ქორენო სიმართლე მნიშვნელოვან?

ქუდაკვირებეთო, ნამდა მუთ დრო მეურს მართალ დო ტყურაშ გიშაგორუა ართიანშე უმოსო დო უმოსო ჭირს? ამდღა ადამიანეფიშ რწმენა სიმართლე დო ფაქტეფშა ვარინ ემოციეფშა დო თიშა რე გერსხილ, მუდგაშ წანა. ამდღა მთელ მსოფლიოს, ბრელს ჯერსჷ, ნამდა ვა არსებენს სიმართლე.

თეცალ დამოკიდებულება ვა რე უცხო. სოდგარენ 2 000 წანაშ წოხოლე, რომიშ გუბერნატორქ, პონტიუს პილატექ, გეძიცებულო კითხჷ იესოს: „მუ რე სიმართლე?“ (იოანე 18:38). მართალ რე, პილატექ ვა უჯინ პასუხის, მარა თე კითხვა მნიშვნელოვან რდჷ. ამდღა მსოფლიოს ხალხის ვა უჩქჷ, მუ რე სიმართლე დო მუ რე ტყურა, მარა ბიბლია ირზენს თე კითხვაშ პასუხის, მუდგაშ რჩქინა ზუსტას თეშ გაგებას მიმეხვარებუნა.

ქოარსებენსო ჭეშმარიტება?

ქო. ბიბლია სიტყვა „ჭეშმარიტებას“ ირინუანს ფაქტეფიშ დო თიშ ოძირაფალო, მუთ მორალურო სწორ რე. თინა ოგურუანს, ნამდა იეჰოვაa რე სიმართლეშ აბსოლიტურ წყარო დო თის მიშინუანს, მუჭოთ: „ჭეშმარიტებაშ ღორონთ‘‘ (ფსალმუნი 31:5). ბიბლიას მოჩამილ რე სიმართლე, ნამუთ ღორონთშე მოურს. თინა შედარებულ რე სინთეშა, ნამდგას შეულებ გომსინთუან თე ქვეყნიერებას დო ქომხელმძღვანელან (ფსალმუნი 43:3; იოანე 17:17).

მუჭო შეილებ ჭეშმარიტებაშ გორუა?

ღორონთის ვაკო, ნამდა უაზროთ დებჯერათ ჭეშმარიტება, ნამუთ ბიბლიას რე ინოჭარილ. თეშ მანგიორო თინა ელამჩანა, ნამდა ჭეშმარიტება გააზრებულ მაფუდან დო ჩქინ რჩქინა ემოციეფშა ვა რდასჷ გერსხილ (რომაელეფ 12:1). იეჰოვას ოკო, ნამდა გეფჩინებაფუათ დო „მთელ გონებათ“ ქიპჸოროფუათ თინა. თეს გეძინელ, თის ხოლო ელამჩანა, დებრწმუნათ, ნამდა მუდგას ბიბლიაშე ბგებულენთ ჭეშმარიტება რე (მათე 22:37, 38; საქმეეფ 17:11).

სოვრეშე მოურს ტყურეფ?

ბიბლია მირაგადუნა, ნამდა ტყურეფ ღორონთიშ ნტერშე, სატანა ეშმაკშე, მოურს, მით ღორონთიშ სიტყვას მოშინაფილ რე, მუჭოთ „ტყურაშ მუმა“ (იოანე 8:44). თიქ ღორონთიშ გურშენ ტყურა პირველ ადამიანეფს უწუ (დაბადება 3:1–6, 13, 17–19; 5:5). თევრეშე მოჸუნაფილ სატანა აგრძელენს ტყურეფიშ გავრცელებას დო ოცად, ღორონთიშ გურშენ ჭეშმარიტებაშ ფულუას (გამოცხადება 12:9).

მუშენ რე ამდღა ტყურა თაშ მოდვალირ?

ჩქინ დროს, ნამდგას ბიბლია „ბოლო დღალეფს“ უძახ, სატანას მთელ მსოფლიოს ხოლო უმოს ადამიან მიშაჸუნს შეცდომაშა დო ოჯერუანს ტყურეფს. ათეშენ ამდღა ხალხშო ჩვეულებრივ ამბე რე ართიანიშ ღორება დო გიმორნაფა (2 ტიმოთე 3:1, 13). რელიგიეფიშ უმენტაშ ხოლო ტყურეფს ოგურუანს. ბიბლია ჩქინ დროს მახორუ ხალხიშ გურშენ თეცალ მუდგარენს წინასწარმეტყველენს: „ქიგიშაყარანა თიცალ მასწავლებერეფს, მით თის ქუწინა, მუდგაშ მორჩქილაფა მუნეფს ოკონა“ დო „სიმართლეს ჸუჯშა ველეშქვანდან იჸი“ (2 ტიმოთე 4:3, 4).

მუშენ რე სიმართლე მნიშვნელოვან?

სიმართლეშ უმშო ადამიანეფს ართიანიშ ნდობა ვაღვენუნა. ნდობაშ უმშო ვართ მეგობრობა იჸუაფ დო ვართ ხალხის აღვენუ ართობა. ბიბლია მირაგადუნა, ნამდა ღორონთის ოკო, ჩქინ თაყვანიშცემა სიმართლეშა რდასჷ გერსხილ. ბიბლიას პკითხულენთ: „[ღორონთიშ] თაყვანიშმცემელეფქ თის წმინდა შურიშ ხელმძღვანელობათ დო სიმართლეთ ოკო ცანჷ თაყვან“ (იოანე 4:24). თიშ გაგებელო, მუჭო შეულებ ბიბლიას ინოჭარილ ჭეშმარიტებას მიმეხვარან, გეგშეფჩინათ რელიგიურ ტყურა გურაფეფ დო დუდ დეფრსხათ თიშე, წეკითხით სტატიეფიშ სერია: „ღორონთშე გავრცელებურ ტყურა“ [ქორთ.].

მუშენ ოკო ღორონთის, გებგათ სიმართლე?

ღორონთის ოკო, მარადიულო იფცხოვრათ. თეშო საჭირო რე, გებგათ სიმართლე ღორონთიშ გურშენ (1 ტიმოთე 2:4). მუჟამსით ქიგეგენთ მუ მოწონს დო მუ ვა მოწონს ღორონთის დო თეშ თანახმას მიქციებუთ, თეშნერო შეგალებენა დეახლოვათ თის (ფსალმუნი 15:1, 2). ღორონთიქ ხალხის მუშ დუდ გაჩინებაფუკო თიშენ, იესო მაშქვჷ დედამიწაშა. იეჰოვას ოკო, ქუმურჩქილუათ იესოშ გურაფეფს (მათე 17:5; იოანე 18:37).

მუს გაკეთენს ღორონთ თიშო, ნამდა ტყურაქ მეტო ვეჸუას?

ღორონთის ჯოგჷ, მუჟამსით ორწყე ხალხ მუჭო აღორენს დო ირგებუანს ართიანს. თინა მოპირუნა, ნამდა მოსპუნს არძას, მით ვემიოტენს ტყურაშ რაგადის (ფსალმუნი 5:6). მუჟამსით ღორონთ თეს გაკეთენს, მუშ ხოლო ართ დუნაპირებუს შეასრულენს: „მართალიშ მორაგადე ნინა დღას ვემისპუ“ (იგავები 12:19).