კითხვა დო პასუხ

მუჟამსით იესოქ გოშინაშ ონჯუა დარსხუ, სო რდჷ 70 მოწაფე, ნამუთ თეიშახ ოქადაგებშა გოუტუ? ხომ ვემიოტუეს თინეფქ იესო?

გოშინაშ ონჯუაშ დორსხუაფაშ დროს 70 მოწაფე იესოწკუმა ვა რდუნჷ თიშ გურშენ ოკო ვეფიფქრათ, ნამდა თინეფქ მიოტუეს ქრისტე. იესოს უბრალოთ ოკოდ, თე მნიშვნელოვან დღას მოციქულეფწკუმა ართო რდუკო.

მუჭოთ 12 მოციქულ, თეშ თი 70 მოწაფე იესოშო მოსაწონეფ რდესჷ. თიქ დუდშე მუშ მოწაფეეფშე 12 კოჩ გეგშეგორ დო მოციქულეფ გიოდვჷ (ლუკ. 6:12—16). იესო გალილეას რდჷ, მუჟამსით „ქუდუძახ ვითოჟირ მოციქულს“ დო „მიდაშქვჷ თინეფ, ნამდა იქადაგესკო ღორონთიშ სამეფოშ გურშენ დო დასქილიდუესკო ხალხ“ (ლუკ. 9:1—6). უკულ იუდეას თიქ „გეგშეგორ 70 მოწაფე დო ჟირ-ჟირო გოუტუ“ (ლუკ. 9:51; 10:1). თაშ ნამდა, იესოს შხვადოშხვა დიხას ჸუნდჷ მუშ მიმაჸუნალეფ, მით თიშ გურშენ იქადაგენდეს.

იესოშ იუდეველ მოწაფეეფ დიო ხოლო აღნიშნენდეს ირ წანას პასექიშ დღახუს, შილებე მუნეფიშ ოჯახეფწკუმა ართო (გამ. 12:6—11, 17—20). ღურაშახ ჭიჭე ხანიშ წოხოლე თიქ მუშ მოციქულეფწკუმა ართო იერუსალიმშა მიდართჷ, მარა პასექიშ აღნიშნებელო იესოს დიდ აკოშაყარუა ვა მუნწყუ დო ვა დუპატიჟებ მუშ არძა მოწაფე იუდეაშე, გალილეაშე დო პერეაშე. მუჭოთ იძირენ, თის ოკოდ, ნამდა თე დღას მუშ მოციქულეფწკუმა ართო რდუკო, მუთ ჯგირო იძირე თი სიტყვეფშე, ნამუთ თინეფს უწუ: „მანგარო მოკოდ, ჩქიმ ტანჯებაშახ თქვანწკუმა ართო ომჭკუმუდუკო თე პასექ“ (ლუკ. 22:15).

ვა რე გასაკვირ, მუშენ ოკოდ იესოს თე დღაშ მუშ მოციქულეფწკუმა ართო აღნიშნება; თინა მალას დოღურუდ, მუჭოთ „ღორონთიშ კირიბ . . . ნამუთ თე ქიანაშ ცოდას მოსპუნს!“ (იოან. 1:29). იესოქ იერუსალიმს ოკო დოღურუკო, მუშენდა ღორონთშა მსხვერპლიშ შეწირუა ირიათო თექ ხვადუდ. იესოშ მსხვერპლ ბრელით უმოს დიდ თავისუფლებას მოუღანდ ადამიანეფს, ვინემ ისრაელეფიშ ეგვიპტეშე გათავისფალება რდჷ, მუდგაშ გაშინალო თინეფ პასექიშ დღას კირიბის ჸვილუნდეს (1 კორ. 5:7, 8). იესოშ მსხვერპლ საშვალებას ქიმეჩანდ 12 მოციქულს „ქრისტიანულ კრებაშ ოსხირო“ გინირთესკო (ეფეს. 2:20—22). „გამოცხადებაშ“ წიგნშე ბგებულენთ, ნამდა „წმინდა ქალაქის“, იერუსალიმს, ოსხირო 12 ქუა უღჷ, ნამდგას გეჭარილ რე „კირიბიშ 12 მოციქულიშ 12 სახელ“ (გამოცხ. 21:10—14). თაშ ნამდა, თე მოციქულეფს მნიშვნელოვან როლ აღვენუდეს ღორონთიშ განზრახვაშ შესრულებას. ათეშენ, გასაკვირ ვა რე, მუშენ ოკოდ იესოს, ბოლო პასექიშ აღნიშნებაშ დო გოშინაშ ონჯუაშ დაწესებაშ დროს 12 მოციქულწკუმა ართო რდუკო.

იესოქ მსახურებაშა გოუტუნ თი 70 მოწაფე დო შხვა მოწაფეეფ ვა რდესჷ თიმ ონჯუას თიწკუმა ართო. მარა არძა, მით იესოშ ართგურ რდჷ, სარგებელს მიღენდ გოშინაშ ონჯუაშე, ნამდგაშ დორსხუაფაქ თიმ დღას მოხვად. თინეფ ხოლო, მით უკულ გინირთუდეს ცხებულო, იჸუაფუდეს სამეფოშო დოდვალირ შეთანხმებაშ მონაწილეეფ, ნამდგაშ გურშენ იესოქ მოციქულეფწკუმა თიმ ონჯუას იჩუ (ლუკ. 22:29, 30).