უფალიშ გოშინაშ ონჯუა — თიშ აღნიშნება პატის მიაგენს ღორონთის

ქრისტიანეფი ოკო აღნიშნენდან ქრისტეშ ღურაშ გოშინაშ ონჯუას, ნამუსით ბიბლიას „უფალიშ ოსერშე“ ხოლო ჯოხო (1 კორინთელები 11:20). მუშენ რე თენა მნიშვნელოვანი? მუჟამს დო მუნერო ოკო ჩეტარინას უფალიშ გოშინაშ ონჯუაქ?

იესოქ თე ონჯუა დაწეს ახალ წანაკოროცხუათ 33 წანაშ ართ ონჯუას, თიმ დროს, მუჟამსით ებრაელეფ პასექიშ დღახუს ზეიმენდეს. პასექის წანმოწანაშე ართშა, ებრაულ კალენდარით 14 ნისანს აღნიშნენდეს. თე რიცხვი ქუდუდგინებდესკონ თიშენ, ებრაელეფ უჯინედეს გაზარხულიშ ბუნიობას, მუჟამსით სერ დო დღაშ ართ მანგ რე. თეშ უკულ პირველ ახალ თუთაშ მიკორჩქინათ ნისანიშ თუთა იჭყაფუდ. 14 დღაშა, ბჟაშ ინულაშ უკულ პასექის ზეიმენდეს.

იესოქ მუშ მოციქულეფწკუმა ართო პასექი ქიზეიმუნ თიშ უკულ, იუდა ისკარიოტელს უწუ, ნამდა თექიანობა ქუდუტებუდუკო. მუჟამს მუშ ართგურ მოციქულეფწკუმა ართო ქუდოსკიდუნ, მუშ ღურაშ გასაშინე ონჯუა დაწესუ. თეთ იესოქ იუდეველეფიშ პასექიშ დღესასწაულ დოთირუ დო ათეშგურშენ ქრისტიანეფქ ხოლო ქრისტეშ გოშინაშ ონჯუა წანმოწანაშე ართშა ოკო აღნიშნან.

მათეშ სახარებას პკითხულენთ: «იესოქ გეჭოფ ქობალ, ქილოცუ, გოტახუ, მოწაფეეფს გეგნაჭირინუ დო თქუ: „გეჭოფით, ჭკომით. თენა ჩქიმ სხეულს ნიშნენს“. გეჭოფუ სასმის, ღორონთის მადლობა ქოუწუ, ქიმეჩუ თინეფს დო უწუ: „არძაქ გეშვით, მუშენდა თენა ჩქიმ ზისხირს ნიშნენს, „შეთანხმებაშ ზისხირს“, ნამუქით ბრელშო ოკო დოწუას ცოდეფიშ ოპატიებელო“» (მათე 26:26—28).

ნამთინეს წანს, ნამდა იესოქ პირდაპირ გაგებათ გინართინუ ქობალ მუშ ხორცო დო ღვინი — მუშ ზისხირო. მარა იესოშ ხორციელ სხეულს დიო ხოლო მუთუნ ვაჭირუდ, მუჟამს ქობალ მეჩუ მუშ მოციქულეფს. მართალო პირდაპირ გაგებათ ჭკომესო მოციქულეფქ იესოშ ხორცი დო შვესო თიშ ზისხირი? მუშო ოკო რაგად ვარ, მუშენდა თენა კანიბალიზმი დო ღორონთიშ კანონიშ დარღვიება იჸუაფუდ (დაბადება 9:3, 4; ლევიანები 17:10). ლუკაშ 22:20-ის იესო იჩიებუ: „თე სასმის ნიშნენს ახალ შეთანხმებას ჩქიმ ზისხირიშ საფუძველშა, ნამუქით თქვანო ოკო დოწუას“. თე სასმისიქ პირდაპირ გაგებათ მართალო „ახალ შეთანხმებაქ“ იჸუო? მუთუნით ვეშილებედ თექ თაშ ქიჸუკონ, მუშენდა შეთანხმება ხე მითხინენ ფერ საგან ვა რე.

თაშ ნამდა, ქობალ დო ღვინი ხვალე სიმბოლოეფ რე. ქობალ იესოშ სრულყოფილ სხეულიშ სიმბოლო რე. იესოქ პასექიშ აღნიშნებაშ უკულ დოსკილადირ ქობალ გიმირინუ. ქობალ ეიოჸონაფალიშ უმშო რდუ ჭვილი (გამოსვლა 12:8). ბიბლიას ქობალიშ ეიოჸონაფალ ხშირას ცოდაშ სიმბოლოთ რე მოშინაფილი. ათეშგურშენ რე ქობალ იესოშ სრულყოფილ დო უცოდარ სხეულიშ სიმბოლოთ გიმორინაფილ, ნამუთ თიქ მსხვერპლო შეწირუ (მათე 16:11, 12; 1 კორინთელები 5:6, 7; 1 პეტრე 2:22; 1 იოანე 2:1, 2).

ჭითა ღვინი იესოშ ზისხირიშ სიმბოლო რე. ახალ შეთანხმება მოქმედენს თიშ დუნაბუნა ზისხირიშ საფუძველშა. იესოქ თქუ, ნამდა მუშ ზისხირ დოწენდუ „ცოდეფიშ ოპატიებელო“. ათეშ უკულ ხალხის საშუალება მიაჩამუ ღორონთიშ თოლს ვა უღუდან ცოდა დო იეჰოვაწკუმა დოდვალირ ახალ შეთანხმებაშ მონაწილეთ გინირთან (ებრაელები 9:14; 10:16, 17). თე შეთანხმება 144 000 ართგურ ქრისტიანეფს არზენს საშვალებას მუჭოთ მეფეეფ დო მღვდელეფინ თეშ იმსახურან ზეცას დო მთელ კაცობრიობას ჯგირობუა მოუღან (დაბადება 22:18; იერემია 31:31—33; 1 პეტრე 2:9; გამოცხადება 5:9, 10; 14:1—3).

მიქ ოკო მიღას სიმბოლოეფი ქრისტეშ გოშინაშ ონჯუას? ლოგიკურ რე, ქობალ დო ღვინი ხვალე თი ქრისტიანეფქ ოკო მიღან, მიდგაწკუმა ახალ შეთანხმება რე დოდვალირი, ანუ მიდგას ზეცას ცხოვრებაშ იმენდ უღუ. თინეფს ღორონთიშ წმინდა შური არწმუნენს, ნამდა ზეცას იმეფანინ თიშო რენა გიშაგორილი (რომაელები 8:16). იესოქ ხოლო დოუდ თინეფს შეთანხმება სამეფოშენ (ლუკა 22:29).

მუშ რაგად შილებე დედამიწას მარადიულ ცხოვრებაშ მოიმენდე ხალხშენ? თინეფი მეჸუნა იესოშ სიტყვეფს დო ოსწრუნა ქრისტეშ გოშინაშ ონჯუას, მარა ვა ღებულენა სიმბოლოეფს. წანმოწანაშე ართშა, 14 ნისანს ბჟაშ ინულაშ უკულ, იეჰოვაშ მოწმეეფ ქრისტეშ გოშინაშ ონჯუას აღნიშნენა. მართალ რე, მთელ მსოფლიოს სიმბოლოეფს ხვალე მუსხირენ ანთას ღებულენს, მარა ქრისტეშ გოშინაშ ონჯუა არძა ქრისტიანშო განსაკუთრებულ მოვლენა რე. თე დღას არძას შეულებ, ხოლო ართშა დეფიქრას თი ჸოროფაშენ, ნამუთ იეჰოვა ღორონთიქ დო იესო ქრისტექ გიმირჩქინეს (იოანე 3:16).