ბალაამიშ ვირქ რაგად ქიდიჭყჷ

ისრაელეფ სოდგარენ 40 წანას რდესჷ უდაბნოს. თე დროშ დინახალე, თინეფქ ბრელ ძალიერ ქალაქ ეჭოფეს. ასე, მუჟამსით იორდანეშ აღმოსავლეთით, მოაბიშ დიხას რდესჷ დაბანაკებულ, მონჭაფილ რდჷ დრო, ნამდა გემნორთესკო დუნაპირებ დიხაშა. მოაბიშ მეფეს, ბალაკის, ოშქურუდ, ნამდა მუშ დიხას მიოდინუანდ, ათეშენ მოაბშა ართ კოჩ, სახელო ბალაამ, ქიჭანუ ისრაელეფიშ ოჭყალო.

მარა იეჰოვაქ ბალაამს უწუ: ვაჭყუა ისრაელეფ! ათეშენ ბალაამს ვა ულინ. მეფე ბალაკიქ თინა მაჟიაშა ქიჭანუ დო დეპირ, ნამდა მუდგას მიკორინუანდ, ირფელს მეჩანდ. მარა ბალაამქ იშენით ვედჷ. თეშ უკულ ღორონთიქ თის უწუ: შეილებ იდე, მარა ხვალე თინა ოკო თქუე, მუდგას მა გიწინქ.

ბალაამქ მუშ ვირით ეყარ დო სამხრეთჸურე მოაბიშ შარას ქიგიოდირთჷ. თიშ უმკუჯინუო, ნამდა იეჰოვას რაგადებულ აფუდ, ვაჭყუკო ისრაელეფ, თის იშენით ულამუდ თეშ კეთება. შარას იეჰოვაშ ანგელოზიქ სუმშა ქეწუდირთჷ თის, მარა თე ანგელოზის ხვალე ბალაამიშ ვირ ორწყედ. პირველო, ვირქ შარაშე მინდორიაშა გეგნორთჷ. თეშ უკულ, თიქ ქუაშ კიდალაჸურე ქირაგუ დუდ დო ბალაამს კუჩხ ქიმკუჭყანჭყჷ. ბოლოს ვირქ შქა შარას ბორკეფ ქეთირღვჷ დო ადგილშე ვექანცუდ. სუმხოლო შემთხვევას ბალაამ კეტით ლახუნდჷ ვირს.

ბოლოს იეჰოვაქ ვირს რაგად ქუდაჭყაფუ. ვირქ ბალაამს კითხჷ: მუშენ ბლახუნქ? ბალაამქ უწუ: გაძიცალო გინმოშქვჷ! ყამა ქომღუდასინ, ღურა ვეგოჩირთუდ! ვირქ უპასუხ: წანეფ რე, მუთ გომსახურუქ, ათაშ დღას მიკეთებუნო?

თეშ უკულ იეჰოვაქ ბალაამს ხოლო ქაძირუ ანგელოზ, ნამდგაქ უწუ: ხომ გუგაფრთხილ იეჰოვაქ, ვაიჭყუდკო ისრაელეფ?! ბალაამქ უპასუხ: მეფჩირთჷ, უკახალე დიბრთუქ. მარა ანგელოზიქ უწუ: შეილებ იდე მოაბშა, ოღონც ხვალე თინა ოკო თქუე, მუდგას იეჰოვა გიწინს.

ქუდაგურუო მუთუნქ ბალაამს თე შემთხვევაშე? ვარ. თეშ უკულ ხოლო, თიქ სუმშა ეცად დოჭყუკო ისრაელეფ, მარა იეჰოვა ირ შემთხვევას, ჭყალაშ მანგიორო, ოხვამაფუანდჷ თინეფს. საბოლათ, ისრაელეფქ ქიგიანთხეს მოაბელეფს დო ბალაამ ხოლო დოჸვილეს. ვა უჯგუდუო, ბალაამს იეჰოვაშა ქუმურჩქილუაფუდუკო?!