ᲒᲐᲙᲕᲔᲗᲘᲚ 100
პავლე დო ტიმოთე
ლისტრაშ კრებას რდჷ ართ ახალგაზრდა ჯიმა, ტიმოთე. თიშ მუმა ბერძენ რდჷ დო დიდა – იუდეველ. ტიმოთეშ დიდას ევნიკე ჯოხოდ დო ბების – ლოის. თინეფ ტიმოთეს ჭიჭენობაშე ოგურუანდეს იეჰოვაშ გურშენ.
მუჟამსით პავლე მაჟიაშა რდჷ ულირ შორ ადგილეფშა ოქადაგებშა, თოლშა ქუმუოლ ტიმოთეშ მონდომაქ – მუჭო უჸორდჷ თის და დო ჯიმალეფ დო მუჭო ოკოდ, ქიმეხვარუკო თინეფს. პავლექ ტიმოთეს უწუ, ნამდა მიდაჸუნკო შორ ადგილეფშა ოქადაგებშა. დროშ მიკულაწკუმა ართო, პავლე ტიმოთეს ამზადენდჷ, ნამდა თინა სახიოლო ამბეშ ჯგირ მაქადაგებელ დო მასწავლებერ ჸოფედუკო.
პავლექ დო ტიმოთექ სოდგა ვედესკონ, წმინდა შურ ირდიხას ხელმძღვანელენდჷ თინეფს. ართ სერს პავლექ ხილუას ქოძირ კოჩ, ნამუთ თის თხინდჷ, მაკედონიაშა ქუმორთ დო ქიმმეხვარითია. ათეშენ პავლექ, ტიმოთექ, სილაქ დო ლუკაქ მიდართეს მაკედონიაშა, ნამდა ქიქადაგესკო დო ახალ კრებეფ ქუდარსხუესკო.
მაკედონიაშ ქალაქ თესალონიკეს ბრელქ გინირთჷ ქრისტიანო. ნამთინე იუდეველს ენჯარ პავლეშ დო თიწკუმა ართო რდესინ თინეფიშ. ათეშენ ხალხ გეიახნარეს, თე ჯიმალეფ ქალაქიშ მმართველეფშა მიდასერგელუეს დო ღვარანდეს, თე კოჩეფ რომიშ მთავრობაშ ნტერეფ რენანია. პავლეს დო ტიმოთეს ჯგირ მუთუნ ვა მოძუდეს, შილებედ დოჸვილესკო, ათეშენ თიმ სერს თინეფქ ბერეაშა ინტეს.
ბერეას მახორუ ხალხიქ ხიოლით მირჩქილუ სახიოლო ამბე. შედეგო ქოთ ბერძენეფქ დო ქოთ იუდეველეფქ ქრისტიანეფო გინირთეს. მარა თესალონიკეშე მუსხირენ იუდეველქ ბერეაშა ხოლო ქუმორთჷ. თინეფქ თექ ხოლო გეტახეს ართ ამბე. ათეშენ პავლექ ათენშა მიდართჷ. ტიმოთექ დო სილაქ ბერეას ქუდოსქიდეს დო და დო ჯიმალეფს ამანგარენდეს. დროშ მიკულაშ უკულ პავლექ ტიმოთე კინ თესალონიკეშა მიდაშქვჷ, ნამდა თექიან და დო ჯიმალეფს ქიმეხვარკო, მუშენდა თხოზუდეს თინეფს. უმოს გვიანო, პავლექ ტიმოთე შხვა ბრელ კრებაშა ხოლო მიდაშქვჷ, ნამდა გამანგარკო დო გურშა ელუკინუკო და დო ჯიმალეფს.
პავლექ ტიმოთეს უწუ: მიდგას ოკო, იეჰოვას ემსახურას, თხოზუდან იჸი. ქოთ თაშ რდჷ. რწმენაშ გურშენ ტიმოთეს ხოლო თხოზუდეს დო ციხეს ქიმთახუნუეს. მარა თინა ბედნერ რდჷ, მუშენდა უღუდ საშვალება, იეჰოვას ართგურობა დუმტკიცუკო.
პავლექ ფილიპელ და დო ჯიმალეფს უწუ: ტიმოთეს უტენქ თქვანდა. თინა ქუდგოგურუანა, მუჭო ემსახურათ იეჰოვას დო მუჭო იქადაგათ. პავლეს უჩქუდ, ნამდა შეულებუდ ნოღვედუკო ტიმოთეშ იმენდ. თინეფ ჯგირ მეგობრეფ დო თანამშრომელეფ რდესჷ დო ბრელ წანას მსახურენდეს ართო.
„მითინ ვამწონებ, მით ტიმოთეცალო შურ დო გურით მიგკოჯინენა. შხვა არძა ხვალე მუშ ჯგირობუაშე ფიქრენს დო ვართ ხოლო თიშე, მუთ იესო ქრისტეს ოკო“ (ფილიპელეფ 2:20, 21).