მუს იჩიებ ბიბლია ოჭკუმალიშ სინაკლებეშენ, ნამდგას ამდღა ვორწყეთ?

„ვეჸუაფ შქირენა“. თე სიტყვეფშე იძირე, ნამდა მსოფლიო ლიდერეფს, კაცობრიობაშ თე დიდ პრობლემაშ მოსპუალაშ იმენდ უღნა დო ოკონა ირკოჩის დასაბაღ ოჭკუმალ ქიმეჩან.a ქიჸინო თიცალ დრო, მუჟამსით შქირენა ვეჸუაფ? მუს იჩიებ ბიბლია?

ბიბლიაქ იწინასწარმეტყველ ამდღანერ ოჭკუმალიშ სინაკლებე

ბიბლიაქ იწინასწარმეტყველ, ნამდა ჩქინ დროს, შხვანერო ქოფთქუათინ, „ბოლო დღალეფს“, ოჭკუმალიშ სინაკლებე იჸუაფუდ (2 ტიმოთე 3:1). ღორონთ მუთუნ შქას ვა რე ოჭკუმალიშ სინაკლებეწკუმა დო ვართ თიშ მიზეზით ხვადუ თენა, მარა თიქ გუმაფრთხილეს თე ირფელიშ გურშენ (იაკობ 1:13). გუვარჩუათ ჟირ ბიბლიურ წინასწარმეტყველება.

„იჸუაფ ოჭკუმალიშ სინაკლებე... მინ ართ დო მინ მაჟია ადგილს“ (მათე 24:7). თე ბიბლიურ წინასწარმეტყველება იჩიებ, ნამდა შქირენა ბრელ ადგილს იჸუაფუდ. სურსათიშ მომარაგებაშ მონიტორინგიშ ბოლო ანგარიშის ნარაგად რე: „მსოფლიოს ოჭკუმალიშ სინაკლებე კინ პრობლემათ სქიდუ. თეს გეძინელ, ხალხის ვართ ჯანსაღ დო დასაბაღ ოჭკუმალ უღჷ“.b ოშობით მილიონ პიროვნებას, ვითობით ქიანას ვა უღჷ დასაბაღ ოჭკუმალ. სანარღოთ, თეშ შედეგო, ბრელ ღურუ.

„მიკიბჯინ დო უჩა ცხენ ქობძირ. მით თის გეხედ, ხეს სასწორ უკებუდ“ (გამოცხადება 6:5). თე წინასწარმეტყველებას სიმბოლურ ცხენ დო თიშ მხედარ, თე ბოლო დღალეფს რენ თი შქირენას განასახიერენს.c მხედარს ხეს უკინებ სასწორ, ნამდა გეწონას დასაბაღ ვა რენ ფერ ოჭკუმალ, მუშენდა არძას ჭიჭექ ვარა ქეშეხვადას. მუჟამსით თე მხედარ მოურს, ხუმა აცხადენს, ნამდა ოჭკუმალიშ ფას მანგარო მიძინანს დო აფრთხილენს ხალხის, მოზოგილო გეგმირინუან თინა (გამოცხადება 6:6). თენა ზუსტას ეჭარუნს ამდღანერ სიტუაციას. ოჭკუმალიშ სინაკლებეშ გურშენ, ამდღა მილიარდობით ხალხის ვა უღჷ საშვალება ქიშუან, ვარდა ქიჸიდან ჯანსაღ ოჭკუმალ.

მუჭო მეღებუ ბოლო ოჭკუმალიშ სინაკლებეს?

ექსპერტეფ იჩიებნა, ნამდა ჩქინ პლანეტას არსებობაშო აუცილებერ, დასაბაღშე მეტ პროდუქტ რე. აბა მუშენ რე ოჭკუმალიშ სინაკლებე? მუს იჩიებ ბიბლია, მუჭო მაგვარენს ჩქინ გუმაჭყაფალ იეჰოვაd თე პრობლემას?

პრობლემა: მართველეფს ვეშულებნა ბოლო მუღან სიღარიბეს დო ეკონომიურ უთანასწორობას, ნამდგას მოჸუნს შქირენა.

გამოსავალ: არასრულყოფილ ადამიანურ მთავრობეფს დოთირანს სრულყოფილ მთავრობა — ღორონთიშ სამეფო (დანიელი 2:44; მათე 6:10). ამდღა ბრელ ღარიბ პიროვნებას ვა უღჷ დასაბაღ ოჭკუმალ, მარა ღორონთიშ სამეფოშ მართველობაშ დროს თენა დითირუ. ბიბლია ღორონთიშ სამეფოშ მეფეშე, იესო ქრისტეშე, იჩიებ: „თინა დერსხენს ღარიბის, ნამუთ მოხვარას ითხინს, გაჭირებულს დო თის, მიდგას მოხვარე მითინ ვა ჸუნს... ხვეიანო იჸუაფ მარცვლეულ დედამიწას, გვალაშ წვანდეფს ხოლო ხვეიანო იჸუაფ“ ( ფსალმუნი 72:12, 16).

პრობლემა: ომეფ ანადგურენს ირფელს, მუდგას ეკონომიკურ არასტაბილურობა მოჸუნს. შედეგო, ხალხის ვა უღჷ დასაბაღ ოჭკუმალ.

გამოსავალ: „[იეჰოვა] მოსპუნს ომეფს მთელ დედამიწას, მშვილდის ჩინჩოლუნს დო ჭვირთის ტახუნს, დაჩხირს თქუთქუნს ეტლეფს“ (ფსალმუნი 46:9). ღორონთ განადგურენს საომარ იარაღეფს დო თინეფს, მით ომეფს უნწყუნს ხეს. შედეგო, არძა უსაფრთხოთ იცხოვრენს. ბიბლია მოპირნა: „თიშ დროს გეხარენს მართალ დო იმეფენს მშვიდობა“ (ფსალმუნი 72:7).

პრობლემა: ამინდეფიშ გაუფრაშებაქ დო სტიქიურ უბედრობეფქ განადგურ შემოსავალ დო გოჭყვიდ საქონელ.

გამოსავალ: ღორონთ გაკონტროლენს ბუნებაშ ძალეფს დო ირნერო შეუნწყუნს ხეს თის, ნამდა შემალებუან ჯგირ მოსავალიშ მოჸუნაფაქ. ბიბლია იჩიებ: „[იეჰოვა] არჩქალენს ქარბორიას დო იწყნარებნა ზღვაშ ტალღეფ... უდაბნოს, ლერწამ ჩანსინ ფერ ტობათ გინაშქვანს დო უწყარე დიხას – მალწყარეფო... თექ დახორუანს შქირენულეფს,.. თასუნა ქობალიშ კაკალს დო ენარღვანა ბინეხის; ღებულენა ხვეიან მოსავალს“ (ფსალმუნი 107:29, 35—37).

პრობლემა: ჰარამ დო კორუმპირებულ პიროვნებეფ ამზადენა ოჭკუმალო ვერგუნ ფერ პროდუქტეფს, ვარდა ვარზენა თინეფს, მიდგას ოსაჭირ.

გამოსავალ: ღორონთიშ სამეფო მოსპუნს უპატიოსნო დო კორუმპირებულ ხალხის. ბიბლია ეჭარუნს იეჰოვა ღორონთის, მუჭოთ პიროვნებას, „მით სამართალს ურჩქინანს დაჩაგრულს დო ოჭკუმალს არზენს შქირენულს“ (ფსალმუნი 146:7).

პრობლემა: ირ წანას მსოფლიოს ოჭკუმალიშ მარაგიშ ნასმორს ვარა გინარღვანა, ვარა დინუ.

გამოსავალ: ღორონთიშ სამეფოშ მართველობაშ დროს ოჭკუმალ სწორას იჸი განაწილებურ. დედამიწას ცხოვრებაშ დროს იესო უგამაგათ ვარღვანდჷ ოჭკუმალს. მაგალთო, ართშა თიქ სასწაულებრივო დადიარუ 5 000 კოჩშე მეტ. უკულ მუშ მოწაფეეფს დავალ: „დოშაყარეთ დოსკილადირ ნოტეხეფ, ნამდა მუთუნქ ვეგნირღვას“ (იოანე 6:5—13).

ღორონთიშ სამეფო მოსპუნს შქირენაშ მიზეზეფს. შედეგო, არძას ხვეიანო აღვენუ ჯგირ დო ჯანსაღ ოჭკუმალ (ესაია 25:6). თიშ გაგებელო, მუჟამ შეასრულენს ღორონთიშ სამეფო თე ირფელს, ქოძირით ართ-ართ სტატია ჩქინ ვებგვერდის („როდის დაიწყებს ღვთის სამეფო დედამიწაზე მმართველობას?“).