მამზადით ხალხი მოწაფეეფო

1, 2. ა) მუჭოთ მათეშ 28:18—20-ის ინოჭარილ იესოშ მითითებაშე იძირე, მუ რე ქრისტიანულ კრებაშ მთავარ მიზან? ბ) მუ კითხვეფს გუვარჩიენთ თე სტატიას?

მოციქულეფ გაოცებულ იჸუაფდეს, მუჟამსით იესოქ მუშ გათელებაშ უკულ თხუ თინეფს, გვალამ ადგილს გეკიშაყარესკო (მათ. 28:16). მუჭოთ იძირენ, თაქ იესოქ ართდროულო ხუთოშშე მეტ ჯიმას გეგმეცხად (1 კორ. 15:6). მუშენ თხუ იესოქ მუშ მოწაფეეფს, თე ადგილს ქეშეხვადესკო? იესოქ თინეფს მნიშვნელოვან დავალება მეჩჷ: „მეუთ დო მოწაფეეფო მამზადით ხალხი არძა რჯულშე“ (წეკითხით მათე 28:18—20).

² მოწაფეეფქ, მიდგაქ მირჩქილუ იესოშ სიტყვეფ, უმოს გვიანო პირველ საუკუნეშ ქრისტიანულ კრებაშ წევრეფო გინირთეს. თე კრებაშ მთავარ მიზან რდუ, მუთ შილებე მეტ პიროვნება მამზადესკო ქრისტეშ მოწაფეთb. ამდღა ვითანთასობით ჭეშმარიტ ქრისტიანულ კრება რე მთელ მსოფლიოს დო თე კრებეფიშ მთავარ მიზან ხოლო თინა რე, მუთ პირველ საუკუნეშ კრებეფიშ მიზან რდუ. თე სტატიას ოთხ საკითხის გუვარჩიენთ: მუშენ რე ხალხიშ მოწაფეეფო მომზადება თეცალ მნიშვნელოვან? მუ მიშურს ხალხიშ მოწაფეეფო მომზადებაშ საქმეშა? არძა ქრისტიან ღებულენსო მონაწილებას მოწაფეეფო მომზადებაშ საქმეს? მუშენ მოსაჭირნა თე საქმეს მოთვინებაშ გიმორჩქინა?

მუშენ რე ხალხიშ მოწაფეეფო მომზადება თეცალ მნიშვნელოვან

3. მუჭოთ იოანეშ 14:6 დო 17:3-შე იძირე, მუშენ რე მოწაფეეფიშ მომზადება მნიშვნელოვან?

³ მუშენ რე ხალხიშ მოწაფეეფო მომზადება თეცალ მნიშვნელოვან? თეშ მიზეზ თინა რე, ნამდა ხვალე ქრისტეშ მოწაფეეფს შეულებნა გინირთან ღორონთიშ მეგობრეფო. თეს გეძინელ, თინეფს, მით ქრისტეშ შარას გეჸუნა, უჯგუშ ცხოვრება უღნა ამდღა დო მომავალს მარადიულ სიცოცხლე ელნა (წეკითხით იოანე 14:6; 17:3). ნამდვილო, ქრისტექ სერიოზულ დავალება მუჩეს, მარა თის ხვალე ჩქინ ძალეფით ვა ვასრულენთ. მოციქულ პავლექ მუშ დუდშენ დო მუსხირენ ხოლოშიან მეგობარშენ თქუ: „ჩქი ღორონთიშ თანამსახურეფ ვორეთ“ (1 კორ. 3:9). მუშმადიდა პატი რე ჩქინო, არასრულყოფილ კათაშო, ნამდა იეჰოვა დო იესოქ თე საქმეშ კეთება ჩქი დუმავალეს.

4. მუს ბგურაფლენთ ივან დო მატილდაშ მაგალითშე?

⁴ მოწაფეეფო მომზადებაშ საქმეს დიდ ხიოლ მოჸუნს. ქობძირათ კოლუმბიელ ივან დო თიშ მეუღლეშ, მატილდაშ მაგალით. თინეფქ ართ ახალგაზრდა კოჩის, დავიერს უქადაგეს. დავიერქ თინეფს უწუ: „მოკო, დოფთირუე ჩქიმ ცხოვრებაშ წეს, მარა თენა ვეშმალებე“. თინა მოკრივე რდუ, ნარკოტიკეფს გიმირინუანდჷ, ბრელს შუნდჷ დო ცხოვრენდჷ მეგობარ ძღაბ, ერიკაწკუმა ართო. ივან იჩიებ: „დავიერ დაშორებულ სოფელს ცხოვრენდჷ. ჩქი ხშირას მივაკითხანდით თის. თექ მიოულარო ლეტამ შარეფს საათობით მიფშით ველისპეტით. ბიბლიაშ გურაფა ერიკაქ ხოლო ქიდიჭყჷ, მუჟამსით ქოძირ, ნამდა დავიერ უჯგუშობაშა ითირუდ“. დრო ხანიშ უკულ დავიერქ მიოტუ ნარკოტიკეფიშ გიმორნაფა, შუმა დო კრივი. ერიკა დო თიქ კანონიერო დექორწინეს. მატილდა იჩიებ: «მუჟამსით დავიერ დო ერიკაქ 2016 წანას დექორწინეს, ჩქი დავიერიშ სიტყვეფქ ქუგმაშინეს: „მოკო, დოფთირუე ჩქიმ ცხოვრებაშ წეს, მარა თენა ვეშმალებე“. ხიოლით ჩილამურეფქ ვეშმაკავებუეს». მუშო ოკო რაგად, ჩქინდა დიდ ხიოლ მოუღ, მუჟამსით ვოხვარუთ შხვეფს, გინირთან ქრისტეშ მოწაფეეფო.

მუ მიშურს ხალხიშ მოწაფეეფო მომზადებაშ საქმეშა

5. ნამ რე მოწაფეეფო მომზადებაშ პირველ ნაბიჯ?

⁵ მოწაფეეფო მომზადებაშ პირველ ნაბიჯ მართალ გურიშ კათაშ გორუა რე (მათ. 10:11). მუჟამსით არძას ვუქადაგუთ, მიდგას შეფხვადუთ, თეთ ვოძირანთ, ნამდა ნამდვილო იეჰოვაშ მოწმეეფ ვორეთ. თეშნერო ვომორჩილუთ ქრისტეშ მითითებას დო ფქადაგენთ, მუდგათ ვოძირანთ, ნამდა ჭეშმარიტ ქრისტიანეფ ვორეთ.

6. მუ მიგეხვარებნა გიღდან ჯგირ შედეგეფ მსახურებას?

⁶ ნამთინეს მანგარო ოინტერეს ბიბლიურ ჭეშმარიტებაშ გაგება, მარა უმენტაშ, მიდგას შეფხვადუთ, დუდშე შილებე თეშ იძირედას, ნამდა ვაინტერესნა ბიბლიურ თემეფშე ჩიება. ჩქი შემლებნა თეცალ კათას ინტერეს გურჩქინათ. მსახურებას ჯგირ შედეგეფ გაღვენუნა, მუჟამსით ჯგირო მემზადებუთ თეშო. გეგშაგორით კონკრეტულ თემეფ, ნამდგაქ შილებე დაინტერესას თქვან ტერიტორიას მახორუ ხალხი. თეშ უკულ დაგეგმით, მუჭო შეილებნა თე თემაშე რაგადიშ დოჭყაფა.

7. მუჭო შეილებნა რაგადიშ დოჭყაფა დო მუჭო ფიქრენთ, მუშენ რე მნიშვნელოვან შხვეფიშ მორჩქილაფა დო თინეფიშ აზრიშ პატიცემა?

⁷ მაგალთო, შეილებნა ქოკითხათ მობინადრეს: „თქვან აზრი მოინტერეს ართ საკითხშენ. პრობლემეფ, ნამდგას არძა შეფხვადუთ, მთელ მსოფლიოს რე გავრცელებურ. მუჭო ფიქრენთ, ქეშულებნანო ადამიანურ მთავრობეფს მაგვარან თე პრობლემეფ?“. თეშ უკულ ქიმსჯელ დანიელიშ 2:44-შე. ვარდა შეილებნა თეცალ კითხვა ქუდუსვათ: „თქვან აზრით, მუჭო შემლებნა ბაღანეფიშ რდუალა თეშ, ნამდა ჯგირ ჩვევეფ გუვითარათ?“. თეშ უკულ წეკითხით დო გარჩით კანონიშ 6:6, 7. მუდგა თემა ვეგშაგორათინ, მნიშვნელოვან რე დეფიქრათ თი კათაშე, მით მოირჩქილუანა. წერმიდგინით, მუჭო მეხვარებ თინეფს ბიბლიაშე ნაგურეფ. ხალხწკუმა ჩიებაშ დროს, მნიშვნელოვან რე ყურადღებით ქურჩქილათ დო პატი ქოცათ თინეფიშ აზრის. თეშნერო, უმოს უჯგუშო ქუგუგენთ თინეფს დო მეტ ალბათობა რე, ქუმოიჩრქილუან.

8. მუშენ რე საჭირო მუსხირენშა ქიმიაკითხუათ მობინადრეს?

⁸ სოიშახ პიროვნება ბიბლიაშ გურაფაშ დოჭყაფას გინოჭყვიდუნს, შილებე დრო დო მონდომაქ დეგესაჭირან, ნამდა ქიმიაკითხუათ მუსხირენშა. თეშ კეთება თიშენ რე საჭირო, ნამდა შილებე პირველ მეკითხირიშ დროს ვა დორხვადან ჸუდეს. თეს გეძინელ, მუსხირენშა კინ მეკითხირ თიშენ ხოლო რე საჭირო, ნამდა სოიშახ ბიბლიაშ გურაფას დიჭყანდას, მობინადრექ უმოს თავისფალო ქიგინას თქვანწკუმა დუდ. ვაგგოჭყორდან, მცენარე თიმწკუმა ირდუ, მუჟამსით რეგულარულო ელუბნა წყარს. თეშნერო, დაინტერესებულს იეჰოვაშ დო ქრისტეშ ჸოროფაქ შილებე თიმწკუმა გევითარას, მუჟამსით რეგულარულო ქიმსჯელენთ თე პიროვნებაწკუმა ღორონთიშ სიტყვაშე.

არძა ქრისტიან ღებულენსო მონაწილებას ხალხიშ მოწაფეეფო მომზადებაშ საქმეს?

9, 10. მუშენ შემლებნა თიშ რაგად, ნამდა არძა ქრისტიან მონაწილენს მართალ გურიშ კათაშ გორუას?

⁹ არძა ქრისტიან ღებულენს მონაწილებას მართალ გურიშ კათაშ გორუას. შემლებნა თე საქმე შევადარათ დინაფილ ბაღანაშ გორუას. გუვარჩუათ ნამდვილ შემთხვევა, მუჟამსით 3 წანერ ბაღანაქ ჸუდეშე გეგმორთჷ დო მედინ. თის სოდგარენ 500 კოჩ გორუნდჷ. საბოლათ, ბაღანაშ დინაფაშე 20 საათიშ უკულ, ართ მოხალისექ ქოძირ თინა. მოხალისეს ვაკოდ შხვეფქ ქაცქუესკო დო განადიდესკო თინა ბაღანაშ გორუაშ გურშენ. თიქ თქუ: „ბაღანაქ თიშენ იძირ, ნამდა არძა ართო ბგორუნდით თის“.

¹⁰ ამდღა ხალხიშ უმენტაშ თე ბაღანაცალო რე. თინეფს ვა უღნა იმენდ, ათეშენ ჩქინ მოხვარა ოსაჭირნა (ეფეს. 2:12). ბრუო მილიონშე მეტ მოწმე ოცად, დოგორას თეცალ კათა. შილებე პირადო თქვა ვეშეხვადათ პიროვნებას, მით ბიბლიაშ გურაფას ქიდიჭყანს თქვანწკუმა. მარა შილებე შხვა მაქადაგებელეფქ, მით თქვან ტერიტორიას ქადაგენა, ქეშეხვადან პიროვნებას, მიდგას ოკო ღორონთიშ სიტყვაშე ჭეშმარიტებაშ გურაფა. არძას, მით მონაწილენს თეცალ კათაშ გორუას, ხიოლიშ დიდ მიზეზ უღჷ, მუჟამსით ნამდგაინ თანაქრისტიან დოგორუნს თიცალს, მით ქრისტეშ მოწაფეთ გინირთუ.

11. ბიბლიაშ გურაფას პირადო თქვა ვატარენთ-და, მუჭო შეილებნა ქიმეხვარათ შხვეფს ხალხიშ მოწაფეეფო მომზადებაშ საქმეს?

¹¹ ბიბლიაშ გურაფეფს პირადო თქვა ვატარენთ-და, შეილებნა ქიმეხვარათ შხვეფს ხალხიშ მოწაფეეფო მომზადებაშ საქმეს. მაგალთო, შეილებნა ჯგირო ქეშეხვადათ დო დემეგობრათ თინეფს, მით პირველო მოულა სამეფო დარბაზშა. თეშნერ მოქციებათ დერწმუნებნა, ნამდა ჭეშმარიტ ქრისტიანეფ ჸოროფათ გიშეგორნა (იოან. 13:34, 35). კრებაშ შეხვალამას კეთებულ მოკლე კომენტარეფით მაგალითის არზენთ ახალ დაინტერესებულეფს, შურ დო გურით გეგმოხანტან მუნეფიშ აზრი. თეს გეძინელ, შეილებნა მსახურებაშა მიდეჸონათ ახალ მაუწყებელ დო ქიმეხვარათ ქადაგებაშ დროს ხალხწკუმა ბიბლიურ მუხლეფშე მსჯელობას. მუჟამსით თაშ ქიმიქციებუთ, თეშნერო მეხვარებუთ, ქიდიგურუან, ნამდა მიაჸუნან ქრისტეშ მაგალითის (ლუკ. 10:25—28).

12. მოსაჭირნანო განსაკუთრებულ უნარეფ მოწაფეეფიშ მამზადებელო? გენწყით.

¹² ნამთინქ ოკო ვეფიფქრათ, ნამდა განსაკუთრებულ უნარეფ მოსაჭირნა, მუვამზადათ შხვეფ ქრისტეშ მოწაფეეფო. მუშენ შემლებნა თეშ რაგად? გუვარჩუათ ფაუსტინაშ მაგალით, ნამუთ ბოლივიას ცხოვრენს. თის კითხირ ვა უჩქუდ, მუჟამსით პირველო შეხვად იეჰოვაშ მოწმეეფს. მარა თიქ ჭიე-ჭიეთ ქიდიგურუ კითხირ. ასე თინა ნათილ რე დო შხვეფს ხიოლით ოგურუანს. თინა ირ მარას ხუთ ბიბლიაშ გურაფას ატარენს. მართალ რე, მუშ დაინტერესებულეფიშ უმენტაშცალო ჯგირო ვაკითხირე, მარა თიქ ამშვ პიროვნებას მეხვარ, დინათესკო (ლუკ. 10:21).

13. მუ ჯგირობუა მოუღ ხალხიშ მოწაფეეფო მომზადებას თიმწკუმა ხოლო, მუჟამსით ბრელ საქმე მიღნა?

¹³ ქრისტიანეფიშ უმენტაშის მნიშვნელოვან პასუხიშმგებლობეფ ოვალნა დო დაკავებულეფ რენა. მარა იშენით გუმურთუნა დროს ბიბლიაშ გურაფეფს, მუდგას დიდ ხიოლ მოუღ თინეფშო. ქობძირათ მელანიშ მაგალით, ნამუთ ალიასკაშე რე. თინა ხვალე რდუნდჷ მუშ ბრუო წანერ ძღაბის, სრულ განაკვეთის მუშენდჷ დო ულუანდჷ კიბო უღუდუნ ფერ მუმას. მელანი დაშორებულ ტერიტორიას ცხოვრენდჷ, სოდეთ თიშ მეტ იეჰოვაშ მოწმე თექ მითინ ვარდჷ. თინა ირიათო ლოცულენდჷ დო ძალეფს თხინდჷ იეჰოვას, ნამდა ჩხურუშ უმკუჯინუო მიდართკო მსახურებაშა, მუშენდა მანგარო ოკოდ ბიბლიაშ გურაფაშ დოჭყაფა. საბოლათ, თიქ ქეშეხვად სარას, ნამუსით ღორონთიშ პირად სახელიშ გაგებაქ მანგარო ახიოლ. ჭიჭე ხანიშ უკულ თიქ ბიბლიაშ გურაფა ქიდიჭყჷ. მელანი იჩიებ: „ხშირას ობიშხა ონჯუას გინოფშურდუდ, მარა ჩქიმ ძღაბწკუმა ართო იშენით მიფშჷ დო ვატარენდჷ ბიბლიაშ გურაფას, ნამდგას ჩქინო ხოლოშო მოუღუდ ჯგირობუა. ჩქი იბრკვიენდით სარაშ დოსუმალირ კითხვეფიშ პასუხეფს დო მოხიოლდეს თიშ ძირაფა, ნამდა თიქ იეჰოვაშ მეგობარო გინირთჷ“. სარაქ გაბედულო ქეშეხვად წინააღმდეგობეფს, ქიდიტუ ეკლესია დო დინათ.

მუშენ ითხინს ხალხიშ მოწაფეეფო მომზადება მოთვინებას

14. ა) მუშენ რე მოწაფეეფიშ მომზადება ჩხომუაშა შედარებულ? ბ) მუ შედეგის მოიღანა 2 ტიმოთეშ 4:1, 2-ს მოჩამილ პავლე მოციქულიშ რჩევაშ მეჸუნა?

¹⁴ თიმწკუმა ხოლო, მუჟამსით ფიქრენთ, ნამდა თქვან მსახურებას შედეგ ვა მოჸუნს, გურქ ვეიოლან დო გაგრძელით ღირსეულეფიშ გორუა. ქიგიფშინათ, ნამდა იესოქ მოწაფეეფიშ მომზადება შეადარ ჩხომუას. მეჩხომეს შილებე ჩხომიშ ოჭოფალო საათობით დროქ დესაჭირას. ხშირას თინეფ გვიან სერით ვარდა ოჭმარეს ადრე იჭყანა ჩხომუას დო მინშა შორშა ხოლო მეულა (ლუკ. 5:5). თეშნერო, ნამთინე ქრისტიან მოთვინებას გიმირჩქინანს დო დიდ დროს უთმენს თი ხალხიშ გორუას, მიდგაქ შილებე ჭეშმარიტება მიღას. თეშო თინეფ შხვადოშხვა ტერიტორიას შხვადოშხვა დროს მიაკითხანა ხალხის, ნამდა მუთ შილებენ მეტის ქეშეხვადან. თინეფ, მით დიდ მონდომას გიმირჩქინანა, ხშირას შეხვადუნა თიცალ კათას, მიდგას ოინტერეს ჭეშმარიტება. ქაცადუთო თიცალ დროს ვარდა თიცალ ადგილეფს იქადაგათ, სოდეთ უმოსო ქეშეხვადუთ ხალხის? (წეკითხით 2 ტიმოთე 4:1, 2).

15. მუშენ რე საჭირო ბიბლიაშ გურაფაშ ჩატარებაშო მოთვინებაშ გიმორჩქინა?

¹⁵ მუშენ რე საჭირო ბიბლიაშ გურაფაშ ჩატარებაშო მოთვინებაშ გიმორჩქინა? ართ-ართ მიზეზ თინა რე, ნამდა დაინტერესებულეფს უმოს მეტ მოხვარა ოსაჭირნა, ვინემ ხვალე გუვოჩინებაფუათ დო ქოვუჸოროფუათ ბიბლიურ გურაფეფ. მნიშვნელოვან რე, გუვოჩინებაფუათ დო ქოვუჸოროფუათ თინეფს ბიბლიაშ ავტორ, იეჰოვა. თეს გეძინელ, დასაბაღ ვა რე ხვალე თინა, ნამდა ქუდვოგურუათ, მუს ითხინს იესო მუშ მოწაფეეფშე; საჭირო რე, ქიმვეხვარათ თიშ გაგებას, მუჭო გიმირინუან ცხოვრებას იესოშ მითითებეფ. ჩქი მოთვინებათ ოკო მივეხვარათ თინეფს, მუჟამსით ოცადნა ბიბლიურ პრინციპეფიშ ცხოვრებას გიმორნაფას. ნამთინე მუსხირენ თუთაშა თირანს გლახა აზროვნება დო ჩვევეფს. ნამთინეს უმოს დრო ოსაჭირ.

16. მუ დიგურეთ რაულიშ შემთხვევაშე?

¹⁶ ართ მისიონერიშ მაგალით, ნამუთ პერუს მსახურენს, მიმეხვარებნა თიშ გაგებას, მუ ჯგირობუა მოჸუნს მოთვინებაშ გიმორჩქინას. თინა იჩიებ: „ართ პიროვნებას, სახელო რაულს, ბიბლია დიო ართ წიგნით დო უკულ მაჟია წიგნით დუვოგურე, მარა თის იშენით მანგარო უჭირდჷ ცხოვრებაშ თირუა. რაულს ოჯახის პრობლემეფ უღუდ, უწმაწურ სიტყვეფს იჩიებუდ დო მუშ გლახა საქციელიშ გურშენ სქუალეფ პატის ვა ცენდეს. მარა თინა იშენით რეგულარულო აგრძელენდჷ კრებაშა გილულას, ათეშენ მა ხოლო მივაკითხანდჷ, ნამდა ქიმვეხვარკო თის დო თიშ ოჯახის. ბიბლიაშ გურაფაშ დოჭყაფაშე სუმ წანაშ უკულ, საბოლათ, თიქ დინათ“.

17. მუს გუვარჩიენთ უკულიან სტატიას?

¹⁷ იესოქ თეცალ მითითება მუჩეს: „მეუთ დო მოწაფეეფო მამზადით ხალხი არძა რჯულშე“. თე მითითებაშ შეიოსრულებერო ჩქი ხშირას მიხვადნა თიცალ კათაწკუმა შეხვალამა, მიდგას ჩქინდე ბრელით განსხვავებულ შეხედულებეფ უღნა, თეწკუმა ართო თინეფს ხოლო, მით ვაკუთნუნა ნამთინ რელიგიურ ორგანიზაციას ვარდა ვა ჯერა ღორონთიშ არსებობა. უკულიან სტატიას გუვარჩიენთ, მუჭო ვუქადაგათ სახიოლო ამბე განსხვავებულ წარმომავლობაშ კათას.