„ართ დროს აგრესიულ ვორდჷ დო ხეთეშე მუმალედ გურ“

მოკლე ბიოგრაფია

დებაბდ მექსიკას, ჩიაპასიშ შტატიშ ჭიჭე ქალაქ სან ხუან ჩანკალაიტოს. ჩქიმ ოჯახ მაიაშ ტომიშ ართ-ართ ეთნიკურ ჯგუფის, ჩოლს, ოკუთვნჷ. 12 და დო ჯიმაშე, მა მახუთა ვორდჷ. ბაღანობას მა დო ჩქიმ და დო ჯიმალეფს იეჰოვაშ მოწმეეფ ბიბლიას მოგურუანდეს. სანარღოთ, ახალობას ვემეპჸუნდჷ ბიბლიურ პრინციპეფს.

მუჟამსით 13 წანერ ვორდჷ, ქიდიბჭყჷ ნარკოტიკეფიშ გიმორნაფა დო ფხირულენდჷ. ჸუდეშე ხოლო მიდაფრთჷ დო სო დო სო ვა ვოთანუანდჷ სერს. 16 წანერ ვორდინ, მარიხუანაშ პლანტაციას ქიდიბჭყჷ მუშება. სოდგარენ ართ წანაშ უკულ, მუჟამსით სერით დიდ რაოდენობათ მარიხუანა გინომღუდეს ნავით, ჩქინწკუმა დაპირისპირებულ რდესინ ფერ ნარკოტიკეფით მოვაჭრე ჯგუფიქ ქიგმანთხეს; თინეფ შეიარაღებულეფ რდეს. უკულ ჸოთამა ქიდიჭყეს, მარა დუც ვუსაშველ, იმტჷ დო მალწყარშა ქოფსხაპ. თე შემთხვევაშ უკულ, ამერიკაშა გეგნოფრთჷ ოცხოვრებშა.

ნარკოტიკეფით ვაჭრობა ამერიკას ხოლო ვემემტებ, მუდგას უმოს პრობლემეფქ ქუმაჸუნ. 19 წანერ ვორდინ თეშ, ობჭოფეს დო ხირუას დო კოჩიშ ჸვილუას ვეცადინ თიშენ, ციხეს ქუდმოხუნეს. ციხეს ართ-ართ ბანდაშ წევრო გინიფრთჷ დო უმოსო ქუმუძინ გლახა საქმეეფიშ კეთებას. შედეგო, ციხეშ უნჩაშეფქ პენსილვანიაშა, ლუისბერგიშ მკაცრ რეჟიმიშ ციხეშა გეგნომიჸონეს.

ლუისბერგიშ ციხეს უფრაშო იფქციებუდ. მუსხირენ თიცალ ტატუ მიღუდ, მუნერით ბანდაშ წევრეფს უღდეს; ათეშენ, კინ თი ბანდაშა მიშულა ჩქიმო რთულ ვა ჸოფე. თეს გეძინელ, უმოს მოძალადეთ გინიფრთჷ დო ირიათო ფჩხუპენდჷ. ართშა, ციხეშ ეზოს ხოლო იბჩხუპით; ართიანს ბეისბოლიშ კეტეფს დო ოვარჯიშებელ განტელეფს მივოგანდით. ჩქინ გარზიებელო, ციხეშ მცველეფქ ცრემლსადენ გაზ გიმირინუეს. თეშ უკულ, ციხეშ უნჩაშეფქ თიცალ ადგილშა გეგნომიჸონეს, ნამუთ საშიშ დამნაშავეეფშო რდუ გიმორთელ. მანგარ უხეშ ვორდჷ დო ხშირას იბგორაფუდ. კოჩიშ ლახუა მუთუნო ვემმორჩქუდ; პირიქით, მოსიამოვნუდ თეშ კეთება დო სინდის ხოლო შურო ვა მაწუხენდჷ.

ბიბლიაქ ჩქიმ ცხოვრება დოთირუ

თე სპეციალურო გიმორთელ საკანს დღაშ უმენტაშ ნაწილს ხვალე ვორდჷ, ათეშენ დროშ ოღალარო ბიბლიაშ კითხირ ქიდიბჭყჷ. უმოს გვიანო, ციხეშ მცველქ ქომუჩ წიგნ, ნამუთ ბიბლიაშა რდუ გერსხილ (შენ შეგიძლია მარადიული ცხოვრება სამოთხეში დედამიწაზე).a თე წიგნიშ კითხირიშ დროს ქუგმაშინ ირფელქ, მუდგას იეჰოვაშ მოწმეეფ ბაღანობას მოგურუანდეს. თეშ უკულ, დეფიფქრ, მუჭო მოფხვად თე გლახა სიტუაციას, ხვალე თიშენ, ნამდა აგრესიულ ხასიათ მიღუდ. ჩქიმ ოჯახიქ ხოლო ქუგმაშინ. მიჩქუდ, ნამდა ჩქიმ ჟირ დაქ იეჰოვაშ მოწმეთ გინირთჷ. ჩქიმო ფიფქრენდჷ: „თინეფ ხომ მარადიულო იცხოვრენა“. უკულ ჩქიმ დუც ვოკითხუდ: „მა მუ მოცილ მარადიულო იფცხოვრე?“. ზუსტას თე დროს გინობჭყვიდ, დიფთირკო.

მიჩქუდ, ნამდა დიფთირკონ თიშენ, მოხვარა მოსაჭირუდ. ათეშენ, პირველ რიგის ქიბლოც დო იეჰოვას ქოფთხი, ქიმმეხვარკო. თეშ უკულ, ამერიკას იეჰოვაშ მოწმეეფიშ ფილიალს ქიმებჭარ დო ბიბლიაშ გურაფა მიფხთი. ფილიალქ ქიზრუნ, ნამდა ხოლოშიან კრებაშე იეჰოვაშ მოწმეეფქ ქუმმაკითხესკო; მარა თე დროს, ჩქიმ ძირაფაშ უფლება ოჯახიშ წევრეფიშ გარდა მითინს ვა უღუდ, ათეშენ კრებაშ ართ-ართ წევრ გურიშემაკინალ წერილეფს დო ბიბლიურ ლიტერატურას მიჯღონანდჷ. თიშ წერილეფქ გამიმანგარ სურვილ, დოფთირეკო ცხოვრება.

ართ-ართ მნიშვნელოვან ნაბიჯ თიმწკუმა გინობდგჷ, მუჟამსით გინობჭყვიდ, დიბტეკო ბანდა, ნამდგაშ წევრ წანეფიშ დინახალე ვორდჷ. ბანდაშ უნჩაშ ციხეშ თი ნაწილს ხედჷ, სოდეთ მა; ათეშენ ეზოს ვორდითინ თეშ, თიშა ქიმეფრთჷ დო ვუწი, ნამდა მოკოდ იეჰოვაშ მოწმეთ გინიფრთიკო. მანგარო გამკვირდჷ, მუჟამსით მიწუ: „თეს სერიოზულო ქომრაგადუქ-და, გაკეთ, მუთ გინოჭყვიდილ გაფჷ. სქან დო ღორონთ შქას მა ვეშმარნე; მარა თეშ მიზეზ ბანდაშე ულა ქორენ-და, გვალო ჯგირო გიჩქჷ თეს მუ მაჸუნუ“.

უკულიან ჟირ წანაშ განმავლობას ციხეს მუშენდესინ თინეფ ორწყედეს, მუჭო იფთირუდ, მუდგაშ გურშენ ჩქიმ მიმართ დამოკიდებულებაქ დათირეს. მაგალთო, მუჟამსით საკანშე გიმოპჸუნდით, ნამდა გომბონუდკო, მცველეფ ბორკილეფს ვამკეთენდეს. ართ-ართ მცველქ გურშა ელამკინ დო ელამიჩ, ნამდა გუვაგრძელკო ცხოვრებაშ თირუა. უმოს გვიანო, ციხეშ უნჩაშეფქ თიცალ სასჯელაღსრულებაშ დაწესებულებაშა გეგნომიჸონეს, სოდეთ ნაკლებ მკაცრ რეჟიმ რდუ; ჩქიმ პატიმრობაშ ბოლო ართ წანას თექ ვორდჷ. 2004 წანას, 10 წანიან პატიმრობაშ უკულ, ციხეშე გუმათავისუფლეს დო ციხეშ ავტობუსით მექსიკაშა დუმორთინეს.

მექსიკაშა დორთაშ უკულ ხეთეშე, იეჰოვაშ მოწმეეფიშ სამეფო დარბაზ დობგორ. თექ პირველო მეფრთინ, ციხეშ ფორმა მიკმოქუნდჷ, მუშენდა შხვა მიკაქუნალ ვა მიღუდ. თეშ უმკუჯინუო, იეჰოვაშ მოწმეეფქ მთელ გურით მემღეს. მუჟამსით თინეფიშ გიმორჩქინელ ჸოროფა ქობძირ, ქიბგინ, ნამდა ნამდვილ ქრისტიანეფ შქას ვორდჷ (იოანე 13:35). შეხვალამაშ უკულ, კრებაშ უხუცესეფქ ქიზრუნეს, ნამდა ართ-ართ იეჰოვაშ მოწმეს ჩქიმდა ბიბლიაშ გურაფა ჩუტარებუდკო. ართ წანაშ უკულ, 2005 წანაშ 3 სექტემბერს, დიბნათ დო იეჰოვაშ მოწმეთ გინიფრთჷ.

2007 წანაშ იანარს სრულ დროთ მსახურება ქიდიბჭყჷ; ირ თუთას 70 საათის ფქადაგენდჷ დო შხვეფს ხოლო ვოგურუანდჷ ბიბლიას. 2011 წანას ბიბლიურ სკოლა მიკოფრთჷ, ნამუთ დაუქორწინებელ ჯიმალფშო რდუ (ასე თე სკოლას ჯოხო „სამეფოს მახარობელთა სკოლა“). თე სკოლაქ მანგარო მიმეხვარ, ნამდა თი პასუხიშმგებლობეფ, ნამუთ კრებას მიღჷ, უჯგუშო შევასრულკო.

2013 წანას მა დო პილარქ დეფქორწინით. პილარ მინშა ციგანებულო იჩიებ, ნამდა ვა ჯერსჷ თინა, მუდგას ჩქიმ ულირ ცხოვრებაშ გურშენ ვეჩიებუქ. ულირ ცხოვრება ართ დო სამუდამოთ მივოტე. მა დო ჩქიმ ოსურს ჯგირო მიჩქნა, ნამდა თირუა ხვალე ბიბლიაშ მოხვარათ რე შეიოლებერ (რომაელები 12:2).

კურთხევეფ, ნამუთ მიბღჷ

ლუკაშ 19:10-ის ინოჭარილ სიტყვეფ ჩქიმდე ისრულებ: „კოჩიშ სქუა ხოლო ხომ თიშენ მორთ, ნამდა დინაფილ დუგორუდკო დო ირსხუკო!“. მა დუც დინაფილ შხურო ვა ბგინაფლენქ. ვართ ჭუას მივორინუანქ ხალხის. მარდულ ვორექ, ნამდა ბიბლიაქ ცხოვრებაშ აზრ ქომუჩ, ასე ჯგირ ურთიერთობა მიღ შხვეფწკუმა დო მუთ არძაშ უმოს მნიშვნელოვან რე, ჯგირ ურთიერთობა მიღ ჩქიმ გუმაჭყაფალ, იეჰოვაწკუმა.