქულეფიშ მიმართ. მუჭოთ იძირე, თიქ დო მუშ ჯიმაქ მუნეფიშ დიდა ქეთირჩქინეს, მუშენდა იესოშა ქუთხუდკო, ნამდა განსაკუთრებულ ადგილ ქიმუჩამუდკო თინეფშა მუშ გვერდით, სამეფოს. მუჟამსით შხვა მოციქულეფქ ქიგეგეს, მუ აკეთეს იაკობ დო იოანექ, თინეფს მანგარო მოურთეს გურქ! (მათ. 20:20, 21, 24). თესხი შეცდომეფიშ უმკუჯინუო, იესოს იშენით უჸორდჷ იოანე (იოან. 21:7).

5. მუს გუვარჩიენთ თე სტატიას?

⁵ თე სტატიას ჩქი გუვარჩიენთ იოანეშ მაგალითის დო მუსხირენ აზრის, მუთ თიქ ჸოროფაშ გურშენ ჭარჷ. შედეგო ქიგებგენთ, მუჭო შემლებნა გეგმიფრჩქინათ ჸოროფა და დო ჯიმალეფიშ მიმართ. თეს გეძინელ, ჩქი ქობძირუნთ მნიშვნელოვან მხარეს, მუჭო შეულებ ოჯახიშ დუდის გეგმირჩქინას ჸოროფა მუშ ოჯახიშ მიმართ.

ჸოროფა საქმეეფშე იძირე

6. მუჭო გიმირჩქინ იეჰოვაქ ჩქინ მიმართ ჸოროფა?

⁶ შილებე ფიფქრენდათ, ნამდა უმენტაშო ჸოროფა სათუთ გრძნობა რე, ნამუთ სიტყვეფით გიმიხანტუ. მარა ნამდვილ ჸოროფა საქმეეფით ხოლო ოკო იძირედას (ქეშუდარით იაკობიშ 2:17, 26). მაგალთო, იეჰოვას ჩქი ვუჸორთ (1 იოან. 4:19). თინა ჸოროფას თი სქვამ სიტყვეფით გიმოხანტუნს, ნამუთ ბიბლიას რე მოჩამილ (ფსალმ. 25:10; რომ. 8:38, 39). იეჰოვას ვუჸორთინ თენა, ქოთ თიშ ნარაგადშე იძირე დო ქოთ — საქმეეფშე. იოანექ ჭარჷ: „ღორონთიქ ჸოროფა თით დამიმტკიცეს, ნამდა მუშ ხვალეგუნაჭყეფ სქუა ქუმაშქვჷ ქვეყნიერებაშა, მუშენდა თიშ საშვალებათ მიბღითკო სიცოცხლე“ (1 იოან. 4:9). იეჰოვაქ მუშ საჸოროფო სქუა გოუტუ, ნამდა იტანჯკო დო დოღურკო ჩქინ გურშენ (იოან. 3:16). შილებენო თეშ უკულ ეჭვ გემშებღათ იეჰოვაშ ჸოროფაშა?

7. მუჭო დამიმტკიცეს იესოქ ჸოროფა?

⁷ იესოქ დარწმუნ მოწაფეეფ, ნამდა უჸორდჷ თინეფ (იოან. 13:1; 15:15). თის მუშ მოწაფეეფ დო თეწკუმა ართო ჩქი მუზმათ ვუჸორთინ, თექ ხვალე სიტყვეფშე ვარინ, საქმეეფშე ხოლო ქიძირ. თიქ თქუ: „ვა არსებენს თიშე უმოს დიდ ჸოროფა, მუჟამსით მიდგარენ დუდის დოდვანს ოღურალო მეგობრეფშო“ (იოან. 15:13). მუჭო ოკო იმოქმედას ჩქინდა თიშე ფიქრიქ, მუთ იეჰოვაქ დო იესოქ ჩქინ გურშენ აკეთეს?

8. მუჭოთ პირველ იოანეშ 3:18-შე იძირე, მუ ოკო ვაკეთათ?

⁸ ჩქი იეჰოვა დო იესოს ჸოროფას მორჩილებათ ვოძირანთ (იოან. 14:15; 1 იოან. 5:3). იესოქ კონკრეტულ მითითება მუჩეს, ნამდა მიჸორდესკო ართიან (იოან. 13:34, 35). ჩქინ და დო ჯიმალეფს ჸოროფა ხვალე სიტყვეფით ვარინ, საქმეეფით ხოლო ოკო ქუვოძირათ (წეკითხით 1 იოანეშ 3:18). კონკრეტულო მუშ კეთება შემლებნა თეშო?

გიჸორდან და დო ჯიმალეფ

9. მუშა აღძრჷ იოანე ჸოროფაქ?

⁹ იოანეს შეულებუდ მუამუშის ქელუდირთკო ოჯახიშ ბიზნესის დო ფარა უკეთებუდკო. მარა თეშ მანგიორო, თიქ მთელ ცხოვრება თიშო გეგმირინუ, ნამდა შხვეფს იეჰოვა დო იესოშ გურშენ ჭეშმარიტება ქუდაგურუკო. თიქ თიცალ ცხოვრება გიშეგორ, ნამუთ ვარდჷ ადვილ. პირველ საუკუნეშ ბოლოს უკვე ხანშამიშულირ იოანეს ქადაგებაშ გურშენ თხოზუდეს დო თინა გეგნახორუეს (საქ. 3:1; 4:1—3; 5:18; გამოცხ. 1:9). თიმწკუმა ხოლო, მუჟამსით ქადაგებაშ გურშენ ციხეს ხედჷ, იოანექ დამტკიც, ნამდა შხვეფშო ფიქრენდჷ. მაგალთო, კუნძულ პატმოსის თიქ ჭარჷ გამოცხადებაშ წიგნ დო კრებეფშა ქაჯღონ, ნამდა თინეფქ ქიგეგესკო, „მუდგაქ მალას ოკო მოხვადკო“ (გამოცხ. 1:1). საეგებიოთ, პატმოსშე გათავისუფლებაშ უკულ იოანექ ჭარჷ სახარება იესოშ მსახურებაშ დო ცხოვრებაშ გურშენ. თიქ ხოლო სუმ წერილ ჭარჷ, ნამდა გურშა ელუკინკო დო გამანგარკო მუშ და დო ჯიმალეფ. მუჭო შეილებნა მიაჸუნათ იოანეშ დუდგინოდვალირ ცხოვრებაშ მაგალითის?

10. მუჭო შეილებნა ადამიანეფს ჸოროფა ოძირუათ?

¹⁰ ადამიანეფს ჸოროფა შეილებნა ოძირუათ თით, მუნერ ცხოვრებას გიშეგორუნთ. სატანაშ ქვეყნიერებას ოკო, ნამდა თქვან დრო დო ენერგია ხვალე თქვან დუდშო გიმირინუათ — ეცადათ, ფარა დოშაყარუათ ვარდა ცნობილ პიროვნებათ გინირთათ. თეშ გინაწონს, მთელ მსოფლიოს დუდგინოდვალირ სამეფოშ მაქადაგებელეფ მუნეფიშ დროს გიმირინუანა სახიოლო ამბეშ ოქადაგებელო დო ხალხიშ მახვარებელო, ნამდა დეახლოვან იეჰოვას. ნამთინეს თიშ შესაძლებლობა ხოლო უღჷ, სრულ დროთ მიღას მონაწილება ქადაგებაშ დო გურაფაშ საქმეს.

11. მუჭო ოძირანს ბრელ ართგურ მაუწყებელ იეჰოვაშ დო და დო ჯიმალეფიშ ჸოროფას?

¹¹ ბრელ ართგურ ქრისტიანს უწიენს სრულ დროთ იმუშუას, ნამდა მუნეფიშ დუდშო დო ოჯახეფშო ქიზრუნას. მარა თე ართგურ მაუწყებელეფ, მუთ შეულებნან თით უკინენა ხუჯის ღორონთიშ ორგანიზაციას. მაგალთო, ნამთინე ოხვარ სტიქიურ უბედრობათ დაზარალებურეფს, შხვეფ მუშენა სამშენებლო პროექტეფს დო არძას უღჷ საშვალება, გაკეთას შესაწირავეფ მსოფლიო საქმეშო. თინეფ თეს თიშენ ორთნა, ნამდა უჸორა ღორონთ დო მოყვას. ირმარას და დო ჯიმალეფიშ ჸოროფას ვოძირანთ კრებაშ შეხვალამეფშა დასწრებათ დო მონაწილებაშ მეღებათ. შილებე შულადირ ვორდათ, მარა თეშ უმკუჯინუო, ვოსწრუთ შეხვალამეფს. მართალ რე, მინშა შილებე ბნერვიანენდათ, მარა იშენ იფჩიებუთ კომენტარს. არძას მიღნა პრობლემეფ, მარა იშენით ელუკინანთ შხვეფს გურშა კრებაშ შეხვალამაშ დოჭყაფაშახ დო თებაშ უკულ (ებრ. 10:24, 25). ჩქი მანგარ მარდულეფ ვორეთ ძვირფას და დო ჯიმალეფიშ ნაკეთებ საქმეეფშენ!

12. ხოლო მუ საშვალებათ ოძირუ იოანექ მუშ და დო ჯიმალეფიშ ჸოროფა?

¹² იოანექ მუშ და დო ჯიმალეფს ჸოროფა ხვალე ცქვაფათ ვარინ, რჩევაშ მეჩამათ ხოლო ოძირუ. მაგალთო, მუშ წერილს იოანექ ქაცქუ თინეფ მუნეფიშ რწმენა დო ჯგირ საქმეეფშენ, მარა თიქ ცოდვაშ გურშენ პირდაპირ რჩევა ხოლო ქიმეჩ (1 იოან. 1:8—2:1, 13, 14). თეცალო, ჩქი ხოლო ოკო ქუვოცქუათ ჩქინ და დო ჯიმალეფს მუნეფიშ ჯგირ საქმეეფიშ გურშენ. მარა მითინ გლახა დამოკიდებულებას ქიგმირჩქინანს ვარდა გლახა ჩვევას ქავითარენს-და, შემლებნა ჸოროფა ვოძირუათ თით, ნამდა ტაქტიანო ვუწუათ ორაგადე. მეგობარშა რჩევაშ მეჩამას გაბედულება ოსაჭირ, მარა ბიბლია იჩიებ, ნამდა ნამდვილ მეგობრეფ ართიანს ლასირანა დო გიშასწორენა (იგავ. 27:17).

13. მუშ კეთებას ოკო ევუჩილითუათ დუდ?

¹³ მინშა ჩქინ და დო ჯიმალეფს ჸოროფას ვოძირანთ თით, მუდგას ვა ვორთუთ. მაგალთო, თინეფიშ ნარაგადშე ადვილო ვა მოპჸუნა გურ. დეფიქრით შემთხვევაშე, ნამდგაქ დედამიწას იესოშ ცხოვრებაშ დროს მოხვად. თიქ უწუ მუშ მოწაფეეფს, ნამდა სიცოცხლეშ მიოღებელო თინეფს თიშ ხორც ოკო უჭკუმდესკო დო თიშ ზისხირ უშუმდესკო (იოან. 6:53—57). იესოშ თე სიტყვეფქ თეშ გუკვირდეს, ნამდა ბრელ მოწაფექ მიოტუ თინა, მარა ნამდვილ მეგობრეფქ, თინეფ შქას იოანექ, ართგურო ქუდოსქიდეს თიწკუმა. თინეფქ ვენანჭეს იესოშ ნარაგადის დო ალბათ გაკვირვებულ რდეს. მარა იესოშ ართგურ მეგობრეფქ ვეფიქრეს, ნამდა მუთ თიქ თქუ, არასწორ რდუ დო თიშ ნარაგადიქ გურს ვემკაბინეს. თეშ მანგიორო, თინეფქ მიენდეს იესოს, მუშენდა უჩქუდეს, ნამდა თიშ ნარაგად სიმართლე რდუ (იოან. 6:60, 66—69). მუსხით მნიშვნელოვან რე, ადვილო ვა მიპჸუნათ გურ ჩქინ მეგობრეფიშ ნარაგადშე! თეშ მანგიორო, ქიმეფჩათ თინეფს საშვალება, გემინწყან თინა, მუთ არასწორო გებგით (იგავ. 18:13; ეკლ. 7:9).

14. მუშენ ოკო ვა გიბჯოგუათ დღას ჩქინ და დო ჯიმალეფ?

¹⁴ იოანექ ჩქი ხოლო ელამჩეს, ნამდა ვა ბჯოგდან ჩქინ ჯიმალეფ ვარდა დალეფ. თე რჩევას ვემვაჸუნუთ-და, სატანას საშვალებას ქიმეფჩანთ, ჩქინდა გავლენა უღდას (1 იოან. 2:11; 3:15). თექ მოხვად ახ. წ. პირველ საუკუნეშ ბოლოს. სატანა ირფელს ორთუდ, ნამდა ღორონთიშ ხალხის ართიან გოუჯოგუკო დო თინეფ შქას უთანხმოება გემშიღკო. თე დროს იოანექ ჭარჷ წერილეფ, სოდეთ მიშინუ თინეფ, მით სატანაცალო ოცადუდ კრებას ბუნტიშ ეტახუას. მაგალთო, დიოტრეფე ართ-ართ კრებას და დო ჯიმალეფ შქას აზრეფიშ გორთუალას ოცადუდ (3 იოან. 9, 10). თინა უპატიცემლოთ ოქცუდ თექ მეულირ ჯიმალეფს, ნამუთ ხემძღვანელ საბჭოს აფუდ გოტებულ. დიოტრეფე თის ხოლო ოცადუდ, ნამდა კრებაშე გარიცხუკო თინეფ, მით სტუმარო ღებულენდჷ, მუს ვა მოწონდუნ თი პიროვნებეფს. მუნერ ამაყ რდუ თინა! სატანა ამდღა ხოლო მანგარო ოცად, ღორონთიშ ხალხ შქას უთანხმოება გემშიღას. ჩქი დღას ოკო ვა გიბჯოგუათ და დო ჯიმალეფ დო ვემვოტუათ თინეფ.

გიჸორდან თქვან ოჯახ

15. მუ ოკო შუდან ოჯახიშ დუდეფს?

¹⁵ ართ-ართ მნიშვნელოვან საშვალება, მუდგათ ოჯახიშ დუდ ჸოროფას ოძირანს მუშ ოჯახის, რე თინეფიშ მატერიალურ საჭიროებეფშო ზრუნვა (1 ტიმ. 5:8). მარა თის ოკო შუდას, ნამდა მატერიალურ ნივთეფშე უმოს მნიშვნელოვან თინეფიშ სულიერ საჭიროებეფ რე (მათ. 5:3). დეფიქრით თი მაგალითშე, ნამუთ იესოქ ოჯახიშ დუდეფს მეჩჷ. მუჭოთ იოანეშ სახარებას ჭარჷ, თიმწკუმა ხოლო, მუჟამსით თინა წამებაშ ბოძის ღურუდ, მუშ ოჯახიშ გურშენ ფიქრენდჷ. იოანე მარიამწკუმა, იესოშ დიდაწკუმა, გერდჷ თი ადგილს, სოდეთ იესო ღურათ დასაჯეს. თიშ უმკუჯინუო, ნამდა მანგარო იტანჯებუდ, იოანეს თხუ, ქიზრუნკო მარიამშე (იოან. 19:26, 27). იესოს ჸუნდჷ და დო ჯიმალეფ, ნამუთ ქიმკაჯინედეს მარიამიშ საჭიროებეფს, მარა მუჭოთ იძირე, თი დროს თინეფშე ნამთინ ვარდჷ თიშ მოწაფე. ათეშენ იესოს ოკოდ, დერწმუნკო, ნამდა მარიამიშ მუჭოთ ფიზიკურინ თეშ სულიერ საჭიროებეფშო ხოლო მიდგაინ ქიზრუნენდჷ.

16. მუ პასუხიშმგებლობეფ უღუდ იოანეს?

¹⁶ იოანეს ბრელ პასუხიშმგებლობეფ უღუდ. მუჭოთ ართ-ართ მოციქულ, თინა დუდგინოდვალირ ოკო რდუკო ქადაგებაშ საქმეს. თეს გეძინელ, შილებე დაქორწინებულ ჸოფედკო. თაშ ნამდა, თის მუშ ოჯახიშ მუჭოთ მატერიალურ, თეშ სულიერ საჭიროებეფშო ხოლო აჸიდ ოზრუნებელ (1 კორ. 9:5). მუს გურაფლენა ოჯახიშ დუდეფ ამდღა თე მაგალითშე?

17. მუშენ ოკო იზრუნას ოჯახიშ დუდიქ ოჯახიშ სულიერ საჭიროებეფშე?

¹⁷ ჯიმას, ნამუთ ოჯახიშ დუდ რე, შილებე ბრელ მნიშვნელოვან პასუხიშმგებლობა უღდას. მაგალთო, თიქ სამუშას გურგედვალირო ოკო ქიმუშუას, ნამდა თიშ საქციელქ განადიდას იეჰოვა (ეფეს. 6:5, 6; ტიტ. 2:9, 10). შილებე თინა კრებას მომსახურეთ ვარდა უხუცესო მსახურენდას. ათეშენ ოკო ქიზრუნას და დო ჯიმალეფშე დო ქუხემძღვანელას სამქადაგებლო ჯგუფეფს. თეწკუმა ართო, მნიშვნელოვან რე, რეგულარულო იგურუას ბიბლია მუშ ოსურ დო სქუალეფწკუმა ართო. ოჯახიშ დუდიშ პასუხიშმგებლობა რე, ქიზრუნას თინეფიშ ფიზიკურ, ემოციურ დო სულიერ მდგომარეობაშ საჯგირობუოთ. დო მუშ ოჯახ მანგარ მარდულ იჸუაფ თე ხანდაშ გურშენ (ეფეს. 5:28, 29; 6:4).

„ქუდოსქიდით ჩქიმ ჸოროფას“

18. მუშა რდუ იოანე დარწმუნებულ?

¹⁸ იოანე ბრელ ხანს ცხოვრენდჷ დო თის საინტერესო შემთხვევეფით ეფშა ცხოვრება უღუდ. თიქ ირნერ სირთულეს შეხვად, მუდგას შეულებუდ თიშ რწმენაშ დასუსტება. მარა თინა, მუთ შეულებუდუნ ირფელს ორთუდ იესოშ მითითებეფიშ დაცვებელო, მუნერით რე და დო ჯიმალეფიშ ჸოროფა. ათეშენ, იოანე დარწმუნებულ რდუ, ნამდა იეჰოვა დო იესოს უჸორდეს თინა დო ქიმეჩანდეს ძალას, გიორჯგინკო ნებისმიერ სირთულეს (იოან. 14:15—17; 15:9, 10; 1 იოან. 4:16). სატანას დო მუშ ქვეყნიერებას ვეშიალებუ გოუჯოგუკო იოანეს და დო ჯიმალეფ, თინა სიტყვეფით დო საქმეეფით ოძირანდჷ თინეფს მუშ ჸოროფას.

19. მუშ კეთებას ელამჩანა პირველ იოანეშ 4:7-ის ინოჭარილ სიტყვეფ დო მუშენ?

¹⁹ იოანეცალო, ჩქი ფცხოვრენთ ქვეყნიერებას, ნამდგას სატანა მართუნს. თინა თე სისტემაშ ღორონთ რე დო მითინ ვა უჸორს (1 იოან. 3:1, 10). სატანას ოკო, გიბჯოგუათ და დო ჯიმალეფ, მარა თენა ვაკეთებე, სოიშახ ჩქი ვემეფჩანთ თეშ საშვალებას. მორთ გინოჭყვიდილ მაფდან, მიჸორდან ჩქინ და დო ჯიმალეფ დო თე ჸოროფა სიტყვეფით დო საქმეეფით ქუვოძირათ. თაშ მოქციებათ ბედნერ ცხოვრება დო ხიოლ მაღვენუნა, მუშენდა ვორეთ იეჰოვაშ ოჯახიშ ნაწილ (წეკითხით 1 იოანეშ 4:7).