მი დერსხენს უბრალო ხალხის? — მუს იჩიებ ბიბლია?

გაეროშ ანგარიშიშ თანახმას

• 2023 წანაშ 7 ოქტომბერშე 23 ოქტომბერშა, ღაზა დო ისრაელ შქას სამხედრო დაპირისპირებაშ დროს 6 400 კოჩიქ ღურჷ დო 15 200 კოჩიქ დეზიან. თინეფიშ უმენტაშ უბრალო ხალხ რდჷ, მით ვა ღებულენდეს ჩხუბის მონაწილებას. თეს გეძინელ, ოშობით ანთას პიროვნებას ოცხოვრებელ ადგილქ აჸუ დატებელქ.

• 2023 წანაშ 24 სექტემბერშე მოჸუნაფილ, უკრაინა დო რუსეთ შქას ჩხუბიშ დროს, უბრალო ხალხ შქას 9 701 კოჩიქ ღურჷ დო 17 748 პიროვნებაქ დეზიან.

მუ იმენდის არზენს ბიბლია თი კათას, მით ომიშ გურშენ იტანჯებ?

მუშ იმენდ შემლებუნა მიღუდან?

ბიბლია წინასწარმეტყველენს, ნამდა ღორონთ „მოსპუნს ომეფს მთელ დედამიწას“ (ფსალმუნი 46:9). თინა ადამიანეფიშ მართველობას მუშ სამეფოთ დოთირანს (დანიელი 2:44). ღორონთიშ სამეფო კაცობრიობას რსხებას მოუღანს.

დეკვირით, მუს გაკეთენს იესო ქრისტე, ღორონთიშ სამეფოშ მეფე:

• „თინა დერსხენს ღარიბის, ნამუთ მოხვარას ითხინს, გაჭირებულს დო თის, მიდგას მოხვარე მითინ ვა ჸუნს. თინა ქეშიცოდილუანს გაჭირებულს დო ღარიბის, გინატენს ღარიბეფს. დაჩაგრება დო ძალადობაშე ირსხენს თინეფს“ (ფსალმუნი 72:12—14).

მუშ სამეფოშ საშვალებათ, ღორონთ სადღამუშოთ მოსპუნს გაჭირება დო ტანჯებას, ნამუთ ომს დო ძალადობას მოჸუნს.

•  „გელუწიმინდანს თინეფს ირნერ ჩილამურს თოლეფშე დო მეტო ვეჸუაფ ღურა, ვართ ნგარა, თვალუა დო ჭუა, მუშენდა მუთ ულირს რდჷ, ირფელქ მისპჷ“ (გამოცხადება 21:4).

მალას ღორნთიშ სამეფო დედამიწას ირფელს დოთირანს. ბიბლიას ნაწინასწარმეტყველებ რდჷ, ნამდა ჩქინ დროს ომეფ იჸუაფუდ (მათე 24:6). მუჭოთ თე დო შხვა მოვლენეფშე იძირე, ჩქი ადამიანეფიშ მართველობაშ „ბოლო დღალეფს“ ფცხოვრენთ (2 ტიმოთე 3:1).