ხორციელ სხეულით გეთელუო იესოქ დოვარ სულიერით?

მუ პასუხის მარზენა ბიბლია:

ბიბლია იესოშ გურშენ იჩიებ, ნამდა: „ხორციელ სხეულს ჸვილეს, მარა სულიერ სხეულს გეთელ“ (1 პეტრე 3:18; საქმეები 13:34; 1 კორინთელები 15:45; 2 კორინთელები 5:16).

მუჭოთ იესოქ თქუ, თინა ხორციელ სხეულით ვეგეთელებუდ. თიქ თქუ, ნამდა მუშ ხორციელ სხეულ „ქვეყნიერებაშ სიცოცხლეშო“ ოკო შეწირკო (იოანე 6:51; მათე 20:28). თინა ხორციელ სხეულით გეთელებუდ-და, გიშაჸიდირალიშ მსხვერპლის მუთუნნერ ძალა ვაღვენუდ. მარა შეიოლებერ ვა რდჷ თექ ქუმოხვადკო, მუშენდა, მუჭოთ ბიბლიას ბკითხულენთ, იესოქ „ხვალე ართშა“ შეწირ მსხვერპლო სიცოცხლე დო ქუდაბ მუშ ზისხირ (ებრაელები 9:11, 12).

იესოქ სულიერ სხეულს გეთელ-და, მუჭო ძირეს თინა მუშ მიმაჸუნალეფქ?

• სულიერ ქმნილებეფს შეულებნა ქაგურან ადამიანეფს. მაგალთო, ჯვეშო ანგელოზეფქ ხორციელ სხეულ მიღეს დო ადამიანეფწკუმა ართო ჭკუმუნდეს დო შუნდეს (დაბადება 18:1—8; 19:1—3). მარა თინეფ იშენით სულიერ ქმნილებეფ რდეს დო თავისფალო შეულებდეს დედამიწაშ დოტება (მსაჯულები 13:15—21).

• გათელებაშ უკულ იესოქ ხოლო ხორციელ სხეულ მიღჷ, მუჭოთ ჯვეშო ანგელოზეფქ. თის, მუჭოთ სულიერ ქმნილებას, შეულებუდ მითინ ველუდუნ თეშ გეგმეცხადკო მუშ მიმაჸუნალეფს დო მითინ ველუდუნ თეშ მედინკო (ლუკა 24:31; იოანე 20:19, 26). იესო შხვადოშხვა ფიზიკურ სხეულით გიმეცხადებუდ მოწაფეეფს. თაშ ნამდა, გათელებაშ უკულ, სოიშახ ზეცაშა იშკონ, ხოლოშიან მეგობრეფ იესოს მუშ ჩიებათ დო საქმეეფით ჩინებულენდეს (ლუკა 24:30, 31, 35; იოანე 20:14—16; 21:6, 7).

• მუჟამსით მოციქულ თომას გუჭირდჷ თიშ დაჯერებაქ, ნამდა იესოქ გეთელ, თიქ მუშ ნჭყოლირ სხეულით გეგმეცხად, ნამდა თომას რწმენაქ გემანგარკო (იოანე 20:24—29).