ანაყუ ხალხ შხვა შხურშე განადიდენს ღორონთის დო ქრისტეს

1. მუჭო იმოქმედ 1935 წანაშ კონგრესის კითხირებულ მოხსენებაქ ართ ახალგაზრდა ჯიმაშა?

ართ ახალგაზრდა 18 წანერ რდუ, მუჟამსით 1926 წანას ინათ. თიშ მშობლეფ ბიბლიაშ მარკვიებელეფ რდეს. ჯვეშო იეჰოვაშ მოწმეეფს თე სახელით იჩინენდეს. თე მშობლეფს სუმ ქომოლსქუა დო ჟირ ოსურსქუა ჸუნდეს დო თინეფს იეჰოვაშ მსახურება დო ქრისტეშ მაგალითიშ მეჸუნა ქუდაგურეს. მუჭოთ არძა ბიბლიაშ მარკვიებელ, თი ახალგაზრდა ჯიმა ხოლო, ნამუთ აბზაციშ დაჭყაფუს მიფშინეთ, ირ წანაშ გოშინაშ ონჯუას ღებულენდჷ ქობალ დო ღვინს. თი დროს თენა სწორო მიორჩქუდეს. მარა 1935 წანას ვაშინგტონს (აშშ) ჩატარებულ კონგრესის თიქ მირჩქილუ რუტერფორდიშ ისტორიულ მოხსენება — „ანაყუ ხალხ“, მუდგაქ თის მომავალიშ იმენდ მთლიანო დუთირუ. მუ მნიშვნელოვან ჭეშმარიტება გეგეს თე კონგრესის?

2. მუ მნიშვნელოვან ჭეშმარიტება გეგეს ჯიმა რუტერფორდიშ მოხსენებაშე?

² ჯიმა რუტერფორდიქ მუშ მოხსენებას ენწყჷ, მი მიშეშ გამოცხადებაშ 7:9-ს მოშინაფილ ანაყუ ხალხშა. თეიშახ ბიბლიაშ მარკვიებელეფიშ თე ჯგუფ ფიქრენდჷ, ნამდა ანაყუ ხალხ მაჟიახარისხოვან სულიერ კლას რდუ, ნამუთ ნაკლებ ართგურობას გიმირჩქინანდჷ. ჯიმა რუტერფორდიქ წმინდა წერილეფიშ გიმორნაფათ ენწყჷ, ნამდა ანაყუ ხალხ ვარდჷ ზეციერ ცხოვრებაშო გიშაგორილ. თინეფ ქრისტეშ შხვა შხურb რენა, ნამუთ გინასქიდუ „დიდ გასაჭირს“ დო დედამიწას მარადიულო იცხოვრენს (გამოცხ. 7:14). იესოქ თქუ: „მა შხვა შხურ ხოლო პჸუნს, თე ოშხურეშ ვარ, თინეფ ხოლო ოკო მიპჸონე. თინეფ ქიმირჩქილუანა ჩქიმ ხონარს დო იჸუაფ ართ ოჭყიშალ დო ართ ჭყიშ“ (იოან. 10:16). თე „შხვა შხურ“ იეჰოვაშ ართგურ მოწმეეფ რენა, მიდგას დედამიწას, სამოთხეს, მარადიულო ცხოვრებაშ იმენდ უღნა (მათ. 25:31—33, 46). მორთ ქობძირათ, მუჭო თირუ იეჰოვაშ ბრელ მსახურიშ, თინეფ შქას ჟიშე მოშინაფილ 18 წანერ ჯიმაშ, ცხოვრება ბიბლიურ ჭეშმარიტებაშ თე ახალ გაგებაქ (ფსალმ. 97:11; იგავ. 4:18).

ახალ გაგებაქ ანთასობით ადამიანიშ ცხოვრება დოთირუ

3, 4. მუ გეგჷ ანთასობით ადამიანქ 1935 წანაშ კონგრესის?

³ მანგარ სახიოლო მომენტ რდუ, მუჟამსით ჯიმა რუტერფორდიქ აუდიტორიას ქოთხუ: „მიდგას დედამიწას ცხოვრებაშ იმენდ გიღნა, ქორთხინთ, გემწოდირთათ“. მუჭოთ თე კონგრესის რდუნ, თი ჯიმა იჩიებ, 20 000 დამსწრეშე გვერდიშ უმოსიქ გემწოდირთჷ. თეშ უკულ ჯიმა რუტერფორდიქ თქუ: „დეკვირით! თენა რე ანაყუ ხალხ!“. თეშ მეჯინუ აუდიტორია დიდ ხიოლს გიმოხანტუნდჷ. კუჩხის გერდესინ თინეფქ, ქიმეხვადეს, ნამდა ვა რდეს ზეციურ ცხოვრებაშო გიშაგორილეფ დო ღორონთიშ შურით ცხებულეფ. კონგრესიშ მაჟია დღას 840 ადამიანქ დინათ, თინეფიშ უმენტაშ შხვა შხურ რდუ.

⁴ თე მოხსენებაშ უკულ ჟიშე მოშინაფილ ახალგაზრდა ჯიმაქ დო ანთასობით ადამიანქ მიოტუ ქრისტეშ გოშინაშ ონჯუას ქობალ დო ღვინიშ მეღება. ბრელქ იგინ დუდ თი ჯიმაცალო, ნამდგაქ თეშნერ სიტყვეფ თქუ: „1935 წანაშ გოშინაშ ონჯუა ბოლო რდუ, მუჟამსით სიმბოლოეფ მიბღჷ. ქიმეფხვად, ნამდა იეჰოვას მუშ წმინდა შურით ვა მუჩამ ჩქიმდა ზეციერ ცხოვრებაშ იმენდ; თეშ მანგიორო, მა დედამიწას ცხოვრებაშ დო თიშ სამოთხეთ გინორთაშა მონაწილებაშ მეღებაშ იმენდ მიღუდ“ (რომ. 8:16, 17; 2 კორ. 1:21, 22). თეშ უკულ ანაყუ ხალხიშ რაოდენობაქ მიძინ დო თინეფ ცხებულეფიშ დოსქილადირ ნაწილწკუმა თანამშრომლენა.

5. მუჭო უჯინე იეჰოვა თინეფს, მიდგაქ გოშინაშ ონჯუაშ სიმბოლოეფიშ მეღება მიოტუ?

⁵ მუჭო უჯინე იეჰოვა თინეფს, მიდგაქ 1935 წანაშ უკულ ქრისტეშ გოშინაშ ონჯუას სიმბოლოეფიშ მეღება მიოტუ? დო მუს ფიქრენს თინა ნათილ ქრისტიანშე, ნამუთ ღებულენს თე სიმბოლოეფს, მარა ჭიჭე ხანშა მეხვადუ, ნამდა ვა ჸოფე წმინდა შურით ცხებულ? (1 კორ. 11:28). ნამთინექ მიღჷ სიმბოლოეფ, მუშენდა თინეფქ სწორას ვენანჭეს მუნეფიშ იმენდის. მარა გურით ქაღიარენა შეცდომას, მეტო ვა ღებულენა სიმბოლოეფს დო ღორონთიშ ართგურო მსახურებას ქაგრძელენა-და, იეჰოვა აუცილებერო მიღენს თინეფს შხვა შხურიშ ნაწილო. თიშ უმკუჯინუო, ნამდა ვა ღებულენა ქობალ დო ღვინს, იშენით ოსწრუნა გოშინაშ ონჯუას, მუშენდა მანგარო აფასენა თის, მუთ იეჰოვა დო იესოქ აკეთეს თინეფშო.

დიდებულ იმენდ

6. მუ მითითება მეჩჷ იესოქ ანგელოზეფს?

⁶ დიდ გასაჭირ ხოლოს რე, ათეშენ ჩქინო გურიშ ემაკინალ იჸუაფ, გუვარჩუათ, მუს იჩიებ გამოცხადებაშ მა-7 დუდ ცხებულ ქრისტიანეფშე დო ანაყუ ხალხშე, ნამუთ შხვა შხურიშ ნაწილ რე. იესოქ მითითება მეჩჷ ანგელოზეფს, ქეწიჭოფესკო ოთხ გუმანადგურებელ ბორია. თინეფქ ოკო ვა დუმბარან თე ბორიეფს, სოიშახ არძა ცხებულ ქრისტიან ბეჭედ გეშქუმალირ ვეჸი, მუთ თის ნიშნენს, ნამდა იეჰოვა საბოლათ მირჩქინანს თინეფს ართგურეფო (გამოცხ. 7:1—4). მუნეფიშ ართგურობაშ ჯილდოთ, ქრისტეშ ცხებულ ჯიმალეფ, თიწკუმა ართო ზეცას მეფეეფ დო მღვდელეფ იჸინა (გამოცხ. 20:6). ღორონთიშ ოჯახიშ ზეციურ ნაწილ მანგარ ბედნერ იჸუაფ თიშ ძირაფათ, მუჭო მიღენს 144 000 ცხებულ მუშ ზეციურ ჯილდოს.

7. მუჭოთ გამოცხადებაშ 7:9, 10-ის ჭარჷ, მი ძირჷ იოანექ ხილუას დო მუს ორთუდეს თინეფ? (ქოძირით სურათ გალენ გვერდის).

⁷ 144 000 მეფე დო მღვდელიშ გურშენ ჩიებაშ უკულ იოანე საინტერესო მუდგარენს, არმაგედონს გინოსქილადირ ანაყუ ხალხის, ორწყე. პირველ ჯგუფშე განსხვავებით, მაჟია ჯგუფ ბრელით უმოს დიდ რე დო თინეფიშ ზუსტ რაოდენობა ვა მიჩქნა (წეკითხით გამოცხადებაშ 7:9, 10). თინეფ „ჩე გინძე მიკაქუნალით მიკოქუნელეფ“ რენა, მუთ თის ოძირანს, ნამდა „დუდ დეცვეს“ სატანაშ უწმინდურ ქვეყნიერებაშე დო ღორონთიშ დო ქრისტეშ ართგურო ქუდოსქიდეს (იაკ. 1:27). თინეფ ხონარმაღალო იჩიებნა, ნამდა იეჰოვა დო იესოშ, ღორონთიშ კირიბიშ, ჭყოლოფათ გეგნოსქიდეს. თეს გეძინელ, ხეს პალმაშ ნოჸელეფ უკინებნა, მუთ თის ოძირანს, ნამდა ხიოლით ღებულენა იესოს, მუჭოთ იეჰოვაშ დანიშნულ მეფეს (ქეშუდარით იოანეშ 12:12, 13).

8. მუს მირაგადნა გამოცხადებაშ 7:11, 12 იეჰოვაშ ზეციერ ოჯახიშ გურშენ?

⁸ წეკითხით გამოცხადებაშ 7:11, 12. მუქ მოხვად ზეცას, მუჟამსით ანაყუ ხალხ ქოძირეს? იოანე ორწყე, ნამდა იეჰოვაშ ზეციერ ოჯახ ხიოლით ეფშა რე ანაყუ ხალხიშ ძირაფათ დო განადიდენს ღორონთის. იეჰოვაშ ზეციერ ოჯახ გახარებულ იჸუაფ თე ხილუაშ შესრულებაშ ძირაფათ, მუჟამსით ანაყუ ხალხ გინასქიდუ დიდ გასაჭირს.

9. მუჭოთ გამოცხადებაშ 7:13—15-ის ჭარჷ, მუს ორთჷ ამდღა ანაყუ ხალხ?

⁹ წეკითხით გამოცხადებაშ 7:13—15. იოანექ ჭარჷ, ნამდა ანაყუ ხალხიქ მუნეფიშ „გინძე მიკაქუნალეფ გინახვეს დო კირიბიშ ზისხირით დარჩიალეს“. თენა ნიშნენს, ნამდა თინეფ სუფთა სინდისით დო სიმართლეთ გერენა იეჰოვაშ წოხოლე (ეს. 1:18). თინეფ რენა მეძღვინელ დო ნათილ ქრისტიანეფ, მიდგას იესოშ გიშაჸიდირალიშ ძალიერ რწმენა დო იეჰოვაწკუმა ურთიერთობა უღნა (იოან. 3:36; 1 პეტ. 3:21). თეშ გურშენ იწონუანს ღორონთ თინეფს დო შეულებნა წმინდა მსახურება შეუსრულან თის დედამიწას. თინეფ ასე ხოლო დუდგინოდვალირო ასრულენა სამეფოშ გურშენ ქადაგებაშ დო მოწაფეეფიშ მომზადებაშ საქმეშ უმენტაშ ნაწილს (მათ. 6:33; 24:14; 28:19, 20).

10. მუშა რე ანაყუ ხალხ დარწმუნებულ დო ნამ დუნაპირებუშ შესრულებას ძირნა თინეფ?

¹⁰ ანაყუ ხალხ, ნამდგაქ დიდ გასაჭირს გინასქიდ, დარწმუნებულ რე, ღორონთ გაგრძელენს თინეფშე ზრუნვას, მუშენდა „ტახტის გეხენ თინა მუშ კარავს გუფაჩუნს თინეფს“. თი დუნაპირებ, ნამდგას შხვა შხურ ბრელ ხანს ელუდ, საბოლათ შისრულებ: „[ღორონთ] გელუწიმინდანს თინეფს ირნერ ჩილამურს თოლეფშე დო ვეჸუაფ ღურა, ვართ ნგარა, თვალუა დო ჭუა, მუშენდა მუთ ულირს რდუნ, ირფელქ მისპჷ“ (გამოცხ. 21:3, 4).

11, 12. ა) მუჭოთ გამოცხადებაშ 7:16, 17-შე იძირე, მუ კურთხევეფს ელჷ ანაყუ ხალხ მომავალს? ბ) მუშ კეთება შეულებ შხვა შხურს გოშინაშ ონჯუას დო მუშენ იჸუაფ თენა ჯგირ?

¹¹ წეკითხით გამოცხადებაშ 7:16, 17. ამდღა იეჰოვაშ ხალხშე ნამთინე გლახა ეკონომიკურ მდგომარეობაშ ვარდა ჩხუპეფიშ გურშენ ფიზიკურ შქირენათ იტანჯებ. შხვეფ ციხეს ხენა მუნეფიშ რწმენაშ გურშენ. მარა თე ანაყუ ხალხ ბედნერ რე თიშ რჩქინათ, ნამდა თე უბადო სისტემაშ განადგურებაშ უკულ ირიათო აღვენუ ქიანაშ ფიზიკურ დო სულიერ საზრდო. მუჟამსით იეჰოვა სატანაშ უბადო სისტემას განადგურენს, ანაყუ ხალხ თხილერ იჸუაფ თიშ „თაკარია ჩხანაცალ“ რისხუაშე, ნამდგას ერეფს ქიგიოტახანს დუდის. დიდ გასაჭირიშ თებაშ უკულ იესო დედამიწას გინოსქილადირეფს „[მარადიულ] სიცოცხლეშ წყარიშ წყურგილეფშა ქეწაჸუნუ“. დეფიქრით: მუ დიდებულ იმენდ უღჷ ანაყუ ხალხის. მილიარდობით ადამიანს, მიდგას მუთუნ დროს უცხოვრებ, შეულებ დღას ვა ღურას! (იოან. 11:26).

¹² შხვა შხურს უღჷ სარკო იმენდ დო თეშ გურშენ იეჰოვა დო იესოს უმარდ! მართალ რე, ზეციერ ცხოვრებაშო გიშაგორილ ვა რე, მარა თენა თის ვა ნიშნენს, ნამდა იეჰოვა შხვა შხურს ნაკლებო აფასენს. ჟირხოლო ჯგუფის — შხვა შხურს დო ცხებულეფს — შეულებნა განადიდან ღორონთ დო ქრისტე. თეშ ოკეთებელო ართ-ართ საშვალება უფალიშ გოშინაშ ონჯუაშა დასწრება რე.

მთელ გურით განადიდით ღორონთ დო ქრისტე გოშინაშ ონჯუას

13, 14. მუშენ ოკო დესწრას არძაქ ქრისტეშ ღურაშ გოშინაშ ონჯუას?

¹³ ბოლო წანეფს გოშინაშ ონჯუაშ დროს ირ 1 000 დამსწრეშე ართ ხოლო ვა ღებულენს სიმბოლოეფს — ქობალ დო ღვინს. თენა თის ნიშნენს, ნამდა კრებეფიშ უმენტაშის ვა რე თიცალ პიროვნება, მით სიმბოლოეფს ღებულენს. გოშინაშ ონჯუაშ დამსწრეეფიშ უმენტაშის დედამიწას ცხოვრებაშ იმენდ უღჷ. იმწკუმა მუშენ ოსწრუნა თინეფ თე ღონისძიებას? თი მიზეზიშ გურშენ, მუდგაშეთ ხალხ მეგობარიშ ქორწილს ოსწრჷ. თინეფს ოკონა დასწრებათ მუნეფიშ ჸოროფა დო ელარნა ქაძირუან წყვილს, ნამუთ იქორწინებ. თეშნერო შხვა შხურს ოკო გოშინაშ ონჯუაშ დასწრებათ ქაძირუას, ნამდა უჸორს დო ხუჯის უკინენს ქრისტეს დო ცხებულეფს. შხვა შხურ თიშ გურშენ ხოლო ოსწრჷ, ნამდა ოკო, გიშაჸიდირალიშ მარდულობა ოძირას. თე გიშაჸიდირალ დედამიწას მარადიულო ცხოვრებაშ საშვალებას არზენს.

¹⁴ ხოლო ართ მნიშვნელოვან მიზეზ, მუდგაშ გურშენ შხვა შხურ გოშინაშ ონჯუას ოსწრუნ, თენა რე იესოშ მითითებაშ მორჩილება. მუჟამსით იესოქ წიმიჭყჷ თე განსაკუთრებულ ონჯუაშ აღნიშნება მუშ ართგურ მოციქულეფწკუმა ართო, თიქ უწუ თინეფს: „თენა აკეთით ჩქიმ გასაშინეთ“ (1 კორ. 11:23—26). თაშ ნამდა, თინეფ უფალიშ გოშინაშ ონჯუას ოსწრუნა, ონდო ცხებულეფშე ნამთინე დედამიწას რე. შხვა შხურ არძას აპატიჟენს, ქიდესწრან ქრისტეშ გოშინაშ ონჯუას მუნეფწკუმა ართო.

15. მუჭო შემლებნა გოშინაშ ონჯუას პირადო განვადიდათ ღორონთ დო ქრისტე?

¹⁵ გოშინაშ ონჯუას საშვალება მიღნა, განვადიდათ ღორონთ დო ქრისტე ობირეშიშ ბირათ დო ლოცვათ. თე წანას კითხირებულ იჸუაფ მოხსენება სათაურით: „დაფასით თინა, მუთ ღორონთიქ დო ქრისტექ თქვანო აკეთეს!“. თენა უმოსო გამმანგარენა იეჰოვა დო ქრისტეშ მიმართ მარდულობაშ გრძნობას. მუჟამსით ქობალ დო ღვინს გეგნოფჩანთ ართიანს, თენა ქუგმოშინანა, მუდგას თინეფ ასიმბოლოენა — ქრისტეშ სხეულს დო თიშ ზისხირს. ქიფიფქრენთ თიშე, ნამდა ჩქინო სიცოცხლე შეიოლებერ ქოჸოფედკონ, იეჰოვაქ მუშ სქუა ოღურალო გაწირ (მათ. 20:28). არძას, მიდგას ჩქინ ზეციერ მუმა დო თიშ სქუა უჸორს, ოკოდას იჸი გოშინაშ ონჯუაშა დასწრება.

მარდულ რდათ იმენდშენ, ნამუთ იეჰოვაქ მერჩეს

16. მუ საერთო უღნა ცხებულეფს დო შხვა შხურს?

¹⁶ ღორონთ ცხებულეფს დო შხვა შხურს ართნერო აფასენს. ჟირხოლო ჯგუფ მნიშვნელოვან რე თიშო. თიქ ართ დო იგივე ფას გინიგ — მუშ სქუაშ სიცოცხლე შეწირ — ქოთ ცხებულეფიშ დო ქოთ შხვა შხურიშ გიშაჸიდირალო. თე ჟირ ჯგუფ შქას განსხვავება თინა რე, ნამდა თინეფს შხვადოშხვა იმენდ უღნა. მარა ჟირხოლო ჯგუფიქ ღორონთიშ დო ქრისტეშ ართგურქ ოკო დოსქიდას (ფსალმ. 31:23). რშუდან, ღორონთიშ წმინდა შურს შეულებ არძას ართნერ ძალა მეჩას. თენა თის ნიშნენს, ნამდა იეჰოვა თითოულს, ცხებულს დო შხვა შხურს, საჭიროებაშ მიხედვით არზენს წმინდა შურს.

17. მუს ელჷ ცხებულეფიშ დოსქილადირ ნაწილ?

¹⁷ ცხებულ ქრისტიანეფ ზეციერ იმენდით ვებადებნა. თის ღორონთ ენუდვანს გურეფშა. თინეფ ფიქრენა მუნეფიშ იმენდშენ, ლოცულენა თეშ გურშენ დო მთელ გურით ელნა ზეციურ ჯილდოშ მეღებას. ცხებულეფს წარმოდგენა ხოლო ვეშულებნა, მუნერ იჸუაფ მუნეფიშ სულიერ სხეულ (ფილ. 3:20, 21; 1 იოან. 3:2). მარა შურ ოლნა, ქეშეხვადან იეჰოვა, იესო, ანგელოზეფ დო შხვა ცხებულეფს დო თინეფ შქას ქიდეკინან მუნეფიშ ადგილ ზეციერ სამეფოს.

18. მუს ელჷ შხვა შხურ?

¹⁸ შხვა შხურ აფასენს დედამიწას მარადიულო ცხოვრებაშ იმენდის. თე იმენდ ბუნებრივო უღნა ადამიანეფს (ეკლ. 3:11). თინეფ ელნა თი დღას, მუჟამსით შეიალებენა მონაწილება მიღან მთელ პლანეტაშ სამოთხეთ გინორთინაფაშ საქმეს. თინეფ ელნა დროს, მუჟამსით შეიალებენა ქუდოდგან მუნეფიშ ჸუდეეფ, გაშენან ბაღეფ დო სრულყოფილ ჯამრთელობათ მორდან სქუალეფ (ეს. 65:21—23). თინეფ ელნა დროს, მუჟამსით ქოძირნა დედამიწაშ არძა კუნთხუს — გვალეფს, ტყალეფს, ზღვეფს დო გეგმირკვიენა ღორონთიშ ირნერ გუნაჭყეფუს. მარა პირველ რიგის, თინეფ ბედნერეფ რენა, მუშენდა უჩქნა, იეჰოვაწკუმა ურთიერთობა უმოსო ემანგარებდან იჸი.

19. მუშ საშვალებას მარზენა თითოულს გოშინაშ ონჯუა დო მუჟამ ჩეტარებ თინა თე წანას?

¹⁹ იეჰოვაქ მუშ არძა მეძღვინელ მსახურს მომავალიშ დიდებულ იმენდ მეჩჷ (იერ. 29:11). ქრისტეშ ღურაშ გოშინაშ ონჯუა თითოულს საშვალებას მარზენა, განვადიდათ ღორონთ დო ქრისტე თიშო, მუთ ჩქინო აკეთეს, ნამდა შემლებნა გეფხარათ ულიებ სიცოცხლეთ. მუშო ოკო რაგად, გოშინაშ ონჯუა არძაშ უმოს მნიშვნელოვან შეხვალამა რე ჭეშმარიტ ქრისტიანეფშო. თინა ჩეტარებ 2021 წანაშ 27 მარტის, საბატონს, ბჟაშ ენულაშ უკულ. თე წანას ბრელს შეიალებე შედარებით თავისფალო ქიდესწრას თე მნიშვნელოვან შეხვალამას. შხვეფ წინააღმდეგობეფიშ უმკუჯინუო იშენით ქიდესწრებნა. ნამთინეშო ძნელ იჸუაფ, ციხეს აღნიშნას თენა. მუდგა მდგომარეობას ვა ვორდათინ, ფშუდან, იეჰოვა, იესო დო ღორონთიშ ოჯახიშ ზეციერ ნაწილ მორწყენა. მოკონა არძა კრებაქ, ჯგუფიქ დო თინეფქ, მით ხვალე რენა, ღირსუანო აღნიშნას გოშინაშ ონჯუა!