ᲙᲣᲠᲪᲮᲐᲡ ᲠᲓᲐᲗ!
მუშენ რე პოლიტიკა ხალხიშ გორთუალაშ მიზეზ? — მუს იჩიებ ბიბლია?
ამდღა მთელ მსოფლიოს ბრელ ქიანა პოლიტიკურო გორთილ რე. 2022 წანას ართ-ართ კვლევით ცენტრიქ (Pew Research Center) 19 ქიანას ჩატარ გამოკითხვა, მუდგაქ ოძირუ, ნამდა „თი ხალხიშ 65%-ის, მიდგაქ გამოკითხვას მიღჷ მონაწილება, მიორჩქ, ნამდა მუნეფიშ ქიანას ხალხიშ გორთუალაშ დო დაპირისპირებაშ მიზეზ თინა რე, ნამდა თინეფ ხუჯის უკინენა შხვადოშხვა პოლიტიკურ პარტიას“.
ქიმეიქციებნანო ყურადღება, ნამდა თქვან ქიანას ხალხ პოლიტიკაშ გურშენ უმოსო დო უმოსო რე გორთილ? მუ რე თეშ მიზეზ? არსებენსო გამოსავალ? ქობძირათ, მუს იჩიებ ბიბლია.
მუ რე თიშ მიზეზ, ნამდა ხალხ პოლიტიკურო გორთილ რე
ბიბლია ნაწინასწარმეტყველებ რდჷ, ნამდა ჩქინ დროს, ნამდგას „ბოლო დღალეფ“ ჯოხო, ხალხის განსხვავებულ დამოკიდებულებეფ აღვენუდ, მუდგაშ გურშენ ვეშიალებედეს, უღდესკო ართობა.
„ბოლო დღალეფს ძნელ გარზებელ დრო დოდირთუ. ადამიანეფ იჸუაფნა დუდიშ მოჸოროფეეფ, ჯიუტეფ“ (2 ტიმოთე 3:1—3).
მართალ რე, ხალხ მანგარო ოცად, ნამდა მთავრობეფქ ჯგირობუა მუღას თინეფს, მარა თინეფიშ მონდომას შედეგ ვა მოუღ. განსხვავებულ დამოკიდებულებეფიშ გურშენ ადამიანეფს ვეშულებნა გაერთიანებულო ეცადან პრობლემეფიშ მოგვარებას. თენა ოძირანს, ნამდა ბიბლიას ქიანაშ ხანიშ წოხოლე ინოჭარილ სიტყვეფ ამდღა ისრულებ.
„კოჩ კოჩის ირო ორუდ თიშ საზარალოთ“ (ეკლესიასტე 8:9).
მარა ბიბლია მოგებაფუანა, მუ რე თე ირფელშე გამოსავალ. თინა მირაგადნა, ნამდა არსებენს მთავრობა, ნამდგას შეულებ ბოლო მუღას კაცობრიობაშ პრობლემეფს.
მართველ, ნამუთ ზრუნენს ხალხშე
ბიბლია მოგებაფუანა, მი რე თი მართველ, მიდგას შეულებ ბოლო მუღას არძა პრობლემას. თენა იესო ქრისტე რე. თის ქოთ ძალა, ქოთ უფლება დო ქოთ სურვილ უღჷ, ხალხის ნამდვილ ართობა დო მშვიდობა მუღას.
„თიშ დროს გეხარენს მართალ დო იმეფენს მშვიდობა“ (ფსალმუნი 72:7).
„თის დემორჩილებ არძა ხალხ“ (ფსალმუნი 72:11).
იესო არძაშ უჯგუშ მართველ რე, მუშენდა ზრუნენს ადამიანეფშე დო ოკო, ნამდა მეხვარას თინეფს, განსაკუთრებულო თიცალ კათას, მიდგას უსამართლოთ ოქცუნა.
„თინა დერსხენს ღარიბის, ნამუთ მოხვარას ითხინს, გაჭირებულს დო თის, მიდგას მოხვარე მითინ ვა ჸუნს. თინა ქეშიცოდილუანს გაჭირებულს დო ღარიბის, გინატენს ღარიბეფს. დაჩაგრება დო ძალადობაშე ირსხენს თინეფს“ (ფსალმუნი 72:12—14).
მიღით უმოს ინფორმაცია ღორონთიშ სამეფოშ გურშენ, ნამდგაშ მართველ იესო ქრისტე რე. ქიგეგით, მუ ჯგირობუას მოიღანა თიშ მართველობა დო მუჭო შეილებნა ხუჯ დუკინათ თის.
ქუჯინით ვიდეოს: „მუ რე ღორონთიშ სამეფო?“.
ქოძირით სტატია: „ღორონთიშ სამეფო — ხელისუფლება კორუფციაშ უმშო“ [ქორთ.].