ჩქინ მღვდელმთავარ იესოს არჩქილე ჩქინ

1, 2. ა) მუშენ მაშქვჷ იეჰოვაქ იესო დედამიწაშა? ბ) მუს გუვარჩიენთ თე სტატიას? (ებრ. 5:7–9).

ᲡᲝᲓᲒᲐᲠᲔᲜ 2 000 წანაშ წოხოლე იეჰოვაქ მუშ საჸოროფო სქუა მაშქვჷ დედამიწაშა. მუშენ აკეთ თენა? ართ-ართ მიზეზ თინა რე, ნამდა საშვალება ქიმეჩუკო ადამიანეფს, დუდ დერსხესკო ცოდა დო ღურაშე დო გეთავისფალესკო თი არძა უბედრობაშე, მუთ სატანაქ მოუღ თინეფს (იოან. 3:16; 1 იოან. 3:8). თეწკუმა ართო, იეჰოვას უჩქუდ, ნამდა დედამიწას ადამიანცალო ცხოვრება იესოს მამზადენდ თიშო, ნამდა რდუკო თიცალ მღვდელმთავარ, ნამუთ გემშეშ შხვეფიშ მდგომარეობაშა. თიქ მღვდელმთავარო მსახურება ახ. წ. 29 წანას, ნათუაშ უკულ დიჭყჷ.a

² თე სტატიას გუვარჩიენთ, მუჭო მეხვარ იესოს დედამიწას ცხოვრებაქ, ჸოფედუკო თიცალ მღვდელმთავარ, მით გემშეშ შხვეფიშ მდგომარეობაშა. თიშ უკულ, მუთ უმოსის ქიგებგენთ, მუჭო „გესრულყოფილ“ იესოქ მუშ თე დანიშნულებაშო, უმოს ადვილ მაჸინა, ლოცვათ ქუდურაგადუათ ღორონთის თიმწკუმა ხოლო, მუჟამსით ჩქინ სისუსტეეფიშ ვარდა შეცდომეფიშ გურშენ გურგოტახილ ვორეთ (წეკითხით ებრაელეფიშ 5:7–9).

ᲦᲝᲠᲝᲜᲗᲘᲨ ᲡᲐᲸᲝᲠᲝᲤᲝ ᲡᲥᲣᲐ ᲓᲔᲓᲐᲛᲘᲬᲐᲨᲐ ᲛᲝᲣᲠᲡ

3, 4. მუ დიდ ცვლილებეფქ მოხვად იესოშ ცხოვრებას დედამიწაშა მოულაშ უკულ?

³ ბრელს ნობღვენა თიცალ შემთხვევა, მუჟამსით სიტუაციაქ დუმათირეს. მაგალთო, შილებე შხვადო გაჸუეს გინაულარქ ოცხოვრებშა დო ოჯახიშ წევრეფქ დო მეგობრეფქ დატებელქ გაჸუეს. თეცალ ცვლილებეფ ვა რე ადვილ. მარა მითინს ვა პჸოფუნა თიშმადიდა ცვლილებაშა მიორჩქვანალ, მუნერშათ იესოს აჸუ. თინა ზეცას პირველ დო არძაშ უმოს მნიშვნელოვან სულიერ ქმნილება რდჷ. იესო ირიათო გინაფლენდჷ, მუჭო უჸორდჷ მუამუშის დო მანგარო ოხიოლუდ თიშ „მარძგვან ხეწკუმა“ რინა (ფსალმ. 16:11; იგავ. 8:30). მარა, მუჭოთ ფილიპელეფიშ 2:7 იჩიებ, თიქ მუშ ნებათ ირფელშე ვარია ქოთქუ თიშო, ნამდა არასრულყოფილ ადამიანეფწკუმა ართო იცხოვრუკო დედამიწას.

⁴ დეფიფქრათ იესოშ დედამიწას ცხოვრებაშ პირველ წანეფშე ხოლო. იესოშ დაბადებაშ დროს თიშ ოჯახიქ ჟირ ჭიჭე ფრინველ შეწირ ღორონთის, მუთ ოძირანდჷ, ნამდა თიქ ღარიბ ოჯახის დებად (ლევ. 12:8; ლუკ. 2:24). მუჟამსით მეფე ჰეროდექ ქიგეგ მესიაშ დაბადებაშ ამბე, თიშ ჸვილუა მინდომ. ჰეროდეშე დუდიშ დარსხებელო იესოშ ოჯახიქ ეგვიპტეშა ინტჷ (მათ. 2:13, 15). წერმიდგინით, ზეცას ცხოვრებაშ გინაწონს, მუ განსხვავებულ მდგომარეობა უღუდ იესოს დედამიწას.

5. მუს ორწყედ იესო დედამიწას დო მუჭო მამზად თექ მღვდელმთავრობაშო? (ქოძირით სურათ).

⁵ მუჟამსით იესო დედამიწას რდჷ, თინა ორწყედ, მუჭო იტანჯებუდეს ადამიანეფ. მუშო ოკო რაგად, თინა მუშ დუდშა გეგმოცადუნდ, მუშმანწარა რე საჸოროფო ადამიანეფიშ ღურა. მუჭოთ იძირე, თის მუშ მარდუალ მუმა, იოსებ ხოლო, ღურელ აფუდ. მსახურებაშ დროს თინა შეხვადუდ კეთროვანეფს, თოლს ვარწყედესინ ფერეფს, დახუნკებულეფს დო სქუაღურელ მშობელეფს დო მანგარო ოცოდუდ თინეფ (მათ. 9:2, 6; 15:30; 20:34; მარ. 1:40, 41; ლუკ. 7:13). მართალ რე, იესო ზეცაშე ხოლო ორწყედ ხალხიშ ტანჯებას, მარა დედამიწას ცხოვრებაშ დროს გვალო შხვანერო ქოძირ, მუ ჭუას გინაფლენდჷ ხალხ (ეს. 53:4). შხვადოშხვა სიტუაციაქ ქიმეხვარ იესოს, უჯგუშო ქენანჭუკო, მუს გინაფლენდეს ადამიანეფ დო მუს ურზუდეს. თიქ მუშ დუდშა გეგმოცად თი გრძნობეფ დო ემოციეფ, მუთ ადამიანეფს უღუდეს. მაგალთო, მუ ხოლო გინოშურდუდ დო მინშა მუს ხოლო აფუდ გურ შეჭირებულ.

ᲘᲔᲡᲝᲡ ᲒᲣᲠᲨᲐ ᲛᲔᲣᲦ ᲨᲮᲕᲔᲤᲘᲨ ᲒᲐᲭᲘᲠᲔᲑᲐ

6. მუს მოგურუანა წინასწარმეტყველ ესაიაშ მოჸუნაფილ შედარებეფ იესოშ გურშენ? (ეს. 42:3).

⁶ დედამიწას მსახურებაშ დროს იესო მიშეშ თი ხალხიშ მდგომარეობაშა, მიდგას შხვეფ აჩაგრენდეს. თეშნერო, თიქ შეასრულ ესაიაშ წინასწარმეტყველება. ებრაულ წერილეფს ფარამ დო ძალიერ ხალხ მინშა შედარებულ რე ჯგირო წყარილ ბაღწკუმა ვარდა დიდ დო ჸონიერ ჯალეფწკუმა (ფსალმ. 92:12; ეს. 61:3; იერ. 31:12). მარა ღარიბ დო დაჩაგრულ ხალხ შედარებულ რე გინოტახილ ღერიას დო ჭვიტანსინ ფერ ფიტილს. თენეფ თიცალ მუდგარენეფ რე, მუთ ნაკლებო გიმადირთუ კოჩის (წეკითხით ესაიაშ 42:3). თე შედარებეფ ღორონთიქ მაჸუნებაფუ ესაიას, მუდგათ იწინასწარმეტყველ, მუნერ ჸოროფა აღვენუდ იესოს დო მუჭო გემშეშ თინეფიშ მდგომარეობაშა, მიდგას შხვეფიშ თოლს ფას ვა უღუდ.

7, 8. მუჭო შეასრულ იესოქ ესაიაშ წინასწარმეტყველება?

⁷ მათე მუშ სახარებას იჩიებ, ნამდა იესოქ შეასრულ წინასწარმეტყველ ესაიაშ სიტყვეფ: „გინოდირაკილ ღერიას ვეგნოტახუნს დო ჭვიტანსინ ფერ ფიტილს ვა შქირიტუნს“ (მათ. 12:20). იესოქ ბრელ სასწაულ აკეთ დაჩაგრულ დო მუთუნიშ იმენდ ვა უღუდუნ ფერ ხალხშო, მით ალბათ „გინოტახილ ღერიაცალო“ დო „ჭვიტანსინ ფერ ფიტილცალო“ გინაფლენდეს დუდის. მაგალთო, თინეფ შქას რდჷ ართ კოჩ, ნამდგას მთელ სხეულ კეთრით აფუდ ფორილ. თე კოჩის ალბათ მუთუნნერ იმენდ ვაღვენუდ, ნამდა აკა დღას დოსქიდუდ ლახალაშე დო გემოშა დარინედ მუშ ოჯახ დო მეგობრეფ შქას (ლუკ. 5:12, 13). იესოქ ჸუჯის ვერჩქილედ დო ნინას გესქიდუდუნ ფერ კოჩის ხოლო შეხვად. წერმიდგინით, მუს გინაფლენდუკონ იჸიდ თე კოჩ, მუჟამსით ორწყედ, მუჭო ეჩიებუდეს შხვეფ ართიანს, მარა მუს ართ სიტყვა ხოლო ვარჩქილედ (მარ. 7:32, 33).

⁸ იესოშ დროს ბრელ იუდეველს ჯერდჷ, ნამდა მითინს მუთუნ ლახალა ქაჭირუდ-და, თინა მუშ ვარდა მუშ მშობლეფიშ ცოდეფიშ გურშენ ისაჯებუდ (იოან. 9:2). თეცალ არასწორ აზროვნებაშ გურშენ, დალახებურ კათას შხვეფიშ თოლს პატი ვეგეძუდ. მარა იესო ოსქილიდუანდჷ დალახებურეფს დო ღორონთიშ იმენდის ურთინუანდჷ. თეშნერო ისრულებუდ ესაიაშ წინასწარმეტყველება. მუშ იმენდის მარზენა თენა ჩქი?

9. მუჭო იძირე ებრაელეფიშ 4:15, 16-შე, ნამდა ჩქინ მღვდელმთავარს ბოლოშა არჩქილე არასრულყოფილ ადამიანეფიშ?

⁹ წეკითხით ებრაელეფიშ 4:15, 16. შემლებუნა ბჯერდან, ნამდა იესოს არძა სიტუაციას არჩქილედას იჸი, მუს ბგინაფლენთ. ბერძნულ სიტყვა, ნამუთ თე მუხლის თარგმნილ რე, მუჭოთ „მდგომარეობაშა მიშულა“, ნიშნენს, გურიშ ხოლოშა მეიღუდას ვარდა გინაფლენდე შხვაშ ჭუას დო ოწუხებელს (ქოძირით ებრაელეფიშ 10:34, სოდეთ პავლე იგივე ბერძნულ ზმნას ირინუანს). მუჟამსით ბიბლიაშე პკითხულენთ, მუჭო ოხვარუდ იესო ადამიანეფს, ვორწყეთ, მუშმანწარა აფუდ თის შხვეფიშ გაჭირებაშ ძირაფა. იესო თეს უბრალოთ თიშენ ვართუდ, ნამდა ოკეთებელ აფუდუნ ფიქრენდჷ. თის მთელ გურით აწუხენდჷ ხალხიშ მდგომარეობა დო ოკოდ თინეფიშ მოხვარა. მაგალთო, იესოს შურო ვა აფუდ საჭირო, კეთროვანიშ ოსქილიდაფარო თიშ ხოლოშა მეულა დო ხეშ მეთხუმა. მარა თენა თიშ სიცოდილქ ოკეთებაფუ. შილებე წანეფიშ დინახალე თის მითინ ვემკონჭაფ დო იესო რდჷ პირველ, მიდგაქ ხე მეთხჷ. ვარდა, მუჟამსით ჸუჯის ვერჩქილედუნ ფერ კოჩ ოსქილიდუ, რია-რიაშე გეგშეჸუნ დო ცალკე, ხმაურ ვა რდუნ ფერ ადგილს დურთინუ ჸუჯიშ რჩქილა. ვაგგოჭყორდან თიქ ხოლო, მუქ მოხვად, მუჟამსით დაშებულს ნარღენდუნ ფერ ოსურკოჩიქ იესოს მუშ ჩილამურეფით უბონ კუჩხ დო თუმათ უსქირუ. ფარისეველეფ გლახა თოლით უჯინედეს თე ოსურს. მარა იესოქ ქიგნადირთჷ თის (მათ. 8:3; მარ. 7:33; ლუკ. 7:44). იესო დუდის ვა ურიდანდჷ თინეფს, მიდგას სერიოზულო აფუდეს დაშებულ ვარდა მუდგაინ ლახალა უღუდეს. თეშ გინაწონს, თინა გემუანო შეხვადუდ დო ჸოროფათ ოქცუდ თეცალ ხალხის. შემლებუნა ბჯერდან, ნამდა იესო ჩქი ხოლო თაშ მომრენა.

ᲛᲔᲞᲸᲣᲜᲗ ᲩᲥᲘᲜ ᲛᲦᲕᲓᲔᲚᲛᲗᲐᲕᲐᲠᲘᲨ ᲛᲐᲒᲐᲚᲘᲗᲘᲡ

10. მუს იბრინუანთ, ნამდა თოლს ვარწყენა დო ჸუჯის ვერჩქილენან ფერ ადამიანეფს სულიერო ქიმვეხვარათ? (ქოძირით სურათეფ).

¹⁰ ჩქი, იესოშ ართგურ მიმაჸუნალეფ, ვოცადუთ, თიცალო ჸოროფა ქუვოგინაფუათ ადამიანეფს დო გურშა მიბღათ თინეფიშ გაჭირება (1 პეტ. 2:21; 3:8). მართალ რე, ჩქი ვართ რჩქილა მუმაკათაფენა მითინშა დო ვართ თოლსინთე, მარა შემლებუნა სულიერო ქიმვეხვარათ თეცალეფს. მაგალთო, ბიბლიაშა გერსხილ ჩქინ პუბლიკაციეფ 100-Შე უმოს ჟესტურ ნინაშა გიშმურს. თინეფშო, მით ჯგირო ვარწყენა თოლს ვარდა შურო ვარწყენა, 60-შე უმოს ნინაშა გიშვაშქვანთ პუბლიკაციეფს ბრაილიშ შრიფტით დო 100-შე უმოს ნინაშა ჩქინ ვიდეოეფს აუდიოაღწერა ხოლო მოჸუნს. თე ირფელ თიშო იკეთებ, ნამდა თოლს ვარწყენა დო ჸუჯის ვერჩქილენან ფერ ადამიანეფქ დეახლოვან იეჰოვას დო თიშ სქუას.

11. მუჭო ზრუნენს იეჰოვაშ ორგანიზაცია იესოცალო არძანერ წარმომავლობაშ ადამიანშე? (საქ. 2:5–7, 33; ქოძირით სურათეფ).

¹¹ იეჰოვაშ ორგანიზაცია ოცად, არძანერ წარმომავლობაშ ადამიანს ქიმეხვარას. მუჭოთ ფშუნა, გათელებაშ უკულ იესოქ წმინდა შურ ქიმეჩ მუშ მოწაფეეფს, ნამდა ჟარნეჩდომავითა დღაშ დღახუს აკოშაყარელ ხალხის, მით დედამიწაშ არძა კუნთხუშე რდესჷ, მუშ-მუშ ნინაშა ქოუქადაგესკო (წეკითხით საქმეეფიშ 2:5–7, 33). იესოშ ხელმძღვანელობათ, ჩქინ ორგანიზაცია ბიბლიაშა გერსხილ პუბლიკაციეფს 1 100-შე უმოს ნინაშა გიმშაშქვანს, თინეფ შქას თიცალ ნინეფშა, ნამდგაშათ იშენდოიშენ ბრელ ადამიან ვეჩიებ. თეცალ ჭიჭე ნინეფ შქას რე ამერიკელ ინდიელეფიშ ნინეფ, ნამდგაშათ ჩრდილოეთ დო სამხრეთ ამერიკაშ ტერიტორიას მახორუ ხალხიშ მანგარ ჭიჭე ნაწილ იჩიებ. მარა ჩქინ პუბლიკაციეფ 160-შე უმოს თეცალ ნინაშა გიშმურს, ნამდა თინეფს ხოლო ქიმიაჩან სახიოლო ამბეშ მორჩქილაფაშ საშვალებაქ. პუბლიკაციეფᲡ გიშვაშქვანთ 20-შე უმოს ბოშურ ნინაშა ხოლო. თეცალ ნინაშა მორაგადე ანთასობით ადამიან ღებულენს სახიოლო ამბეს დო იეჰოვაშ მსახურებას იჭყანს.

12. ხოლო მუჭო ოხვარ იეჰოვაშ ორგანიზაცია ადამიანეფს?

¹² თიწკუმა ართო, ნამდა ირნერო ოცად, სახიოლო ამბე ქუგაგებაფუას მუთ შილებენ მეტ ადამიანს, ჩქინ ორგანიზაცია სტიქიურ უბედრობეფით დაზარალებურეფს ხოლო მანგარო ოხვარ. ანთასობით მოხალისე მზათ რე, თეცალ დროს ქელუდირთას გაჭირებას რენან ფერ და დო ჯიმალეფს. თეწკუმა ართო, ჩქინ ორგანიზაცია თაყვანიშცემაშო აშენენს მოკრძალებურ შენობეფს, სოდეთ ხალხის შეულებ გემოშა გეკიშაყარას დო ქიდიგურუას ღორონთიშ გურშენ.

ᲩᲥᲘᲜ ᲛᲦᲕᲓᲔᲚᲛᲗᲐᲕᲐᲠᲡ ᲨᲔᲣᲚᲔᲑ ᲗᲥᲕᲐᲜ ᲛᲝᲮᲕᲐᲠᲐ

13. მუ დო მუ საშვალებეფით მოხვარუნა იესო?

¹³ ჩქინ ჯგირ ჭყიშ, იესო, ირფელს ორთჷ, ნამდა მუშ ნამთინ შხურს სულიერო მუთუნქ ვემმოკორდან (იოან. 10:14; ეფეს. 4:7). მინშა შილებე ჩქინ ცხოვრებაქ თეშ მიდართას, ნამდა „გინოტახილ ღერიას“ დო „ჭვიტანსინ ფერ ფიტილს“ ქუვაგურათ. თაშ შილებე ლახალაშ, ცხოვრებას დაშვებულ შეცდომეფიშ ვარდა ხოლო თანაქრისტიანწკუმა ურთიერთობაქ გილმელესინ თიშენ იბგინათ დუდ. შილებე მიჭირდან, ამდღარ პრობლემეფიშ იშო ქიბჯინათ დო მთელ ყურადღება მომავალიშ იმენდშა გეგნიბღათ. თაშ ქორენ-და, ქორშუდან, ნამდა იესო ორწყე, მუს ურზუთ, დო მანგარ ჯგირო არჩქილე, მუს გინაფლენთ. თის თიცალო აჭვჷ თქვან ჭუა, ნამდა ვეშულებ ვემგეხვარანინ. მაგალთო, თიქ შილებე წმინდა შურ გეგმირინუას თქვან გამანგარებელო (იოან. 16:7; ტიტ. 3:6). თეწკუმა ართო, იესოქ შილებე თქვან მახვარებელო კრებაშ უხუცესეფ ვარდა შხვა თანაქრისტიანეფ გეგმირინუას, ნამდა გურშა ქელაიკინან, ქალაიდირთან დო ქიმგეხვარან (ეფეს. 4:8).

14. მუშ კეთება შემლებუნა, მუჟამსით გურ მაფუნა გოტახილ?

¹⁴ გურგოტახილ ქორეთ დო ძალეფქ ქეშგელუეს-და, ქიგიშინით, მი რე თქვან მღვდელმთავარ დო ქიფიქრით, მუს ნიშნენს თენა თქვანო. ვაგგოჭყორდან, ნამდა იეჰოვაქ თინა დედამიწაშა ხვალე გიშაჸიდირალიშ გინაგაფალო ვარინ, თიშა ხოლო მაშქვჷ, ნამდა უჯგუშო ქინანჭუკო თი პრობლემეფს, ნამდგას არასრულყოფილ ადამიანეფ შეფხვადუთ. მუჟამსით ჩქინ ცოდეფიშ ვარდა სისუსტეეფიშ გურშენ გურგოტახილეფ ვორეთ, იესო ირო მზათ რე, „მუშ დროს“ ქიმმეხვარან (ებრ. 4:15, 16).

15. მუქ მეხვარ ართ ჯიმას კრებაშა დორთას?

¹⁵ იესო მუშ ხალხის თიცალეფიშ გორუას დო ალარნას ხოლო ავალენს დო ოხვარ, მიდგაქ გამაჩირთეს იეჰოვაშ ოჭყიშალს (მათ. 18:12, 13). ყურადღება ქიმიაქცით სტეფანოშb შემთხვევას. კრება დატებაფუესინ თევრეშე 12 წანაშ უკულ თიქ გეგნოჭყვიდ, ქიდესწრუკო შეხვალამას. სტეფანო იჩიებ: „დუდშე მანგარო მიჭირდჷ თექ მეულა, მარა მოკოდ, იეჰოვაშ მოჸოროფე ოჯახის დუვართიკო. უხუცესეფქ, მიდგაქ დომრაგადუეს, მანგარ თავისფალო მოგინაფუეს დუდ. მინშა უღირსობაშ გრძნობა მიღუდ დო აკაბცხა მემძუდ, ნამდა ირფელს ხე ავოღიკო. მარა უხუცესეფქ ქუგმოშინეს, ნამდა იეჰოვა დო იესოს ოკოდეს, ვაგვაჩერდიკო დო გუვაგრძელიკო ნაბიჯეფიშ გინოდგუმა. მუჟამსით კრებაშა დუმორთინუეს, მთელ კრებაქ ჸოროფათ მემღეს ქოთ მა დო ქოთ ჩქიმ ოჯახ. ბოლოს ჩქიმ ოსურქ ხოლო ქიდიჭყჷ ბიბლიაშ გურაფა დო ამდღა ართო ვომსახურუთ იეჰოვას“. წერმიდგინით, მუ გახარებულ იჸუაფ ჩქინ მღვდელმთავარ, მუჟამსით ორწყე, მუჭო ოხვარ ქრისტიანულ კრება თინეფს, მიდგაქ კრება დიტუეს, მარა ასე ნარღენა დო ოცადუნა დორთას.

16. მუშენ რეთჷ მარდულ, ნამდა რჸუნა მღვდელმთავარ, ნამდგას შეულებ ჩქინ მდგომარეობაშა მიშულა?

¹⁶ დედამიწას ცხოვრებაშ დროს, იესოქ ქიანაშ ადამიანს მეხვარ, ზუსტას ოსაჭირუდესინ თიმ დროს. ჩქი ხოლო შემლებუნა ბჯერდან, ნამდა თინა აუცილებერო ქიმმეხვარებუნა გაჭირებას, დო ახალ ქიანას, ნამუთ მანგარ ხოლოს რე, თინა ქიმეხვარებ მორჩილ ადამიანეფს, ბოლოშა გეთავისფალან ცოდა დო არასრულყოფილებაშ მოღალირ ირნერ უბედრობაშე. მარდულ ვაფუთ ჩქინ ღორონთის, იეჰოვას, ნამდგას თიშმანწარას უჸორთ, ნამდა ჩქინ მდგომარეობაშა მიშულა შეულებუნ ფერ მღვდელმთავარ ქიგემრინუეს!