ირიათო ბგურაფლენქ

დებაბდჷ 1927 წანას ჭიჭე ქალაქის, ნამუთ ჩიკაგოწკუმა ხოლოს რდჷ (აშშ, ილინოის). ჩქიმ დიდა დო მუმას ხუთ სქუა პჸუნდით – ჯეთა, დონ, მა, კარლ დო ჯოი. არძა შურ დო გურით ვომსახურუდით იეჰოვას. ჩქიმ უნჩაშ დაქ, ჯეთაქ, 1943 წანას სკოლა „გალაადიშ“ მაჟია კლას მიკორთჷ დო ჩქიმ შხვა და დო ჯიმალეფ ართიანიშ მეჸუნელო მიწვიეს ბრუკლინიშ ბეთელშა, დონ 1944-ის, კარლ 1947-ის დო ჯოი 1951-ის. ჩქიმ ოჯახიშ წევრეფიშ ჯგირ მაგალითიქ მანგარო იმოქმედ ჩქიმდა.

ᲩᲥᲘᲜ ᲝᲯᲐᲮ ᲭᲔᲨᲛᲐᲠᲘᲢᲔᲑᲐᲡ ᲒᲔᲑᲣᲚᲔᲜᲡ

დიაჩქიმ დო მუაჩქიმ ბიბლიას კითხულენდეს დო ღორონთ უჸორდეს; თენა დუმოგურუეს ჩქი ხოლო. მარა მუაჩქიმს ეკლესიაშა გურქ გეუოლ, მუჟამსით პირველ მსოფლიო ომიშ დროს ევროპას ჯარს მსახურენდჷ. დიაჩქიმ ღორონთის უმარდუდ თიქ ჸუდეშა ცოცხალქ დირთუნ, ათეშენ უწუ: „კარლ, მოლართ ეკლესიაშა მიდაფრთათ“. მუაჩქიმქ უპასუხ: „გაჸუნუქ, მარა დინახალე ვემნურქ“. დიაჩქიმქ კითხჷ: „ქო მარა, მუშენ?“. თიქ უპასუხ: „ჩხუპიშ დროს მღვდელეფ ქოთ ჩქინ დო ქოთ ნტერეფიშ მხარეს ხვამანდეს ჯარიშკოჩეფს დო იარაღეფს. ვარინ ჟირხოლო მხარე ართ რელიგიაშ ვორდით. მუ გიშურს, ჟირხოლო მხარეს გინარდუო ღორონთ?!“.

უკულ, ართშა, დიაჩქიმ ეკლესიას რდუნ თეშ, ჟირ იეჰოვაშ მოწმექ ქუმმაკითხეს ჸუდეშა დო მუაჩქიმს ქიმეჩეს ბიბლიაშ ოგურაფალ ჟირ-ნაწილიან წიგნ, ნამდგას „სინთე“ ჯოხოდ. თექ ბიბლიაშ წიგნ, გამოცხადება, რდჷ გარჩიებულ. მუაჩქიმს დეინტერეს თიქ დო გეგწუღ. დიაჩქიმქ თე წიგნეფ ქოძირუნ, კითხირ ქიდიჭყჷ. ართ დღას თიქ გაზეთის ქოძირ განცხადება, სოდეთ ჭარუდ, ნამდა, მიდგას ოკოდუნ, ბიბლიაშ გურაფას მეხვარებუდეს ჩქი დომტუესინ თი წიგნეფით. დიაჩქიმქ გინოჭყვიდ, ქიმერთუკო თექ. მეულირს კარ ართ ხანშამიშულირ ოსურქ გოუნჯჷ. დიაჩქიმს თე წიგნეფიშ პირველ ნაწილ მეუღუდ, ქაძირუ თე ოსურს დო კითხჷ: „თე წიგნის თაქ ოგურუანთო?“. თიქ უპასუხ: „ქო, სქან გოლუაფრო, მუნორთ“. უკულიან მარას დიაჩქიმქ ჩქი ხოლო მიდამიჸონეს დო თიშ უკულ ვემემტებუნა გილულა.

ართ-ართ შეხვალამას ჩამტარებელქ ქოფთხუ, ფსალმუნიშ 144:15 წეპკითხიკო, სოდეთ ჭარჷ, ნამდა იეჰოვაშ მსახურეფ ბედნერეფ რენა. მანგარო მიმეწონ თე დო ხოლო ჟირ მუხლიქ: 1 ტიმოთეშ 1:11-იქ, ნამუთ იჩიებ, ნამდა იეჰოვა „ბედნერ ღორონთ“ რე, დო ეფესოელეფიშ 5:1-იქ, ნამუთ ელამჩანა, ნამდა მივაჸუნათ „ღორონთიშ მაგალითის“. თე მომენტის ქიმეფხვად, ნამდა, მუთ შემლებუდუნ, ირფელ ოკო გუვაკეთიკო ჩქიმ გუმაჭყაფალშო დო მარდულ ოკო ვაფუდიკო თის, თე პატი მუჩუნ. ზუსტას თე ჟირ მუდგარენიშ კეთებას ვოცადუქ მთელ ცხოვრება რე.

კრება ჩიკაგოშ აშო ვა რდჷ. თეიშახ 32 კილომეტრ მემძუდეს, მარა იშენით ირიათო გილეფშით დო უმოსის დო უმოსის ბგებულენდჷ ბიბლიაშე. გუმაშინე, ართშა ჩამტარებელქ ჯეთას კომენტარ ქოკითხჷ. ურჩქილედინ, იფიფქრჷ: „თენა მა ხოლო მიჩქუდ. მა ხოლო ოკო ემჭოფუდუკო ხე“. თეშ უკულ ქიდიპჭყჷ კომენტარეფიშ მომზადება დო კეთება. მა დო ჩქიმ და დო ჯიმალეფ სულიერო წიმი მიფშით. 1941 წანას დიმნათ.

ᲘᲔᲰᲝᲕᲐ ᲛᲝᲒᲣᲠᲣᲐᲜᲡ ᲙᲝᲜᲒᲠᲔᲡᲔᲤᲘᲗ

განსაკუთრებულო ფშჷ 1942 წანაშ კონგრეს, ნამდგაქ კლივლენდის, ოჰაიოს, ჩეტარ. პროგრამა შეერთებულ შტატეფს 50-შე უმოს ადგილს გინიჩამუდ ტელეფონით. შხვეფცალო, ჩქინ ოჯახ ხოლო კარავეფს გისერუანდჷ, ნამუთ კონგრეს იტარებუდუნ თი ადგილიშ გოხოლუას აფუდეს ჯიმალეფს გოფაჩილ. თე დროს მაჟია მსოფლიო ომ მიშჷ დო იეჰოვაშ მოწმეეფიშ თხოზინ ხოლო ჭიე-ჭიეთ იძინანდჷ. ონჯუას ქობძირ, ნამდა ჯიმალეფქ მანქანეფ თეშ ქიგიორინუეს, ნამდა ჩხვინდ გალენ მხარეს უღუდუკო. თინეფქ ქიმირაგადუეს, ნამდა თითო მანქანას ართ კოჩ ოკო მითოხედუკო, მით მთელ სერს იყარაულენდჷ. მიდგაინ ჩქინდა გენთხაფას ქიმინდომენდ-და, ჯიმალეფ სინთეეფს გეიორზანდეს, ნამდა თინეფს თოლ მოჭკირუკო, დო სიგნალეფს მოუნჭანდეს, ნამდა შხვეფქ ქუმორთესკო მახვარებშა. თე დროს იფიფქრჷ: „იეჰოვაშ ხალხ მუნერ მომზადებულ რე-მაქ ირფელშო“. მუთუნშა ვა მოშქურუდ, ათეშენ გემოშა ქიდიბრულე, დო ვართ მოხვალამე მუთუნ.

წანეფიშ უკულ თე კონგრესშე ფიფქრენდინ, იფშინანდჷ, ნამდა დიაჩქიმს ართ ვაშქურნებ. უკულ ქუგოფხვად, მუჭო ონდუდ თინა იეჰოვას დო თიშ ორგანიზაციას. თიშ თე ჯგირ მაგალით დღას ვაგმოჭყორდუ.

კონგრესშახ ჭიჭე ხანით ადრე, დიაჩქიმქ პიონერობა ქიდიჭყჷ. ათეშენ განსაკუთრებულო თი მოხსენებეფს ურჩქილედ, ნამუთ სრულ დროთ მსახურებაშენ რდჷ. ჸუდეშა იბრთუდითინ, თიქ მიწუეს: „მანგარო მოკო, პიონერობა გუვაგრძელე, მარა მსახურებას დო ჸუდეშ საქვარეფს ართათ ვაგვანჭუქ“. უკულ პკითხეს, ქიმვეხვარებუდით დო ვარ. ჩქი უწით, ნამდა ქელუდირთუდით. ათეშენ, თიქ ქუდმავალეს, ნამდა თითო-ჟირ ოთახ ქუდვონწყითკო ოჭმარეს ოჭკუმალიშ ჭკუმუაშახ. ჩქი სკოლაშა მიდეფშითინ, თინა ქოძირუნდჷ, ჸუდე ქორდჷ დო ვარ დონწყილ დო უკულ მიდეშ მსახურებაშა. დიაჩქიმს ქიანა საქმე უღუდ, მარა ბაღანეფ უმინჯურო დღას ვა ვაფუდით მეტებულ. მუჟამსით ჸუდეშა მიფშით ოჭკუმშა ვარდა სკოლაშე იბრთუდით, თინა ირიათო ჸუდეს დოფხვადუდეს. ნამთინე დღას სკოლაშ უკულ მსახურებაშა მეპჸუნდით. თაშ ნამდა, ჯგირო ვორწყედით, მუზმა ხანდა ოკოდ პიონერო მსახურებას.

ᲘᲞᲭᲧᲐᲜᲥ ᲡᲠᲣᲚ ᲓᲠᲝᲗ ᲛᲡᲐᲮᲣᲠᲔᲑᲐᲡ

16 წანერ ვორდინ თეშ დიპჭყჷ პიონერო მსახურება. მართალ რე, მუაჩქიმ დიო ვა რდჷ იეჰოვაშ მოწმე, მარა ოინტერესუდ, მუჭო მიშჷ ჩქიმ მსახურება. ართ ონჯუას უწი, ირნერო ვოცადუქ, მარა ბიბლიაშ გურაფაქ იშენით მითინწკუმა ვადმაჭყინ-მაქ. უკულ თის პკითხჷ: „მუს თქუანქ, სქანწკუმა ქიდიპჭყენ?“. ჭიჭე ქიფიქრჷ დო უკულ მიპასუხ: „მუშენ ვარ“. თაშ ნამდა, პირველ, მიდგას ბიბლია დუვოგურე, მუაჩქიმ რდჷ. თენა ჩქიმო ქიანაშმადიდა პატი რდჷ.

ბიბლიას ბგურაფლენდით წიგნით „ჭეშმარიტება გუგათავისფალენა“. თე წიგნის მიფშითინ, ფხვადუდ, მუჭო მოხვარუდ მუაჩქიმ, უჯგუშ მოსწავლეთ დო მასწავლებერო გინიბრთიკო. მაგალთო, ართ ონჯუას აბზაც წეპკითხით დო მუაჩქიმ მოკითხჷ: „წიგნის მუ ჭარუნ ქუვორწყექ, მარა სოვრე გიჩქჷ, თაქ მუთ ჭარუნ მართალ რენ?“. თე კითხვაშ პასუხ ვამღუდ, ათეშენ უწი: „ასე მა თენა სქანდა ვადმამტკიცებე, მარა ანწიან გურაფაშ დროს ქიმერჩანქ პასუხის“. ქოთ შევასრულ სიტყვა – დობგორ ბიბლიურ მუხლეფ, ნამუთ ენწყუნდჷ საკითხის, ნამდგას ჩქი ვარჩიენდით. თიშ უკულ, ირ ბიბლიაშ გურაფაშო უჯგუშო ვემზადებუდ. თექ ქოთ მა დო ქოთ მუაჩქიმს მიმეხვარეს, უმოსო მიბრდითკო სულიერო. თიქ ქიდიჭყჷ ნაგურეფუშ გიმორნაფა დო 1952 წანას დინათ.

ᲐᲮᲐᲚ ᲛᲘᲖᲜᲔᲤ, ᲜᲐᲛᲣᲗ ᲣᲛᲝᲡᲘᲨ ᲒᲣᲠᲐᲤᲐᲡ ᲛᲝᲮᲕᲐᲠ

17 წანერ ვორდინ თეშ ცალკე გეგნობრთჷ ოცხოვრებშა. ჯეთაქa მისიონერო დენიშნჷ დო დონ ბეთელშა მიწვიეს. ჟირხოლოს მანგარო უჸორდეს მუნეფიშ დანიშნულება დო თინეფიშ განწყობაქ მა ხოლო გეგნმადვჷ. ათეშენ, ქოთ ბეთელიშ ბლანკ შევავსჷ დო ქოთ სკოლა „გალაადიშ“ დო სო გიმომრინუანდუნ თენა იეჰოვას მივანდჷ. 1946 წანას ბეთელშა მემწვიეს.

წანეფიშ დინახალე ბეთელს ბრელ შხვადოშხვა დანიშნულება მიღუდ, მუდგაქ ბრელ მუდგარენ ქუდმოგურუ. ბეთელს 75 წანიან მსახურებაშ დინახალე ქიდიბგურე სტამბაწკუმა, ბუღალტერიაწკუმა, შესყიდვეფწკუმა დო გადაზიდვეფწკუმა დაკავშირებულ საქმეეფ. თე ირფელიშ უმოსის მიჸორს თი სულიერ განათლება, ნამდგას ბეთელ მარზენა ოჭმარეშ თაყვანიშცემაშ დოვარ შხვა მოხსენებეფიშ საშვალებათ.

ჩქიმ უკლაშ ჯიმაშე, კარლშე ხოლო ბრელ დიბგურე. თიქ ბეთელშა 1947 წანას მორთჷ. კარლის მანგარო უჸორდჷ ბიბლიაშ გიმორკვიება დო ქოთ შხვეფშა გურაფა გიშალედ ჯგირო. ართშა მანგარო მიმეხვარ, მუჟამსით მოხსენებათ მაფუდ გიშაულარ. მა უწი ქიანაშ მასალა მაფჷ აკოშაყარელ დო ნამ ფთქუე ვა მიჩქ-მაქ. თის ბრელ მუთუნ ვა უთქუალ, ხვალე ართ მუდგარენ პკითხჷ, მუდგათ მანგარო მიმეხვარ. კარლიქ მიწუ: „ჯოელ, მუ რე სქან მოხსენებაშ სათაურ?“. ხეთეშე ქიმეფხვად, მუშ რაგად ოკოდ; ხვალე თი აზრეფ ოკო ქიდიპტეკო, მუთ თემას მეურდჷ, დო შხვა ირფელს ჩევეთხიკო. თიშ ნარაგად ირიათო ალაფშჷ.

ბეთელს მსახურებაქ ხიოლ ქუმოიღასინ ქუგოკონ-და, ხშირას ოკო გილართე ოქადაგებშა. თეს ქართუქ-და, ბრელ გურიშ ემაკინალ შემთხვევა გაღვენუ. ართ შემთხვევა ფშჷ, მუჟამსით მა დო ართ ჯიმა ონჯუას ნიუ-იორკიშ ართ-ართ რაიონს ვორდით მსახურებას. მივაკითხეთ ართ ოსურკოჩის, ნამდგას „გინაჯინალ კოშკი“ დო „გეგშაკურცხით!“ დუტეთ. ქეშეფხვადითინ, უწით: „ჩქი მანგარ გურიშ ემაკინალ ამბეშ გაგებას ვოხვარუთ ადამიანეფს ბიბლიაშე“. თიქ მიპასუხეს: „ბიბლიაშე ქოილამუნა ჩიება-და, გამნოზოჯით“. ღორონთიშ სამეფოშ დო ახალ ქვეყნიერებაშ გურშენ მუსხირენ მუხლ წუკითხით დო გუვარჩით. ირფელქ მანგარო მეწონ, ათეშენ უკულიან მარაშო მუშ მუსხირენ მეგობარ ხოლო ქუდაპატიჟ, ნამდა თინეფწკუმა ხოლო ქიფჩითკო. თიქ დო მუშ ქომონჯიქ დინათეს დო ართგურო ომსახურუდეს იეჰოვას.

ᲑᲒᲣᲠᲐᲤᲚᲔᲜᲥ ᲩᲥᲘᲛ ᲛᲔᲣᲦᲚᲔᲨᲔ

10 წანას ბგორუნდჷ მეუღლეს, მუდგაშ უკულ ქეშეფხვად ართ სულიერო მოწიფულ დას. ქოიჩქუნანო მუქ მიმეხვარ? ბლოცულენდჷ დო ფიფქრენდჷ თეცალ კითხვაშე: „დეფქორწინებუქ-და, მუ მიზნეფ მაღვენუნა მა დო ჩქიმ მეუღლეს?“. 1953 წანას იანკიშ სტადიონს ჩატარებულ კონგრესიშ უკულ, გეფჩინებაფე ართ და, მერი ანიოლ. თინა დო ჯეთა ართო რდესჷ „გალაადიშ“ მაჟია კლასის დო უკულ ართო მსახურენდეს მისიონერეფო ხოლო. თინა შურ დო გურით მეჩიებუდ, მუჭო მიშჷ მსახურება კარიბიშ ზღვაშ კუნძულეფს დო მუჭო ატარენდჷ ბიბლიაშ გურაფეფს წანეფიშ დინახალე. ართიან უჯგუშო გეფჩინებაფეთინ, ქიმეფხვადით, ნამდა ართნერ სულიერ მიზნეფ მიღუდეს. ჭიე-ჭიეთ ქიმეჸოროფეს ართიანქ დო 1955 წანაშ აპრილს დეფქორწინით. მერი მართალო იეჰოვაშ საჩუქარ რდჷ ჩქიმო. თინა მანგარ სამაგალითო ადამიან რდჷ, არძა დავალებას ხიოლით ღებულენდჷ, ბრელს ხანდენდჷ, შურ დო გურით ოხვარუდ შხვეფს დო სამეფოშ საქმე ირო პირველ ადგილშა გეურდჷ (მათ. 6:33). სუმ წანას ვორდით რაიონულ მსახურებას დო 1958 წანას ბეთელშა მემწვიეს.

მერიშე ბრელ მუდგარენ დიბგურე. მაგალთო, დაქორწინებაშ უკულ გეგნოპჭყვიდით, ართო წეპკითხითკო ბიბლია, ირდღას სოდგარენ 15 მუხლ. მუჟამსით ჩქინდე ნამდგაინ წეკითხენდჷ, უკულ იფჩიებუდით, მუ დიბგურეთ თე მონაკვეთშე დო მუჭო შემლებუდეს თიშ ცხოვრებას გიმორნაფა. მერი ხშირას მეჩიებუდ, მუ დიგურუ „გალაადის“ დო მისიონერულ მსახურებას. თეშნერო თიქ ქუდმოგურუ, მუჭო ელუკინიკო გურშა დალეფს დო მუჭო გუვაუჯგუშიკო ჩქიმ მოხსენებეფ (იგავ. 25:11).

ჩქიმ ძვირფას მერიქ 2013 წანას დომღურ. შურ მოლჷ, მუჟამ შეფხვადუქ თის ახალ ქვეყნიერებას. თეიშახ გინოჭყვიდილ მაფჷ, უმოს ქიდიბგურუე იეჰოვაშ გურშენ დო მთელ გურით მივენდე თის (იგავ. 3:5, 6). ემქექუანს დო გურს ხიოლით ემიფშანს თიშე ფიქრ, მუს გაკეთენს იეჰოვაშ ხალხ ახალ ქვეყნიერებას. ართ-ართ, მუდგას გუვაკეთენთ თინა რე, ნამდა უმოსის ქიდიბგურუანთ ჩქინ „დიდებულ მასწავლებერიშ“ გურშენ. სიტყვეფ ვამბაღ, გეგმოფხანტე, მუნერ მარდულ ვაფუქ იეჰოვას, ნამდა თეზმა მუდგარენ დუმოგურუ დო ბრელშა ქუმოძირუ, მუნერო უჸორქ.