რელიგია დო ომი უკრაინას — მუს იჩიებ ბიბლია?

ქობძირათ, მუ დამოკიდებულება უღჷ ნამთინე რელიგიურ ლიდერს რუსეთ-უკრაინაშ ომიშ გურშენ:

• „რუსულ მართლმადიდებლურ ეკლესიაშ წინამძღოლს, პატრიარქ კირილეს, მუთუნ ვა უთქუალ რუსეთიშ აგრესიაშ წინააღმდეგ . . . თიშ ეკლესია ტყურას ავრცელენს უკრაინაშ გურშენ, მუდგათ პუტინ ამართლენს თე ომს“ (EUobserver, 7 მარტი, 2022).

• „პატრიარქ კირილექ თე ომიშ გურშენ თქუ, ნამდა თინა რე ცოდვაშ წინააღმდეგ ბრძოლაშ ნაწილ. თეშნერო არგამათ ქაძირუ, ნამდა ამართლენს რუსეთიშ უკრაინაშა მიშაჭკირუას“ (AP News, 8 მარტი, 2022).

• «კიევიშ დო მთელ უკრაინაშ მართლმადიდებლურ ეკლესიაშ მიტროპოლიტ ეპიფანე I-ქ თუთაშხას კურთხევა ქიმეჩ მუშ ხალხის, ნამდა „ქებრძოლან რუს ჯარიშკოჩეფს“ ··· დო გეუძინ, ნამდა თინეფიშ ჸვილუა ცოდვა ვა რე» (Jerusalem Post, 16 მარტი, 2022).

• „ჩქი [უკრაინაშ ეკლესიეფიშ დო რელიგიურ ორგანიზაციეფიშ საბჭო (UCCRO)] ხუჯის უკინენთ უკრაინაშ სამხედრო ძალეფს დო არძას, მით ჩქინ ქიანაშო ბრძოლენს. ბლოცულენთ თინეფშო დო კურთხევას ვარზენთ, ნამდა დეცვან უკრაინა აგრესორშე“ (UCCROa Statement, 24 ფრევალი, 2022).

მუჭო ფიქრენთ, რელიგიეფ, ნამუთ აცხადენა, ნამდა მეჸუნა იესო ქრისტეს, ოკო ახნარენდანიო მუნეფიშ მიმაჸუნალეფს, მონაწილება მიღან ომს? მუს იჩიებ ბიბლია?

ომეფს რელიგიაშ მონაწილებაშ ისტორია

მუჭოთ ისტორიაშე იძირე, რელიგიეფ ხშირას ომშა ულას ცოდვათ ვა თვალუნდეს, ამართლენდეს ვარდა ელუჩანდეს ხალხის, იბრძოლესკო მშვიდობაშო. ვითობით წანეფ რე, მუთ იეჰოვაშ მოწმეეფ თეცალ რელიგიურ ფარისევლობას აარგამენა. ქობძირათ ჩქინ პუბლიკაციეფს მოშინაფილ მუსხირენ მაგალით:

• ქოძირით სტატია „ჯვაროსნულ ლაშქრობეფ — ნამდვილ ილუზია“ [ინგლ.], სოვრეშეთ ქიგეგენთ, ნამდა ღორონთიშ დო ქრისტეშ სახელით ხალხიშ ჭყვადუა კათოლიკურ ეკლესიაშ კისერს რე.

• ქოძირით სტატია „კათოლიკურ ეკლესია აფრიკას“ [ინგლ.], ნამუთ ეჭარუნს, ნამდა რელიგიაქ მუთუნ ვაკეთ ტომეფ შქას ომქ დო თეწკუმა ართო გენოციდიქ მეჭყორდკონ.

• ქოძირით სტატიეფ „რელიგიაშ ბრალ რენო ომეფ?“ [ქორთ.], „მუ როლს ლაჸაფენს რელიგია ომეფს?“ [ინგლ.] დო „რელიგიეფ, ნამუთ შხვადოშხვა მხარეს გერენა“ [ინგლ.], სოდეთ ენწყუმილ რე, მუჭო უკინენდეს ხუჯის კათოლიკურ, მართლმადიდებლურ დო პროტესტანტულ ეკლესიეფ ომეფიშ დროს ჟირხოლო მხარეს.

ოკო უკინენდანიო ხუჯის ქრისტიანულ რელიგიეფ ომს?

მუ მოგურეს იესოქ: „მოყვას სქან დუდცალო გიჸორდას“ (მათე 22:39). „გიჸორდან თქვან ნტერეფ“ (მათე 5:44—47).

მუ თქუ იესოქ: „ჩქიმ სამეფო თე ქვეყნიერებაშ ნაწილ ვა რე. თე ქვეყნიერებაშ ნაწილ ქოჸოფედკონ, ჩქიმ მსახურეფ იბრძოლენდეს, ნამდა იუდეველეფიშ ხეს ვაშაბლაფედკო“ (იოანე 18:36). „ყამაშ ემაჭოფალ ყამათ დოღურუ!“ (მათე 26:47—52).

დეფიქრით: ქრისტიანქ ქრისტეშ დაცვებელო ხოლო ოკო ვებრძოლკო-და, გიშურს, ნამდა მუთუნნერ მიზეზ ვა ნოღვე ბრძოლაშო. ქოძირით სტატია „შილებენო ქრისტიანქ მონაწილება მიღას ომს?“ [ქორთ.], ნამდა ქიგეგათ, მუჭო მეჸუნდეს ართგურო პირველ საუკუნეშ ქრისტიანეფ იესოშ მაგალითის დო გურაფეფს.

მუ ელჷ თი რელიგიეფს, ნამუთ ომს უკინენა ხუჯის?

მუჭოთ ბიბლია მოგურუანა, ღორონთ ვა ღებულენს თი რელიგიეფს, ნამუთ აცხადენა, ნამდა იესოშ მიმაჸუნალეფ რენა, მარა ვამორჩილნა თიშ გურაფეფს (მათე 7:21—23; ტიტე 1:16).

• გამოცხადებაშ წიგნშე იძირე, ნამდა ღორონთ რელიგიეფს გედვანს ბრალს „დედამიწას . . . არძა ჸვილირიშ ზისხირიშ“ გურშენ (გამოცხადება 18:21, 24). მიზეზიშ გაგებელო წეკითხით სტატია «მუ რე „დიდ ბაბილონ“?» [ქორთ].

• იესოქ თქუ, ნამდა, მუჭოთ გლახა ჯას, ნამდგას გლახა ნაყოფ მიკუღ, „კვათნა დო დაჩხირს მითაჸათანა“, თეშ არძა რელიგია, ნამდგას ღორონთ ვა ღებულენს, მუშ უბადო საქმეეფიშ გურშენ გენადგურებ (მათე 7:15—20). წეკითხით სტატია „ტყურა რელიგიაშ აღსასრულ ხოლოს რე!“ [ქორთ.], ნამდა ქიგეგათ, მუჭო მოხვადუ თენა.

ფოტო კვარჩხანშე: Photo by Sefa Karacan/Anadolu Agency/Getty Images; მარძგვანშე: Maxym Marusenko/NurPhoto via Getty Images