მუს იჩიებ ბიბლია შხვაშა ჯგირიშ კეთებაშენ?
მუ პასუხის მარზენა ბიბლია:
ბიბლია მომწოდენა, ნამდა ჯგირ ვაკეთათ, ოღონც ჩქინ სურვილით დო სწორ მოტივეფშე გამომდინარე. ჯგირიშ კეთებას სარგებელ ჟირხოლო მხარეშა მოუღ, ქოთ თიშო, მიდგას ჯგირს უკეთენა დო ქოთ ჯგირიშ მაკეთებელშო (იგავები 11:25; ლუკა 6:38). იესო იჩიებ: „შხვაშა ჯგირიშ კეთებას უმოს ბედნერობა მოუღ, ვინემ მეღებას“ (საქმეები 20:35).
მუჟამ უღჷ ჯგირიშ კეთებას ფას?
ჯგირიშ კეთებას თიმ დროს უღჷ ფას, მუჟამსით თეს ჩქინ სურვილით დო მთელ გურით ვორთუთ. ბიბლია იჩიებ: „თითოულქ თეშ მიქცუას, მუჭოთ გურს გინოჭყვიდ, მარა თენა ხიოლიშ უმშო დო ნანძალუო ვაკეთას, მუშენდა ღორონთის თინა უჸორს, მით ხიოლით ორთჷ ჯგირს“ (2 კორინთელები 9:7).
ჯგირ საქმეეფიშ მთელ გურით კეთება ჩქინ თაყვანიშცემაშ ნაწილ რე დო ღორონთ თის მანგარო იწონუანს (იაკობი 1:27). პიროვნება, ნამუთ ხეგოფაჩილო ოხვარ გაჭირებულეფს, გურს უხარენს იეჰოვას. ღორონთ თითოულ კეთებულ ჯგირ საქმეს თეშ ღებულენს, ითამ ჯგირიშ მაკეთებელ მუს არზენდას სესხის (იგავები 19:17). ბიბლია ოგურუანს, ნამდა ჯგირიშ მაკეთებელს ღორონთ ჯგირით გინუგანს (ლუკა 14:12—14).
მუჟამ ვა უღჷ ჯგირიშ კეთებას ფას?
ჯგირიშ კეთებას ფას უდინუ, მუჟამსით თენა ეგოისტურ მოტივეფით რე კეთებულ. მაგალთო, მუჟამსით:
ხალხიშ თოლს ჯგირ შთაბეჭდილებაშ დოტებას ოცად (მათე 6:2).
მანგიორიშ მეღებას ელჷ (ლუკა 14:12—14).
ფიქრენს, თეთ ღორონთშე რსხებას მიღენს (ფსალმუნი 49:6, 7).
მუჟამსით ჯგირიშ კეთება ხეს უნწყუნს თიცალ საქმეეფს, ნამდგას ღორონთ ვეწონუანს. მაგალთო, ვეჸუაფ სწორ, მიდგაინს ფარა მეფჩათ აზარტულ ლაჸაფეფიშ ოლაჸაფეთ, ნარკოტიკეფიშ მიოღებელო ვარდა უზომე შუმაშ მიკახარჯებელო (1 კორინთელები 6:9, 10; 2 კორინთელები 7:1). ვართ თინა იჸუაფ სწორ, ნამდა ირიათო ეიბჯუმუათ თიცალ ადამიან, ნამდგას შეულებ იმუშუას, მარა თეს შეგნებულო ვართჷ (2 თესალონიკელები 3:10).
მუჟამსით სქან ოჯახის აზარალენქ დო შხვას ოხვარუქ. ბიბლია ოგურუანს, ნამდა ოჯახიშ დუდიქ ოკო იზრუნას მუშ ოჯახიშ საჭიროებეფშო (1 ტიმოთე 5:8). ვეჸუაფ სწორ, ოჯახიშ დუდიქ თიზმა მეჩას შხვეფს, ნამდა თეთ მუშ ოჯახ დაზარალას. თეს გეძინელ, იესოქ გაჭყორ თინეფს, მით ვა ზრუნენდჷ ხანიერ მშობლეფშო დო დუდის თით იმართლენდჷ, ნამდა მთელ ქონება ღორონთშა აფუდჷ მეძღვინელ (მარკოზი 7:9—13).