რდათჷ ნამდვილ მეგობარ

ᲓᲦᲐᲡ ქოიგინაფუნანო დუდ თეშ, ნამდა თქვან პრობლემეფწკუმა ხვალე ქიგესქიდით? ჩქი „ძნელო გინაღალარ დროს“ ფცხოვრენთ, ათეშენ, გასაკვირ ვა რე, მინშა გურ მიტირხუდან დო დუდის ხვალახეთ ბგინაფლენდათ (2 ტიმ. 3:1). მარა, მუ ჯგირ რე, ნამდა პრობლემეფშა ხვალე ვა მაფუნა ობრძოლებერ. მუჭოთ ბიბლიაშე ბგებულენთ, გაჭირებაშ დროს მეგობრეფ ალამრენა (იგავ. 17:17).

ᲛᲣᲨ ᲙᲔᲗᲔᲑᲐ ᲨᲔᲣᲚᲔᲑᲣᲜᲐ ᲜᲐᲛᲓᲕᲘᲚ ᲛᲔᲒᲝᲑᲠᲔᲤᲡ?

მოციქულ პავლეს მანგარო ოხვარუდეს თი მეგობრეფ, მით თიწკუმა ართო გილეშეს მისიონერულ მოგზაურობეფშა (კოლ. 4:7–11). მუჟამსით თინა რომს ციხეს ხედჷ, მეგობრეფ ურთუდეს თი საქმეეფს, მუთ მუს ვაკეთებედ. მაგალთო, ეპაფროდიტექ თის ქიმუღ თი ირფელ, მუთ ფილიპელ და დო ჯიმალეფქ მეუჯღონეს (ფილ. 4:18). ტიქიკეს პავლეშ წერილეფ მეუღუდ შხვადოშხვა კრებაშა (კოლ. 4:7). ციხეს რდუო დოვარ შინაპატიმრობას, პავლე, მეგობრეფიშ მოხვარათ აგრძელენდჷ მუშ მსახურებას. თქვა მუშ კეთება შეილებუნა, ნამდა რდათჷ ნამდვილ მეგობარ?

ამდღა ხოლო ბრელ რენა თიცალ და დო ჯიმალეფ, მით ნამდვილ მეგობრეფ რენა თანაქრისტიანეფშო. გუვარჩუათ ართ პიონერ დაშ, ელისაბედიშ, მაგალით, მით ესპანეთშე რე. მუჟამსით თიშ დიდას ბოლო სტადიაშ კიბოშ დიაგნოზ ქიგუშქვეს, ელისაბედის მანგარო ელუდირთჷ მუშ მეგობარქ. თინა გურიშემაკინალ წერილეფს დო ბიბლიურ მუხლეფს უჯღონანდჷ თის. ელისაბედ იჩიებ: „თე წერილეფ ძალას მარზენდჷ დო ირდღას ბგინაფლენდჷ, ნამდა ხვალე ვა ვორდჷ“ (იგავ. 18:24).

თანაქრისტიანეფწკუმა მეგობრულ ურთიერთობაშ გავითარება შემლებუნა თით, ნამდა ქიმვეხვარათ მსახურებაშა დო შეხვალამეფშა ულას. მაგალთო, შეილებუნა ქოუწუათ ნამდგაინ ხანშამიშულირ ჯიმას ვარდა დას, ნამდა მანქანათ მიდეჸუნანთ ოქადაგებშა ვარდა კრებაშა. თენა ართმაჟიაშა გურიშ ელაკინაშ საშვალებას ქიმერჩანა (რომ. 1:12). რენა თიცალ და დო ჯიმალეფ ხოლო, მიდგას ჸუდეშე შურო ვეგმართენა. თეცალ დროს მუჭო შეილებუნა თინეფშო ნამდვილ მეგობარქ ქიჸუათ?

ᲠᲓᲐᲗᲷ ᲜᲐᲛᲓᲕᲘᲚ ᲛᲔᲒᲝᲑᲐᲠ ᲗᲘᲜᲔᲤᲨᲝ, ᲛᲘᲓᲒᲐᲡ ᲸᲣᲓᲔᲨᲔ ᲕᲔᲒᲛᲐᲠᲗᲔᲜᲐ

ნამთინე და დო ჯიმას ჯანმრთელობაშ პრობლემაშ ვარდა შხვა სიტუაციაშ გურშენ ვალნე კრებაშ შეხვალამეფშა. მაგალთო, ართ ჯიმას, დეივიდის, ლიმფომაშ დიაგნოზ ქიგუშქვეს. ამშვ თუთას თინა ქიმიოთერაპიაშ კურსეფს მიკიშ. თე დროშ დინახალე თინა დო თიშ მეუღლე, ლიდია, კრებაშ შეხვალამეფს ჸუდეშე ოსწრუდეს.

მუჭო მეხვარეს თინეფს მეგობრეფქ? ირ კრებაშ უკულ, ნამთინე, მით შეხვალამას დარბაზის ოსწრუდ, ოცადუდ, ქუდურაგადუკო დეივიდის დო ლიდიას, მით ვიდეოკონფერენციათ რდესჷ ჩართულ. თეს გეძინელ, მუჟამსით თინეფ კომენტარს გაკეთენდეს, წერილეფს ღებულენდეს თანაქრისტიანეფშე. თეშნერო თინეფ და დო ჯიმალეფშე ირიათო გინაფლენდეს ჸოროფას.

შეილებუნანო თქვან განრიგ თეშ ქიგიონწყუათ, ნამდა შეგალებუან თი თანაქრისტიანწკუმა მსახურებაქ, მიდგას ჸუდეშე ვეგმართე? შილებე თქვან გეგმას ჭიჭე მუდგარენიშ თირუაქ იჸუას საჭიროქ, მარა თაშ ქიმიქციებუთ-და, თანაქრისტიანს ქაძირანთ, ნამდა ირიათო რშუნა (იგავ. 3:27). შეილებუნა ჸუდეშე ვეგმართენ ფერ თანაქრისტიანწკუმა ართო ტელეფონით ვარდა წერილეფით იმსახურათ. უხუცესეფს შეულებუნა თეშ დაგეგმან, ნამდა სამქადაგებლო შეხვალამეფშა ვიდეოკონფერენციათ შეიალებუან დასწრებაქ თინეფს, მიდგას ვეშულებ ცოცხალო დასწრება. თაშ ორთუდეს დეივიდიშ დო ლიდიაშ კრებას ხოლო, მუდგაქ მანგარო მეხვარ თინეფს. დეივიდ იჩიებ: „მანგარო მოხვარუდეს, ნამდა თე მუსხირენ წუთიან შეხვალამას ჩქინ ჯგუფწკუმა ართო ვოსწრუდით დო ლოცვას ხოლო იბრჩქილუაფუდით“. თეწკუმა ართო, შეილებუნა ჸუდეშე ვეგმართენ ფერ თანაქრისტიანს წინასწარ ქუდურაგადუათ დო თეშ დაგეგმათ, ნამდა კანკალეშა თქვან ბიბლიაშ მაგურაფალ ქიმიჸუნათ თიშა დო ართო ჩუტარათ ბიბლიაშ გურაფა.

მუჟამსით თეცალ თანაქრისტიანეფწკუმა ართო ბმსახურენთ, უმოსო ვორწყეთ თინეფიშ ჯგირ თვისებეფს დო ხოლოშიან მეგობრეფო გინიბრთუთ. მაგალთო, მუჟამსით ვოკვირუთ, მუ ჯგირო ირინუანა ღორონთიშ სიტყვას, ნამდა პიროვნებაშ გურს ქინანჭან, უმოს პატიცემა მირჩქინდუნა თინეფიშ მიმართ. ხვალე თენა ვარინ, თანაქრისტიანეფს სულიერ საქმეეფს მონაწილებას ვოხვარუთინ, უმოს მეტ მეგობარს იბრჩქინანთ (2 კორ. 6:13).

სირთულეეფიშ დროს, პავლეს ელუდირთჷ დო გურშა ელუკინ მუშ მეგობარ, ტიტექ (2 კორ. 7:5–7). თე ბიბლიურ მონაკვეთ გუმოშინანა, ნამდა თანაქრისტიანეფშა გურიშ ელაკინა ხვალე გემუან სიტყვეფიშ რაგადით ვარინ, თით ხოლო შემლებუნა, ნამდა დრო გუვატარათ თინეფწკუმა ართო დო ქიმვეხვარათ (1 იოან. 3:18).

ᲠᲓᲐᲗᲷ ᲜᲐᲛᲓᲕᲘᲚ ᲛᲔᲒᲝᲑᲐᲠ ᲗᲮᲝᲖᲘᲜᲘᲨ ᲓᲠᲝᲡ

რუსეთის მახორუ ძვირფას და დო ჯიმალეფ ართმაჟიაშ ალარნაშ ჯგირ მაგალითის ირზენა. გუვარჩუათ ართ ჩილ დო ქომონჯიშ, სერგეიშ დო ტატიანაშ, შემთხვევა. მუჟამსით პოლიციაქ თინეფიშ ჸუდე გოშმონ, დაკითხვაშა მიდეჸუნეს. პირველო ტატიანა დაკითხეს დო ჸუდეშა გოუტუეს. სერგეი იჩიებ: „ტატიანაქ ჸუდეშა ქიმერთუნ, ართ დაქ ხეთეშე ქიმიაკითხუ თის. უკულ შხვა და დო ჯიმალეფქ ხოლო ქიმერთეს დო ქიმეხვარეს ჸუდეშ დონწყუალას“.

სერგეი აგრძელენს: «იგავეფიშ 17:17 ირიათო ჩქიმ საჸოროფო მუხლ რდჷ. მუჭოთ თექ პკითხულენთ, „ნამდვილ მეგობარს ირიათო უჸორდენ იჸი; თინა გაჭირებაშო დაბადებულ ჯიმა რე“. თხოზინიშ დროს უმოსო დებრწმუნ თე სიტყვეფიშ ჭეშმარიტებას. იეჰოვაქ ქომუჩ თიცალ მეგობრეფ, მით გაბედულო დო უშქურანჯუო გერდეს ჩქიმ მხარეს».a

რთულ სიტუაციეფს ართიანიშ ალარნა მოსაჭირუნა. მარა მეგობრეფშე მოხვარა განსაკუთრებულო „დიდ გაჭირებაშ“ დროს იჸუაფ საჭირო. ათეშენ, მორთ ირნერო ვეცადათ, ნამდვილ მეგობრეფ ვორდათ ართიანშო (1 პეტ. 4:7, 8).