თინეფქ იეჰოვაშ წინააღმდეგ მიდართეს

მუსხირენ ხანიშ უკულ, მუჟამსით ისრაელეფ უდაბნოს რდესჷ, კორახიქ, აბირამქ, დათანქ დო ხოლო 250 კოჩიქ მოსეშ დო აარონიშ წინააღმდეგ მიდართეს. თინეფქ უწუეს: კისერშა რეთჷ ეკულირ! სი მუშენ ოკო რდე ჩქინ წინამძღოლ, ვარდა აარონ მუშენ ოკო რდასჷ მღვდელმთავარ?! იეჰოვა ხვალე სქანწკუმა დო აარონწკუმა ვარინ, ჩქინწკუმა ხოლო რე. იეჰოვას ვემეწონ თინეფიშ საქციელქ. თიქ მოსეშ დო აარონიშ წინააღმდეგ ულა მუშ წინააღმდეგ ულათ მირჩქინ.

მოსექ კორახის დო თიშ მხარეს რდესინ თინეფს უწუ: ჭუმან კარავწკუმა ქუმორთით დო საკმელით ეფშა საცეცხლურეფ ქიმიღით. იეჰოვა ქუმოძირანა, მი აფჷ გიშაგორილ.

მაჟია დღას კორახიქ დო თი 250 კოჩიქ კარავწკუმა ქიმერთეს მოსეშ შეიოხვალამშა. თექ საკმელ გეიორზეს, მუდგაშ კეთებაშ უფლება ხვალე მღვდელეფს უღუდეს. იეჰოვაქ მოსეს დო აარონს უწუ: კორახ დო თიშ ხალხწკუმა ხოლოს ვეგედირთათ.

მართალ რე, თაყვანიშცემაშ კარავწკუმა მოსეშ შეიოხვალამშა კორახიქ ქიმერთჷ, მარა დათანქ, აბირამქ დო თინეფიშ ოჯახეფქ ვემერთეს. იეჰოვაქ ისრაელეფს უწუ, კორახიშ, დათანიშ დო აბირამიშ კარავეფშე შორს ქიგედირთესკო. ისრაელეფქ ხეთე დემორჩილეს თე მითითებას. დათან დო აბირამ ოჯახეფით მუნეფიშ კარავეფწკუმა გერდეს; უცფას დიხაქ გოხორცქჷ დო ქენიჸუნუ თინეფ. თაყვანიშცემაშ კარავწკუმა დაჩხირქ გიმილ ცაშე დო დოჭვჷ კორახ დო თიშ მხარეს რდესინ თი 250 კოჩ.

უკულ იეჰოვაქ მოსეს უწუ: არძა ტომიშ დუდკოჩის გეგწუღ კეტ დო ქიგიოჭარ თინეფიშ სახელეფ. ლევიშ ტომიშ კეტის აარონიშ სახელ ქიგიოჭარ. ქიმნანწკარ თინეფ თაყვანიშცემაშ კარავს; გოფალუნსინ თი კეტიშ მინჯე იჸუაფ ჩქიმ გიშაგორილ.

მაჟია დღას მოსექ გეგმიღ კეტეფ დო ტომეფიშ დუდკოჩეფს ქაძირუ. აარონიშ კეტ გოფალირ რდჷ დო ნუშ აფუდ მიკოღალირ. თეშნერო იეჰოვაქ დამტკიც, ნამდა მღვდელმთავარო აარონ აფუდ გიშაგორილ.