დაფასით ნებაშ თავისუფლებაშ ძღვინი

1, 2. ა) მუ დო მუნერ აზრი არსებენს ნებაშ თავისუფლებაშ გურშენ? ბ) მუს მოგურუანა ბიბლია ნებაშ თავისუფლებაშ გურშენ დო მუ კითხვეფს გენიფხილენთ?

ართ ოსურკოჩიქ, ნამუსით მუდგარენ საკითხ აფუდ გინაჭყვიდირალინ, მუშ მეგობარს უწუ: „ვამაიძულა ფიქრი. სი ქომწი მუჭო მიფქცუე, თაშ უმოს ადვილ რე“. თიშ მანგიორო, ნამდა ღორონთშე მეჩამილ ნებაშ თავისუფლება გეგმურინუაფუდკონ, თის უსხუნუდ, შხვეფს უთქუალდესკო, მუჭო მიქცუკო. თქვა მუჭო გისხუნუნა? თქვანით გინოჭყვიდათ საკითხეფი დო ვარ თქვან მანგიორო შხვეფქ გეგნოიჭყვიდან? მუს ფიქრენთ ნებაშ თავისუფლებაშ გურშენ?

² ბრელ ხან რე ხალხის თე საკითხიშ გურშენ შხვადოშხვა აზრი უღუ. ნამთინეშ აზრით, ვა არსებენს ნებაშ თავისუფლება დო ღორონთის წინასწარ აფუ დოდგინელ არძა ჩქინ მოქმედება. შხვეფ ფიქრენა, ნამდა აბსოლიტურ თავისუფლებაშ უმშო ვა არსებენს ნებაშ თავისუფლება. თე საკითხშენ სწორ თოლწონუაშ გაგება ბიბლიაშე შემლებუნა. ბიბლიაშე იძირე, ნამდა მუჟამსით იეჰოვაქ კოჩი გაჭყუნ, ნებაშ თავისუფლება ხოლო მეჩუ; თენა თის ნიშნენს, ნამდა თიქ კოჩის ქიმეჩ უნარი, გაკეთას გონივრულ არჩევანი (წეკითხით იესო ნავეშ ძეშ 24:15). ბიბლია თეცალ კითხვეფს ხოლო პასუხენს: მუჭო ოკო გიმიბრინუათ ნებაშ თავისუფლება სიკითხეფიშ გინოჭყვიდუაშ დროს? არსებენსო მუთუნნერ შეზღუდვეფი? ნებაშ თავისუფლებაშ გიმორინაფათ, მუჭო ვოძირანთ, ნამდა მიჸორა იეჰოვა? მუჭო ვოძირანთ, ნამდა პატის ფცენთ შხვეფს, მუჟამსით მუდგაინ საკითხეფს გინოჭყვიდუნა?

მუს ბგურაფლენთ იეჰოვაშე დო იესოშე?

3. ნებაშ თავისუფლებაშ გიმორინაფაშ, მუ მაგალით მუჩეს იეჰოვაქ?

³ ხვალე იეჰოვას უღუ აბსოლიტურ თავისუფლება დო ჩქინო მაგალით რე, მუჭო გიმირინუანს ღორონთი თის. მაგალთო, თიქ ისრაელეფი მუშ ხალხო, „გიშაკერძაფილ საკუთრებათ“ გეირჩუ (კან. 7:6—8). ღორონთის თენა უმიზნოთ ვა უკეთებ. იეჰოვაქ შეასრულ მუშ პირობა, ნამუთ საუკუნეეფიშ წოხოლე მუშ მეგობარ აბრაამს, მეჩუ (დაბ. 22:15—18). იეჰოვა ნებაშ თავისუფლებას ჸოროფათ დო სამართლიანო გიმირინუანს. თენა იძირე თევრეშე, მუჭო დასაჯ ღორონთიქ ისრაელეფი, მიდგაქ ოჭიშ ქურთინუეს ჭეშმარიტ თაყვანიშცემას. მარა მუჟამსით თინეფ მთელ გურით ინანიენდესინ, იეჰოვა ჸოროფას გიმირჩქინანდ დო პატიენდ თინეფს. ღორონთი იჩიებ: „დუვოსკილიდუანქ თინეფს ორგულობაშე. ჩქიმ ნებათ ქიპჸოროფუანქ თინეფს“ (ოს. 14:4). მუშმაჯგირა მაგალით რე თიშ, ნამდა ღორონთიქ მუშ ნებაშ თავისუფლება შხვეფიშ საჯგირობუოთ გიმირინუ!

4, 5. ა) პირველო მიქ მიღუ ნებაშ თავისუფლებაშ ძღვინ დო მუჭო გიმირინუ თიქ თენა? ბ) მუ ოკო პკითხათ ჩქინ დუც?

⁴ გოჭყაფაშ დროს, იეჰოვაქ ჸოროფათ გეგნოჭყვიდ, ნამდა გონიერ ქმნილებეფშა ნებაშ თავისუფლება ქიმუჩამუდუკო. პირველ, მიდგაქ თე ძღვინ მიღუნ, რდუ ღორონთიშ პირველგოჭყაფილ სქუა, „უძირაფ ღორონთიშ ამნახანტა“ (კოლ. 1:15). დედამიწაშა მოულაშახ იესოს გინოჭყვიდილ აფუდ, ნამდა მუშ მუმაშ ართგურ ჸოფედკონ დო სატანაშ მხარე ვადუკინებუდკონ. მუჟამსით დედამიწაშა ქუმორთუნ, იესოქ ნებაშ თავისუფლება გეგმირინუ დო ვარია ქოთქუ ირფელშენ, მუდგა სატანაქ ოჩილითაფარო მიარზუ (მათ. 4:10). ღურაშ წოხოლენ სერს, იესოქ მთელ გურით ქილოც დო ხოლო ართშა დამტკიც, ნამდა თის გინოჭყვიდილ აფუდ ღორონთიშ ნებაშ შესრულება. თიქ ლოცვას ღორონთის უწუ: „მუმა, ქუგონებუნ-და, ემოჩილითე თე ოშუმალ, მარა რდას ჩქიმ ნება ვარინ, სქანი“ (ლუკ. 22:42). მორთ მივაჸუნათ იესოშ მაგალითის დო ნებაშ თავისუფლება გეგმიბრინუათ იეჰოვაშ ოდიდებელო დო თიშ ნებაშ შეიოსრულებელო. ქორენო თენა შეიოლებერ?

⁵ ჩქი შემლებუნა მივაჸუნათ იესოშ მაგალითის, მუშენდა ჩქი ხოლო გოჭყაფილ ვორეთ იესოცალო ღორონთიშ ამნახანტო (დაბ. 1:26). ჩქი შეზღუდულ ვორეთ, მუშენდა ხვალე იეჰოვა რე, მიდგას აბსოლიტურ თავისუფლება უღუ. ღორონთიშ სიტყვაშე ბგებულენთ, ნამდა ჩქინ თავისუფლებას უღუ ზღვარ, ნამუთ იეჰოვაქ დამდგინეს დო ვეგნოფრთათ ოკო თის. მაგალთო, ოსურეფქ ოკო დემორჩილან მუნეფიშ ქომონჯეფს დო ბაღანეფქ — მშობლეფს (ეფეს. 5:22; 6:1). მოქმედენსო თე შეზღუდვეფ თიწკუმა, მუჭო გიმიბრინუანთ ნებაშ თავისუფლებას? თე კითხვაშ პასუხის შეულებ გეგნოჭყვიდას ჩქინ მარადიულ მომავალი.

ნებაშ თავისუფლებაშ გიმორინაფა

6. ქიმიჸონ მაგალით, მუშენ რე ჯგირ შეზღუდულ თავისუფლება.

⁶ ნებაშ თავისუფლებას შეზღუდვეფ ქოუღუნ-და, ქიჸინო თინა ნამდვილ თავისუფლება? ქო. მუშენ შემლებუნა თეშ თქუალა? ღორონთიშ დოდგინელ შეზღუდვეფ მიცვენა. მაგალთო, გინოჭყვიდილ მაფუნა ნამდგაინ ქალაქშა ულა. ქიბგინანთო დუც დაცულო, სოდეთ მოძრაობაშ წესეფ ვა არსებენს დო არძა მუშობურო გინოჭყვიდუნს, მუ სიჩქარეთ დო შარაშ ნამ მხარეს იდას? მუშო ოკო რაგად, ვარ. შეზღუდვეფი აუცილებერ რე, ნამდა ირკოჩიქ გეხარას ნამდვილ თავისუფლებათ. გუვარჩუათ მუსხირენ მაგალით ბიბლიაშე, ნამუთ მოძირანა, მუსხით გონივრულ რე ნებაშ თავისუფლებაშ გიმორინაფა იეჰოვაშ დოდგინელ ზღვარიშ დინახალე.

7. ა) მუჭო განასხვავენდ ნებაშ თავისუფლებაშ ძღვინ ადამს ედემიშ ბაღის რდესინ თი შხვა ქმნილებეფშე? ბ) ქიმიჸონ ართ შემთხვევა თიშ, სოდეთ ადამქ გიმირინუ ნებაშ თავისუფლება.

⁷ მუჟამს ღორონთიქ ადამ გაჭყუნ, თის ქიმეჩ ძღვინ, ნებაშ თავისუფლება, მუნერით ზეციერ ქმნილებეფშა ხოლო აფუდ მეჩამილ. თეთ გენესხვავებუდ ადამი ცხოველეფშე, ნამუსით ინსტიქტ უღუნა. გუვარჩუათ, მუჭო გიმირინუ ადამქ ნებაშ თავისუფლება. ღორონთიქ ცხოველეფი კოჩიშ გორჩქინაშახ გაჭყუ. მარა თინეფშა სახელეფიშ გედვალა პირველო გოჭყაფილ კოც ქუდავალ. ღორონთიქ „ქიმუჸონ თინეფ კოჩის, ნამდა ქუძირუდკო, მუს გიოდვანდ თითოულს“. ადამქ ჯგირო ქიდეკვირ ირ ცხოველს დო ოსადაგუდუნ ფერ სახელი ქიმეჩუნ თიშ უკულ, იეჰოვა ვაჩარიებე დო ვაუთირუ თინეფშა სახელი. „მუდგას კოჩ ცოცხალ შურს გიოდვანდუნ, თინა იჸიდ თიშ სახელი“ (დაბ. 2:19).

8. მუჭო გიმირინუ ადამქ ნებაშ თავისუფლება დო მუ შედეგიქ მაჸუნ თეს?

⁸ ადამი ვარდ კმაყოფილ ღორონთიშ მეჩამილ დავალებათ, ნამდა უმინჯებუდკო დო მიკუჯინუდკო სამოთხეშა. თიქ ვადაფას თი დიდ თავისუფლება, ნამუთ ოკო გიმირინუკო ღორონთშე მეჩამილ დავალებაშ შეიოსრულებელო: „ინაყოფიერით დო გემრავლით, გეიოფშით დედამიწა, ქუმინჯით თის დო თქვა დეგემორჩილან ზღვაშ ჩხომეფქ, ცაშ მაფურინჯეეფქ დო არძა ცოცხალ არსებაქ დედამიწას“ (დაბ. 1:28). თიქ გინოჭყვიდ, გეგნურთუმუდკო ღორონთიშ დოდგინელ ზღვარშე დო ოჭკომ ვარიებულ ჯაშ მიკნაღელი. ადამქ ნებაშ თავისუფლება სწორას ვეგმირინუ დო თექ თიშ შთამომავლობას ტანჯება დო ჭუა ქუმუღ (რომ. 5:12). ჩქი მიჩქუნა, მუქ მაჸუნ ადამიშ გინნაჭყვიდირა საქმეს; თექ ქიმმეხვარან ოკო ჩქინ თავისუფლება თეშ გეგმიბრინუათ, ნამდა იეჰოვაშ დოდგინელ ზღვარს ვეგნოფრთათ.

9. მუშ არჩევან მეჩ იეჰოვაქ მუშ ხალხის, ისრაელს დო მუ პასუხ მეჩეს თინეფქ?

⁹ ადამ დო ევაშ შთამომავლეფქ მუნეფიშ ურჩ მშობლეფშე არასრულყოფილება დო ღურა მიღეს. ნებაშ თავისუფლება თინეფშა მითინს ვემდუღალ. თენა იძირე ისრაელ ხალხწკუმა ღორონთიშ ურთიერთობაშე. მუშ მსახურ მოსეს იეჰოვაქ დავალ, ხალხშა ქიმუჩამუდუკო არჩევანიშ საშვალება — მიღესკო ვარდა ვემიღესკო თიშ პატი, ნამდა ჸოფედესკო ღორონთიშ საკუთრება (გამ. 19:3—6). მუ რდუ თინეფიშ პასუხი? თინეფქ მუნეფიშით დეთანხმეს, შეუსრულებდესკო თი პირობეფი, ნამუთ მეთხიებუდ ღორონთიშ ხალხის. მთელ ხალხიქ ართათ განაცხად: „ირფელს შევასრულენთ, მუთ იეჰოვაქ თქუ“ (გამ. 19:8). მარა ჭე-ხანიშ უკულ თინეფქ სწორას ვეგმირინეს თავისუფლება დო ვეშეასრულეს მუნეფიშ სიტყვა. მორთ, ჩქინო ჭკუაშ ოგურაფალქ იჸუას თინეფიშ მაგალითიქ დო ირო დუვაფასათ ნებაშ თავისუფლებაშ ძღვინ იეჰოვაწკუმა ხოლოშიან ურთიერთობათ დო თიშ სამართლიან მოთხოვნეფიშ მორჩილებათ (1 კორ. 10:11).

10. სოვრეშე იძირე, ნამდა არასრულყოფილ კათას შეულებუნა ნებაშ თავისუფლება ღორონთიშ ოდიდებელო გეგმირინუან? (ქოძირით სურათ მა-12 გვერდის).

¹⁰ ებრაელეფიშ მა-11 დუც მოშინაფილ რე 16 ართგურ მსახურიშ სახელი, მიდგაქ გინოჭყვიდეს, ნამდა ნებაშ თავისუფლება გიმურინუაფდესკო ღორონთიშ დოდგინელ ზღვარიშ დინახალე. თეთ თინეფქ ღორონთიშ კურთხევეფ მიღეს დო მომავალიშ იმენდშა დერწმუნეს. მაგალთო, ნოექ დიდ რწმენა გეგმირჩქინ დო გეგნოჭყვიდ იეჰოვაშ მითითებეფშა დამორჩილება, ნამდა აუშენებუდკო კიდობანი მუშ ოჯახიშ დო კაცობრიობაშ მოდგმაშ გინასქილიდარო (ებრ. 11:7). აბრაამი დო სარაქ მუნეფიშ სურვილით ქიმიაჸუნეს იეჰოვაშ ხემძღვანელობას, მიდურთუმდესკო დაპირებულ ქიანაშა. გვარიან ხანიშ ოულარ შარას ქიგიოდირთეს თიშ უკულ ხოლო უღუდეს თინეფს, სქვამ ქალაქ ურშა „დორთაშ საშვალება“. მარა თინეფ რწმენაშ თოლით უჯინედეს ღორონთიშ დუნაპირებუშ შესრულებას დო „უჯგუშ ადგილშა“ მინჭუაფუდეს (ებრ. 11:8, 13, 15, 16). მოსექ ვარია ქოთქუ ეგვიპტეშ ქონებაშენ დო „ეირჩუ, ღორონთიშ ხალხწკუმა ართო თის ხოლო სასტიკო ქუმოქციებდესკო, ვინემ დროებით ცოდამ ფუფუნება უღუდკო“ (ებრ. 11:24—26). მორთ, მივაჸუნათ ჯვეშო ცხოვრენდესინ ფერ კათაშ რწმენაშ მაგალითის, დუვაფასათ ნებაშ თავისუფლებაშ ძღვინ დო გეგმიბრინუათ თინა ღორონთიშ ნებაშ შეიოსრულებელო!

11. ა) ნამ რე არძაშ უმოს დიდ კურთხევა, ნამუთ ნებაშ თავისუფლებაშ გიმორინაფას მოჸუნს? ბ) მუ ოკო რდას ნებაშ თავისუფლებაშ გიმორინაფაშ არძაშ უმოს მართებულ მოტივ?

¹¹ შილებე იფიფქრათ, ნამდა უმოს ადვილ იჸუაფ ჩქინ მანგიორო შხვეფქ გეგნოჭყვიდან მუდგარენ საკითხეფ, მარა თეთ ნებაშ თავისუფლებაშ დიდ კურთხევას მივოდინუანდით, ნამუთ ინოჭარ კანონიშ 30:19, 20-ის (წეკითხით). მა-19 მუხლის მოშინაფილ რე, მუშ გიშაგორუაშ საშვალება მეჩუ ღორონთიქ ისრაელეფს. მა-20 მუხლშე იძირე, ნამდა თე ძვირფას შასაძლებლობა თიშ გურშენ მეჩუ ისრაელეფს, ნამდა ქუძირუდკო, მუ უღუდეს თინეფს გურს. თინეფცალო, ჩქი ხოლო შემლებუნა გეგშებგორათ ღორონთიშ თაყვანიშცემა. ღორონთიშ მოჩამილ ნებაშ თავისუფლებაშ გიმორინაფაშ არძაშ უმოს მართებულ მოტივ ოკო რდას თიშ ჸოროფა დო განდიდება!

სწორას გეგმირინეთ ნებაშ თავისუფლებაშ ძღვინ!

12. მუჭო ოკო ვეგმიბრინუათ ჩქინდა მოჩამილ ნებაშ თავისუფლებაშ ძღვინ?

¹² წერმიდგინით, ნამდა მეგობარს ძვირფას საჩუქარ აჩუქით. მარა, მუჭო ქელგაჭვედეს გური, მუჟამსით ქიგეგენდით, ნამდა თიქ საჩუქარი გვამშა გეგნაჸათ ვარდა შხვეფშა გლახაშ ოკეთებელო გიმირინუ. ასე დეფიქრით, მუს გინაფლენს იეჰოვა, მუჟამსით ბრელ კოჩი ნებაშ თავისუფლებას სწორას ვეგმირინუანს დო შილებე შხვეფშა გლახაშ ოკეთებელო ხოლო გიმირინუანდას. მუჭოთ ბიბლიას რდუ წინასწარ ნარაგადა, „ბოლო დღალეფს“ კათა უმარდულეფ იჸუაფუდეს (2 ტიმ. 3:1, 2). მორთ, დღას ვეგმიბრინუათ ნებაშ თავისუფლებაშ ძვირფას ძღვინ გლახათ დო ვაგვაუბრალოათ თინა. მუ მიმეხვარებუნა ნებაშ თავისუფლებაშ ძღვინ გლახათ ვეგმიბრინუათ?

13. მუჭო შემლებუნა სწორას გეგმიბრინუათ ნებაშ თავისუფლება?

¹³ არძას მიღუნა უფლება, ჩქინით გეგშიბგორათ მეგობრეფი, მუკოქუნაშ დო რცხონუაშ სტილი ვარდა გართობა. მარა შილებე ნებაშ თავისუფლება უბადოთ გეგმიბრინუათ, მუჟამსით ხორციშ კორნებეფს ვარდა თე ქიანას გავრცელებულ მოდას გევაჸუნუთ (წეკითხით 1 პეტრეშ 2:16). თიშ მანგიორო, ნამდა გეგმიბრინუათ ნებაშ თავისუფლება ხორციშ კორნებეფიშ დოჸუნათინ, გინოჭყვიდილ ოკო მაფუდან, თიცალ არჩევან გავაკეთათ, ნამუთ მიმეხვარებუნა გებთვალისწინათ თე რჩევა: „ირფელ ღორონთიშ ოდიდებელო აკეთით“ (გალ. 5:13; 1 კორ. 10:31).

14. მუჭო ოხუ იეჰოვაშა მენდება ნებაშ თავისუფლებაშ გიმორინაფას?

¹⁴ თეშ გარდა, ნებაშ თავისუფლებაშ ძღვინს სწორას გეგმიბრინუანთ, მუჟამსით ქიმვენდებუთ იეჰოვას დო ქიმვაჸუნუთ თიშ ხემძღვანელობას, ნამუსით მარზენა ჩქინო დოდგინელ ზღვარიშ დინახალე. ხვალე იეჰოვა „მოგურუანა ჩქინ საჯგირობუოთ დო გილამჸონანა თი შარათ, ნამუთ ოკო გილაფრთათ“ (ეს. 48:17). ჩქი თანდაბლობა ოკო გეგმიფრჩქინათ დო ვაღიარათ ოკო თე სიტყვეფიშ ჭეშმარიტება: „კოჩიშ ნებაშა ვა რე მუშ შარა; მიმალ კოჩის ვანჯღვარებე მუშ ნაბიჯეფშა“ (იერ. 10:23). ადამ დო ურჩ ისრაელეფცალო, ვენვანთხათ თიშ მახეს, ნამდა შემლებუნა ჩქინ ჭკუას მივენდათ. თეშ მანგიორო, მორთ მთელ გურით მივენდათ იეჰოვას (იგავ. 3:5).

პატი ფცათ შხვეფიშ ნებაშ თავისუფლებას

15. მუს ბგურაფლენთ გალატელეფიშ 6:5-ის ინოჭარილ პრინციპშე?

¹⁵ ართ-ართ შეზღუდვა, ნამუთ იეჰოვაქ ჩქინ თავისუფლებაშო დადგინ, რე თინა, ნამდა პატი ფცათ თის, მუდგას შხვეფ გინოჭყვიდუნა მუნეფიშ ცხოვრებას. ჩქინდა არძაშა რე ნებაშ თავისუფლება მოჩამილ, ათეშგურშენ, შეიოლებერ ვა რე, ქრისტიანეფქ ირო ართნერო გინოჭყვიდან საკითხეფ. თენა ოხუ მუჭოთ ღორონთიშ თაყვანიშცემას, თეშ ჩქინ საქციელს ხოლო. ვაგმოჭყორდან ოკო გალატელეფიშ 6:5-ის ინოჭარილ პრინციპიქ (წეკითხით). მუჟამსით გააზრებულ მაფუნა, ნამდა არძა ქრისტიანს „მუშ ოღალ მეუღ“, თიმწკუმა პატის ქოფცენთ შხვეფიშ ნებაშ თავისუფლებას.

16, 17. ა) მუშენ უღუდეს კორინთელ ქრისტიანეფს შხვადოშხვა აზრი ნებაშ თავისუფლებაშ გურშენ? ბ) მუჭო მაგვარ პავლექ თე საკითხი დო მუს ბგურაფლენთ თავრეშე შხვეფიშ უფლებეფიშ გურშენ?

¹⁶ გენიფხილათ ართ მაგალით ბიბლიაშე, სოვრეშეთ იძირე, მუშენ ოკო ფცათ პატი თის, მუდგას და დო ჯიმალეფ გინოჭყვიდუნა მუნეფიშ ცხოვრებას. კორინთელ ქრისტიანეფს შხვადოშხვა აზრი უღუდეს ხორციშ ჭკომუაშენ, ნამუთ შილებედ კერპშენაწირ რდუ დო გიმიჩამუდ ბაზარს. ნამთინე ფიქრენდ: „კერპი მუთუნ ვა რე, ათეშგურშენ შემლებ სუფთა სინდისით ბჭკუმე თინა“. მარა შხვეფ, მით ადრე კერპის ოთაყვანუდ, ფიქრენდეს, ნამდა თეცალ ხორციშ ჭკომუა კერპიშ თაყვანიშცემაშ მანგურ რდუ (1 კორ. 8:4, 7). თენა მანგარ საფრთხილო საკითხ რდუ დო კრებაშ ართობას ოცილუდ. მუჭო მეხვარ პავლექ კორინთელ ქრისტიანეფს, თე საკითხიშ გურშენ სწორ თოლწონუა უღუდესკონ?

¹⁷ პირველ რიგის პავლექ ქუგაშინ თინეფს, ნამდა ოჭკომალ ღორონთწკუმა დაახლოებას ვემეხვარებუდ (1 კორ. 8:8). თეშ უკულ გაფრთხილ, ნამდა მუნეფიშ უფლება სუსტეფიშ დუმაბრკოლებელო ვეგმურინუაფდესკო (1 კორ. 8:9). თინეფს, მიდგას უმოს მგრძნობიარე სინდისი უღუდესინ, პავლექ ელუჩ, ნამდა ვაგუსამართლებდესკო თი ქრისტიანეფი, მიდგას თეცალ ხორციშ ჭკომუა აფუდეს გინოჭყვადილ (1 კორ. 10:25, 29, 30). თეგვარო, კორინთელ ქრისტიანეფქ მუნეფიშით გინოჭყვიდესკო ოკო, მუჭო მიქციებუდეს თე მნიშვნელოვან საკითხიშ დროს, ნამუთ თაყვანიშმცემლობას ოხუდ. თავრეშე იძირე, ნამდა ჩქი ხოლო პატი ოკო ფცათ თანაქრისტიანეფიშ უფლებას, მუნეფიშით გეგნოჭყვიდან თეშე ნაკლებ მნიშვნელოვან საკითხეფი (1 კორ. 10:32, 33).

18. მუჭო შეილებუნა ქაძირუათ, ნამდა აფასენთ ღორონთშე მოჩამილ ძღვინს?

¹⁸ იეჰოვაქ ნებაშ თავისუფლებაწკუმა ართო ჭეშმარიტ თავისუფლება ხოლო მუჩეს (2 კორ. 3:17). ჩქი ვაფასენთ, თე ძღვინს, მუშენდა შემლებუნა საკითხეფ თეშ გინობჭყვიდათ, ნამდა იძირედას, იეჰოვა მიჸორან. მორთ, თე ძღვინ ირიათო იეჰოვაშ ოდიდებელო გეგმიბრინუათ დო პატი ქოფცათ შხვეფიშ ნებაშ თავისუფლებას. თეგვარო, ქუვოძირანთ, ნამდა ვაფასენთ თე ძვირფას ძღვინს.