ვადინუათ სიმშვიდე დო მიენდით იეჰოვას

1. მეფე დავითცალო, მუ შილებე ჩქინდე ნამთინექ იკითხას?

არძას მოკონა, მიღდან მშვიდ ცხოვრება. მითინს ვა მოწონს, მუჟამსით გურ აფჷ შეწუხებულ. მარა მინშა თეცალ სიტუაციეფ ხოლო მიღნა. ათეშენ იეჰოვაშ ნამთინე მსახურს შილებე იგივე კითხვაქ გურჩქინდას, მუთ მეფე დავითის უღუდ: „სოიშახ ოკო ბწუხენდე, სოიშახ ოკო ვორდე გურშეჭირებულ?“ (ფსალმ. 13:2).

2. მუს გუვარჩიენთ თე სტატიას?

² თიშ უმკუჯინუო, ნამდა კანკალეშა არძას მაფნა გურ შეწუხებულ, შემლებნა დუდ უჯგუშო იბგინათ. თე სტატიას დიო გუვარჩიენთ ნამთინე მიზეზის, მუდგას ჩქინდა ოწუხებელ მოუღ. უკულ ქობძირუნთ ამშვ პრაქტიკულ საშვალებას, ნამუთ მიმეხვარებნა, პრობლემეფიშ დროს სიმშვიდე ვა ვოდინუათ.

მუქ შილებე ოწუხებელ გომრჩქინან?

3. მუ ოწუხებელეფს შილებე შეფხვადათ დო შემლებნანო ეიფჩილითუათ თინეფ?

³ ჩქი ვემაჩილითენა ნამთინე სიტუაცია, ნამდგას ოწუხებელ მოუღ. მაგალთო, ვეშემლებნა ვაკონტროლათ ოჭკუმალიშ, მიკაქუნალიშ დო შხვა საჭირო ნივთეფიშ ფას, ნამუთ ირწანას იძინანს; ვართ თიშ კონტროლ შემლებნა ჩქინ თანამშრომელეფ ვარდა სკოლაშ ამხანაგეფ, მუზმათ ხშირას მინდომენა, მიმექცუან უპატიცემულოთ ვარდა ეცადებნა, გევაჸუნათ სექსუალურ უზნეობას. ვეშემლებნა ჩქინ ოცხოვრებელ ტერიტორიას ადამიანეფს მივოტებაფუათ უკანონოთ მოქციება. ჩქი შეფხვადუთ თე სირთულეეფს, მუშენდა ფცხოვრენთ ქვეყნიერებას, სოდეთ ხალხიშ უმენტაშიშ აზროვნება ბიბლიურ პრინციპეფშა ვა რე გერსხილ. სატანას, თე ქვეყნიერებაშ ღორონთის, უჩქჷ, ნამდა ნამთინეს „თე ქიანაშ ოწუხებელ“ ეცილებ, ემსახურას იეჰოვას (მათ. 13:22; 1 იოან. 5:19). ათეშენ ჩქი ვამკვენა, ნამდა თე ქვეყნიერება ეფშა რე პრობლემეფით, მუდგას ოწუხებელ მოუღ!

4. მუჭო შილებე იბგინათ დუდ, მუჟამსით ბრელ ოწუხებელ მიღნა?

⁴ ჩქინ პრობლემეფიშ გურშენ შილებე თეშ ვორდათ გურშეჭირებულ, ნამდა შხვა მუთუნშე ვა მაფიქრებედან. მაგალთო, შილებე თიშე ბწუხენდათ, ნამდა ვა მაღვენუნა დასაბაღ ფარა ჩქინ საჭიროებეფშო, გლახათ გინიფრთუთ დო ვეშმალებედან იჸი მუშობა ვარდა მივოდინუანთ სამუშას. შილებე თინა ხოლო მაწუხენდან, ნამდა ვეშმალებენა ღორონთიშ ართგურო დოსქილადა ცდუნებაშ დროს. ვარდა თიშე ბწუხენდათ, მუს გუვაკეთენთ თი დროს, მუჟამსით სატანა მუ აკონტროლენსინ, თინეფს გეიახნარენს ღორონთიშ ხალხიშ წინააღმდეგ. შილებე ფიფქრენდათ, „არასწორ ხომ ვა რე, თეცალ მუდგარენეფშე ბწუხენქინ?“

5. მუშ რაგად ოკოდ იესოს სიტყვეფით: „მეტო ვეწუხათ“?

⁵ ჩქი მიჩქნა, ნამდა იესოქ მუშ მიმაჸუნალეფს უწუ: „მეტო ვეწუხათ“ (მათ. 6:25). თიშ რაგად ოკოდუო იესოს, ნამდა შურო მუთუნშე ოკო ვებწუხათ? მუშო ოკო რაგად, ვარ! ქიგიშინით, ნამდა ჯვეშო იეჰოვაშ ნამთინე ართგურ მსახურ ხოლო რდუ გურშეჭირებულ. მარა იეჰოვა იშენით იწონუანდჷ თინეფსb (1 მეფ. 19:4; ფსალმ. 6:3). სინამდვილეს, თე სიტყვეფით იესოქ გურშა ელამკინეს. თის ვაკოდ, ცხოვრებისეულ საჭიროებეფქ თეშ შემჭირესკო გურ, ნამდა ღორონთიშ მსახურებაქ ნაკლებო მნიშვნელოვანო გინმართესკო. თაშ ქორენ-და, მუშ კეთება შემლებნა, ნამდა ზედმეტო ვებწუხათ? (ქოძირით ჩარჩო „მუჭო შეილებნა თეშ კეთება?“).

ამშვ საშვალება, ნამუთ მიმეხვარებნა, ვა ვოდინუათ სიმშვიდე

6. მუჭოთ ფილიპელეფიშ 4:6, 7-ის ჭარჷ, მუ მიმეხვარებნა, მიღდან სიმშვიდე?

⁶ 1) ხშირას ილოცით. მუჟამსით პრობლემაშ გურშენ წუხენთ, შეილებნა იეჰოვას ქოთხუათ მოხვარა ლოცვას (1 პეტ. 5:7). თის შეულებ თქვან ლოცვაშ პასუხო მერჩან „ღორონთიშ მშვიდობა, ნამუთ ნებისმიერ [ადამიანურ] აზრშე უმოს რე“ (წეკითხით ფილიპელეფიშ 4:6, 7). იეჰოვა ქიმერჩანა სიმშვიდეს, მუშ ძალიერ წმინდა შურიშ ჭყოლოფათ (გალ. 5:22).

7. მუ ოკო ფშუდან, მუჟამსით ბლოცულენთ?

⁷ ლოცვაშ დროს გურ გეგნუფაჩით იეჰოვას. კონკრეტულო ქუდურაგადეთ თის. ქუწით, მუ პრობლემა გიღნა დო გეუნწყით, მუს გინაფლენთ. თე პრობლემაშ გინოჭკირუა შეიოლებერ ქორენ-და, ქოთხით სიბრძნე, ნამდა ქოძირათ გამოსავალ დო ძალა თეშ ოკეთებელო. მარა თენა შეიოლებერ ვა რენ-და, ქოთხით იეჰოვას, ქიმგეხვარან, ზედმეტო ვეწუხათ თიშე. კონკრეტულ ლოცვაშ დროს პასუხის ხოლო უჯგუშო ძირუნთ. მარა პასუხის ხეთეშე ვა ღებულენთ-და, ვემიოტუათ ლოცვა. იეჰოვას ხვალე თინა ვაკო, ნამდა კონკრეტულო ილოცათ, თინა ხოლო ოკო, ნამდა ვემიოტუათ ლოცვა თე ოწუხებელიშ გურშენ (ლუკ. 11:8—10).

8. მუ ოკო მიფშინუათ ჩქინ ლოცვეფს?

⁸ მუჟამსით თქვან ოწუხებელს გეგნოჩანთ იეჰოვას, მარდულობაშ სიტყვეფ ხოლო ქუწით თის. განსაკუთრებულო რთულ მდგომარეობას რეთინ თიმწკუმა ხოლო, ჯგირ იჸუაფ, ქიფიქრათ თი კურთხევეფშე, ნამუთ გიღნა. მინშა ვაიჩქუნა, თქვან გრძნობეფ მუ სიტყვეფით გიმოხანტათ-და, რშუდან, ნამდა იეჰოვა თიცალ უბრალო ლოცვას ხოლო პასუხენს, მუნერით რე, „რთხინქ, ქიმმეხვარ!“ (2 მატ. 18:31; რომ. 8:26).

9. მუჭო შემლებნა ნამდვილ უსაფრთხოებაშ გორუა?

⁹ 2) მიენდით იეჰოვაშ სიბრძნეს დო ვართ ხოლო თქვან დუდის. ჯვ. წ. მა-8 საუკუნეს იუდას მახორუეფს ოშქურდეს, ასურელეფქ ვეგიანთხესკო დუდის. ათეშენ შქურნაფილ კათაქ, თინეფიშ მონობას დუდ ეუჩილითუკონ თიშენ, ეგვიპტელეფს ქოთხუ მოხვარა, მით ვამსახურდეს იეჰოვას (ეს. 30:1, 2). იეჰოვაქ გაფრთხილ თინეფ, ნამდა თე არასწორ ნაბიჯ ჯგირს მუთუნს ვა მუღანდჷ (ეს. 30:7, 12, 13). ესაიაშ პიჯით იეჰოვაქ უწუ ხალხის, სო შეულებდეს ნამდვილ უსაფრთხოებაშ გორუა. თიქ თქუ: „თქვან ძალა მშვიდას რინას დო [იეჰოვაშა] მენდებას იჸუაფ“ (ეს. 30:15ბ).

10. მუ სიტუაციეფიშ დროს შემლებნა ვოძირუათ, ნამდა ვონდუთ იეჰოვას?

¹⁰ მუჭო შემლებნა ვოძირუათ, ნამდა ვონდუთ იეჰოვას? გუვარჩუათ მუსხირენ სიტუაცია. შილებე ჯგირ სამუშა მუგარზის, ნამუთ დიდ დროს ითხინს დო სულიერ საქმეეფს გოცილნა. ვარდა შილებე სამუშას თიცალ მიდგარენ გიმირჩქინანდას თქვან მიმართ რომანტიკულ ინტერესის, მით ვა რე იეჰოვაშ ნათილ მსახურ. ვარდა წერმიდგინით, თქვან საჸოროფო ოჯახიშ წევრ არჩევანიშ წოხოლე გიგორინუანა: „ვარა მა დო ვარა სქან ღორონთ“. არძა თე შემთხვევას რთულ გადაწყვეტილება გაჸინა მიოღებელ, მარა იეჰოვა თითოულ სიტუაციაშო ქიმერჩანა საჭირო ხემძღვანელობას (მათ. 6:33; 10:37; 1 კორ. 7:39). მთავარ რე, ქენდებუთ დო ვარ თე ხემძღვანელობას დო ქიმიაჸუნუთ დო ვარ თის.

11. ნამ ბიბლიურ მაგალითეფშე შემლებნა იფიფქრათ, ნამდა წინააღმდეგობეფიშ დროს სიმშვიდე ვა ვოდინუათ?

¹¹ 3) ქიდიგურეთ ჯგირ დო გლახა მაგალითეფშე. ბიბლიას მოჩამილ რე ბრელ შემთხვევა, ნამუთ ოძირანს, მუზმათ მნიშვნელოვან რე, ვორდათ მშვიდას დო მივენდათ იეჰოვას. თე შემთხვევეფიშ კითხირიშ დროს ქიდეკვირით, მუქ მეხვარ ღორონთიშ მსახურეფს, რთულ წინააღმდეგობეფიშ უმკუჯინუო მშვიდას ჸოფედესკო. მაგალთო, მუჟამსით იუდეველეფიშ უზენაეს სასამართლოქ მოწაფეეფს ქადაგებაშ მეტება მოთხუ, თინეფს ვა შქურნებნა. თეშ მანგიორო, გაბედულო თქუეს: „ჩქი ღორონთის ოკო დევემორჩილათ მუჭოთ მართველს დო ვართ ხოლო ადამიანეფს“ (საქ. 5:29). გოროზგუაშ უკულ ხოლო თინეფ პანიკას ვენოლაფენა. მუშენ? თიშენ, ნამდა უჩქუდეს, იეჰოვა რდუ მუნეფიშ მხარეს. იეჰოვა კმაყოფილ რდუ მოწაფეეფიშ საქციელით. შედეგო, თინეფქ გაგრძელეს სახიოლო ამბეშ ქადაგება (საქ. 5:40—42). თეშნერო, მოწაფე სტეფანეს ხოლო ვა უდინუაფ სიმშვიდე, მუჟამსით ღურას თოლეფს ინაჯინედ. თინა თიცალ მშვიდას რდუ, ნამდა „სახე ანგელოზიშ სახეშა უგუდ“ (საქ. 6:12—15). მუშენ რდუ სტეფანე თეცალ მშვიდას? მუშენდა ჯერდჷ, ნამდა იეჰოვა კმაყოფილ რდუ თიშ საქციელით.

12. მუჭოთ პირველ პეტრეშ 3:14 დო 4:14-ის ჭარჷ, მუშენ შემლებნა ვორდათ ბედნერეფ თხოზინიშ დროს?

¹² მოციქულეფ არგამათ ორწყედეს, ნამდა იეჰოვა მუნეფიშ გვერდით რდუ. თინა სასწაულეფიშ კეთებაშ ძალას არზენდჷ მოწაფეეფს (საქ. 5:12—16; 6:8). თეშ კეთებაშ ძალა ჩქი ვამღუნა. მარა თეშ უმკუჯინუო, მუშ სიტყვაშე იეჰოვა ჸოროფათ მარწმუნენა, ნამდა, მუჟამსით სიმართლეშ გურშენ იბტანჯებუთ, ჩქინ ართგურობა თის გურს უხარენს დო წმინდა შურით ქელამდირთუნა (წეკითხით 1 პეტრეშ 3:14; 4:14). ათეშენ ბრელ ოკო ვეფიფქრათ თიშ გურშენ, მუჭო მიფქციებუთ მომავალს წინააღმდეგობეფს ქეშეფხვადით-და. თეშ მანგიორო, ყურადღება თიშა ოკო გეგნიბღათ, ასე მუჭო გემამგარათ იმენდ, ნამდა იეჰოვა ქიმმეხვარებნა დო დოფთხილანა. პირველ საუკუნეშ მოწაფეეფცალო, ჩქი ხოლო ოკო მივენდათ იესოშ დუნაპირებუს: „მა ქიმერჩანთ სიბრძნეს დო მა გორაგადაფუანთ . . . თიმწკუმა თქვა გოწინააღმდეგნან თინეფს ართათ ეკოშაყარელო ხოლო ვეწარნენა თქვანდა დო ვანირზებენა“. ჩქი თეცალ დუნაპირებ მიღნა: „მოთვინებათ გინისქილიდუანთ დუდის“ (ლუკ. 21:12—19). ირიათო რშუდან, იეჰოვას აკაბცხა დეტალეფ ხოლო ვაჭყორდუ მუშ მსახურეფიშ გურშენ, მიდგაქ თიშ ართგურეფო ღურეს დო ღორონთ გათელენს თინეფს.

13. მუ ჯგირობუას მომღანა თინეფიშ მაგალითეფიშ გურაფა, მიდგაქ მიოდინუ სიმშვიდე დო ვემიენდჷ იეჰოვას?

¹³ ჩქი თინეფიშ მაგალითეფშე ხოლო ბგურაფლენთ, მიდგაქ მიოდინუ სიმშვიდე დო ვემიენდჷ იეჰოვას. თე გლახა მაგალითეფშე ფიქრ მიმეხვარებნა, დუდ ევუჩილითუათ იგივე შეცდომეფს. მაგალთო, ასაშ მეფობაშ დაჭყაფუს, მუჟამსით დიდ ჯარქ თიშ წინააღმდეგ მოლართჷ, თიქ მიენდჷ იეჰოვას. იეჰოვაქ ხოლო აკურთხჷ თინა დო მაგებაფუ თე ჩხუპ (2 მატ. 14:9—12). მარა ჭიჭე ხანშა ისრაელიშ მეფე ბააშაშ ბრელით უჭიჭაშ ჯარქ გეგშართჷ, ნამდა დუდის ქიგიანთხკო ასას. თიშ მანგიორო, ნამდა, მუჭოთ ულირსინ თეშ, იეჰოვაშა ჸოფედკო მენდებულ, ასაქ ოქრო დო ვარჩხილ უჯღონ სირიელეფს, ნამდა თინეფქ ქიმეხვარესკო (2 მატ. 16:1—3). თეს გეძინელ, ღურაშახ ხოლო, მუჟამსით თიქ მანგარო დელახ, იეჰოვაშა ვა უთხუ მოხვარა (2 მატ. 16:12).

14. მუშ გურაფა შემლებნა ასაშ შეცდომეფშე?

¹⁴ დუდშე ასა იეჰოვას მიოჯინედ პრობლემეფიშ დროს. მარა ჭიჭე ხანშა თიქ მიოტუ იეჰოვაშა მოხვარაშ თხუალა დო მუშით ოცადუდ, მაგვარკო პრობლემეფ. ართ მეჯინათ, ასაშ გეგმა — ისრაელეფიშ წინააღმდეგ სირიელეფშა მოხვარაშ თხუალა — გონივრულო იძირედ. მარა თე გეგმას ბრელ ხანით ვა მუღალ წარმატება. უმოს გვიანო, იეჰოვაქ ასას წინასწარმეტყველიშ პიჯით უწუ: „სირიაშ მეფეშ მანგიორო იეჰოვაშა, სქან ღორონთშა ქიმეინდებუდკონ, ასე სირიაშ მეფეშ ჯარშა მორიებულ გაჸიდ“ (2 მატ. 16:7). სიფრთხილე მოსაჭირნა, ვეფიფქრათ, ნამდა იეჰოვაშა ხემძღვანელობაშ თხუალაშ უმშო, ჩქინით, შემლებნა პრობლემეფიშ მოგვარება. გადაწყვეტილება ხეთეშე მაფნა მიოღებელინ თიმწკუმა ხოლო, მშვიდას ოკო ვორდათ დო მივენდათ იეჰოვას, მით სწორას მოქციებას მიმეხვარებნა.

15. მუშ კეთება შემლებნა ბიბლიაშ კითხირიშ დროს?

¹⁵ 4) ქიდემახსოვრით ბიბლიურ მუხლეფ. მუჟამსით თიცალ მუხლეფს ქეშეხვადუთ, სოვრეშეთ იძირე, ნამდა ძალა მშვიდას რინაშე დო იეჰოვაშა მენდებაშე მოურს, ეცადით, ქიდემახსოვრათ თინეფ. თე მუხლეფიშ დამახსოვრებას შილებე მიგეხვარან თინეფიშ ხმამაღალო კითხირქ ვარდა ფურცელშა გეჭარუაქ დო ხშირას გინოჯინაქ. იესო ნავეშ სქუაქ მიღჷ დავალება, რეგულარულო იკითხკო კანონიშ წიგნ ხმადაბალო, ნამდა გონივრულო მიქცუკო. თეწკუმა ართო, თე შეხსენებეფ ქიმეხვარებუდ თის, გიორჯგინკო შიშის დო გაბედულო ქუხემძღვანელკო ღორონთიშ ხალხის (იეს. 1:8, 9). ღორონთიშ სიტყვას მოჩამილ ბრელ მუხლის შეულებ მერჩან მშვიდობა თიცალ სიტუაციეფს ხოლო, მუჟამსით წუხება დო შიშ ჩვეულებრივ მუდგარენ რე (ფსალმ. 27:1—3; იგავ. 3:25, 26).

16. მუჭო მოხვარნა იეჰოვა კრებაშ საშვალებათ, ვა ვოდინუათ სიმშვიდე დო მივენდათ თის?

¹⁶ 5) ურთიერთობა გიღდან ღორონთიშ ხალხწკუმა. იეჰოვა ჩქინ და დო ჯიმალეფიშ საშვალებათ მოხვარნა, ვა ვოდინუათ სიმშვიდე დო მივენდათ თის. შეხვალამეფიშ დროს ჩქინდა ჯგირობუა მოუღ სცენაშე მეღებულ მითითებეფს, აუდიტორიაშ კომენტარეფს დო გურიშემაკინალ ურთიერთობეფს და დო ჯიმალეფწკუმა (ებრ. 10:24, 25). თეს გეძინელ, გურშა ელამკინანა ჩქინ ოწუხებელიშ გინოჩამა ხოლოშიან მეგობრეფშა, ნამუთ კრებას პჸუნა. მეგობარიშ „კეთილ სიტყვას“ შეულებ დუდ უჯგუშო მოგინებაფუან (იგავ. 12:25).

17. მუჭოთ ებრაელეფიშ 6:19-ს ჭარჷ, მუჭო მოხვარნა სამეფოშ გურშენ ჩქინ იმენდ, რთულ სიტუაციეფიშ დროს ვა ვოდინუათ სიმშვიდე?

¹⁷ 6) ვადინუათ თქვან იმენდ. სამეფოშ გურშენ ჩქინ იმენდ, ნამუთ „ღუზაცალო რე ჩქინო“, მოხვარნა, რთულ სიტუაციეფიშ ვარდა უარყოფით ფიქრეფიშ დროს ვა ვოდინუათ სიმშვიდე (წეკითხით ებრაელეფიშ 6:19). იფიქრით იეჰოვაშ დუნაპირებ მომავალშე. თიმწკუმა მითინს ვაღვენუ ოწუხებელ (ეს. 65:17). წერმიდგინით, თქვან დუდ მშვიდობიან ახალ ქვეყნიერებას, სოდეთ გურიშალმაჭუაფალ მუთუნ ვა მოხვადუ (მიქ. 4:4). შხვეფწკუმა ახალ ქვეყნიერებაშ გურშენ ჩიებათ თქვან იმენდ ხოლო გემანგარებ. მუთ შეილებნან, ირფელ გაკეთით ქადაგება დო მოწაფეეფიშ მომზადებაშ საქმეს. თაშ ქართუთ-და, შეილებნა „ბოლოშა მტკიცე“ იმენდ გიღდან (ებრ. 6:11).

18. მუ სირთულეეფს შილებე შეფხვადათ მომავალს დო მუჭო შემლებნა გივორჯგინათ თინეფს?

¹⁸ მუთ უმოსო ვეახლოებუთ თე ქვეყნიერებაშ აღსასრულს, თით უმოს მეტ სირთულეეფს შეფხვადუთ, ნამუთ უარყოფით ფიქრეფს მირჩქინანა. 2021 წანაშ მუხლის შეულებ მიმეხვარან, სირთულეეფიშ წოხოლე მანგარო ქიგებდირთათ დო ვა ვოდინუათ სიმშვიდე, ჩქინ ძალეფით ვარინ, იეჰოვაშა მენდებათ. მორთ თე წანას ჩქინ საქმეეფით ქუვოძირათ, ნამდა მიღნა იეჰოვაშ დუნაპირებუშ რწმენა: „თქვან ძალა მშვიდას რინას დო მენდებას იჸუაფ“ (ეს. 30:15).