ახალგაზრდა ჯიმალეფ, ქიდიგურეთ მარკოზ დო ტიმოთეშე

1, 2. მუქ შილებედ ეცილუკო მარკოზ დო ტიმოთეს იეჰოვაშო უმოსიშ კეთებას?

ᲐᲮᲐᲚᲒᲐᲖᲠᲓᲐ ჯიმალეფ, ქუგოკონანო, უმოს გაკეთათ იეჰოვაშ მსახურებას დო კრებას უმოსო გეგმადირთათ? ბჯერა, მთელ გურით გოკონა თენა. გურს ხიოლით მიფშანა თიშ ძირაფა, ნამდა ბრელ ახალგაზრდა ჯიმა მზათ რე შხვეფიშ მამსახურებელო (ფსალმ. 110:3). მარა ალბათ მუდგარენ სირთულეეფ ხოლო ქოიღუნა. მაგალთო, მსახურებაშე უმოსიშ კეთებაშე ხომ ვეჭოფუნთ დუდის თიშ შიშით, ნამდა ვაიჩქუნა, მუ მუჭო იჸუაფ? ვარდა მუდგაინ დავალებაშენ ხომ ვაითქუალუნა ვარია თიშ გურშენ, ნამდა თქვან დუდიშ იმენდ ვაიღუდეს? თაშ ქორენ-და, გიჩქუდან, ნამდა ხვალე თქვა ვა რეთჷ თეცალ სიტუაციას.

² თქვანცალ სირთულეეფ მარკოზ დო ტიმოთეს ხოლო უღუდეს. თინეფს ვა უჩქუდეს, მუჭო იშჷ თინეფიშ ცხოვრება, დო გამოცდილება ხოლო ვა უღუდეს. მარა თე ირფელს ვეცილუანდეს დო ირნერო ოცადუდეს, უმოს გაკეთესკო იეჰოვაშო დო და დო ჯიმალეფშო. შილებე მარკოზ დიამუშწკუმა ართო ჯგირო მონწყილ ჸუდეს გემოშა ცხოვრენდუკო, მუჟამსით პავლექ უწუ, პირველ მისიონერულ მოგზაურობაშა მიდაჸუნუკო თის დო ბარნაბას (საქ. 12:12, 13, 25). მარა მარკოზ მზათ რდჷ, ქიდიტუკო მუშ კუნთხუ, ნამდა იეჰოვაშო უმოსიშ კეთებაქ შეიალებუკო. პირველო თიქ ანტიოქიაშა მიდართჷ დო უკულ, პავლე დო ბარნაბაწკუმა ართო, უმოს შორ ადგილეფს ხოლო მსახურენდჷ (საქ. 13:1–5). მუჭოთ იძირენ, მარკოზცალო, ტიმოთე ხოლო მშობლეფწკუმა ართო ცხოვრენდჷ, ონდო პავლე იჸუნანდ, ნამდა ქადაგებაშ საქმეს ქიმეხვარუკო. ტიმოთე ახალგაზრდა დო გამოუცდელ რდჷ, ათეშენ შეულებუდ ვარია თქუკო თე დავალებაშ მეღებაშენ (ქეშუდარით ართიანს 1 კორინთელეფიშ 16:10, 11 დო 1 ტიმოთეშ 4:12). მარა თიქ მიდართჷ პავლეწკუმა ართო დო ქოთ ქიანაშ კურთხევა მიღჷ იეჰოვაშ მსახურებას (საქ. 16:3–5).

3. ა) სოვრეშე იძირე, ნამდა პავლეს მანგარო უჸორდჷ მარკოზ დო ტიმოთე? (2 ტიმ. 4:6, 9, 11; ქოძირით სურათეფ). ბ) მუ კითხვეფს გუვარჩიენთ თე სტატიას?

³ მარკოზ დო ტიმოთექ ახალგაზრდობაშე ქიდიგურუეს, მუჭო შეასრულესკო შხვადოშხვა სერიოზულ პასუხიშმგებლობეფ კრებას. პავლეს თეშ უჸორდჷ თე ახალგაზრდა ჯიმალეფ, ნამდა ღურაშ წოხოლე იჭანუ თინეფ, ნამდა ქოძირუკო (წეკითხით 2 ტიმოთეშ 4:6, 9, 11). ნამ თვისებეფქ უჸოროფუ პავლეს თე ახალგაზრდა ჯიმალეფ თეცალო? მუჭო შეულებუნა ახალგაზრდეფს მიაჸუნან მარკოზ დო ტიმოთეშ მაგალითის? მუშ გურაფა შეულებუნა ახალგაზრდა ჯიმალეფს პავლეშ მუმასქუალურ რჩევეფშე? თე სტატიას თე კითხვეფს ქუპასუხენთ.

ᲛᲐᲠᲙᲝᲖᲪᲐᲚᲝ ᲑᲠᲔᲚ ᲘᲮᲐᲜᲓᲘᲗ ᲘᲔᲰᲝᲕᲐᲨᲝ ᲓᲝ ᲗᲐᲜᲐᲥᲠᲘᲡᲢᲘᲐᲜᲔᲤᲨᲝ

4, 5. მუჭო ოძირანდჷ მარკოზ, ნამდა მზათ რდჷ შხვეფიშ მამსახურებელო?

⁴ მუჭოთ ართ წყაროს რე ენწყუმილ, მომსახურება ნიშნენს, დუდ ვაზოგე შხვეფიშ მახვარებელო, თიმწკუმა ხოლო, მუჟამსით თეშ კეთება მანგარ ძნელ რე. მარკოზ მართალო ჯგირ მაგალით რე თე კუნთხუთ. მუჟამსით პავლექ მაჟია მისიონერულ მოგზაურობაშა მარკოზიშ ჸუნაფაშენ ვარია თქუ, ალბათ თე ახალგაზრდა მანგარ გურალაჭვილ იჸუაფუდ (საქ. 15:37, 38). მარა მარკოზიქ გურ ვეგიტახ დო ვემუტებ და დო ჯიმალეფიშ მომსახურება.

⁵ მარკოზიქ შხვა მხარეშა ოქადაგებშა მიდაჸუნ ბარნაბას, ნამუთ ხოლოშიან ნათესე აფუდ. სოდგარენ 11 წანაშ უკულ თინა შხვა ჯიმალეფწკუმა ართო ოხვარუდ დო ელურდჷ მოციქულ პავლეს, ნამუთ რომს რდჷ ჭოფილ (ფლმ. 23, 24). პავლე თიცალ მარდულ რდჷ თე ირფელშო, ნამდა მარკოზ თი ჯიმალეფ შქას მიშინუ, მიდგაშ გურშენ თქუ: „თენეფ რენა ჩქიმ გურიშ ემაქექაფალეფ“ (კოლ. 4:10, 11).

6. მუჭო მეხვარ მარკოზის მოწიფულ ქრისტიანეფწკუმა ურთიერთობაქ? (ქოძირით სქოლიო).

⁶ მარკოზიქ ბრელ მუდგარენ დიგურუ მუშე უნჩაშ სულიერო მოწიფულ ჯიმალეფშე. მუსხირენ წანას რომს პავლეწკუმა ართო რინაშ უკულ, თიქ ბაბილონს მოციქულ პეტრეწკუმა ართო გაგრძელ მსახურება. თინეფქ თეშ დეახლოვეს ართმაჟიას, ნამდა პეტრექ თინა სქუათ მიშინუ (1 პეტ. 5:13). ალბათ, ართო მსახურებაშ დროს, პეტრე ბრელ საინტერესო დეტალს ქოუწინდ მუშ ახალგაზრდა მეგობარს იესოშ ცხოვრებაშ დო მსახურებაშ გურშენ, მუდგას უკულ მარკოზ მუშ სახარებაშა გემშეღანდ.a

7. მუჭო მიაჸუნ ართ ახალგაზრდა ჯიმაქ, სენგ ვუქ, მარკოზიშ მაგალითის? (ქოძირით სურათ).

⁷ მუჭოთ ვორწყეთ, მარკოზ ბრელს ხანდენდჷ ღორონთიშ მსახურებას დო ხოლოშიან ურთიერთობა უღუდ მოწიფულ ჯიმალეფწკუმა. მუშ გურაფა შეილებ თავრეშე? შილებე იეჰოვაშ მსახურებას უმოსიშ კეთება გოკოდას, მაგალთო, მომსახურექ ვარდა უხუცესიქ გოკო ქიჸუენ, მარა დიო ვემგაჭირინუ თე მიზანშა. თაშ ქორენ-და, გურ ვეგიტახა; ქიმითვინ დო ქიფიქრ, მუჭო შეილებ იეჰოვას დო კრებას უმოსო გეგმადირთე. დეფიფქრათ ართ ჯიმაშ, სენგ ვუშ, შემთხვევაშე, ნამუთ ასე უხუცესო მსახურენს. უმოს ახალგაზრდა რდუნ თიმწკუმა, თინა მუშ დუდის შხვა ახალგაზრდა ჯიმალეფს უდარენდჷ; ნამთინექ თიშე უმოს ადრე მიღჷ პასუხიშმგებლობეფ. სენგ ვუ თეშ გურშენ ჭიჭე გურალაჭვილ რდჷ. ბოლოს გინოჭყვიდ, უხუცესეფწკუმა ალალას ქუჩიებინუდუკო თეშ გურშენ. ართ უხუცესიქ თის ელუჩ, ნამ შეულებუდუნ ირფელ გაკეთუკო შხვეფიშ მახვარებელო დო თიმწკუმა ხოლო თაშ მიქცუკო, მუჟამსით მითინ ვა ძირუნდ თიშ კეთებულ საქმეს. სენგ ვუქ გეგმირინუ თე რჩევა დო ქიდიჭყჷ ხანშამიშულირეფიშ დო თიცალ და დო ჯიმალეფიშ მოხვარა, მიდგას კრებაშ შეხვალამეფშა მოჸუნაფა ოსაჭირუდეს. ულირს იშინანსინ, თე ჯიმა იჩიებ: „უჯგუშო ქინვანჭჷ, სინამდვილეს, მუს ნონიშნებუე შხვეფიშ მომსახურება. ჩქიმ დუდშა გეგმოფცად თი ხიოლ, ნამუთ შხვეფშა პრაქტიკულო მოხვარას მოუღ“.

ᲢᲘᲛᲝᲗᲔᲪᲐᲚᲝ ᲸᲝᲠᲝᲤᲐ ᲥᲐᲫᲘᲠᲔᲗ ᲨᲮᲕᲔᲤᲡ

8. მუშენ გიშეგორ პავლექ ტიმოთე, ნამდა თიწკუმა ართო იმსახურუკო? (ფილ. 2:19–22).

⁸ პავლეს გაბედულ თანამსახურეფ ოსაჭირუდ, მუშენდა ირთუდ თი ქალაქეფშა, სოდეთ თეიშახ თხოზინს შეხვად. დუდშე თიქ გამოცდილ ჯიმა, სილა, მიდეჸუნ (საქ. 15:22, 40). უკულ ტიმოთე ხოლო მიდეჸუნ. მუშენ იჸუნ პავლექ ტიმოთე? ართ თიშენ, ნამდა თის ჯგირ სახელ გეძუდ (საქ. 16:1, 2). თეწკუმა ართო, შურ დო გურით ზრუნენდჷ შხვეფშე (წეკითხით ფილიპელეფიშ 2:19–22).

9. სოვრეშე იძირ, ნამდა ტიმოთე და დო ჯიმალეფშე ფიქრენდჷ?

⁹ პავლეწკუმა მსახურებაშ დოჭყაფაშე მალას ქიძირ, ნამდა ტიმოთე შხვეფშე უმოსო ფიქრენდჷ, ვინემ მუშ დუდშე. ათეშენ, მუჟამსით პავლექ ბერეაშე მიდართჷ, ტიმოთე ქიდიტუ თექ, მუშენდა ჯერდჷ, ნამდა თინა ჯგირო ქიზრუნენდჷ თექიან და დო ჯიმალეფშე, მით გვალო ახალ გინორთელ რდესჷ ქრისტიანეფო (საქ. 17:13, 14). ტიმოთეწკუმა ართო ბერეას სილაქ ხოლო ქუდოსქიდ. ალბათ ახალგაზრდა ტიმოთე ბრელს ქიდიგურუანდ თე ქრისტიანიშ მაგალითშე. ჭიჭე ხანიშ უკულ, პავლე თის თესალონიკეშა უტენს, ნამდა გამანგარას თექიან და დო ჯიმალეფ (1 თეს. 3:2). მუჭოთ ბიბლიაშე ბგებულენთ, თავრეშე სოდგარენ, 15 წანაშ უკულ ხოლო ტიმოთეს გურშა მეუღუდ თანაქრისტიანეფიშ გაჭირება დო „ინგარდჷ თინეფწკუმა, მით ინგარდეს“ (რომ. 12:15; 2 ტიმ. 1:4). ახალგაზრდა ჯიმალეფ, მუშ გურაფა შეილებუნა ტიმოთეშე?

10. მუჭო დიგურუ ჯიმა ვუ ჯიქ, უმოსო დეინტერესუკო შხვეფით?

¹⁰ ართ ჯიმაქ, ვუ ჯიქ, ქიდიგურუ, უმოსო მუჭო დეინტერესუკო შხვეფით. უმოს ახალგაზრდა რდუნ თიმწკუმა, თიშო რთულ რდჷ, დოგორუკო უნჩაშ ასაკიშ და დო ჯიმალეფწკუმა ოჩიებელ თემა. ათეშენ, დარბაზშა გემნიშუნ, უბრალოთ გამარჯობას ურაგადუდ თინეფს დო მიკმიშ. ართ უხუცესიქ თის ელუჩ, და დო ჯიმალეფწკუმა ჩიება თით ქიმწიჭყუკო, ნამდა ქოუწუკო, მუ მოწონდჷ თინეფიშ. თე ჯიმაქ თინა ხოლო უწუ ვუ ჯის, ნამდა დეფიქრუკო, მუ საკითხეფ ოინტერესუნა შხვეფს. ვუ ჯიქ გეგმირინუ უხუცესიშ რჩევა. ამდღა მუ ხოლო უხუცესო მსახურენს დო თეცალ მუდგარენს იჩიებ: „ასე ვამჭირს შხვადოშხვა ასაკიშ და დო ჯიმალეფწკუმა თავისფალო ჩიება. მოხიოლ, ნამდა ასე უმოსო მიჩქჷ, მუ სიტუაცია უღუნა შხვეფს. შედეგო, შემლებ უჯგუშო ქიმვეხვარე თანაქრისტიანეფს“.

11. მუჭო შეულებუნა ახალგაზრდა ჯიმალეფს პირადო დეინტერესან თანაქრისტიანეფით? (ქოძირით სურათ).

¹¹ თეშნერო, სი ხოლო შეილებ პირადო დეინტერესე შხვეფით. კრებაშ შეხვალამეფიშ დროს ქუდურაგადე შხვადოშხვა ასაკიშ დო შხვადოშხვა სიტუაცია უღუნან ფერ და დო ჯიმალეფს; ქოკითხ, მუჭო რენა, დო უკულ ქუმურჩქილე. თეშნერო შეგალებე უჯგუშო ქიმეხვადე, მუჭო შეილებ თინეფიშ მოხვარა. მაგალთო, შილებე ქიგეგე, ნამდა ხანშამიშულირ ჩილ დო ქომონჯის მოხვარა ოსაჭირ JW ბიბლიოთეკაშ გიმორნაფას ვარდა ხოლო მსახურებას პარტნიორ ვა ჸუნა. შეილებ ქიმეხვარე თინეფს, ქიდიგურუან ელექტრონულ მოწყობილობეფიშ გიმორნაფა ვარდა ხოლო მსახურება დაუგეგმე. შხვეფიშ მახვარებელო ნაბიჯის გეგნოდგუნქ-და, ჯგირ მაგალითის ქიმეჩანქ არძას.

ᲞᲐᲕᲚᲔᲨ ᲛᲣᲛᲐᲡᲥᲣᲐᲚᲣᲠ ᲠᲩᲔᲕᲔᲤ ᲗᲥᲕᲐ ᲮᲝᲚᲝ ᲒᲔᲒᲛᲒᲝᲓᲘᲠᲗᲣᲜᲐ

12. მუ ოკო აკეთან ახალგაზრდა ჯიმალეფქ, ნამდა ტიმოთეშა მეჩამილ პავლეშ რჩევეფქ თინეფს ხოლო გეგმადირთან?

¹² პავლექ ტიმოთეს მანგარ ჭკვერულ რჩევეფ მეჩჷ, მუთ გეგმადირთუდ თე ახალგაზრდა კოჩის ცხოვრებას დო მსახურებას (1 ტიმ. 1:18; 2 ტიმ. 4:5). პავლეშ მუმასქუალურ რჩევეფ სი ხოლო გეგმგოდირთუ. ათეშენ, წეკითხ ტიმოთეშა მეჭარილ პავლეშ ჟირ წერილ დო თეშ უჯინ, ითამ სქანდა აფუდას მოციქულს მუნაჭარა. კითხირიშ დროს ქიდეკვირ, კონკრეტულო ნამ რჩევეფიშ გიმორნაფა შეილებ სი. მორთ გუვარჩუათ თინეფშე მუსხირენ.

13. მუჭო შეულებუნა ახალგაზრდა ჯიმალეფს გევითარან იეჰოვაშ ართგურობა?

¹³ „მიზანო გიღუდას, რდე ღორონთიშ ართგურ დო თეს ირნერო გეუჯგუშე“ (1 ტიმ. 4:7ბ). მუს ნიშნენს, რდე ღორონთიშ ართგურ? თენა ნიშნენს, მანგარ ხოლოს რდე იეჰოვაწკუმა დო გოკოდას, ირო თინა აკეთე, მუთ გურს გუხარენს თის. რახანს ჩქი თე თვისებათ ვებაბდებუთ, საჭირო რე, გებვითარათ თინა. მუჭო ოკო ვაკეთათ თენა? ბერძნულ სიტყვა, ნამუთ თე მუხლის თარგმნილ რე, მუჭოთ „გაუჯგუშება“, ეჭარუნს თი რთულ ფიზიკურ ვარჯიშეფს, ნამდგას სპორტსმენეფ ორთუნა შეჯიბრშო მომზადებაშ დროს. თე სპორტსმენეფქ მანგარ პრინციპ ოკო დეკინან, ნამდა ქეშიალებუან მიზანიშ მენჭირნაფაქ. ჩქი ხოლო თეშნერო ოკო მეუდირთათ თი ჯგირ ჩვევეფიშ გავითარებას, ნამუთ უმოსო მაახლოვენა იეჰოვაწკუმა.

14. მუ ოკო რდასჷ ჩქინ მიზან ბიბლიაშ კითხირიშ დროს? ქიმიჸუნით მაგალით.

¹⁴ მანგარ მნიშვნელოვან რე, გიღუდას ბიბლიაშ ირდღას კითხირიშ ჩვევა დო თეწკუმა ართო, რშუდას, მუშენ კითხულენქ ღორონთიშ სიტყვას – თიშო, ნამდა დეახლოვე იეჰოვას. მაგალთო, წერმიდგინ, ნამდა კითხულენქ იესოშ დო მდიდარ ახალგაზრდა მმართველიშ ჩიებას. მუშ გურაფა შეილებ იეჰოვაშ გურშენ თე მონაკვეთშე? (მარ. 10:17–22). თე ახალგაზრდას წანდჷ, იესო მესია რდუნ, მარა თიშო ვა უბაღუდ რწმენა, ნამდა თიშ მიმაჸუნალო გინირთუკო. თეშ უმკუჯინუო, მუჭოთ ბიბლიას პკითხულენთ, „იესოქ ჸოროფათ ქინაჯინ თის“. გურ ვა გოიტიბუო იესოშ დამოკიდებულებაქ თე ახალგაზრდა კოჩიშ მიმართ? არგამა რე, თის ოკოდ, თე კოჩიქ იეჰოვაშ მსახურება ქიდიჭყუკო დო ბედნერ ცხოვრება უღუდუკო. იესოშ თე დამოკიდებულებაშე ჯგირო ქიძირ, მუჭო უჸორდჷ იეჰოვას თე ახალგაზრდა მმართველ (იოან. 14:9). დეფიქრ თე ბიბლიურ მონაკვეთშე დო სქან სიტუაციაშე, დო უკულ ქოკითხ სქან დუდის: მუშ კეთება შემლებ, ნამდა უმოსო დევეახლოვე იეჰოვას დო უმოსიშ კეთებაქ ქეშმალებუას შხვეფშო?

15. მუშენ რე მნიშვნელოვან, ახალგაზრდა ჯიმალეფ ჯგირ მაგალითის არზენდან შხვეფს? (1 ტიმ. 4:12, 13).

¹⁵ „ართგურეფს მაგალით ქიმეჩ“ (წეკითხით 1 ტიმოთეშ 4:12, 13). მოციქულ პავლექ ტიმოთეს ელუჩ, ნამდა კითხირიშ დო გურაფაშ უნარწკუმა ართო, გევითარუკო თიცალ ჯგირ თვისებეფ ხოლო, მუნერით რე ჸოროფა, რწმენა დო სიწმინდე. მუშენ ელუჩ თენა პავლექ? მუშენდა სიტყვეფშე უმოს ძალა საქმეეფს უღჷ. მაგალთო, წერმიდგინ, ნამდა მოხსენება გიღჷ თიწკუმა დაკავშირებით, მუ ოკო ვაკეთათ, ნამდა მსახურებას უმოს მონდომა მიღუდან. მსახურებას დუდის ვა ზოგენქ დო მუთ შეილებუნ ირფელს ქართუქ-და, უმოს თამამას გაჩიებინე. სქან მარჩქილეეფშო ხოლო სქან სიტყვას უმოს წონა აღვენუ დო გურჩქინდუნა სურვილ, გაკეთან თინა, მუდგას სი ელუჩანქ (1 ტიმ. 3:13).

16. ა) ნამ ხუთ მხარეს შეულებუნა ახალგაზრდა ქრისტიანეფს, ჯგირ მაგალით მეჩან შხვეფს? ბ) მუშ კეთება შეულებუნა ახალგაზრდა ჯიმალეფს, ნამდა სამაგალითო რდანჷ „რაგადის“?

¹⁶ 1 ტიმოთეშ 4:12-ს პავლე მიშინუანს ხუთ მხარეს, სოდეთ ახალგაზრდა ჯიმალეფს შეულებუნა ჯგირ მაგალითის ირზენდან. ჯგირ იჸუაფ, პირად გურაფაშ დროს უჯგუშო გეგმირკვიე თე მხარეეფ. მაგალთო, შილებე გოკოდას, უმოს სამაგალითო რდე „რაგადის“. დიო ხოლო მშობლეფწკუმა ართო ქოცხოვრენქ-და, შეილებ უმოს ხშირას ქუწუე მადლობა თი ირფელშო, მუდგას სქანო ორთუნა. კრებაშ შეხვალამაშ უკულ ხოლო შეილებ ნამდგაინ ჯიმას ვარდა დას ქაცქუე დო ქუწუე, მუქ მიგეწონ თიშ დავალებას. თეწკუმა ართო, ქეცად, კომენტარეფ სქან სიტყვეფით ქოთქუე. მუჟამსით ირნერო ეცადებუქ, სამაგალითო რდე რაგადის, შხვეფ ხოლო ქოძირუნა სქან წიმი ულას (1 ტიმ. 4:15).

17. მუ მეხვარებ ახალგაზრდა ჯიმალეფს სულიერ მიზნეფიშ მენჭირნაფას? (2 ტიმ. 2:22).

¹⁷ „ვეიაჸუნა ახალგაზრდულ სურვილეფს. თეშ გინაწონს, . . ინჭე სიმართლეშა“ (წეკითხით 2 ტიმოთეშ 2:22). პავლექ ტიმოთეს უწუ, ნამდა ებრძოლუკო თიცალ სურვილეფს, ნამუთ ეცილებუდ სულიერ მიზნეფიშ მეჭირნაფას დო გილულუანდ იეჰოვაწკუმა ურთიერთობას. შილებე გურ ქუგუჩე, ნამდა თიცალ საქმეეფ ხოლო, ნამუთ იშენდოიშენ გლახა ვა რე, ბრელ დროს მიდმაიღანს დო დრო ვა გოსქიდუ თიშო, ნამდა უმოს გაკეთე იეჰოვაშო. მაგალთო, დეფიქრ, მუსხი დროს უთმენქ სპორტის, ინტერნეტის მიშახუნას ვარდა ვიდეოლაჸაფეფს. ხომ ვეშეილებ თე ირფელს ჭიჭე დრო გამურკე დო უმოს გაკეთე იეჰოვაშო დო შხვეფშო? მაგალთო, ხომ ვეშეილებ დარბაზიშ მიკოლუაფას ვარდა სტენდით მსახურებას მიღე მონაწილება? თეცალ საქმეეფს მონაწილებაშ დროს, უმოსო შილებე გირჩქინე ახალ მეგობრეფ ხოლო, მით მიგეხვარებუნა, გიღუდას სულიერ მიზნეფ დო ქიმიოჭირინუე თინეფს.

ᲨᲮᲕᲔᲤᲘᲨ ᲛᲝᲛᲡᲐᲮᲣᲠᲔᲑᲐᲡ ᲙᲣᲠᲗᲮᲔᲕᲔᲤ ᲛᲝᲸᲣᲜᲡ

18. მუშენ შემლებუნა ფთქუათ, ნამდა მარკოზ დო ტიმოთეს ბედნერ დო კურთხევეფით ეფშა ცხოვრება უღუდეს?

¹⁸ მარკოზ დო ტიმოთექ ბრელ მსხვერპლშა იდეს, ნამდა უმოსო ქეშიალებუესკო შხვეფიშ მომსახურებაქ, დო თექ თინეფს ბედნერობათ დო კმაყოფილებათ ეფშა ცხოვრება მოუღ (საქ. 20:35). მარკოზ და დო ჯიმალეფიშ მახვარებელო ბრელს გილეშ, მუდგაქ საშვალება მეჩჷ, მსოფლიოშ შხვადოშხვა კუნთხუ ქოძირუკო. თეწკუმა ართო, თის მიაჩ პატიქ, დოჭარუკო ართ-ართ სახარება, სოდეთ ცოცხალო ეჭარ იესოშ ცხოვრება დო მსახურება. ტიმოთექ პავლეს მეხვარ ახალ კრებეფიშ ჩამოყალიბებას დო მანგარო ელუკინანდჷ გურშა და დო ჯიმალეფს. მუშო ოკო რაგად, იეჰოვა ორწყედუკონ იჸიდ, მუ მსხვერპლშა იდეს თე ახალგაზრდა ჯიმალეფქ, ნამდა უმოს გაკეთესკო თიშო, დო მანგარო ახიოლედ თეშ ძირაფა.

19. მუშენ ოკო ალერჩქილუან ახალგაზრდა ჯიმალეფქ პავლეშ რჩევეფ დო მუ შედეგ მაჸუნუ თეს?

¹⁹ ტიმოთეშა მეჭარილ პავლეშ წერილეფშე ჯგირო იძირე, მუშმანწარას უჸორდჷ მოციქულს ტიმოთე. მარა ვაგმოჭყორდან, ნამდა თე წერილეფ პავლეს იეჰოვაქ ოჭარაფუ. ათეშენ თექ ინოჭარილ ოძირანს, იეჰოვას მუჭო უჸორთ თქვა, ახალგაზრდა ჯიმალეფ. თიშო მანგარ ძვირფასეფ რეთჷ დო ოკო, წარმატებულეფ რდათჷ. ათეშენ, გურიშ ხოლოშა ქიმიღით პავლეშ მუმასქუალურ რჩევეფ დო უმოსო ქიმინდომით, მეტ გაკეთათ შხვეფშო. თაშ ქიმიქციებუთ-და, კმაყოფილებათ ეფშა ცხოვრება გაღვენუნა ამდღა დო მომავალს მიღენთ „ნამდვილ სიცოცხლეს“ (1 ტიმ. 6:18, 19).