ანძალენანო იეჰოვაშ მოწმეეფ ხალხის რელიგიაშ თირუას?

მუშო ოკო რაგად, ვარ. ჩქინ მთავარ ოგურაფალ ჟურნალს, „გინაჯინალ კოშკის“ ჭარჷ: „ვა რე სწორ, ხალხის დანძალე რელიგიაშ თირუა“.a თუდო მოჩამილ მიზეზეფიშ გურშენ ჩქი ვა ვანძალენთ ხალხის რელიგიაშ თირუას:

• იესო დღას ვანძალენდჷ ხალხის, ქირწმუნესკო, მუდგას ოგურუანდჷ. თის უჩქუდ, ნამდა ბრელ ვემიღენდჷ თიშ ცნობას (მათე 7:13, 14). მუჟამსით ნამთინე მოწაფე დაბრკოლ იესოშ სიტყვეფქ, თიქ ულაშ უფლება ქიმეჩ თინეფს დო ვა დუნძალებ, ქუდოსქიდესკო (იოანე 6:60—62, 66—68).

• იესო მუშ მიმაჸუნალეფს ოგურუანდჷ, ნამდა ვა დანძალესკო შხვეფს რწმენაშ თირუა. მოწაფეეფ ვანძალენდეს ხალხის, მიღესკო სახიოლო ამბე სამეფოშ გურშენ; თეშ გინაწონს, თინეფ ოცადდეს, დოგორესკო თიცალ კათა, მიდგას ოკოდ სახიოლო ამბეშ მორჩქილაფა (მათე 10:7, 11—14).

• მუთუნ აზრ ვა უღჷ, პიროვნებას დუვანძალათ რელიგიაშ თირუა, მუშენდა ღორონთ ხვალე თინეფს იწონუანს, მით მთელ გურით ცენს თის თაყვანს (კანონი 6:4, 5; მათე 22:37, 38).

რენო ჩქინ მიზან, ხალხის რელიგია დუვოთირაფუათ?

ჩქი ბიბლიურ ცნობას ვავრცელენთ „დედამიწაშ არძა კუნთხუს“ დო ფქადაგენთ „სახალხოთ დო კარდოკარ“, მუჭოთ თეს ბიბლია მირაგადნა (საქმეები 1:8; 10:42; 20:20). პირველ საუკუნეშ ქრისტიანეფცალო, მინშა ჩქი ხოლო ეკმაწამენა, ითამ ჩქინ მიზან რე, ხალხის რელიგია დუვოთირაფუათ (საქმეები 18:12, 13). მარა თენა ვა რე მართალ. ჩქი ვა ვოცადუთ, ჩქინ რწმენა მივოღებაფუათ ხალხის. თეშ გინაწონს, ჩქი ფიფქრენთ, ნამდა ადამიანეფს ოკო უღდან რჩქინაშ მეღებაშ საშვალება, ნამდა გადაწყვეტილებაშ მეღებაშ დროს ჯგირო არჩქილედან, მუს გიშეგორუნა.

ჩქი ვა ვანძალენთ ხალხის რელიგიაშ თირუას, ვართ რელიგიას გიმიბრინუანთ თიშო, ნამდა პოლიტიკურ საქმეეფს ტყობაშე მიბღათ მონაწილება დო ვართ მითინს ვურაგადუთ, ნამდა თინეფიშ მატერიალურ ვარდა სოციალურ მდგომარეობა გეუჯგუშებ დო თეშნერო ვემშებტყურუანთ ჩქინ რელიგიაშა. ნამთინე, მით ამტკიცენს, ნამდა ქრისტიან რე, მარა თეცალ საქმეეფს ორთჷ, შეურაცხყოფას მიორინუანს ქრისტეს.b

ქოუღუნო ადამიანს რელიგიაშ თირუაშ უფლება?

მუშო ოკო რაგად, ქო. ბიბლიაშე იძირე, ნამდა ადამიანეფს უღნა უფლება, დითირუან რელიგია. ღორონთიშ სიტყვას ინოჭარილ რე თიცალ კათაშ ბრელ მაგალით, მიდგაქ გინოჭყვიდ ვემიაჸუნკო მუშ ნათესეეფიშ რელიგიას დო მუშით გინოჭყვიდ, ემსახურკო ჭეშმარიტ ღორონთის. თინეფ შქას რდეს აბრაამ, რუთი, ნამთინე ათენელ დო პავლე მოციქულ (იესო ნავეს ძე 24:2; რუთი 1:14—16; საქმეები 17:22, 30—34; გალატელები 1:14, 23). თეს გეძინელ, ბიბლია იჩიებ, ნამდა ადამიანს უღჷ უფლება, მიღას არასწორ გადაწყვეტილება ხოლო დო მიოტუას ჭეშმარიტ ღორონთიშ თაყვანიშცემა (1 იოანე 2:19).

რელიგიაშ თირუაშ უფლებას ხუჯის უკინენს „ადამიანიშ უფლებეფიშ საყოველთაო დეკლარაცია“, ნამდგას გაერთიანებულ ერეფიშ ორგანიზაცია მიშინუანს, მუჭოთ „ადამიანიშ უფლებეფიშ საერთაშორისო სამართალიშ საფუძველ“. თე დეკლარაციას მოშინაფილ რე, ნამდა არძას უღჷ „რელიგიაშ ვარდა რწმენაშ თირუაშ თავისუფლება“ დო უფლება, ნამდა „დოგორას, მიღას დო შხვეფს გეგნოჩას ინფორმაცია ვარდა შეხედულებეფ“, თინეფ შქას რელიგიურ შეხედულებეფ ხოლო.c მუშო ოკო რაგად, თენა ადამიანს აკისრენს ვალდებულებას, პატი ცას შხვაშ თი უფლებას, ნამდა ვეთირუას რწმენა დო ვემიღას შეხედულებეფ, ნამდგას ვათანხმ.

ნიშნენსო რელიგიაშ თირუა ოჯახურ ტრადიციეფიშ ვარდა წეს-ჩვეულებეფიშ უპატიცემლობას?

მუშო ოკო რაგად, ვარ. ბიბლია ელამჩანა, ნამდა პატი ფცათ არძას, თიშ უმკუჯინუო, მუ წანა (1 პეტრე 2:17). თეს გეძინელ, იეჰოვაშ მოწმეეფ ომორჩილნა ბიბლიურ მითითებას, ნამდა პატი ცან მშობლეფს, თიმწკუმა ხოლო, მუჟამსით თინეფს შხვა რწმენა უღნა (ეფესოელები 6:2, 3).

მარა არძა ვათანხმ ბიბლიაშ თვალსაზრისის. ართ ოსურ, ნამდგაქ ზამბიას ირდჷ, იჩიებ: „სოდეთ მა იბრდჷ, რელიგიაშ თირუა ოჯახიშ დო ხალხიშ ღალატო მიორჩქუდეს“. თე ოსურქ ზუსტას თე პრობლემას შეხვად, მუჟამსით გემწირდჷ დო იეჰოვაშ მოწმეეფწკუმა ქიდიჭყჷ ბიბლიაშ გურაფა. ჭიჭე ხანშა თიქ გეგნოჭყვიდ, ნამდა დითირკო რელიგია. თინა იჩიებ: „მშობლეფ ირიათო მირაგადდეს, ნამდა ჩქიმ საქციელით მანგარო ვოწყინებაფე დო თინეფიშ იმენდეფ ვა გუვამართლ. ჩქიმო თე ირფელ ვარდჷ ადვილ გინაღალარ, მუშენდა ჩქიმ მშობლეფშე მოწონაშ მეღება ბრელს ნიშნენს ჩქიმო ... რელიგიურ ტრადიციეფიშ მეჸუნაშ მანგიორო იეჰოვაშ ართგურობა გიშებგორინ, თენა ჩქიმ ოჯახიშ ღალატის ვა ნიშნენს“.d