„ფიფქრენდჷ, ირფელ მიღუდ, მუთ ბედნერობაშო მოსაჭირუდ“

მოკლე ბიოგრაფია

დებაბდ მონრეალს, კანადაშ კვებეკიშ არძაშ უდიდაშ ქალაქის. მა დო ჩქიმ სუმ და დო ჯიმა როზმონტიშ წყნარ უბანს იბრდუდით. ჩქი მოჸოროფე მშობლეფ პჸუნდეს დო მთელ ოჯახ გემუანო ფცხოვრენდით.

ბაღანობას, ბიბლიათ დებინტერეს. ჯგირო ფშუ, 12 წანერ ვორდინ თეშ ახალ აღთქმაშე იესოშ ცხოვრებაშ გურშენ ბკითხულენდჷ, მუთ მანგარო მოსიამოვნუდ. თევრეშე ბგებულენდჷ, ნამდა იესოს უჸორდჷ ხალხ დო გურშა მეუღუდ თინეფიშ გაჭირება; თექ ჩქიმ გურს მანგარო შეხუ დო მოკოდ, თის ქუვაგურკო. სანარღოთ, მუჟამსით გემწიბრდჷ თე სურვილქ მემდინ დო თიცალ საზოგადოებაწკუმა ქიდიბჭყჷ ურთიერთობა, მიდგას გლახა გავლენა უღუდ ჩქიმწკუმა.

მუაჩქიმ საქსაფონისტ რდუ დო თიშე მემკვიდრეობათ ხვალე თე ინსტრუმენტიქ ვარინ, მუსიკაშ ჸოროფაქ ხოლო გინმაჩ, მუდგაქ ჩქიმ ცხოვრებაშ მთავარ მიზანო გინირთჷ. მუსიკა თეშ მიჸორდჷ, ნამდა გიტარაშ მეგამა ხოლო ქიდიბგურე. უმოს გვიანო, მა დო ჩქიმ მეგობრეფქ როკ-ჯგუფ ჩამოვაყალიბით დო მუსხირენ კონცერტ ჩუვატარით. მუსიკალურ სამყაროშ ცნობილ წარმომადგენელეფს მანგარო მეწონეს ჩქინ კონცერტიქ დო შემოფთავაზეს კონტრაქტ გუვაფორმიკო ართ-ართ სერიოზულ ხონარიშ ინმაჭარალ კომპანიაწკუმა. მა ხოლო დევეთანხმჷ დო შედეგო, ჩქიმ მუსიკაქ მანგარ პოპულარულო გინირთჷ. კვებეკიშ რადიოეფს ხშირას ირჩქილედ ჩქიმ მუსიკა.

მიმორჩქუდ, ნამდა ირფელ მიღუდ, მუთ შემლებუდ იმნატრკო. ახალგაზრდა დო პოპულარულ ვორდჷ; ბრელ ფარა მიღუდ დო თი საქმეს ვორთუდ, მუთ მიჸორდჷ. დღაშ განმავლობას გილეფშ სპორტდარბაზშა, იბრზენდჷ ინტერვიუეფს დო ავტოგრაფეფს; თეწკუმა ართო, ტელეგადაცემეფს ხოლო ხშირას ვორდჷ. სერით კონცერტეფს ვატარენდჷ დო შხვადოშხვა წვეულებეფშა გილეფშჷ. მანგარ სტრეს მიღუდ, ათეშენ შუმა დო ნარკოტიკეფიშ გიმორნაფა ქიდიბჭყჷ. თეს გეძინელ, უზნეო ცხოვრებათ ფცხოვრენდჷ დო მუთუნშე ვა ბწუხენდჷ.

თეშ იძირედ, ითამ მანგარ ბედნერ ვორდჷ, ათეშენ ბრელს ონჯარუდ ჩქიმ. მარა შინაგანო სიცარიელეს ბგინაფლენდჷ განსაკუთრებულო თი დროს, მუჟამსით ჩქიმ დუდწკუმა ხვალე ფსკიდუდ. გურგოტახილ ვორდჷ დო დეპრესია მიღუდ. მუჟამსით მანგარ წარმატებულ ვორდჷ, სანარღოთ, ჩქიმ ჟირ მუსიკალურ პროდუსერქ შიდსით დოღურ. შოკის ქინობლჷ! მუსიკა მანგარო მიჸორდჷ, მარა ჩქიმ ცხოვრებაშ წესიქ დუდ გომჯოგუ.

ბიბლიაქ ჩქიმ ცხოვრება დოთირუ

თიშ უმკუჯინუო, ნამდა წარმატებულ ვორდჷ, მაწუხენდჷ თი გლახა მდგომარეობა, მუთ მსოფლიოს რდუ. ვა ბგებულენდჷ, მუშენ რდუ თესხი უსამართლობა დო მიკვენდჷ, მუშენ ვართუდ ღორონთ მუთუნს სიტუაციაშ გიშასწორებელო. ხშირას ბლოცულენდჷ დო ღორონთის ფთხინდჷ ჩქიმ კითხვეფშე პასუხ ქიგებგიკო. ართშა, მუჟამსით კონცერტის ვა ვატარენდჷ დო დრო მიღუდ ბიბლიაშ კითხირ ქიდიბჭყჷ. მართალ რე, ნაკითხირშე ბრელ მუთუნს ვა ბგებულენდჷ, მარა ქიმეფხვად, ნამდა თე ქიანაშ აღსასრულ ხოლოს რდუ.

ბიბლიაშე ქიგებგჷ, ნამდა იესო უდაბნოს 40 დღას მარხულენდჷ (მათე 4:1, 2). ჩქიმო იფიფქრჷ, მა ხოლო თაშ ქიმიფქციებუდ-და, შილებე ღორონთიქ მა ხოლო გეგმეცხადკო. ათეშენ დუვაგეგმ, მუჟამ დიბჭყანდჷ მარხვას. ჟირ მარათ ადრე, სიოშახ მარხვას დიბჭყანდჷ, ჟირ იეჰოვაშ მოწმექ ჩქიმ ჸუდეშ კარს ქუმკუხაკუ. თინეფს ველუდკონ თეშ ქეშეფხვად დო ჸუდეშა გემნიპაპტიჟ. ართ-ართ იეჰოვაშ მოწმეს, ნამდგას ჟაკი ჯოხოდ, თეცალ კითხვა დუსვჷ: „მუშენ შემლებნა ბჯერდან, ნამდა თე ქვეყნიერებაშ ბოლო დღალეფს ფცხოვრენთ?“. თიქ გეგნოფაჩ მუშ ბიბლია დო 2 ტიმოთეშ 3:1—5-ის ინოჭარილ სიტყვეფ გეშამკითხჷ. თეშ უკულ ქიანაშ კითხვეფ ქუდუსვჷ; მაკვირენდჷ, მუ ლოგიკურ პასუხეფს მარზენდეს თინეფ ბიბლიაშე. მუსხირენ მოკითხირიშ უკულ ქიმეფხვად, ნამდა აუცილებერ ვარდჷ, იმაფრხულკო.

იეჰოვაშ მოწმეეფწკუმა რეგულარულო ქიდიბჭყჷ ბიბლიაშ გურაფა. ჭიჭე ხანშა თუმა ხოლო დიბჭკირ დო სამეფო დარბაზშა, კრებაშ შეხვალამეფშა ქიდიბჭყჷ გილულა. თინეფიშ გიმორჩქინელ ყურადღება დო ჸოროფაქ დუმარწმუნ, ნამდა საბოლათ ქიმვოგორე ჭეშმარიტებას.

მუშო ოკო რაგად, მუდგას ბიბლიაშე ბგურაფლენდჷ თის ქიმვაჸუნკო, საჭირო რდუ, დოფთირეკო ჩქიმ ცხოვრება. პირველ რიგის, ოკო მივოტეკო ნარკოტიკეფიშ გიმორნაფა დო უზნეო ცხოვრება. თეს გეძინელ, ხვალე ჩქიმ დუდშე ვარინ შხვეფშე ხოლო ოკო იფიფქრიკო. მა ჟირ სქუას ხვალე ბრდუნდჷ, ათეშენ ოკო იბზრუნკო თინეფიშ მატერიალურ დო სულიერ მოთხოვნილებეფშე. თაშ ნამდა, მივოტე მუსიკალურ კარიერა დო მუშება ქიდიბჭყჷ ქარხანას, სოდეთ ჭიჭე ხელფას მერზიებუდ.

ჩქიმო ადვილ ვა რდუ ცხოვრებაშ თირუა. ვობრძოლუდ აბსტინენციაშ საშინელ სიმპტომეფს, ნამუთ ნარკოტიკეფიშ მეტებაშ მოჸუნს; ათეშენ მინშა დუდშა ვამმარიებედ დო კინ ბღებულენდჷ ნარკოტიკის (რომაელები 7:19, 21—24). არძაშ უმოსო გამჭირდჷ უზნეო ცხოვრებაშ მეტებაქ. თეს გეძინელ, ჩქიმ სამუშა მანგარო ბშულიდუნდჷ დო ხელფასის ხოლო გვალო ჭიჭეს მარზენდეს. სუმ თუთა მოსაჭირუდ თი თანხაშ გიმომუშებას, მუდგას მუსიკალურ კარიერაშ დროს ჟირ საათშა ეპჭოფუნდჷ.

ლოცვაქ დო ბიბლიაშ რეგულარულ კითხირქ მიმეხვარ, გივორჯგინკო თე სირთულეეფს დო ართ დო სამუდამოთ დოფთირეკო ცხოვრება. ბიბლიურ მუხლეფქ მანგარო ელამკინ გურშა. თინეფშე ართ-ართ რდუ 2 კორინთელეფიშ 7:1-ის ინოჭარილ სიტყვეფ: „გეფსუფთათ თი ირფელშე, მუთ გილმალუანს სხეულს დო გონებას“. თეს გეძინელ, ფილიპელეფიშ 4:13-ქ ხოლო დუმარწმუნ, ნამდა შეიოლებერ რე გლახა ჩვევეფიშ მეტება. თაქ ჭარჷ: „ირფელიშ კეთებაშ ძალა მიღჷ ჩქიმ გუმამანგარებელიშ მოხვარათ“. იეჰოვა ღორონთიქ უპასუხ ჩქიმ ლოცვეფს დო ქიმმეხვარ, საბოლათ ქინვანჭიკო ბიბლიურ ჭეშმარიტებას. თექ გინმოჭყვიდირაფუ, ცხოვრება იეჰოვას მევუძღვინკო (1 პეტრე 4:1, 2). 1997 წანას დიბნათ.

კურთხევეფ ნამუთ მიბღჷ

დებრწმუნ, ნამდა ცხოვრებაშ წეს ვამთირუდკო, ასე ცოცხალ ვეპჸიდ. თეშ მანგიორო, ასე ბედნერ ცხოვრება მიღ! პჸუნს ძვირფას მეუღლე, ელვი. ჩქი ჟირხოლო სრულ დროთ ვომსახურუთ იეჰოვას დო შხვეფს ბიბლიას ვოგურუანთ. თეს ჩქიმო დიდ ხიოლ დო კმაყოფილება მოუღ. დიდ მარდულ ვორექ იეჰოვაშ, ნამდა მუწკუმა დაახლოებაშ საშვალება მუჩჷ (იოანე 6:44).