გეგმოხანტით მარდულობა იეჰოვაშ თი ძღვინშო, ნამუთ თოლით ვერწყებე

1. მუ თქუ იესოქ ზეციერ განძიშ გურშენ?

არძა ძღვინიშ თოლით ძირაფა ვა რე შეიოლებერ. სინამდვილეს, არძაშ უმოს ძვირფას ძღვინს თოლით ვა ვორწყეთ. გვალას ქადაგებაშ დროს, იესოქ მიშინუ ზეციერ განძი, ნამუთ ბრელით უმოს ძვირფას რე ვინემ მატერიალურ ქონება. თიქ თქუ: „სოდეთ სქან განძი რენ, თექ იჸი სქან გურ ხოლო“ (მათ. 6:19—21). ჩქინ გურ აღბძრენა მიბღათ თინა, მუთ ჩქინო მანგარ ძვირფას რე. ზეციერ განძი, ნამდგაშ გურშენ იესო იჩიებუდ, ნიშნენს მიღუდან ჯგირ სახელ ღორონთიშ წოხოლე. თეცალ განძის ზეცას დობშაყარანთ-და, თიშა მუთუნს ვაცილებე.

2. ა) 2 კორინთელეფიშ 4:17, 18-ს ინოჭარილ პავლეშ სიტყვეფიშ თანახმათ, მუშა მაფნა ყურადღება გინოღალირ? ბ) მუს გუვარჩიენთ თე სტატიას?

² მოციქულ პავლე იჩიებ: „ვერწყებენ ფერს ვუჯინეთ“ (წეკითხით 2 კორინთელები 4:17, 18). ვერწყებენ ფერ განძშა მიშურს თი კურთხევეფ, ნამდგას ღორონთშე დაპირებულ ახალ ქვეყნიერებას მიბღენთ. თე სტატიას გუვარჩიენთ თოლით ვერწყებენ ფერ ოთხ ძღვინს, ნამდგას ამდღარშე მოუღ ჩქინდა ჯგირობუა — იეჰოვაწკუმა მეგობრობა, ლოცვა, ღორონთიშ წმინდა შურიშ მოხვარა დო მოხვარა, ნამდგას ბღებულენთ იეჰოვა, იესო დო ანგელოზეფშე. თეს გეძინელ, გუვარჩიენთ, მუჭო შემლებნა მარდულობაშ გიმოხანტუა თე ირფელშო.

იეჰოვაწკუმა მეგობრობა

3. ნამ რე თოლით ვერწყებენ ფერ არძაშ უმოს დიდ ძღვინ დო მუშ ჭყოლოფათ რე თინა შეიოლებერ?

³ არძაშ უმოს დიდ ძღვინ, ნამდგას თოლით ვა ვორწყეთ იეჰოვაწკუმა მეგობრობა რე (ფსალმ. 25:14). მუჭო რე შეიოლებერ, წმინდა ღორონთ ცოდვილ ადამიანეფიშ მეგობარ რდას? თენა შეიოლებერ რე იესო ქრისტეშ გიშაჸიდირალ მსხვერპლიშ ჭყოლოფათ, „ნამუთ ქვეყნიერებაშ ცოდვას სპუნს“ (იოან. 1:29). იეჰოვას წინასწარ უჩქუდ, ნამდა კაცობრიობაშ მარსხებელწკუმა დაკავშირებულ მუშ განზრახვა, აუცილებერო შესრულებუდ. ზუსტას თეშ საფუძველშა შეულებუდ იეჰოვას იმეგობრუკო თინეფწკუმა, მით იესოშ ღურაშახ ცხოვრენდჷ (რომ. 3:25).

4. ქიმიჸონით ნამთინე ქომოლკოჩიშ მაგალით, მით ქრისტეშახ ცხოვრენდეს, მარა იეჰოვაშ მეგობრეფო გინირთეს.

⁴ ქიგიფშინათ ნამთინე ქომოლკოჩ, მით ქრისტეშახ ცხოვრენდეს, მარა ღორონთიშ მეგობრეფო გინირთეს. აბრაამქ დიდ რწმენა გიმირჩქინ. თიშ ღურაშე 1  000 წანაშე მეტ ხანიშ უკულ იეჰოვაქ თინა მუშ მეგობარო მიშინუ (ეს. 41:8). თაშ ნამდა, ღურას ხოლო ვეშულებ ღორონთის მუშ ხოლოშიან მეგობრეფ მიდუღას. აბრაამ იეჰოვაშ მეხსიერებას ცოცხალ რე (ლუკ. 20:37, 38). ღორონთიშ ხოლო ართ მეგობარ იობი რდუ. ართშა, მუჟამსით ზეცას ანგელოზეფ ართო რდეს აკოშაყარელ, იეჰოვაქ იობიშ გურშენ დადებითო იჩუ. თიქ თქუ: „მართალ, ღორონთიშ მოშიშ კოჩ რე დო უბადობაშე შორს გერე“ (იობ. 1:6—8). მუჭო აფასენდჷ იეჰოვა დანიელს, ნამუთ 80 წანას ართგურო ომსახურუდ ღორონთის თი ქიანას, სოდეთ ხალხ ვამსახურუდ იეჰოვას? ანგელოზეფქ სუმშა დარწმუნეს ხანშამიშულირ დანიელ, ნამდა „ძვირფას კოჩ“ რდუ ღორონთშო (დან. 9:23; 10:11, 19). შემლებნა ბჯერდან, ნამდა იეჰოვა მთელ გურით ელჷ თი დროს, მუჟამსით გათელენს მუშ საჸოროფო მეგობრეფს, მით ღურელეფ რენა (იობ. 14:15).

5. მუ რე საჭირო თიშო, ნამდა იეჰოვაშ მეგობრეფ ვორდათ?

⁵ მუზმა არასრულყოფილ ადამიან ხარენს ამდღა იეჰოვაწკუმა მეგობრულ ურთიერთობათ? თეცალეფ მილიონეფ რენა. თეს თიშენ იფჩიებუთ, ნამდა მთელ მსოფლიოს ქომოლკათა, ოსურკათა დო ბაღანეფ მუნეფიშ საქციელით ოძირანა, ნამდა ოკონა ღორონთწკუმა მეგობრობა. იეჰოვა „მართალეფწკუმა მეგობრენს“ (იგავ. 3:32). თინეფ რწმენას გიმირჩქინანა იესოშ გიშაჸიდირალ მსხვერპლიშ მიმართ დო ათეშენ შეულებნა ღორონთწკუმა მეგობრობა. იესოშ მსხვერპლიშ საფუძველშა შემლებნა დუდ მევუძღვინათ იეჰოვას დო დიბნათათ. მუჟამსით თე მნიშვნელოვან ნაბიჯეფს გინმობდგუნთ, მილიონობით მეძღვინელ დო ნათილ ქრისტიან შქას ვორეთ, მით სამყაროს არძაშ უმოს დიდებულ პიროვნებაწკუმა მეგობრობათ ხარენა!

6. მუჭო შემლებნა ვოძირათ, ნამდა ვაფასენთ ღორონთწკუმა მეგობრობაშ ძღვინს?

⁶ მუჭო შემლებნა ვოძირათ, ნამდა ვაფასენთ ღორონთწკუმა მეგობრობაშ ძღვინს? აბრაამ დო იობცალო, მით მთელ ცხოვრებას ღორონთიშ ართგურ რდეს, ჩქი ხოლო ბოლოშა ართგურეფ ოკო დოფსქიდათ, ვა უღჷ მნიშვნელობა მუსხი ხან რე ვომსახურუთ იეჰოვას. დანიელცალო, ჩქინო ხოლო ღორონთწკუმა მეგობრობა ჩქინ სიცოცხლეშე უმოს ძვირფას ოკო რდას (დან. 6:7, 10, 16, 22). იეჰოვაშ მოხვარათ შემლებნა, ირნერ განსაცდელს გავურზათ დო იეჰოვაშ მეგობრეფო ქუდოფსქიდათ (ფილ. 4:13).

ლოცვაშ პატი

7. ა) მუჭოთ იგავეფიშ 15:8-ს ჭარჷ, მუს ფიქრენს იეჰოვა ჩქინ ლოცვეფშე? ბ) მუჭო პასუხენს იეჰოვა ჩქინ ლოცვეფს?

⁷ ხოლო ართ ძღვინ, ნამდგას თოლით ვა ვორწყეთ, ლოცვა რე. მეგობრეფს ოსიამოვნუნა მუნეფიშ ფიქრეფ დო გრძნობეფიშ ართიანშა გაზიარება. თენა თაშ რე, იეჰოვაწკუმა ჩქინ მეგობრობაშ შემთხვევას ხოლო! იეჰოვა მუშ სიტყვაშ საშვალებათ მეჩიებნა დო მოგებაფუანა მუშ ფიქრეფ დო გრძნობეფიშ გურშენ. ჩქი ლოცვაშ საშვალებათ ვეჩიებუთ თის დო ვუზიარენთ ჩქინ ფიქრეფ დო გრძნობეფს. ღორონთის ოსიამოვნ ჩქინ ლოცვეფიშ მორჩქილაფა (წეკითხით იგავები 15:8). იეჰოვა, ჩქინ მოჸოროფე მეგობარ, ჩქინ ლოცვეფს უბრალოთ ვერჩქილენ, პასუხის ხოლო მარზენა თინეფშე. მინშა პასუხის ხეთეშე ბღებულენთ. მარა, მინშა შილებე ართდოიგივე საკითხშე ბრელშა მაჸუან ოლოცებერქ. მარა შემლებნა დარწმუნებულ ვორდათ, ნამდა იეჰოვა პასუხის საჭირო დროს დო არძაშ უჯგუშ შარათ ქომჩანა. მუშო ოკო რაგად, შილებე თიცალ პასუხ ვემიბღათ, მუნერით მოკოდეს. მაგალთო, პრობლემაშ ჩათხინაფაშ მანგიორო, შილებე ღორონთიქ სიბრძნე დო ძალა ქომჩან, „ნამდა ბოლოშა მითვინათ“ (1 კორ. 10:13).

8. მუჭო შემლებნა ვოძირათ, ნამდა ვაფასენთ ლოცვაშ დიდებულ ძღვინს?

⁸ მუჭო შემლებნა ვოძირათ, ნამდა ვაფასენთ ლოცვაშ დიდებულ ძღვინს? ართ-ართ საშვალება რე, გეფთვალისწინათ ღორონთიშ შთაგონებულ რჩევა „ირიათო ილოცით“ (1 თეს. 5:17). იეჰოვა ლოცვას ვა მანძალენა. თინა აფასენს ჩქინ ნებაშ თავისუფლებას დო მომწოდენა ირიათო იბლოცათ (რომ. 12:12). თაშ ნამდა, დღაშ განმავლობას ხშირას ქიბლოცენთ-და, თეშნერო დუვაფასენთ თე ძღვინს. მუშო ოკო რაგად, ოკო ვაგმოჭყორდან, ნამდა ჩქინ ლოცვეფს მარდულობა გეგმოფხანტათ იეჰოვაშ მიმართ დო განვადიდათ თინა (ფსალმ. 145:2, 3).

9. მუს ფიქრენს ართ ჯიმა ლოცვაშ გურშენ დო თქვა მუს ფიქრენთ თე ძღვინშენ?

⁹ მუთ უმოს მეტ ხან რე ვომსახურუთ იეჰოვას დო ვორწყეთ, მუჭო პასუხენს ჩქინ ლოცვეფს, თით უმოსო ოკო დუვაფასათ ლოცვაშ ძღვინ. მაგალთო, ართ ჯიმა, კრის, ნამუთ 47 წანა რე, მუთ სრულ დროთ მსახურენს, იჩიებ: „მანგარო მოსიამოვნ ოჭმარეს, ადრე ლოცვა, მუჟამსით სიწყნარე რე დო ბჟაშ სხივეფ ცუნდამ დოლოს გერწკინუნს! თენა აღბძრენს, მარდულობა გეგმოფხანტე თი ირფელშე, მუთ იეჰოვაქ მიძღვინეს, თინეფ შქას ლოცვაშ პატიშენ. დღაშ ბოლოს, ლოცვაშ უკულ, მშვიდას იბრულუანქ“.

წმინდა შურიშ მოხვარა

10. მუშენ ოკო ვაფასენდათ ღორონთიშ წმინდა შურს?

¹⁰ იეჰოვაშ ხოლო ართ ძღვინ თიშ მოქმედ ძალა რე. იესოქ მომწოდეს, ნამდა იბლოცათ წმინდა შურიშ მიოღებელო (ლუკ. 11:9, 13). იეჰოვა, მუშ წმინდა შურიშ საშვალებათ, მარზენა ძალას „ნამუთ ჩვეულებრივშე უმოს რე“ (2 კორ. 4:7; საქ. 1:8). ღორონთიშ წმინდა შურიშ მოხვარათ, ირნერ განსაცდელიშ გინოღალა შემლებნა.

11. მუჭო მოხვარნა წმინდა შურ?

¹¹ წმინდა შურ მოხვარნა, შევასრულათ თი დავალებეფ, ნამდგას ღორონთიშ მსახურებას ბღებულენთ. ღორონთიშ წმინდა შურს შეულებ ჩქინ ნიჭი დო უნარეფიშ გაუჯგუშება. თინა მოხვარნა ქრისტიანულ პასუხიშმგებლობეფიშ შესრულებას. ჩქი მარჩქილენა, ნამდა თი ჯგირ შედეგეფ, ნამუთ ღორონთიშ მსახურებას მიღნა, ჩქინ დამსახურება ვარინ, ღორონთიშ წმინდა შურიშ მოხვარაშ შედეგ რე.

12. მუჭოთ სალმუნიშ 139:23, 24-ის ჭარჷ, მუშ გურშენ შემლებნა იბლოცათ?

¹² ჩქი ვაფასენთ წმინდა შურს, მუჟამსით ბლოცულენთ, ნამდა თიქ ქიმმეხვარან, ქობძირათ, არასწორ ფიქრეფ ვარდა სურვილეფ ხომ ვა მიღნა (წეკითხით ფსალმუნი 139:23, 24). თე საკითხშე ქიბლოცენთ-და, იეჰოვა, წმინდა შურიშ საშვალებათ მიმეხვარებნა, ქობძირათ ჩქინ არასწორ ფიქრეფ დო სურვილეფ. თეშ უკულ, ლოცვას ღორონთის ოკო ქოფთხუათ წმინდა შურ, ნამდა ქომჩან საჭირო ძალეფ თეცალ ფიქრეფ დო სურვილეფიშ ჩათხინაფალო. თეშნერო ვოძირანთ, ნამდა გინოჭყვიდილ მაფნა, დუდ ევუჩილითუათ ირფელს, მუთ იეჰოვაშ წმინდა შურიშ მოხვარას მიმოდინაფუანა (ეფეს. 4:30).

13. მუჭო შემლებნა უმოს მარდულეფ ვორდათ წმინდა შურშო?

¹³ თიშე დაფიქრება, მუს ორთჷ ამდღა წმინდა შურ, მიმეხვარებნა, უმოს მარდულეფ ვორდათ. იესოქ, ზეცაშა ულაშახ, მუშ მოწაფეეფს უწუ: „მუჟამსით თქვანდა წმინდა შურ გინილენს, ძალას მიღენთ დო იჸუაფუთ ჩქიმ მოწმეეფ . . . დედამიწაშ არძა კუნთხუს“ (საქ. 1:8). თე სიტყვეფ სარკოთ ისრულებ. წმინდა შურიშ მოხვარათ, დედამიწაშ არძა კუნთხუშე, სოდგარენ 8,5 მილიონ პიროვნება იშაყარუ იეჰოვაშ თაყვანიშ ოცემებელო. თეს გეძინელ, ჩქი ფხარენთ სულიერ სამოთხეთ, მუშენდა წმინდა შურ მოხვარნა თიცალ თვისებეფიშ გავითარებას, მუნერით რე ჸოროფა, ხიოლ, მშვიდობა, მოთვინება, ჯგირობუა, სიჯგირა, რწმენა, ლიბ ხასიათ დო დუდშეკება. თე თვისებეფ „შურიშ ნაყოფ რე“ (გალ. 5:22, 23). ღორონთიშ წმინდა შურ მართალო ძვირფას ძღვინ რე!

იეჰოვა, იესო დო ანგელოზეფ ელამრენა მსახურებაშ დროს

14. მი მოხვარნა, მუჟამსით მსახურებას ბღებულენთ მონაწილებას?

¹⁴ თოლით ვერწყებენ ფერ ხოლო ართ ძღვინ რე, ვორდათ იეჰოვაშ დო თიშ ორგანიზაციაშ ზეციერ ნაწილიშ „თანამშრომლეფ“ (2 კორ. 6:1). ჩქი თინეფწკუმა ფთანამშრომლენთ, მუჟამსით მონაწილებას ბღებულენთ მოწაფეეფიშ მომზადებაშ საქმეს. პავლექ მუშ დუდშე დო თინეფშე, მით მონაწილებას ღებულენს თე საქმეს, თქუ: „ჩქი ღორონთიშ თანამშრომლეფ ვორეთ“ (1 კორ. 3:9). მსახურებას მონაწილებათ, იესოშ თანამშრომლეფ ხოლო ვორეთ. იესოქ მუშ მიმაჸუნალეფს დავალ: „მოწაფეეფო მამზადით ხალხ არძა რჯულშე“. თიქ გეუძინ: „თქვანწკუმა ვორექ“ (მათ. 28:19, 20). მუშ რაგად შემლებნა ანგელოზეფშე? მართალო დიდ კურთხევა რე, ნამდა თინეფ ფხემძღვანელენა, „მარადიულ სახიოლო ამბე [ქუვახარათ] დედამიწაშ მახორუეფს“ (გამოცხ. 14:6).

15. ქიმიჸონით ბიბლიურ მაგალით, მუთ ოძირანს მუშმადიდა როლს ლაჸაფენს იეჰოვა ჩქინ მსახურებას.

¹⁵ მუშ მეჭირნაფას მოხვარნა, თი ელარნა, ნამდგას ზეცაშე ბღებულენთ? მუჟამსით სამეფოშ გურშენ თასის ფთასუნთ, ნამთინე თას ჯგირ ნიადაგის გელუ დო ირდუ (მათ. 13:18, 23). მი ოხვარ თე თასის რდუალას დო ნაყოფიშ მიკოღალას? იესო იჩიებ, ნამდა მითინს ვეშულებ მუშით გინირთას იესოშ მიმაჸუნალო, „მუმაქ . . . თეშ საშვალება ვემეჩ-და“ (იოან. 6:44). ბიბლიას თეშ კონკრეტულ მაგალითეფ რე მოჩამილ. ქიგიფშინათ შემთხვევა, მუჟამსით ართშა, ქალაქ ფილიპეშ გოხოლუას, პავლექ ეკოშაყარელ ოსურკათას უქადაგ. ართ-ართ ოსურკოჩიშ, ლიდიაშ გურშენ ბიბლია იჩიებ: „იეჰოვაქ თის გურ გოუნწყჷ, ნამდა ყურადღებათ მირჩქილუკო პავლეშ ნარაგად“ (საქ. 16:13—15). ლიდიაცალო, იეჰოვაქ მილიონეფს მეჩჷ საშვალება, ჸოფედესკო მუშ მსახურ.

16. მის ოკო ვუძღვინათ დიდება თი წარმატებაშო, მუდგას მსახურებას მივოჭირინუანთ?

¹⁶ სინამდვილეს მი გერე თი წარმატებაშ უკახლე, ნამუთ მსახურებას მიღნა? პავლექ თე კითხვას უპასუხ, მუჟამსით კორინთიშ კრებას მეჭარ: „მა დობრგჷ, აპოლოსიქ დოწყარ, მარა ღორონთიქ მორდჷ. თაშ ნამდა, ვართ დუმარგუაფალ რე მუთუნ, ვართ მაწყარალ, მთავარ რე ღორონთ, ნამუთ რდუნს“ (1 კორ. 3:6, 7). პავლეცალო, ჩქი ხოლო ირიათო იეჰოვას ოკო ვუძღვინათ დიდება თი წარმატებაშო, მუდგას მსახურებას მივოჭირინუანთ.

17. მუჭო შემლებნა ვოძირათ, ნამდა ვაფასენთ დიდებულ პატის, ვორდათ იეჰოვა, იესო დო ანგელოზეფიშ „თანამშრომლეფ“?

¹⁷ მუჭო შემლებნა ვოძირათ, ნამდა ვაფასენთ დიდებულ პატის, ვორდათ იეჰოვა, იესო დო ანგელოზეფიშ „თანამშრომლეფ“? მარდულობას გიმოფხანტუნთ, მუჟამსით მუთ შემლებნან ირფელს ვორთუთ, ნამდა სახიოლო ამბე შხვეფს ვუქადაგათ. თეშ ბრელ მეთოდ არსებენს, მაგალთო, ქადაგება „სახალხოთ დო კარდოკარ“ (საქ. 20:20). თეს გეძინელ, ბრელ ხიოლით ქადაგენს არაფორმალურო. მუჟამსით თინეფ უჩინებუს შეხვადნა, მეგობრულო ოქცუნა დო რაგადიშ წუმოჭყაფას ოცადნა. პიროვნება დადებითო განწყობილ ქორენ-და, თინეფ ტაქტიანო გინულა სახიოლო ამბეშ ქადაგებაშა.

18, 19. ა) მუჭო ბწყარუნთ ჭეშმარიტებაშ თასის? ბ) ქიმიჸონით მაგალით, ნამუთ ოძირანს, მუჭო მეხვარ იეჰოვაქ ართ ბიბლიაშ მაგურაფალს?

¹⁸ მუჭოთ ღორონთიშ თანამშრომლეფ, ჩქი ჭეშმარიტებაშ თას ხვალე ოკო ვა ფთასათინ, ოკო დობწყარათ თინა. მუჟამსით პიროვნება ინტერესის გიმირჩქინანს, მუთ შემლებნან ირფელ ოკო გუვაკეთათ, ნამდა კინ ქიმვაკითხუათ თის, ვარდა შხვას ქოფთხუათ ქიმერთას თიშა, თი მიზანით, ნამდა ბიბლიაშ გურაფა ქიდიჭყას. მანგარო მოხიოლნა, მუჟამსით ვორწყეთ, მუჭო ოხვარ იეჰოვა ბიბლიაშ მაგურაფალს დითირუას აზროვნება დო გურიშ მდგომარეობა.

¹⁹ გუვარჩუათ რაფალალანიშ მაგალით, ნამუთ სამხრეთ აფრიკას ცხოვრენს. თინა ტრადიციულ მეთოდეფით მკურნალ რდუ. თის მოწონდჷ, მუდგას ბიბლიაშე გურაფლენდჷ. მარა სირთულეს ქეშეხვად, მუჟამსით წეკითხჷ მუს იჩიებ ღორონთიშ სიტყვა ღურელეფწკუმა ურთიერთობაშ გურშენ (კან. 18:10—12). დროშ მიკულაწკუმა ართო, თიქ იეჰოვას საშვალება ქიმეჩ დოუთირუკო აზროვნება. დროხანიშ უკულ, თიქ მიოტუ ექიმბაშობა, თიშ უმკუჯინუო, ნამდა შხვა სამუშა ვა უღუდ. რაფალალანი, ნამუთ 60 წანერ რე, იჩიებ: „მარდულ ვორექ იეჰოვაშ მოწმეეფიშ, მუშენდა თინეფქ ბრელნერო მიმეხვარეს; თეწკუმა ართო სამუშა ხოლო დუმოგორაფეს. არძაშ უმოსო იეჰოვას ვუმარდუქ, მუშენდა მიმეხვარ, ცხოვრება დიფთირეკო. თაშ ნამდა, ამდღა ნათილ იეჰოვაშ მოწმე ვორექ“.

20. მუშ კეთება გაფნა გინოჭყვიდილ?

²⁰ თე სტატიას გუვარჩით თოლით ვერწყებენ ფერ ოთხ ძღვინ. არძაშ უდიდაშ ძღვინ იეჰოვაწკუმა მეგობრობაშ პატი რე. თენა საშვალებას მარზენა, შხვა მუსხირენ ძღვინ ხოლო მიბღათ, მუნერით რე ლოცვა, წმინდა შურიშ, იეჰოვაშ, იესოშ დო ანგელოზეფიშ მოხვარა მსახურებაშ დროს. მორთ გინოჭყვიდილ მაფდან, უმოსო დუვაფასათ თე ირფელ დო დღას ვაგმოჭყორდან მარდულობაშ გიმოხანტუაქ იეჰოვაშა, ნამუთ დიდებულ მეგობარ რე.