რდათჷ ცადოკცალ გაბედულ

1, 2. მი რდჷ ცადოკ? (1 მატ. 12:22, 26—28).

ᲮᲔᲑᲠᲝᲜᲡ 340 000-შე უმოს ქომოლკოჩ რე აკოშაყარელ, ნამდა დავით მთელ ისრაელს გამეფან. სუმ დღა რე, მუთ ძიცაშ, ჩიებაშ დო იეჰოვაშ ოდიდებელ ობირეშეფიშ ხონარ ხებრონიშ გოხოლუას ირჩქილე (1 მატ. 12:39). თე კომოლკათა შქას რდჷ ართ ახალგაზრდა, სახელო ცადოკ, ნამუთ შილებე ბრელს შუროთ ვა მოლაფ თოლშა. მარა იეჰოვა ორწყედ თის დო ოკოდ, ჩქი ხოლო ქიგებგითკო, ნამდა ცადოკ თე აკოშაყარელ ხალხ შქას რდჷ (წეკითხით 1 მატიანეშ 12:22, 26—28). მორთჷ ასე ქობძირათ, მი რდჷ თინა დო უმოსო გეფჩინებაფუათ.

² ცადოკ მღვდელო მსახურენდჷ დო მღვდელმთავარ აბიათარს ოხვარუდ. თინა წინასწარმხილველ ხოლო რდჷ, მუშენდა ღორონთიქ განსაკუთრებულ სიბრძნე დო უნარ მეჩჷ, ნამდა ქინანჭუკო თიშ ნებას (2 სამ. 15:27). ათეშენ, ხალხ თიშა რჩევაშ ელაკითხირშა მიშჷ. შხვა ირფელწკუმა ართო, თე ახალგაზრდა კოჩ გაბედულ ხოლო რდჷ დო თე სტატიას ზუსტას თიშ თე თვისებაშენ მაღვენუნა ჩიება.

3. ა) მუშენ ოსაჭირუნა ღორონთიშ მსახურეფს ამდღა გაბედულება? ბ) მუს გუვარჩიენთ თე სტატიას?

³ თე ბოლო დღალეფს სატანა უმოსო დო უმოსო ობრძოლ ღორონთიშ ხალხის (1 პეტ. 5:8). ათეშენ, გაბედულება მოსაჭირუნა, ნამდა ქუგვარზათ დო მუდგათიჸინ ქიმეფრთათ თი დროშა, მუჟამსით ღორონთ სადღამუშოთ ჩამთხინუანა სატანას დო თიშ უბადო ქვეყნიერებას (ფსალმ. 31:24). მორთჷ გუვარჩუათ სუმ მხარე, მუჭო შემლებუნა მივაჸუნათ ცადოკიშ გაბედულებაშ მაგალითის.

ᲮᲣᲯ ᲥᲣᲓᲣᲙᲘᲜᲘᲗ ᲦᲝᲠᲝᲜᲗᲘᲨ ᲡᲐᲛᲔᲤᲝᲡ

4. მუშენ მოსაჭირუნა გაბედულება, ნამდა ხუჯ ქუდუკინათ ღორონთიშ სამეფოს? (ქოძირით სურათ).

⁴ ღორონთიშ მსახურეფ მთელ გურით უკინენთ ხუჯის თიშ სამეფოს, მარა მინშა თეშო გაბედულება მოსაჭირუნა (მათ. 6:33). მაგალთო, თე უბადო ქვეყნიერებას ღორონთიშ ნორმეფიშ თანახმას ცხოვრებას დო სახიოლო ამბეშ ქადაგებას მანგარ დიდ გაბედულება ოკო (1 თეს. 2:2). დრო მეურსინ თეშ, თე ქვეყნიერება პოლიტიკურო უმოს გორთილ რე, ათეშენ, გაბედულება თიშენ ხოლო მოსაჭირუნა, ნამდა ნეიტრალურეფქ ქიპჸუათ თე საკითხის (იოან. 18:36). ზუსტას ნეიტრალიტეტიშ დაცვებაშ ვარდა ჯარშა ულაშენ ვარიაშ რაგადიშ გურშენ უღჷ ბრელ ჩქინ და დო ჯიმას ეკონომიკურ პრობლემეფ, ფიზიკურ შეურაცხყოფას მიორინუანა ვარდა ციხეს ოხუნუანა.

5. მუშენ ოსაჭირუდ ცადოკის გაბედულება?

⁵ ცადოკის ხვალე თიშენ ვა ულინ ხებრონშა, ნამდა დავითიშ გამეფება იზეიმუკო. თინა შეიარაღებულ მიშჷ დო შხვეფცალო მზათ რდჷ, დავითის ქეკაჸუნუკო ისრაელიშ ნტერეფიშ წინააღმდეგ ოჩხუპებშა (1 მატ. 12:38). რახანს ცადოკ მღვდელ რდჷ, თის ჩხუპიშ დიდ გამოცდილება ვაღვენუდ, ათეშენ, განსაკუთრებულ გაბედულება დესაჭირებუდ თეშ ოკეთებელო.

6. მუშენ რდჷ დავით გაბედულებაშ ჯგირ მაგალით ცადოკშო? (ფსალმ. 138:3).

⁶ მიშ მაგალით მეხვარებუდ ცადოკის თეცალ გაბედულებაშ გავითარებას? თის ბრელ გაბედულ დო ძალიერ კოჩწკუმა უღუდ ურთიერთობა. მაგალთო, ცადოკ ბრელ მუდგარენს ქიდიგურუანდ დავითშე, ნამუთ გაბედულო ეწოჸუნდჷ ისრაელს ობრძოლებშა. ზუსტას თეშ გურშენ ოკოდ ხალხის თიშ გამეფება (1 მატ. 11:1, 2). თეწკუმა ართო, დავით ნტერეფწკუმა ბრძოლაშ დროს ირიათო იეჰოვას ონდუდ დო ვართ ხოლო მუშ დუდის (ფსალმ. 28:7; წეკითხით ფსალმუნიშ 138:3). ცადოკ ბრელს ქიდიგურუანდ თი ქომოლკათაშე ხოლო, მით ართგურო უკინენდეს ხუჯის დავითიშ გამეფებას. მაგალთო, იეჰოიადა, თიშ მებრძოლ სქუა ბენაია დო 22 დუდკოჩ, მიდგაქ ცადოკწკუმა ართო, დავითის ალუდირთჷ (1 მატ. 11:22—25; 12:26—28).

7. ა) ახალგაზრდა ჯიმალეფიშ გაბედულებაშ ნამ თანამედროვე მაგალითეფ მიღუნა? ბ) მუ დიგურეთ ვიდეოს ძირაფილ ჯიმა აიენგე ნსილუშ მაგალითშე?

⁷ თინეფიშ მაგალითშე დაფიქრება, მიდგაქ ართგურო დუკინეს ხუჯ იეჰოვაშ მმართველობას, გაბედულებას მარზენა. მაგალთო, მუჟამსით დედამიწას რდჷ, იესოქ მანგარო ქიგედირთჷ დო მუთუნით ვეგნირთჷ სატანაშ გენწყილ პოლიტიკურ სისტემაშ ნაწილო (მათ. 4:8—11; იოან. 6:14, 15). იესო ირიათო იეჰოვაშა რდჷ მენდებულ დო ჯერდჷ, ნამდა თინა ქიმეჩანდ ძალას, ირნერ სიტუაციას სწორას ქიმიქცუკო. გაბედულებაშ თანამედროვე მაგალითეფ ხოლო ქიანაშ მიღუნა. მაგალთო, თი ახალგაზრდა ჯიმალეფ, მით მტკიცას იჩიებუნა ვარიას ჯარშა ულაშე ვარდა პოლიტიკურ საქმეეფს მონაწილებაშენ. ჯგირ იჸუაფ, ჩქინ ვებგვერდის jw.org წეკითხათ თე ჯიმალეფიშ შემთხვევეფ.a

ᲥᲘᲛᲔᲮᲕᲐᲠᲘᲗ ᲗᲐᲜᲐᲥᲠᲘᲡᲢᲘᲐᲜᲔᲤᲡ

8. მუ სიტუაციეფს შილებე უხუცესეფს დესაჭირან გაბედულებაქ და დო ჯიმალეფიშ მახვარებელო?

⁸ იეჰოვაშ ხალხის ართმაჟიაშ მანგარ ალარნა უჩქჷ (2 კორ. 8:4). მარა, რე თიცალ სიტუაციეფ, მუჟამსით თეშ კეთებას გაბედულება ოსაჭირ. მაგალთო, მუჟამსით სოდგაინ ომ იჭყაფ, თექიან უხუცესეფ ირფელს ორთუნა, ნამდა ქიზრუნან და დო ჯიმალეფიშ ფიზიკურ დო სულიერ საჭიროებეფშო დო გამანგარან თინეფ. თინეფს მანგარო უჸორა ქრისტეშ შხურ, ათეშენ, მუნეფიშ უსაფრთხოებას რისკენა, ნამდა და დო ჯიმალეფს აუცილებერქ ვემიოკორდან (იოან. 15:12, 13). თეშნერო, თე ძვირფას ჯიმალეფ, ცადოკცალო, გაბედულებას გიმირჩქინანა.

9. მუჭოთ 2 სამუელიშ 15:27—29-შე იძირე, მუშ კეთება დავალ დავითიქ ცადოკის? (ქოძირით სურათ).

⁹ გუვარჩუათ, მუჭო მიქცუ ცადოკიქ, მუჟამსით დავითიშ სიცოცხლე საფრთხეშ თუდო რდჷ. დავითის მუშ სქუა, აბესალომ, ოჸვილარო თხოზუდ, მუშენდა თიშა სამეფო ტახტიშ მიდაღალა ოკოდ (2 სამ. 15:12, 13). დუდ გეგნისქილიდუკონ, დავითის ონტებელ აფუდ იერუსალიმშე. ათეშენ, თიქ მუშ მსახურეფს უწუ: „გედირთით, იმნტათ, ვარა ვეგნუსქიდუთ აბესალომს!“ (2 სამ. 15:14). მინტებუდესინ თეშ, დავითიქ გურ ქუგუჩ, ნამდა მიდგაინქ ოკო ქუდოსქიდუკო იერუსალიმს, ნამდა აბესალომიშ ამბე ქიგეგუკო დო დავითის ამბე ქიმუღუკო. ათეშენ, თიქ ცადოკ დო შხვა მღვდელეფ უკახალე დართინუ (წეკითხით 2 სამუელიშ 15:27—29). დავითშა აბესალომიშ გეგმეფიშ მეღალა მანგარ სარისკო საქმე რდჷ, მუშენდა აბესალომ ეგოისტ დო უდუნდებელ კოჩ რდჷ. წერმიდგინით, მუამუშის ოჸვილარო თხოზუდუნ ფერ კოჩის, ცადოკ დო შხვა მღვდელეფიშ ჸვილუა შურო მუ აჸიდ, თე ამბე ქიგეგუკონ?! ათეშენ, დავითიშ დავალებაშ შესრულებაშ დროს თინეფ მანგარ ფრთხილას ოკო რდესკო.

10. მუჭო გინატუეს ცადოკიქ დო შხვეფქ დავით ღურას?

¹⁰ დავითიქ, ცადოკწკუმა ართო, მუშ ხოლო ართ ართგურ მეგობარს, ხუშაის ქოთხუ მოხვარა (2 სამ. 15:32—37). ირფელქ თეშ ქუმოხვად, მუჭოთ დავითის აფუდ დაგეგმილ. ხუშაიქ აბესალომიშ გურ მიგჷ დო თიცალ საბრძოლო გეგმა ელუჩ, ნამუთ დავითის დროს მაგებაფუანდ. აბესალომქ ქუდაჸუნ თის, მუდგაშ უკულ ხუშაიქ ცადოკის დო აბიათარს ქეჩუ ირფელ (2 სამ. 17:8—16). თინეფქ დავითის ქუგაგებაფუეს, მუ ულამუდ აბესალომს (2 სამ. 17:17). იეჰოვაშ მოხვარათ, ცადოკიქ დო შხვა მღვდელეფქ ქიანაშმადიდა საქმე აკეთეს, ნამდა დავით ღურას გინატუესკო (2 სამ. 17:21, 22).

11. მუჭო შემლებუნა მივაჸუნათ ცადოკიშ გაბედულებაშ მაგალითის თანაქრისტიანეფშა მოხვარაშ დროს?

¹¹ მუჭო შემლებუნა ცადოკცალ გაბედულება გიმიფრჩქინათ, მუჟამსით ჩქინ და დო ჯიმალეფ საფრთხეშ თუდო იჸინა დო მოხვარა დესაჭირებუნა? 1) მიაჸუნით მითითებეფს. თეცალ სიტუაციეფს მანგარ მნიშვნელოვან რე მითითებეფიშ მორჩილება, ნამდა ართობაქ ვამდინან. ათეშენ, მიაჸუნით თი ხელმძღვანელობას, ნამდგას თქვან ფილიალშე მიღენთ (ებრ. 13:17). უხუცესეფქ ირიათო ოკო ქიგნაჯინან საგანგებო სიტუაციეფწკუმა დაკავშირებულ ორგანიზაციაშე მეღებულ მითითებეფს დო თი გეგმას, ნამუთ თეცალ სიტუაციაშო მუნეფს აფუნა მოფიქრებულ (1 კორ. 14:33, 40). 2) გეგმირჩქინით გაბედულება, მარა რდათჷ ფრთხილას (იგავ. 22:3). ონდო მუდგაინს გაკეთენდათ, ჯგირო დეფიქრით. ირნერო ქეცადით, საჭირო ვა რენ ფერ რისკშა ვედათ. 3) მიენდით იეჰოვას. ვაგგოჭყორდან, ნამდა იეჰოვაშო მნიშვნელოვან რე მუჭოთ თქვან, თეშ შხვა და დო ჯიმალეფიშ ჯგირობუა. თის შეულებ დორთხილუან, მუჟამსით ოხვარუთ თი და დო ჯიმალეფს, მიდგას ელარნა ოსაჭირ.

12, 13. მუ დუგოგურუეს ვიქტორიშ დო ვიტალიშ შემთხვევეფქ? (ქოძირით სურათ).

¹² გუვარჩუათ ჩქინ ჟირ ჯიმაშ, ვიქტორიშ დო ვიტალიშ შემთხვევეფ, მიდგას უკრაინას დაზარალებურ და დო ჯიმალეფშა ოჭკუმალ დო წყარ მეუღუდეს. ვიქტორ იჩიებ: „ირდიხას ვოცადუდით ოჭკუმალიშ შიბას და დო ჯიმალეფშო. მინშა თიცალ ადგილეფს მოფხვადუდით, სოდეთ გოხოლუას ჸოთამაშ ხონარ ირჩქილედ. ართშა, ართ ჯიმაქ მუშ საწყობშე ოჭკუმალ შემოპწირეს, ნამუთ და დო ჯიმალეფს ძალამ ხანს დაუბაღუდ. თე ირფელს ჩქინ მარშუტკას მითვოხარგანდითინ თეშ, გვალო 20 მეტრაშმახოლას, ბომბაქ გეგთოლ“. ღორონთიშით, თე ბომბა ვაფეთქებე. ვიქტორ აგრძელენს: „მთელ დღას ბლოცულენდჷ დო იეჰოვას ფთხინდჷ, გაბედულება ქომუჩუკო, ნამდა უშქურანჯუო გუვაგრძელიკო და დო ჯიმალეფშა მოხვარა“.

¹³ მაჟია ჯიმა, ვიტალ, იჩიებ: „თეცალ საქმე გაბედულებაშ უმშო ვა გაკეთებე. გვალო პირველ რეისშა ხვალე იბდჷ. 12 საათის მიფშჷ დო მთელ შარას ლოცვა ვემემტებ“. გაბედულებაწკუმა ართო, ვიტალ სიფრთხილეს ხოლო გიმირჩქინანდჷ. თინა იჩიებ: „იეჰოვას ირიათო სიბრძნეს დო თანდაბლობას ფთხინდჷ, ნამდა საჭირო ვა რდუნჷ ფერ რისკშა ვებდიკო. თეწკუმა ართო, ხვალე თი შარეფით გილეფშჷ, ნამდგას გილულაშ ნებას მთავრობა ირზენდჷ. რწმენას მიმანგარენდჷ თიშ ძირაფა, მუჭო ალურდეს და დო ჯიმალეფ ართიანს. თინეფ წიმინდანდეს შარას დო აკანწყუნდეს დო მითახარგანდეს ჰუმანიტარულ ტვირთის. ხვალე თენა ვარინ, შარა-შარას მა დო ვიქტორს ოჭკუმალს დო მასვანჯებელ ადგილს მოხვამილუანდეს“.

ᲥᲣᲓᲝᲡᲥᲘᲓᲘᲗ ᲘᲔᲰᲝᲕᲐᲨ ᲐᲠᲗᲒᲣᲠᲔᲤᲥ

14. მუჭო მოქმედენს ჩქინდა, მუჟამსით ჩქინო საჸოროფო ადამიან იეჰოვას ოჭიშის ურთინუანს?

¹⁴ მუჟამსით ჩქინ ოჯახიშ წევრ ვარდა მეგობარ იეჰოვას ოჭიშის ურთინუანს, თენა მანგარო მიჭუანა გურს (ფსალმ. 78:40; იგავ. 24:10). მუთ უმოს ხოლოშიან რე სქანო თე პიროვნება, თით უმოს ძნელ გინაღალარ გაფჷ თე ამბე. თქვა ხოლო თეცალ სიტუაციას ქორეთ-და, ცადოკიშ ართგურობაშ მაგალით აუცილებერო გუგამანგარენა.

15. მუშენ დესაჭირ ცადოკის მანგარო გერნაქ, ნამდა იეჰოვაშ ართგურქ ქუდოსქიდუკო? (1 მეფ. 1:5—8).

¹⁵ ცადოკიქ ღორონთიშ ართგურქ ქუდოსქიდ, მუჟამსით თიშ ხოლოშიან მეგობარქ, აბიათარქ, ოჭიშ ქურთინუ იეჰოვას. დავითიშ ღურაშახ თიშ სქუაქ, ადონიაქ, მეფობაშ ხეშა ეშაჸოთამას ეცად. ვარინ, იეჰოვაშ ნებათ, დავითიშ უკულ სოლომონქ ოკო იჸუკო მეფექ (1 მატ. 22:9, 10). აბიათარქ ადონიას ქელუდირთჷ, მუდგათ ხვალე დავითის ვარინ, იეჰოვას ხოლო უღალატ (წეკითხით 1 მეფეეფიშ 1:5—8). წერმიდგინით, მუჭომ გინაღალარ აჸიდ ცადოკის თე ამბე. თინა დო აბიათარ, სოდგარენ 40 წანაშე უმოსის ქომსახურენდეს ართო მღვდელეფო, ართო გილუღუდეს ღორონთიშ კიდობან, ართო დუკინეს ხუჯ დავითიშ გამეფებას დო შხვა ბრელ საქმე აფუდეს ართო ნაკეთებ იეჰოვაშ მსახურებას (2 სამ. 8:17; 15:29; 19:11—14).

16. მუ მეხვარებუდ ცადოკის, იეჰოვაშ ართგურქ ქუდოსქიდუკო?

¹⁶ ცადოკიქ აბიათარცალო ვემიქცუ დო იეჰოვაშ ართგურქ ქუდოსქიდ. დავით თოლწკურილო ონდუდ ცადოკის დო ჯერდჷ, ნამდა დღას ვა უღალატენდჷ. მუჟამსით გამკორჩქინდჷ, მუ ულამუდ ადონიას, დავითიქ ცადოკის, ნათანს დო ბენაიას დავალ სოლომონიშ გამეფება (1 მეფ. 1:32—34). ცადოკის გურშა ელუკინანდჷ დო გამანგარენდკონ იჸიდ იეჰოვაშ თიცალ ართგურ მსახურეფიშ მაგალით, მუნერეფით რდესჷ ნათან დო შხვა ქომოლკათა, მით ხუჯის უკინენდეს დავითის (1 მეფ. 1:38, 39). გამეფებაშ უკულ, სოლომონქ აბიათარიშ მანგიორო, ცადოკ ქუდარინუ მღვდელმთავარო (1 მეფ. 2:35).

17. მუჭო შეილებუნა მიქცუათ ცადოკცალო, თქვან საჸოროფო ადამიან იეჰოვას ოჭიშის ქურთინუანს-და?

¹⁷ თქვან ხოლოშიან პიროვნებაქ იეჰოვას ოჭიშ ქურთინუ-და, მიაჸუნით ცადოკიშ მაგალითის დო არგამათ ქაძირეთ იეჰოვას, ნამდა თიშ ართგურ სქიდუთ (იეს. 24:15). რჯერდან, იეჰოვა აუცილებერო გუგამანგარენა დო ქიმერჩანა თეშ ოკეთებელო საჭირო ძალას. ლოცვას გურ გეგნუფაჩით ღორონთის დო გიღუდან ხოლოშიან ურთიერთობა თიშ ართგურ თაყვანიშმცემელეფწკუმა. რშუდან, იეჰოვა მანგარო აფასენს თქვან ართგურობას დო აუცილებერო გაკურთხენა თეშ გურშენ (2 სამ. 22:26).

18. მუს გურაფლენთ მარკოშ დო სიდსეშ შემთხვევაშე?

¹⁸ დეფიქრით ართ ჩილ დო ქომონჯიშ, მარკოშ დო სიდსეშ, მაგალითშე. თინეფს ჟირ ძღაბ ჸუნა დო ჟირხოლოქ მიოტუ იეჰოვაშ მსახურება. მარკო იჩიებ: „სქუალეფ ქეშგეძინებუნ, თინეფიშ ოსხუნურ მითინ ვა რჸუნსჷ დო ირფელს ორთუქ თინეფიშ ოთხილარო. ათეშენ, მუჟამსით ჩქინ ძღაბეფქ იეჰოვას ოჭიშ ქურთინუეს, მანგარ გინაღალარქ მაჸუ. მარა მა დო ჩქიმ მეუღლე ირიათო ბგინაფლენთ იეჰოვაშ ალარნას; თინა ძალას მარზენა ართიანიშ გამანგარებელო. მუჟამსით მა ვორექ გლახათ, ჩქიმ ოსურ ემქექუანს გურშა დო მოხვარ, იეჰოვაშ ართგურქ ქუდოფსქიდე, დო მუჟამსით თინა რე გლახათ, მა ეუქექუანქ გურშა დო ვოხვარუქ“. მარკოშ მეუღლე, სიდსე, იჩიებ: «ზუსტას მიჩქჷ, იეჰოვა ძალას ვა მარზენდანინ, თე ამბე ვეგნმაღინედეს. ჩქიმ დუდის ვაბრალუაფუდ, ჩქიმ სქუალეფქ იეჰოვას ოჭიშ ქურთინუესინ. ღორონთის ლოცვას გურს გინუფაჩუნდჷ დო ვეჩიებუდ, მუს ბგინაფლენდჷ. ართ-ართ თეცალ ლოცვაშ უკულ, მუსხირენ დღაშა, დარბაზის ართ დას ქეშეფხვად, ნამუთ წანეფიშ უძირაფ მაფუდ. თიქ ხუჯის ხე ქიგნობდვჷ, თოლეფს ქინმოჯინ დო მიწუ: „სიდსე, ართ წუთით ხოლო ვეფიქრა, ნამდა თენა სქან ბრალ რე“. იეჰოვაქ მანგარო ალამდირთჷ, თიშ მოხვარათ ართგურო ვაგრძელენქ თიშ მსახურებას».

19. მუშ კეთება გაფუნა გინოჭყვიდილ?

¹⁹ იეჰოვას ოკო, არძა თიშ მსახურ ცადოკცალ გაბედულ რდასჷ (2 ტიმ. 1:7). მარა თის ვაკო, ჩქინ დუდიშ იმენდო ვორდათ; იეჰოვას ოკო, თიშ ძალაშა ვორდათ მენდებულ. ათეშენ, მუჟამსით გაბედულება დეგესაჭირებუნა, იეჰოვას ქოთხით მოხვარა. რჯერდან, თინა აუცილებერო ქიმგეხვარებუნა, ნამდა ცადოკცალ გაბედულ რდათჷ (1 პეტ. 5:10).