ომს დო კლიმატიშ თირუას მთელ მსოფლიოს ოჭკუმალიშ სინაკლებე მოჸუნს — მუს იჩიებ ბიბლია?

უკრაინაშ ომიშ დო კლიმატიშ თირუაშ შედეგო მსოფლიოს ოჭკუმალიშ სინაკლებე რე. თენა განსაკუთრებულო იძირე ნაკლებო განვითარებულ ქიანეფს, სოდეთ ბრელ ადამიანს ვა უღჷ დასაბაღ ოჭკუმალ.

• „პროდუქტეფიშ წარმოებას მანგარო ოცილ კონფლიქტეფ, კლიმატიშ თირუა, ელექტროენერგიაშ გინაგაფალეფშა ფასიშ მოძინა დო შხვა მუდგარენეფ“ (ანტონიო გუტერეშ, გაეროშ გენერალურ მდივან, 17 კვირკვე, 2023).

• „რუსეთიქ გიშელ მარცვლეულიშ შეთანხმებაშე, მუდგაშ გურშენ, ექსპერტეფ ფიქრენა, ნამდა ოჭკუმალიშ სინაკლებე უმოსო მიძინანს, განსაკუთრებულო დაბალ შემოსავალ რენ თიცალ ქიანეფს, მაგალთო, მუნერით რე, ჩრდილოეთ აფრიკა დო აღმოსავლეთიშ ნამთინე ქიანა“ (Atalayar.com, 23 კვირკვე, 2023).

დეკვირით, მუს იჩიებ ბიბლია ოჭკუმალიშ სინაკლებე დო მომავალიშ გურშენ.

ბიბლიას ნაწინასწარმეტყველებ რდჷ ოჭკუმალიშ სინაკლებეშენ

• იესოქ იწინასწარმეტყველ: „ერ ერს გეგნენტერებ დო სამეფო სამეფოს, იჸუაფ ოჭკუმალიშ სინაკლებე“ (მათე 24:7).

• ბიბლიაშ წიგნ „გამოცხადებას“ მოშინაფილ რე ოთხ მხედარ. თინეფშე ართ-ართ ომიშ სიმბოლო რე, ნამდგას ეკოჸუნს მაჟია მხედარ, ნამუთ შქირენას განასახიერენს, უმოს კონკრეტულო ქოფთქუათინ თი დროს, მუჟამსით ოჭკუმალიშ სინაკლებე იჸუაფუდ დო ფასეფ ხოლო მიძინანდჷ. «უჩა ცხენ ქობძირ. მით თის გეხედ, ხეს სასწორ უკებუდ. ქიგებგონ მუდგარენ ხონარ... თე ხონარ იჩიებუდ: „ართ საწყაო ქობალიშ კაკალ ართ დინარშა დო სუმ საწყაო ქერ ართ დინარშა“» (გამოცხადება 6:5, 6).

ოჭკუმალიშ სინაკლებეშ გურშენ რაგადებულ ბიბლიურ წინასწარმეტყველებეფ „ბოლო დღალეფს“, შხვანერო ქოფთქუათინ, ჩქინ დროს ისრულებ (2 ტიმოთე 3:1). „ბოლო დღალეფიშ“ დო „გამოცხადებას“ მოშინაფილ ოთხ მხედარიშ გურშენ მეტიშ გაგებელო ქუჯინით ვიდეოს „1914 წანაშ უკულ მსოფლიოქ დითირ“ დო წეკითხით ართ-ართ სტატია ჩქინ ვებგვერის („რას განასახიერებს ოთხი მხედარი?”).

მუჭო მოხვარნა ბიბლია?

• თე წიგნის მოჩამილ რე პრაქტიკულ რჩევეფ, ნამუთ მიმეხვარებნა რთულ სიტუაციეფიშ გარზებას, მუდგაშა პროდუქტეფშა ფასეფიშ მოძინა დო ოჭკუმალიშ სინაკლებე ხოლო მიშურს. ქოძირით ართ-ართ სტატია ჩქინ ვებგვერდის (“როგორ ვიმყოფინოთ შემოსავალი?”).

• ბიბლია უჯგუშ მომავალიშ იმენდის მარზენა. თინა მოპირნა დროს, მუჟამსით „ხვეიანო იჸუაფ მარცვლეულ დედამიწას“ დო არძას აღვენუ დასაბაღ პროდუქტეფ (ფსალმუნი 72:16). თიშ გაგებელო, მუშენ შემლებნა ბჯერდან თე დუნაპირებუშ, წეკითხით ართ-ართ სტატია ჩქინ ვებგვერდის (“უკეთესი მომავლის რეალური იმედი”).